Luk 24
24
Jézu nwale
(Mt 28:1–10; Mk 16:1–8; Jn 20:1–10)
1Dimansi nya, lomu go gɔlɛkorona fɛna kini bléyi va, lia ginzannu lé wa ma’lɛrɛ, wo nya wo lee. 2Wa ye léé, gɔlɛ a é sile gɔlɛkoro ’léé; 3wo wɔra gɔlɛkoro gi yé wo ’ka Mizan Jézu gale ye lɛ lo. 4Wo dɔ dan‐uun é pla, tɔɔn mi fié bɔra wo va sɔ nyananyana nya ’wo ta. 5Lomu gi nyɛ kini yé wo yara tua tɛrɛ va; naa, ’bɛnu lé wo lɛ léé: Mi lé é ke é yuɛma, mɛmalé ka a naginian gamunu vaa? 6É ’ka ’ko lo; é nwa é yuɛma. Bléyian va lé é ke turu Galilé tɛrɛ la, fɛan zo lé é we fe ka lɛ, a sele ’é dɔ ka gi ma. 7É léé: É a lé wo maa blami Be nɔ wenyanékɛlɛzannu lɛ, yé wo an gyɛ yili la, yé an nwa gamunu va yi fié a yaazan nya. Yee kaan loo? 8Yé Jézu dére sele dɔ woo lomu gi.
9Wo si aan wo gɔlɛkoro ’léé, wo we ’konu faa zuo fe mi vu ta do valé mi pɔnénu faa lɛ. 10Lomu lé wo we ’konu fe nwunvɔmunu lɛ, wa Magadala le Mari koo, Jane koo, Jak bu Mari koo, le bɛnu lé wo ke wo va koo, wo nya. 11É dɔ wo gi léé, nyɛflawe lé, yé wo ’ka dɔ lɛ lomu ’konu dére ta lo. 12Naa, Piɛri nwa yé é go vlan nya gɔlɛkorona. É tua aan wo, mipasɔ lé ke tɛrɛ va, yee saa lé é a ye; a zuo é go élé kɔn ’léé é gi vurule nya, wenu lé wo bɔ, a ma.
We lé é bɔ Émaus zi ta
(Mk 16:12–13)
13Yi ’ko duo nya Jézu zuomunu fié a gona fla do lé wa laama Émaus, a ta; é a é sile Jérusalɛm ma kilo vu ta do. 14We faa lé é bɔ, ’té woo goo ana glewole nya. 15Bléyian va lé wo ke wefena, ’té woo za vɔa, Jézu bozen a dɔ wo ma yé wo vo tawona ékeva. 16Naa, Jézu ta tiéra wo yuɛ gi yé wo ’ka gi dɔɔ lɛ léé, Jézu lé, lo. 17Jézu lé wo lɛ léé: Mɛ gle lé ka go a wole nya ziaa? Wo dɔ ’té wo yara kyɛ a é vɔle a gi. 18Wo va mi do lé wa laama Kléopas, ’bɛ a zi pa a lɛ léé: We lé é bɔ Jérusalɛm yi ’konu nya, bii do kpen a ’bɛna bɛn nya yé i ’ka a gi dɔɔa loo? 19Yé é lé wo lɛ léé: Mɛ we léé? Yé wo lé a lɛ léé: We lé é kɛlɛ Nazarɛtzan Jézu lɛ, yee lé. É a balelayezan lé é ke plɛplɛ we kɛlɛle valé dére fele gi Kazambale valé munu faa yuɛ va, a nya. 20Kolé Balebanmunu valé ko nwiinmunu a nɔ léé, ’wo ga dɔ a nwiin, yé wa gyɛ yiliblan ta. 21Ko bli a a lɛ léé, é dan Izraɛl si lɛ wo nyanézannu lee; ’bɛ ta loru we ’konu bɔ aan wo a yi yaa lo. 22Yé webozen nya, ko va lomu ko ’léé ma ko ma é baba; wo go gɔlɛkorona bladi 23yé wo ’ka a gale ye lɛ lo, yé wo da yé wo léé, lanjenu bɔra ’wo va yé wo lé ’wo lɛ léé, é a é yuɛma. 24Ko va mi kenu go gɔlɛkorona yé we lé lomu a fe wa ye a zo, naa, wo ’ka Jézu bozen ye lɛ lo. 25Yé Jézu lé wo lɛ léé: Éé munu, ka bɔn‐in ’ka ka ma lo yé we faa lé balelayezannu a fe, a gini ’ka dɔa ka gi é pu lo. 26É ’ka lé Krist é nyané ’konu ble yé é wɔra élé fua gi loo? 27Yé é a pélisia Moizi valé balelayemunu lé sɛbɛnu faa gi yé ébo tawe gɔɔn wo lɛ sɛbɛnu faa gi. 28Fla lé wo ke gona a ta, wo bɔ aan wo a sɔnɔ yé é léé, ’é go a zi zia. 29Naa, wa tunu a fele nya léé: Yiri bɔ baa, yé nyanadi pa. ’I vo ko va. Yé é wɔra, vole wo va we gi. 30Bléyian va lé wa fɛblele zi Jézu buru si; yé dé é Bale bɔ vɔ é a bɔi yé é a nɔ wo lɛ. 31Yé wo yuɛ va kini yé wa dɔɔ; tɔɔn, a ta saan wo lee. 32Wo lé ’wo ke lɛ léé: Bléyian va lé é ke wefena ko lɛ zia, ’té éé sɛbɛnu giwenu fé, gi nanale ’ka da lɛ ko bli gi loo? 33Wo nwa lɛrɛ duo nya yé wo go ’wo pa gi Jérusalɛm yé wo bɔ mi vu ta do ma, ’té woo valé ’wo bɔlunu a é zénle ékeva, ’té wa fé léé: 34Mizan nwa webozen nya, yé é bɔra Simɔn va. 35Yé we lé ’bɛ kɛlɛ wo ’é lɛ zia, é valé fɛan zo lé wo Jézu dɔɔ élé buru bɔi bléyi va, wa zuo fe wo lɛ.
Jézu bɔra é zuomunu va
(Mt 28:16–20; Mk 16:14–18; Jn 20:19–23)
36Bléyian va lé wo ke we ’ko fena, Jézu bozen da wo méléna yé é lé wo lɛ léé: ’Ka vo drɔɔ ma. 37Wo kana, yé wo gi nyɛ kini yé é dɔ wo gi léé, wo mi léli ɛ ye. 38Naa, Jézu lé wo lɛ léé: Mɛmalé ka gi vuruu? Mɛmalé gi bɔrɔle ’ko zo ke ka bli gii? 39Maa lé, webozen nya; ’ka an bɛnu valé an ganenu nagini. ’Ka bɛ mane an ma yé ka ye; mi léli wi ’ka lo, yé a wɔlɛ ’ka lo, fɛan zo lé ka an yé ’ko, a zo lo. 40É a we ’ko fena aan wo, ’té é ’é ganenu valé é bɛnu nagɔɔn‐an wo lɛ. 41Wo gi nanale zi wo ’ka wo bli vo lɛ a lɛ tan lo, ’té wo gi a é vurule wo ma duowo, é lé wo lɛ léé: Fɛblele a ka lee ’koo? 42Yé wo pɔ panele valé zɔrɔnyɔnɔ nɔ a lɛ. 43É a si, yé é a ble wo yuɛ va.
44A zuo yé é lé wo lɛ léé: Bléyian va lé maa ke yi la ka va, maa a fe ka lɛ léé, we lé wa gyɛ an ma we nya Moizi lé bélidɔwe koo, balelayemunu lé sɛbɛnu koo, lɛrɛvɔ sɛbɛ koo, wo gi, é a lé wo faa lɛ é sɔɔ. Yeean é kɛlɛ ’ko loo? 45Yé é wo bɔn gi kini Bale lé sɛbɛnu gi ’male we ma. 46Yé é lé wo lɛ léé: A zo lé wa gyɛ léé: Krist é dan nyané ble lɛ yé é dan nwa lɛ gamunu va yi fié a yaazan nya, 47yé wo dan bli nɔlale valé mi ma we vole lé we fe lɛ a tɔ nya bɛnnu faa lɛ, é sia Jérusalɛm. 48Ka a we ’konu nayezannu nya. 49Yé fɛ lé an Ti a fe léé, é dan a nɔ lɛ ka lɛ, maa ɛ dan a zén lɛ ka ta; naa, ’ka vo fla ’ko la fɔɔ yé Bale é ka suu élé lagi plɛplɛ nya.
Jézu gole la gi
(Mk 16:19–20)
50É go wo nya fɔɔ Bétani sɔnɔ, yé é bɛ pla wo ta, yé é wo drɔɔ vo. 51Bléyian va lé é a wo drɔɔ vona é si wo va yé Bale goan la gi. 52Dé wa bɔ faa, wo go Jérusalɛm gi nanale blɛn nya; 53’té wa yifaama Balebangikɔn gi, ’té woo Kazambale tɔ zin fé, ’té wa drɔɔ voo.
Chwazi Kounye ya:
Luk 24: GOURU
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Alliance Biblique de Cote d'Ivoire 1979