Luk 23
23
Wo go Jézu nya Pilat ’lɛ
(Mt 27:1–2, 11–14; Mk 15:1–5; Jn 18:28–38)
1Wo faa nwa yé wo go Jézu nya Pilat va.
2Wo kun we dɔle ma a nwiin yé wo léé: Ko bɔ mi ’ko ma kolé munu gi pana léé, ’wo nwa minwiinzan blɛn ma, a fele nya léé, té wo gɔɔli banwo Sézaa lɛ lo, yé é léé, yeebozen ɛ ke Krist nya, minwiinzan nya. 3Pilat we laa a lee léé: Bii ɛ ke Juifinu nwiinzan blɛn nyaa? Jézu lé a lɛ léé: Yee lé bé fe bɛ.
4Pilat lé Balebanmunu segelenu valé mi gu lɛ léé: Maa ’ka a ye lɛ léé, we mi ’ko gyɛ lo. 5Wo vo a fena léé: É munu nwa we paale nya ’bɛnu gi Judé tɛrɛ faa la, é sia Galilé tɛrɛ la, fɛana lé é we paale sia, ana, fɔɔ yé é bɔ ’ko.
Wo go Jézu nya Érɔd va
(LvS 2:1–3; Kw 4:25–28)
6Pilat Galilé tɔ ’ma aan wo wo ta, é a laa wo lee léé: Mi ’ko a Galilé tɛrɛ la mi nyaa? 7É a ’ma aan wo léé, é a Érɔd tɛrɛ la bɛn nya, é a pa zia Érɔd va; ’bɛ a é ziin Jérusalɛm ’bɛ yinu nya.
8Érɔd Jézu ye aan wo, a gi nana é baba; é a tawe ’ma é kyɛn, amalé é a a va turu léé, ’é a ye, yé a bli a a lɛ léé, ’é alé gyɛzorowe do kɛlɛna ye. 9É we kiɛre laa a lee, naa, Jézu ’ka a zi do kpen vɔ lɛ lo. 10Balebanmunu segelenu valé sɛbɛgifemunu ana mi, yé wo we dɔ a nwiin gladére plɛplɛ nya. 11Érɔd valé élé sunyanu Jézu kɛlɛ gwɛmazan zo; dé é we nana a ma faa é sɔ nɔnɔmi baba zén a ta yé é a pa zia é ziin Pilat va. 12Yi ’ko nya lé Pilat valé Érɔd kɛlɛ béé valé béé nya, dɔlé té wa ’wo ke nyanénzannu nya é vinin.
Wo ga dɔ Jézu nwiin
(Mt 27:15–26; Mk 15:6–15; Jn 18:39—19:16)
13Balebanmunu segelenu koo, minwiinmunu koo, flamunu koo, Pilat wo zén ékeva yé é lé wo lɛ léé: 14Ka da mi ’ko nya an lɛ bélé mi lé é munu gi pa minwiinzan ma, a zo. Yé maa we laa a lee ka yuɛ va, yé wenu lé ka dɔ a nwiin, maa ’ka a do kpen ye lɛ a pagi nya lo; 15Érɔd é ziin, ’bɛ ’ka we ye lɛ a ma lo yé ’bɛ a pa ko lɛ zia é ziin; ka yé loo? mi ’ko ’ka gawe do kpen kɛlɛ lɛ lo. 16Amalé dé maa a bla wɛsɛné nya faa an dan daan lɛ a ma.
17Fɛti do do bɔle nya Pilat éé bokɔngizan do bɔraan munu lɛ. 18Wo faa siaa ékeva léé: ’I mi ’ko gyɛ yé ’i Barabas bɔra ko lɛ. 19’Bɛ mi ’ko, ’bɛ nwa minwiinmunu ma fla, yé ’bɛ mi do gyɛ amalé wa vɔ bokɔn gi. 20É a Pilat gi léé, ’é daan Jézu ma, amalé é we fe wo lɛ é ziin. 21Naa, wo siaa léé: ’Bé gyɛ yili la! ’Bé gyɛ yili la! 22Pilat lé wo lɛ a gɔnɔ yaazan nya léé: Mɛ wenyané lé mi ’ko a kɛlɛɛ? Maa ’ka gawe do kpen ye lɛ a ma lo. Amalé dé maa a bla wɛsɛné nya faa, an dan daan lɛ a ma. 23Wo yee we duo fe siaale plɛplɛ nya léé, ’wa gyɛ yili la, yé wo lɔlu mini Pilat lɛ. 24Amalé we lé é sɔ wo lɛ, Pilat a kɛlɛ. 25Mi lé wa vɔ bokɔn gi nwale minwiinzannu ma valé mi gyɛle ma, ’té wa laa a lee bɛ, é daan ’bɛ ma yé é Jézu nɔ wolé blibɔmawe lɛ.
Wo Jézu gyɛ yili la
(Mt 27:32–44; Mk 15:21–32; Jn 19:17–27)
26Wa gona Jézu nya aan wo, ’té Sirɛnezan Simɔn si féi yé wo ’bɛ kun yé wo Jézu lé yiliblan dɔ ’bɛ nwiin yé ’bɛ go a nya a zuo.
27Mi gu blɛn go Jézu zuo ’té lomu a wo va, ’té ’bɛnu ’wo golɛ gya, ’té woo wuvɔa a ta. 28Jézu nɔla yé é lé wo lɛ léé: Jérusalɛm lomu, té ka wuvɔ maa ta lo; ’ka wuvɔ kabozen valé kalé nénu ɛ ta. 29Ka ye, a yinu é dan bɔ lɛ, a nya lé munu é dan a fe lɛ léé: Sɔnzannu zé fila vɔ; lomu lé wo ’ka né yaa lɛ lo, ’té wo ’ka nyɔ dɔ lɛ né ’léé lo, wozé fila vɔ. 30Yé wo dan a fe lɛ gɔ blɛnnu lɛ léé: ’Ka zana ko ta. Yé wo dan a fe lɛ gɔ sɛsɛnu lɛ léé: ’Ka dia ko gi. 31Naa, dé wo we ’konu kɛlɛ yili drɔɔdrɔɔ lɛ ’naan, ’té a gale zé é dan kɛlɛ lɛ kaa?
32A bléyi duo nya lé wo go wenyanékɛlɛzan fié lé, é a lé wo wo gyɛ Jézu va, wo nya.
33Wo bɔ aan wo fɛ lé wana laama Miwuowɔlɛ, ana, yé wo Jézu gyɛ yiliblan ta ’bɛna, yé wo wenyanékɛlɛzannu fié gyɛ a va, a do a a bɛyilazia, yé a do a a bɛbolazia. 34Jézu léé: An Ti, we lé wa kɛlɛna, wo ’ka a gi dɔɔa lo, amalé ’i wo ma we vo. Wo alé sɔnu guli ’wo ke ma ’munnu zunle nya.
35Munu dɔ ’bɛna ’té wa naginian. Minwiinmunu a ma we nana a fele nya léé: É mi bɛnu si we gi; dé yee ɛ ke Krist nya, mi lé Kazambale a si a va, a nya, ’é ébozen si we gi ma. 36Sunyanu é ziin wa ma we nana, yé wo bié yé wo dɔrɔ tɔndɔle nɔ a lɛ 37yé wo léé: Dé i a Juifinu nwiinzan blɛn nya ’i ibozen si we gi.
38Wo sɛbɛ gyɛ a ’wuo ta loru léé: Juifinu nwiinzan blɛn lé ke ’ko.
39Wenyanékɛlɛzannu lé wo ke é dunle yiliblan ta Jézu va bɛ, a do Jézu sɔnɔ yé é léé: Biian i ke Krist nya loo? ’I ibozen si we gi, yé ’i ko si we gi é ziin. 40Naa, a bɔluzan we pla a lɛ léé: Bii lé wo ga duo dɔ i nwiin ’naan, i ’ka kanaan Bale lee loo? 41Ko gale yara lé; kolé wenyané ma ban lé; naa, mi ’ko ’ka wenyané do kpen kɛlɛ lɛ lo. 42Yé é lé Jézu lɛ léé: Dé i bɔ ilé fuatɛrɛ la, an sele ’é dɔ i gi ma. 43Yé Jézu lé a lɛ léé: Kyɔ, i dan kɛlɛ lɛ an va paradi webozen nya. Maa fe i lɛ.
Jézu gale
(Mt 27:45–56; Mk 15:33–41; Jn 19:28–30)
44Yiéyi pa aan wo gunu dɔra tɛrɛ faa la, fɔɔ nyanadi yiri plɛplɛ nya. 45Yiri yɔɔ yé Balebangikɔn gi sɔ lé wa kɛlɛ kɔnmi nya, a fee bo é méléna.
46Jézu siaa dére plɛplɛ nya léé: An Ti, maa an léli bɛ pa i lee. Dére ’konu fele nya lé é ga.
47We lé é bɔ sunyayɔsoru ’lɛzan a ye aan wo, é Bale tɔ bɔ yé é léé: Mi ’ko a mi tegele nya webozen nya.
48Munu faa lé wo zén ékeva mi gu nya we ’ko ma, dé wo we ’ko kɛlɛle ye faa wo go fla ’wo golɛ gyɛle nya. 49Munu faa lé wo Jézu dɔɔ, é valé lomu lé wo valé Jézunu si Galilé tɛrɛ la wo nya, wo dɔ baa ’té wa naginian.
Jézu pale
(Mt 27:57–61; Mk 15:42–47; Jn 19:38–42)
50Webolikinizan do ana wa laama Jozɛfu. É a mi tegele valé mi zin nya, 51yé é ’ka pa lɛ mi koɛnu va wolé wefele valé wolé wekɛlɛle nya lo. É si Juifinu lé fla do lé wa laama Arimaté, a ta, yé é a Kazambale plale mi nwiin lɛbɛnna. 52Mi ’ko go Pilat va yé é Jézu gale laa a lee. 53É a si yiliblan ta, yé é a pasɔ vuru a ma, yé é a pa mipana lé wa bo gɔlɛ gi, ’té wo ’ka tan mi vinin pa lɛ a gi lo, ana. 54Fɛnu ma’lɛrɛ yi lé, ’té flinyi pélisiale bɔ é pu.
55Lomu lé wo valé Jézunu si Galilé tɛrɛ la, wo go Jozɛfunu nya, yé mi pana koo, bɛan zo lé wo Jézu gale pa koo, wo ana ye, 56yé wo da fla yé wo lia ginzan valé lasikɔrɔ ma’lɛrɛ. A zuo wo flin flinyi nya bélidɔwe yɛrama.
Chwazi Kounye ya:
Luk 23: GOURU
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Alliance Biblique de Cote d'Ivoire 1979