1Mos. 47
47
Si Jakob samba Parao
1Lepa geti ambitnangan si Josep lima sia sasarainania, lepa ailiakerangan rimata. 2Kuanangan, “Ukkui samba sasarainangku amoian sia baratda ka Kanaan pasamba mungkuat kambing, biribiri, jaui samba sangamberi bakkatra. Kineiget ai sia ka kupkumen Gosyen.” Lepa paagainangan sasarainania nenda katubut rimata. 3Nounounangan sia si rimata, “Apa galajetmui?”
Alegirangan, “Kai nene sipasijago tarimeu kele taikebbukatmai. 4Aku oi kai bule mukuddu kai ka lagai nene, kalulut bulat makope pulajeat ka laggai Kanaan, pat sappru parou pukudduat mungkuat kambing samba biribiri mai. Obaake kukuddukai ka kupkumen Gosyen.” 5Lepa kuanangan rimata kai Josep, “Kineiget ukkui samba sasarainam aian sene. 6Kuake kam laggai Misir sibailiu laggaimu. Eddangan rapukuddu ka kupkumen Gosyen, kudduat simakope eru ka laggai nene. Samba uddetnake katubutra simaagai mugalai masipasikeli tarimeuku.”
7Si Josep leuet masipaagai ukkuinia katubut rimata. Si Jakob masipanukani rimata, 8samba panounounangan rimata katubunia, “Piga ruram?”
9Aleginangan si Jakob, “Amurimanuangan aku sangotu telu pulu ngarura sibailiu sipueppak. Purimanuaiatku nenda matete samba si sun katai le, ta' kele nantat rurat taikebbukatku sipuririmanua sibailiu sipueppak.” 10Lepa nenda kaddiuakenangan kudduat nenda si Jakob samba kaunangan panukanan pasaraat. 11Si Josep masiropmake ukkui samba sasarainania mukuddu ka Misir. Kaunangan ka sia polak sibailiu bakkat karubeiat simaeru ka laggai nenda, kabe'bet laggai Rameses, siripot siparentaakenen rimata. 12Patareknangan si Josep komen rubeiat ka ukkuinia, sasarainania samba kasaepput ukkuinia, pat aili ka sibau tubu.
Tetere pulajeat
13Pulajeat nenda bulat makope, ka sangamberi laggai nenda taan anai komen. Tai Misir samba tai Kanaan musaggo tubu, samba ta'an momoi ragalai tubutra kalulut laje. 14Senen rapasisaki gandum, si Josep le masiruruake bulagat pasilului gandum nenda, lepa koiriakenangannia ka uma purimataat rimata. 15Kele ai sappru bulagat ka Misir samba ka Kanaan, sangamberi sirimanua ka Misir moi katubut Josep samba masikua, “Ake kan mai! Bui' nuobaake kumatei kai. Bulagatmai asaprungan.”
16Aleginangan si Josep, “Ke'bulagatmui asaprungan, akekam tarimeumui; akekungan geti komen katubumui.” 17Lepa kaurangan tarimeura kai Josep, samba kaunangan komen katubudra sibailiu silit kuro, biribiri, kambing, jaui samba kaliddeira. Karura nenda kaunangan si Josep komen katubudra samba ralului pasamba terimeu.
18Karura kasibabara oi sia minca katubunia samba kuarangan, “Kukuangan le kai simakolou kai tuan, bulagaimai asaprungan samba tarimeumai aibailiuan si tuan sibakkatnia. Ta'ananai sibabara katubumai siooi kuake kai tuan; tubumai samba polakmaian le. 19Bui nuobaake kumatai kai! Bui' nuobaake monemai ibailiu magarak. Saki le kai samba polakmai pasamba gandum sibailiu pasiluluinia. Kai samba polakmai ibailiu geti bakkat rimata. Akekakai gandum pasituppai purimanuaiatmai samba leu karamen karapmakenen kamonemai!”
20Lepa sakinangan si Josep sangamberi polak ka Misir addeat rimata. Senen tai Misir masisakiake polaknia, kalulut pulajeat nenda bulat maron. Iageti sangamberi polak ka Misir ibailiu rimata sibakkatnia. 21Sangamberi taikauman Misir ibailiuake le pagugulet Josep. 22Sarat polak bakkatda tai imam le ta'aisaki si Josep. Tai imam ta'arasakiake polakra kalulut ai aikau rimata pasisopo puririmanuandra simariuriu. 23Kuanangan si Josep katubut siberikabaga nenda, “Kineneiget kam samba polakmui akusakingan addeat rimata. Aikoi karamen, karapmakenennu ka monem. 24Kateteret masimonei buania, akemuian seperlima katubut rimata. Samba legeinia momoi nupakeinia karamen samba komennu samba sikalalepnu.”
25Alegirangan, “Anupasikelingan puririmanuamai samba kukua le kai sura. Lulut nenda kuoba le ibailiu kai pagugulet rimata.” 26Lepa geti bailiua kenangan si Josep pagalaiat nenda sara enung galaiakeng pagalaiat polak ka laggai Misir teret kineiget, iate seperlima buat mone buita ibailiu rimata sibakkatnia. Sarat polakda tai imam le ta'ibabailiu rimata sibakkatnia.
Panindogat Jakob pangampulatnnia
27Kise te arakuddu tai Israel ka Misir, ka kupkumen Gosyen. Bailiu makayorangan samba bara punuteteura simaigi sedda. 28Kuddu si Jakob ka Misir ujunia pulu pitu ngarura, bailiu rurania sangotu epat pulu pitu ngarura. 29Kele aiaili teterenia imatei, sogainangan si Josep, togania nenda, lepa kuanangan katubunia, “Galakngake kabeinu ka paoggangan bakkat bakkapatku samba pusuppa, ta'nurarateiake kam aku geti ka Misir nene. 30Kuaoba turateiakeaku kakudduatda tai kebbukatku; ambit le tubuku simamatei bela ka laggai nene samba rateiakeaku karateira.”
Lepa aleginangan si Josep, “Kugagalaiake le geti apa sikuam.”
31Kuanangan si Jakob, “Pusuppa le, gagalaiakenunia geti.” Pusuppanangan si Josep samba pusuranangan si Jakob ka peremannia.
Chwazi Kounye ya:
1Mos. 47: MWV
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
@LAI 2015