1Mos. 46
46
Si Jakob mukuddu ka Misir
1Patabuninangan sangamberi bibiletnia lepa tutituinia. Sagenia ka Bersyeba pangruatnakenangan buluakenennia ka Taikamanua panindogiet Ishak ukkuinia. 2Kasara pasiitsot mata kateteret sinoibo, kuanangan Taikamanua, “Jakob, Jakob!”
Aleginangan, “Oi, Tuhan.”
3Kuanangan, “Aku te Taikamanua, Taikamanua panindogiet ukkuinu. Bui' numaloto mei ka Misir. Kubabailiuake geti muntogatnu bangsa sabeu sedda. 4Aku le geti masipaalei ekeu ka Misir, samba masiambit muntogatnu toili ka laggai nene. Si Josep ailenia kabe'benu, ke'aiailingan teterem.”
5Lepe tutui si Jakob barania ka Bersyeba. Sangamberi togania masisakaiake ukkuira pasamba toga, sinanalepra ka kereta sikau rimata Misir. 6#Pugap. 7:15 Sia leuet masiambit tarimeu samba sangamberi pukayoat sigabadra ka Kanaan, lepa tuitui sia ka Misir. Si Jakob masiambit sangamberi sapunuteteunia, iate 7sangamberi sapunuteteunia simanteu samba sinanalep.
8Saladdou muntogat Jakob siooi ka Misir iate: 9Si Ruben, toga sikebbukat; tatogania: Henokh, Palu, Hezron samba Karmi. 10Simeon; tatogania; Jemuel, Jamin, Ohad, Jakhin, Zohar samba Saul, togat sinanalepnia tai Kanaan. 11Lewi; tatogania: Gerson, Kehat samba Merari. 12Jehuda; tatogania: Syela, Peres samba Zerah, togat Jehuda bagei iate Er samba Onan matei ka Kanaan. Tatogat Peres: Hezron samba Hamul. 13Isakhar; tatogania: Tola, Pua, Ayub samba Simron. 14Zebulon; tatogania: Sered, Elon samba Jahleel. 15Sangamberitda iate tatogat Jakob situtuakenen Lea ka Mesopotamia, aileu bagei togania sinanalep sipuoni si Dina. Oto sangamberi muntogat Jakob sibara kasinanalepnia kai Lea igitra telupulutelu sia.
16Gad; tatogania: Zifyon, Hagi, Syuni, Ezbon, Eri, Arodi samba Areli. 17Asyer; tatogania: Jimna, Jiswa, Jiswi samba Beria pasamba Serah, sasarainanda sinanalep. Tatogat Beria iate si Heber samba Malkiel. 18Kapuluenemra nenda iate muntogat Jakob sibara kai Zilpa, iate pakoinien sinanalep sikau Laban kai Lea, togania sinanalep.
19Si Rahel sinanalep Jakob ai rua togania, iate si Josep samba si Benjamin. 20#1Mos. 41:50-52 Ka Misir si Josep ai rua togania iate si Manasye samba si Efraim situtuakenen sinanalepnia si Asnat, togat Potifera sipasiuukkaake imam ka Heliopolis. 21Benjamin; tatogania: Bela, Bekher, Asybel, Gera, Naaman, Ehi, Ros, Mupim, Hupim samba Ared. 22Kapuluepatda nenda iate muntogat Jakob sibara kasinanalepnia kai Rahel.
23Togat Dan iate si Husim. 24Naftali; tatogania: Jehzeel, Guni, Jezer samba si Syilem. 25Kapitutda nenda iate muntogat Jakob sibara kai Bilha, pakoinien sinanalep sikau Laban kai Rahel, katogania.
26Muntogat Jakob sieei ka Misir sangamberinia igitra enen pulu enem sia, ta'pei tuguru tatalikunia. 27#Pugap. 7:14 Tatogat Josep siputu'tu mata ka Misir ai rua sia, bailiu sangalalep Jakob sisesege ka Misir sangamberinia igitra pitu pulu sia.
Si Jakob samba sangalalepnia ka Misir
28Si Jakob masikoiniake si Jehuda muboiki muenung ka sia masisogai si Josep bule iailiake ukkuinia ka Gosyen. Kele arasage ka Gosyen, 29sakai si Josep kakeretania addeat paaili ka ukkuinia sedda, kateteret arapaaili, lakkaiakenangan ukkuinia si Josep samba pusounangan simauju. 30Kuanangan si Jakob kai Josep, “Kineiget akuobaakean tubukku matei, kalulut akuitcoan ekeu samba kuagai aipeile ekeu muririmanua.”
31Lepa kuanangan si Josep katubut sasarainania samba kasaepput ukkuinia, “Buitamei aku samba masipaagai kai rimata; sangamberi sasarainangku samba saepput ukkuiku sikukuddu ka Kanaan amoian sia. 32Kukua le geti, kam sipasijajago biribiri samba jaui, samba araambitnan terimeunu samba sangamberi bakkatnu. 33Ke'bai isogai kam rimata samba iparere galajetmui, 34kuamuian katubunia, kam nene sipasikeli tarimeu barania peile ka sisule, kele taikebbukatmui. Kabagat nene koiniakenangan geti kam mukuddu ka kupkumen Gosyen.” Aikua pagalaiat nenda si Josep, kalulut tai Misir masitsit sia paalei pasamba sipasijago tarimeu.
Chwazi Kounye ya:
1Mos. 46: MWV
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
@LAI 2015