Markos 16
16
Duaka go Suxi
1Dai bhodïrï goka tasaikïdï abhiadïrï xi gï yaasatu go Suxi aidï ka daibusai go ibhïxtaragai tasai. Tai go Maria Magdalena ïmadï Maria dïïdï Jakobo dai Salomé, gasabïrhi xigian ubadami dai toida agai go mukiadï. 2Dai tumiñoko ïïki mos busaikai tasai iji ïgai mïïka xako yaasapi go Suxi. 3Daidi ikaititadai ïgai,
—Xorai gïr soiñana maigo dasagi go gïï odai ixtukïdï kuupiñi gobai xi bapakia aatïmï— ikaiti.
4Dai nïnïabakai tïï ïgai go gïï odai xi ka maigobai daja. 5Mïtai baapa xako yaasapitadai go Suxi dai tïï ïmo gïrhi xi ami sïïrhixapadïrï dajatadai. Yukuxidï mïï tana ugurai dai kïï totoaja. Daidi go oki arhiï duduadimu tïïgakai.
6Dai go gïrhi potïtïdai aidï,
—Maiti abïr duduadikuda. Aapimï gaagai Suxi go Nasaretañdïrï oidakami, go ix makïdï kuruxiana gï xixatu— itïtïdai. —Ka duaka ïgai dai ka mai tipu tanai, nïijadabïrai mobai mïx xako tïï— itïtïdai. 7—Mïïka abïr aagida go Piduru ïmadï go gaa mamaatïrdamigadï Suxi. Aagidabïrai sai go Suxi gïn bhaitïki imi agai Galileamu. Ami tïïgimu aapimï, podukai gïn tïtïdai ïgai di— itïtïdai.
8Daidi go oki duduadimu dai ka mos gigibukïi dai boopoi abhiadïrï. Mai aagidi ïgai tomarhi ïmadutai duduadimukai.
Suxi gï maaxitu go Maria Magdalena buitapi
9Aidï tumiñoko ïïki kiamoko ka duakata go Suxi xi bhodïrï gï maaxitu ïgai go Maria Magdalena buitapi. Idi ïr go baaxi Maria ix makïdï Suxi duadi aidïxi Maria biakatadai kubarakami Diabora tïtïañikarudï. Maigobai bubaitu ïgai go diabora tïtïañikaru tudu. 10Dai go Maria jii dai mïï ayi xako daraja go gaa mamaatïrdami. Ïgai gasuanïi soigakoñikatai. Dai go Maria aagidi ix gï maaxitu go Suxi.
11—Kaxi ti duaka go Suxi, aanï ka nïidi— itïtïdai.
Dïï go gaa mai buaboitu.
12Gokiïrï ïma dukai gï maaxitu go Suxi goka gï mamaatïrdami buitapi. Ïgai oidigana ajiopaitadai. 13Dai ïgai mïï aagidi go gaa mamaatïrdami ïpï dïï mos go gaa modukai mai buaboitu.
Suxi maa aaduindagai mamaatïrdamigadï
14Gokiïrï ïmo imidagai mesa buidïrï darajatadai go bhaibuxtama dan ïmoko mamaatïrdami baidi go Suxi gï maaxitu buitapi. Dai Suxi bhagaidi ïgai dai aagidi sai arhiï kapaka iibhïadï dai sai mai buaboitudaraga ïgai. Mai buaboitu ïgai go ix makïdï aagidi ix nïidi ix ka duaka ïgai kaxkïdï.
15Daidi Suxi potïtïdai go mamaatïrdami,
—Iimibïrai bïïxi oidigi daama dadi abïr aitulda Diuxi ñokidï bhai ïrhiarakami bïïxi óídakami buitapi. 16Odami ix makïdï gin buaboitudagi kaïkai Diuxi ñokidï daidi gïn bakuanakagi, ïgai kïïgakïrï bubuaki agai. Dïï gia ix makïdï mai buaboitudadagi ïgai biakamu gïïdukami gïïgïbituldaragai abhana— itïtïdai.
17Daidi potïtïdai ïpï,
—Go ix makïdï gin buaboitudadagi naana maaxi iduñimu ix makïdï odami ïïgi xadïrï ixtuidïna dai podukai maaxituda agai xi Diuxi gubukadadïkïdï aatabuayi ïgai. Odamiañdïrï bubaidamu ïgai Diabora tïtïañikarudï aanï gin gubukadakïdï. Dai ïma maaxi ñoki mui ñokadamu ïgai ix makïdï mai maatïkana ïgai. 18Kookoyi buimu ïgai ïpï dai xi yïïdagi ïgai kodakaru maaxi mai xïduñimu ïgai. Duduadamu ïgai kokokoñiadï mos taatakai ïgai— itïtïdai Suxi.
19Daidi bhodïrï ka naato aagakai Suxi Gïr Nukadakami aatagidï bai Diuxi baidaja ïgai tïbagiïrï. Dai ami Diuxi maa ïmo gïïdukami sïïrhikami dai maa xi gï sïïrhixapadïrï daibana go Suxi.
20Dai go mamaatïrdami aipako iji dai óídakami buitapi aiturhi Diuxi ñokidï. Dai Suxi Gïr Nukadakami soikïiña aaduindadïrï bai ïgai naana maaxi ibuadana ix makïdï ïïgi odami xadïrï ixtuidana ix ibuadagi. Podukai maaxiturhi sai ix makïdï aagaiña ïgai ïr buaboi.
Dai mosïkaxi.
Chwazi Kounye ya:
Markos 16: NTP
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Copyright: Ethnos360 Sanford, Florida