Markos 15
15
Go kaigi buidïrï baan gï kïïsatu go Suxi
1Bhodïrï mos maaxikai gïn ïmpagi go bhaitï gukakami daxdadami ïmadï judidiu tïtïanïdamigadï dai maatïtuldiadami sïïrhikami. Bïïxkatai go ix makïdï ïr komite supremo judidiu gïn ïmpagi tudu dai ami bhai dui aatagi ixdukatai duñagi go Suxi. Dai ka aatagakai burhikami bhïkai ïgai go Suxi dai mïï tïïgi go kaigi. Pilato tïgidu go kaigi.
2Dai Pilato potïtïdai aidï go Suxi,
—¿Aapi pïxi tudu ïr reygadï go judidiu?— itïtïdai.
—Ïjï, podukai aba ix duu aagai aapi— ikaiti go Suxi.
3Daidi go bhaitï gukakami daxdadami naana dukai gïpiïrï bupaimi. 4Baidi go Pilato ïpamu potïtïdai go Suxi,
—¿Maiti pïx aa noraida agai tomarhi ïmo ñoki? Daiñi bïï naana dukai gïpiïrï gï bupai gobai— itïtïdai.
5Dïï mos go Suxi mai aa noraidi tomarhi ïmo ñoki xi go Pilato mai tïtïgaitadai ixtumaxi gï tïgitoagi.
Odami gatïjai muaragai go Suxi
6Dai go Pilato mos umiïrï daadagitoiña ïmo maixapikami aidï daibuñigïrï, ïïgi ix makïdï tañiagi odami. 7Dai no maixakaruana dajatadai ïmo omarhigami Barabás tïgidukami. Ïgai ïmadï jaa maamaixapikïdï bui susurhigïitadai go gobierno dai kodai odami. Kaxkïdï maixa ïgai.
8Tai mïï dada go odami muidutai xako daja go Pilato dai aagidimi sai dagitona ïmo maixapikami ix dukai ibuadana ïgai mos umiïrï bagimiïrï. 9Daidi go Pilato potïtïdai aidï,
—¿Aagai mïxi ix dagito aanï go ix makïdï gïn Rey aagai aapimï, go Suxi tudu?— itïtïdai.
10Kïï maatïkatadai ïgai xi mos ïgamu go bhaitï gukakami daxdadami dai gï buitapi baan kïïsatu go Suxi, kaxkïdï aagidi ïgai sa bhai ipïrhidi ix dagitoagi ïgai. 11Dïï go bhaitï gukakami daxdadami bhaiyoma mos abïnakidimi go odami xi tanïna dagito ïgai go Barabás. 12Daidi go Pilato potïtïdai go odami judidiu aidï,
—¿Dukatai duna aidï aanï go ix makïdï gïn Rey aagai aapimï?— itïtïdai.
13Daidi go odami mos ijiñakimi daidi ikaitimi,
—Kuruxiana abïr xixa— ikaitimi.
14Dai go Pilato potïtïdai,
—¿Tumaxi soimaaxi idukami gobai?— itïtïdai.
Dïï mos go odami apia bamioma ijiñakimi daidi ikaitimi,
—Kuruxiana abïr xixa— ikaitimi.
15Bai go Pilato ïïgi go odami dai dagito go Barabás. Maiti ipïrhidi ïgai ix bamioma bhaakoika ïgai kaxkïdï. Bhodïrï gatïjai ïgai sandadaru mïsai gïikarsana go Suxi dai bhodïrï sai bhïkana dai kuruxiana xixana.
Go sandadaru parunai go Suxi
16Taidi go sandadaru baidaja go Suxi Pilato kiidamu ïpamu dai ami tuixikana kïi dai ami mui gïn ïmpagi sandadaru. 17Dai aadi yukuxi moraduakami daidi iduñi ïmo korona uparai dai kïïxi xi ïpïamaaxkana ïgai ïmo Rey dai podukai parunai ïgai. 18Bïïxkatai iiñakai daidi ikaitiña,
—Xïïxi ïr gïdukami reygadï go judidiu— ikaitiña.
Xadutuadan duu kaitiña ïgai dïï mos parunaiña ïgai bhaiyoma. 19Dai ïmo uxikïdï modïrï gïbai. Dai xixibidi dai gïn totonakïdï gukiba buitapi. Xadutuadan buayi mos parunaitai. 20Naana dukai parunadan buayi ïgai dai bhodïrï upasai yukuxidï moraduakami dai ïïgi yukuxidï aadi. Dai bhodïrï busaitu ïgai abhiadïrï dai kuruxiana xixa agai.
Kuruxiana xixa ïgai go Suxi
21Kaiyañdïrï iimïi ïgai tai ayi ïmo kïïrhi Sireniañdïrï oidakami, Ximuñi tïgidukami. Alejandro ïmadï Rufo ogadï ïgai. Oidigañdïrï imïi ïgai tai go sandadaru gubukadakïdï gatïjai sai kusubaka ïgai go kuruxi. 22Mïtai bhïkai go Suxi ïmapïkïrï xakopïrï Golgota tïgidu (odami modï tïiya ïrhidi gobai). 23Ami oida agaitadai ïgai uba baragadï ïkokami bïnakami usabhai. Mira tïgidu go usabhai gobai. Oida agaitadai gobai xi mai kabami kokokagi Suxi dïï maiti ipïrhi ïgai xi iiyagi. 24Daidi go sandadaru upai yukuxidï go Suxi dai bhïiyi go Suxi dai kuruxiana xixa. Bhodïrï gïn totoidi ïgai yukuxidï ïmo tïtïïbiïrï nïidana as tuma aïna ïïmadutai. 25Parï tuxtamïrï kiamoko taidi ka kuruxiana xixatadai go Suxi. 26Mïtai kuruxiana xixa ïmo ojixikami ïpï xi ïgaikïdï gï maatïkana mïx tuixidï xixa go Suxi kuruxiana, daidi ikaiti go ojai,
IDI ÏR REYGADÏ GO JUDIDIU, ikaititadai go ojai.
27Dai bïï gokapadïrï go Suxi mïtai abhai xixa goka ïïxibogami jaa kukuruxiana. 28Podukai ka buaboi busai ixdukatai ka ojixikatadai ïïki xako go ojai ikaiti,
Odami soimaaxi ibuadami dukai nïidi Diuxi otosadï, ikaiti go ojai.
29Dai ix makïdï ami dïgabuskïi mos parunadan kaitidiña dai giidai momodï daidi ikaitiña,
—Aapi pïx ix makïdï pokaititadai pïsaidi ixtutuidi xi daitudagi go gïï kiupaigadï judidiu dai baika tasaikïdï kïïsa agai ïpamu, 30kïïgakïrï gï busaidi ïïgi dai tïbañi kuruxiañdïrï— ikaitiña.
31Daidi go bhaitï gukakami daxdadami ïmadï go maatïtuldiadami sïïrhikami parunadan kaiti ïpï dai ïïgi gïn tïtïdai ïgai aipako sai,
—Kïïgakïrï bubaitu ïgai mui odami dïï gia ïïgi maiti ixtutuidikïi ix kïïgakïrï gï busaidagi ïgai— ikaiti ïgai. 32—Diuxi otosadï gï agaiña ïïgi go Suxi dai reygadï go judidiu. Tï nïida xibi ix bhai tïbanïna kuruxiañdïrï. Aidï gia buaboituda antaada aatïmï— ikaitiña ïgai.
Dai ï goka kïkïïrhi ix makïdï kukuruxiana nagiïjï galnaaxi ñoki surhigidi ïpï.
Suxi muu kuruxiana
33Daidi daan duku abhiadïrï asta koi gïsïko ukami mos tukapi bii oidigi. 34Dai aidï uruno taadako gïgïrï iiña go Suxi daidi ikaiti,
Eloi, Eloi, ¿Lama sabhaktani? ikaiti.
Gobai itïiya ïrhidi, —Gin Oga, Gin Oga, ¿Tui pïxi gin dagito?— itïiya ïrhidi gobai.
35Dai ïïmoko ix makïdï ami daraja kaï ix potïi ïgai daidi ïgai ikaiti,
—Daiñi, gabapaidi gobai go Elias— ikaiti go odami kaïkatai ix tïi go Suxi.
36Tai ïmadutai mïï dai bhïiyi ïmo bixokorhi dai badaitu uba baragadï ïkokami. Bhodïrï ïmo uxi kugïrï tïbïdukami buu ïgai dai miadïrï daxi go Suxi sai bixusuna. Daidi ikaiti go ix makïdï dagïi go uxi,
—Tïnïida sa bhai dibiana go Elias dai tïbandana— ikaiti.
37Daidi go Suxi gïïgïrï iiña dai muu. 38Baidi ïrana ïxi sarai go gïï ikuxi tïkabidïrï abhiadïrï asta mïï taana ukami ix makïdï go gïï kiupaigadïrï judidiu sagiïkatadai. 39Daidi go kapitañi go sandadarugadï romanos buidïrï kïakatadai xako muu go Suxi dai tïgito nïidi ixdukatai iiña ïgai dai ixdukatai muu. Daidi ikaiti ïgai,
—Idi gia ïr buaboi xi ïr Diuxi maradï— ikaiti ïgai.
40Dai mïkaxdïrï gukatadai oki ïpï dai nïnïidi ix dukatai ïpïbuimi. Dajatadai Maria Magdalena, dai go gïmai Maria ix makïdï ïr dïïdï Jakobo ïmadï Jose dai Salomé. Jakobo arhidukïdï aagaiña odami go Jakobo. 41Go oki ïgai oidatukïiña go Suxi dai soikïiña xudu Galileïrï aimïraiña ïgai. Dai jaa mui oki darakatadai ïpï ix makïdï xibhïadïrï oi go Suxi Jerusalenamu ïpï.
Gï yaasatu go Suxi
42-43Ïmo bianaxiko muu go Suxi. Dai dajatadai ïmo kïïrhi Arimateañdïrï oidakami Jose tïgidu. Ïgai ïr ïmo dunukami dai odami kïï oigïdaitadai. Tïgito ajiopaiña ïgai sai dibiagai Diuxi otosadï dai sai ïgai ïmo gïï tïanïdami dukai kïkiba aagai dibiakai. Go Jose yaasa ïrhiditadai tukugadï Suxi dïï ka uruitadai oidigi dai xadiko ka maitï aatabuayi. Kaxkïdï maigobai dáí ïgai duadimudagai dai jii dai mïï baa buidïrï go Pilato dai gatai go Suxi tukugadï. 44Dai go Pilato mai maatïkatadai kia ix ka mutadai go Suxi dai gatïkakai go kapitañi ix bhai ka muu dai ïgai potïtïdai,
—Kaxi ti muu— itïtïdai.
45Aidï gia go Pilato maa oigaragai go Jose xi bhïkiagi tukugadï. 46Taidi Jose sabïrhi ïmo ikuxi namïakami dai tïbañi go mukiadï dai go ikuxiïrï bhixa. Dai ïmo aitiana xako ka dïgarxikatadai ami tïï. Dai bhodïrï taagiña dáí ïmo gïï odai. 47Baidi Maria Magdalena ïmadï Maria Jose dïïdï nïidi mïx xako tïï go Suxi.
Chwazi Kounye ya:
Markos 15: NTP
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Copyright: Ethnos360 Sanford, Florida