Málkúsi 3
3
Yɛɛ́so a á ega ŋghʉ̄ɛ, ŋiŋ á tʉɛ aleʼé aswite
(Mat 12.9-14; Lúk 6.6-11)
1Yɛɛ́so á zéŋ mbīŋ nzem ŋkó á ŋgyā aswiŋte. Mmɔʼ ŋiŋ á gɔ́ éwú, mbɔ apū zí á lē ŋkwhʉ́. 2Epuɔ Falísia é nɔŋ efāʼa eshhʉ̄, á lelɔk ntshí anu ánɛ Yɛɛ́so. Ḿbápne á yí ŋ́gɛ, a elɛ ŋghʉ̄, ŋiŋ á tē ayáʼa aleʼé aswite, mɛ́ zhɛ́ ŋ́gɛ, a á kó á mbū. 3Yɛɛ́so á lé á mbū ŋiŋ yīi, apū zí á lē ŋkwhʉ́ lā ŋ́gɛ: «Lu á esī ntshí á ajʉʼ, á mvhɔ epuɔ. » 4Ḿbiŋ nzɛ́tte á mbū epuɔ ŋ́gɛ, lepé tsímpɛ é veéŋ ŋ́gɛ akɔ̄? Ŋ́gɛ mɛ́ eghʉ̄ anu mbɔŋ aleʼé aswite kɛ á azi tepɔŋ ŋ̄? Ŋ́gɛ mɛ́ eghʉ̄, ŋiŋ a etē, kɛ mɛ́ ecʉ́ʼ a ekwhʉ́ ʉ́?» Ŋiŋ a te pwɛ̄ɛt. 5Yɛɛ́so á paŋ nnēk. Ŋ́gē ecʉ awíɛ awíɛ á ndo eshhʉ̄ yí, ntē yí é nɔŋ mbékɛ, ánɛ ntē wɔ́p á lesek. Ńdé á mbū ŋiŋ mɛ́t ŋ́gɛ: «Seŋte apū jú. » Á seŋte, apū zí, á lɛ mbīŋ. 6Epuɔ Falísia é lɛ ŋgē etó á ŋgyā aswiŋte mɛ́t, pɔ́ a epuɔ pīi é nzem Elōde é cúʼte, ésap efāʼ eshhʉ̄, páʼ pɔ́ e ghʉ épúp, tɛ́ ezwhí á Yɛɛ́so.
Atʉtʉ epuɔ á ega eshʉ̄ʼɛ ntswɛ́ttɛ á Yɛɛ́so
(Mat 4.25; 12.15-16; Lúk 6.17-19)
7Yɛɛ́so pɔ́ nnɔ yí, é gʉɔ mé akʉŋɛ́ mía ntshi, atʉtʉ epuɔ á zhɛnɛ á yí, éfhɔ́ɔ á apak ŋgɔŋ Ŋgaliléa pɔ́ apak ŋgɔŋ Yudéa. 8Éfhɔ́ɔ á Yelósalɛm mbɔɔ Idumɛ, pɔ́ nzéŋ ntshi Juldɛŋ. Ńzéŋɛ efhɔ́ɔ ánɛ mekap alāʼ mīi, é pateé metésɔŋ Tíi pɔ́ Sidɔŋ. Atʉtʉ epuɔ mɛ́t á le júʼ menu ntsem mīi, a á si ŋghʉ̄ɛ, tɛ́ eshʉʼɛ ntswɛ́ttɛ á yí épúp, 9Yɛɛ́so á lé á mbū nnɔ yí ŋ́gɛ, pɔ́ ecʉ̄te akɛnūʼ ntshí, yí ekó á ntē éwú, ḿbɔ́k alāʼ á leswɛ̄t á yí. 10A lɛɛ́ ndʉ́ɛ́ épúp melaʼ mīi, a á ghʉ, megaŋ agɔ é te tee, tɛ ewiɛ́ ŋgaŋ agɔ lɛ́, á nɔŋ ŋŋyɛ̄nɛ, éfāʼa á lepfeŋ á yí. 11Mesī mīi é ánɛ epuɔ, é nɔŋ njʉ́ɔ á yí, ŋ́gwhʉ̄ɛ á mekhu yí, ŋ́gaʼtɛ ndʉ́ɛ́ ŋ́gɛ: «Wu, o ó Méŋ Ndém. » 12Tɛ́ Yɛɛ́so a ekāka á wɔ́p, mbʉ́ɛ́ ŋ́gɛ, ndɛ́ʼ pɔ́ zéŋ eshúŋ á ŋiŋ yīi, yí é ewiɛ́.
Yɛɛ́so a á ega ntsɔ́ʼɔ meziŋ‑ntō pí ntsɔp pīa mé legēm
(Mat 10.1-4; Lúk 6.12-16)
13Yɛɛ́so á ghʉ mbē mé mmɔʼ ndo lekwɛ̄t. Ńtɔ́ŋ epuɔ pīi, a á kɔŋ, pɔ́ shʉʼ ntswɛ́tte á yí. 14Á tsɔ́ʼ emɔ̄ʼ ntsɔp pīa mé legēm, [ńtɔ́ŋ á wɔ́p lɛ meziŋ‑ntō]. Ńtsɔ́ʼ á wɔ́p épúp ŋ́gɛ, pɔ́ a pɔ́p e egɔ́ nnɔ. Ńzɛ́ŋɛ ŋgɔ̄ á ntó pɔ́p ŋ́gɛ, pɔ́ egʉɔ ntswī ŋke mbɔŋ. 15Ŋ́gē etó á wɔ́p, ŋ́gyá á wɔ́p mete, á lelɔk ŋkó ńjūŋ mesī ánɛ epuɔ. 16Epuɔ ntsɔp pīa mɛ́t e epuɔ: Simɔŋ, Yɛɛ́so á zéŋ ntswhī á yí lɛ Piɛ. 17Jáak pɔ́ Jáaŋ, épɔ̄ Zebedé. Yɛɛ́so á zéŋ ntswhī á wɔ́p lɛ Boanegɛs, ńdɔkɔ ŋ́gɛ epɔ̄ lefaŋ. 18Aŋdlɛya, Fílíio, ŋ́ghʉ̄ á Baatelemi pɔ́ Matío mbɔɔ Tomási, ŋ́ghʉ̄ á Jáak méŋ Alfɛ, Tadio mbɔɔ Simɔŋ Nzɔŋɔ‑alāʼ, 19ŋ́ghʉ̄ á Yúdas Iskaliɔt, yí mé le shʉ̄ʼ njhʉ́ mezoʼ Yɛɛ́so.
Yɛɛ́so a á ega ntsɔ́ʼɔ anu á mbū epuɔ pīi, pɔ́ é cɔp á yí
(Mat 12.24-32; Lúk 11.15-23; 12.10)
20Yɛɛ́so á piŋ nzem mé mba. Epuɔ tɛ nzá é zéŋ ncúʼte, ńzá záa, tɛ pɔ́ a nnɔ yí é té wɛ̄ njhʉ̄ zīi, pɔ́ gɔ elɔk mpfɛ́t á azō ɔ́. 21Epuɔ atseŋ ŋgyā pí é júʼ épúp, ńnɔŋ ŋkwāŋa ŋ́gɛ, athū zí á tseŋte, ńdɛ ntsé á mɛnzhɛ eshʉ̄ʼɛ á ŋgɔɔ̄ yí, élɔk epiŋ nzem. 22Emɔ̄ʼ wɔ kɛ́ʼte‑mbé Ndém, é lɛ efhó á Yelósalɛm ncú eshʉ̄ʼ, ńdé ŋ́gɛ: «Bɛlzebul, á efɔ mesī a á ánɛ yí. » Mbɔɔ lɛ̄ɛ: «Efɔ mesī mɛ́t, mé yáa á yí mete, tɛ́ á lɔkɔ njūŋɔ mesī ánɛ epuɔ. »
23Yɛɛ́so á tɔ́ŋ á wɔ́p, pɔ́ shʉʼ. Á lɔk ashuŋne lepúʼ, ńdé á mbū pɔ́p ŋ́gɛ: «Sɛ́ta a gɔ eghʉ̄ʉ páʼ lā, ńjūŋ athū nnɛ̄t zí, yí méŋwɛ̄t é? 24Epuɔ taʼ alāʼ é sɛnnɛ, ńdʉɔ́ʼne mennɛ̄t mɔ́p, mbɔ alāʼ mɛ́t á té ŋgʉ̄ɔ mé nnáŋa á. 25Epuɔ atseŋ ŋgyā, é sɛnnɛ, ńdʉɔ́ʼne mennɛ̄t mɔ́p, mbɔ atseŋ ŋgyā mɛ́t á gɔ le náŋ. 26Sɛ́ta a piŋɛ esɛ̄nne, ńdʉɔ́ʼ athū nnɛ̄t zí yí méŋwɛ̄t, lefɔ tsí é gɔ́ ntáka taká. Mbɔ lefɔ mɛ́t é té ŋgɔ̄ á nnáŋa á, mbɔ é lɛ epú epíi. 27Táʼ, á ké ŋgɔ́ɔ lɛ, ŋiŋ a gɔ le kó á ŋgyā tɛnte ŋiŋ, ŋ́kú á tsitsi yi, té gɔ́ yīi, a á nté njhʉ̄, ŋ́kwɛ́t á yí í. A pikɛ tɛ ŋkwɛ́t á yí, mbɔ a a túʼ akʉ̄ɛ akʉ̄ɛ á ŋgyā, páʼ a á kɔŋ. 28Meŋ shúŋɔ á wɛ́, á kwaʼ anuúnē ŋ́gɛ: Ndém a shʉʼ elekne mefa ntsem mīi, epuɔ menɔŋ é ghʉ. Tɛ mbɔɔ nzɔ zīi, pɔ́ lɔkɔ nzɔ̄ á yí, tɛ e zi mbú nzá áa lɛ akɔ̄ lɛ́. 29Taʼ, ŋiŋ a piŋɛ nzɔ̄te á Azwakne Ndém, mbɔ Ndém a gɔ le láʼ ndēkne emuɔ mefa mɛ́t á mbū ŋgaŋ á, mbɔ ŋgaŋ a á cʉ́ʼ á ŋgaŋ mefa á lemiʼɛ. 30Yɛɛ́so a lɛɛ́ eshúŋnɛ páʼa melaʼ mīi, wɔ kɛ́ʼte‑mbé Ndém é le nɔ̄ŋ ndʉ́ɛ́ ŋ́gɛ, esī mé lē ŋgɔ á yí.
Kwaʼ atseŋ ŋgyā Yɛɛ́so é wɔ awɔ́?
(Mat 12.46-50; Lúk 8.19-21)
31Mía Yɛɛ́so pɔ́ epɔ̄ memía Yɛɛ́so é shʉʼ. Ńzhō á apɛ́ ntshí, ńtó á ŋiŋ ŋ́gɛ, a egʉɔ ntɔ́ŋ á yí. 32Epuɔ tɛ nzáne é le pú nnáŋ á lezēŋ yí. Mɛ́ shʉʼ ndé á mbū yí ŋ́gɛ: «Ayi mɛ́ wu pɔ́ a epɔ̄ memía pú, é tshiteé á apɛ́, éfāʼa á wú le. » 33Á pwɛt á mbū pɔ́p ŋ́gɛ: «Awɔ́ a á mɛ́ ga ā? Wɔ awɔ́ é gɔ́ epɔ̄ memía pá á?» 34Ńdɛ mbwʉ́ʼɛ menēk mí, ńcʉ̄te epuɔ, páʼ pɔ́ ŋkɛ́ne á yí nnáŋ, ńdé ŋ́gɛ: «Mɛ́ ga a ewuɔ, epɔ̄ memía pá, é gɔ́ epuɔ. 35Ŋiŋ yīi a ghʉʉ̄ ajū mīi, Ndém a á si nzɛ́ttɛ, ŋgaŋ mé méŋ mɔ́ ga, éyi menzwí kɛ́ eyi mbaŋa, ńzéŋ ŋgɔ́ á mɛ́ ga. »
Chwazi Kounye ya:
Málkúsi 3: ybb
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
© CABTAL