YOHANE 6
6
1Kyasia ili numa Yesu kahenda yambada nduwa ya Galilaya (ilaho ya Tiberia) kaambadya kya kulya molyolya. 2Mamingi fung'anyi fo wandu wakamwosha kipfa ili wandu wo walewona ṟiho alewuta tsechiṟa wandu waluo. 3Yesu kahenda ido na kundo ko fumvu-hu wakadamya-ho wo na wa kiloshyonyi kyake. 4Na mkonu fulya mnene fo Wayuda fulya fo Pasaka nyi kufui fuhoye. 5Nahong'u Yesu kekiirya meso hake kekiwona mamingi fung'anyi fochikuchea na alyando ai nao kawia Filipo, “A kundo lochihuṟa mkate fo wandu wa wakulie nyi ku ngesa?” (6Nao kehamba ado nyi kyeseenga Filipo cha kipfa nyi aweichi kindo arie iwuta.) 7Filipo kamhalwo, “Kyakyo ma mkate fo shilingi (dinari) mahana hawi fochiwashika mndu nawone-ho ma kipeṟengupfo.” 8Umu o wa kiloshyonyi kyake ewio rina lyake nyi Andrea ai manomae o Simon Petro kambia. 9“Kunu nyi kuwode manake awode mkate ya ngano itanu na makunga hawi. Kyechiwiko cha iki wandu wamfo wado?” 10Yesu kahamba, “Damiṟenyi wandu wo wadamye wanda.” Napfo nyi kuwewode-pfo maṟa hafoi. Nahong'u wasoṟo walya wakadamya wanda washikye cha shiku shitanu. 11Naho Yesu kawada mkate iya kaidapfuma Ruwa kahawya wandu walya wadamye, na mkunga halya kawewahawya chando wakundi. 12Wekiidima ikuihudya Yesu kawia walya wa kiloshyonyi kyake, “Doduonyi-ho shipeṟengu sho shitsihee-ho shiladekye wanda.” 13Wakadodwo-ho shipeṟengusho sha mkate shiletsuha wandu wamlya wakaichuṟa shikunja ikumi na shiwi. 14Kyasia wandu wekiwona ṟiho lilya Yesu awuta wakahamba, “Nyi kya lohi ichu nyi akeri mwikimbi ulya aimteṟye nache kunu wuyana.” 15Kyasia Yesu kekimanya nyi icha wai wache wahende imbika mangi nao kasheṟuka, kahenda alya fumvu-hu o amonyi.
Yesu achumia huya mṟinga
(Mat 14:22-33; Mar 6:45-52)
16Kyasia ili kyukanyi wa kiloshyonyi kyake wakasoka na kulya mawambao ha nduwa. 17Wakado alya ngalawehu, wakahenda yambadya kya kulya Kapernaumu. Na mema fuhoye-pfo na Yesu alawemewakoye. 18Na nduwa iya ikahalukahaluka mnu masinanu otanu lochiida-ho sa lung'anyi. 19Naho ili wa kiloshionyi wammaa ihendesho na ngalawa iya mhendo fo saa imu ang'u kufui nayo (kilometa 5-6) nalyo wakawona Yesu kyechichumia huya mṟinga, amshika kufui na ngalawa iya wakaangalala. 20Yesu kawawia, “Nyio inyi, ma mulaowuo.” 21Nawo wakakunda imdosya ipfo ngalaweny. Nalyo liyenyi wakakoya ngalawa yamshika alya ohambe-hu lo oruka lulya kundo waihenda.
Wandu waipfula Yesu
22Nahong'u ili lya ngama mamingi fulya fo wandu walya waledeo wahoṟoki kulya molyolya ya nduwa iya wakakoya ke kwipfo-se ngalawa ingipfo shile iya imu iweipfo na Yesu alesangana na wa kiloshyonyi kyake ido nawo alya ngalawe-hupfo. Nyi walya wa kiloshyonyi kyake walehenda wo wawenyi. 23Kyasia kukacha napfo ngalawa tsingi tsiwuka kulya Tiberia tsikashika kufui na alya ndo walelia mkate iya Mndumii ammaa iadapfuma Ruwa. 24Nahong'u mamingi fulya fo wandu ili wakoya Yesu nalaiho manya wa kiloshyonyi kyake wakahenda ido alya ngalawehu tsilya wakashika kulya Kapernaumu, wechimpfula.
Yesu mkate fo moo
25Nawo ili walemkoya alya ohambe-hu lulya lungi lo nduwa wakambia, “Maaria a nyi indi omshika kunu?” 26Yesu kawahalwo kahamba, “Nyi lohi kya lohi ngamuwia, Kyamwenenga monjiwalya chi maṟiho halya mulewonapfo, nyi kimaduma kya mkate iya mulelya mukaihuda. 27Mlawinyie kelya kyechipuo; winyienyi kelya kyechikaa kipfa kya moo fo mlungana nakyo nyi Mana chu o mndu echimwenenga. Kyamba Wande nyio Ruwa nyi alembikya mhuri yemṟingishya ke nyio.” 28Nawo wakambia, “Alewo luwike luda lukoye itana maṟunda ha Ruwa?” 29Yesu kahalwo kawawia, “Iṟunda lilya liwawaso nyi Ruwa aili, ke kundu muhende iidikya ichu alemduma.”
30Nahong'u wakambia, “A nyi kiki otana kyeluloṟa kichano so lukiwone luwute-ho ikuidikya iyo. Nyi owika-pfo kuda ngesa? 31 Waku walya wadu wo walelya Manna kulya olelenyi lulya chando ki-kiṟehye kehamba, Alewaenenga mkate folya fuwukye ruwehu.” 32Nahong'u Yesu kawawia, “Nyi lohi kya lohi ngamuwia, Chi Mose amuinengye mkate fu fuwukye ipfo ruwehupfo. Nyio Wande oko amuenenga mkate fu fo lohi fuwukye ruwehu. 33Kyamba mkate fu fui fo Ruwa nyio ichu asoke ruwehu kechienenga wuyana wu moo.” 34Nahong'u wakambia, “Hoo Mndumii, keluenengewo mkate fu kiheri kyose.” 35Yesu kawawia, “Nyio inyi njikeri mkate fu fo moo. Mndu akuchea na koko akiwado-se nyi njaapfo, na mndu awa monjiidikya nakirohyo-se nyi nyoda ma indipfo. 36Kya indi ngammaa imbia, ke nyi mulenjiwona manya mulanjiidikie. 37Iwo wose Wande amenjienenga wo wechikuchea na koko. Na mndu akuchea na koko njechimfunya njapfo. 38Kipfa kyannenga ngasoka ruwehu chi kundu njiwute kya chila yakopfo kya indi kundu njihende iwuta kii kya chila ya ichu alenjiduma. 39Na kilya ichu alenjiduma achilia kikeri kii-le, njiladetseho ma umu o walya alenjiinenga kya indi kundu njiṟutse wose Mfiri fulya fofurumia. 40Kyamba kindo Wande oko akundi nyi iki ke orio mndu awona Mana na imwidikya nawade moo fo mlungana. Na inyi njechiwaṟutsa Mfiri fo furumia.”
41Nahong'u Wayuda wakawoka inunuwa kyake ili ahamba, “Inyi nyi mkate fu fo moo fuchee ruwehu.” 42Wakahamba, “Ashika-wo ichu chio Yesu ai mana o Yosefu? Nde na mae na luwaichi. Nyi kyawa kida ili ahamba ke nyi asoke ruwehu?” 43Yesu kahalwo kawawia, “Lekyenyi inunuwa nyo muwenyi na wenyi. 44Kwipfo mndu eidima icha na kokopfo, kulawode wande ichu alenjiduma amhomwo napfo, na inyi njechimṟutsa Mkonu fulya foimarisya. 45 Waikimbi waleṟehya, ‘Wandu wose wechilosho nyi Ruwa.’ Nahong'u orio mndu ose aadanyia kiwuka ko Wande na ikulosha nyi aicha na koko. 46Chi kikeri cha ili kwipfo mndu alemewona Wandepfo, shila nyi ichu awukie ko Ruwa, nyio alemewona Wande. 47Nyi lohi kya lohi ngamuwia, Ichu aidikie nyi awode moo fo mlungana. 48Inyi nyi mkate fo moo. 49Waku walya wanu wo walelya Mana kulya nuka wakawepfa. 50Aifu mkate fusokie ruwehu; kundu wandu wechilya-ho walakikoyese ipfa. 51Nyio inyi nji mkate fu fo moo fusokie ruwehu. Mkate fu mndu ailya-ho nechikaa na moo mlungana. Na mkate fo njechimnenga mfo mbihufu foko njifulekia njiwonesye nafo wuyana wu moo.”
52Lyo likatewa Wayuda wakaloyana wawenyi na wenyi wakahamba, “A nyi wuda ichu echiidima iluhavya nyama tsake lukulie ngesa?” 53Nahong'u Yesu kawawia, “Nyi lohi kya lohi ngamuwia, Mukada mulalya nyama tsa Mana chu o mndu na inyo samu yake mochikaa ma na moo fu mufuriepfo. 54Mndu kalya nyama tsako na inyo samu yako nyi awode moo fo mlungana na inyi njechimṟutsa Mkonu fulya foimarisya. 55Kyamba nyama tsako tso kando ka lohi na samu yako nyi yo kyenyo kya lohi. 56Na mndu kalya nyama tsako kawenyo samu yako nyio akaa kiidi kyako na inyi njikaa kiidi kyake. 57Kikawa chando Wande chu alenjiduma akeri menyi-moo na inyi njii na moo kimaduma kya Wande na wudo da ichu anjilya inyi nyi akaa na moo kimaduma kyako. 58Ifu mfo mkate fusokie ruwehu, fulai fo mbaṟi imu na mana iya waku walya walelya wakawepfa. Mkate fu mndu kafulya o echiwada mo mlungana.” 59Na kundo alehambya madedo ho nyi ipfo sinagogenyi ya kulya Kapernaumu echiloshya-ho.
Madedo hekeende moo fo mlungana
60Nahong'u wa kiloshyonyi kyake wamwicho adeda ado wafoi wakahamba, “Madedo ho nyi maumu. A mndu eidima ihaicho nyi wu?” 61Nao Yesu kamanya ke wa kilohyonyi kyake nyi wainunuwa kya ikyo. Nalyo kawawia, “A ikyo kyamutewa mkawa kiṟumaṟuma? 62Alewo nyi kyechiwa kida kiheri mochiwona Mana chu o Mndu echido na alya kundo awekukerye-ho kacha? 63Mumuyo mfo fuiwika moo, mbihufu fumenyi fochiidima kindopfo. Madedo ho ngamemuwia ho hai ha Mumuyo hakawewa na moo. 64Indi ipfo kiidi kyanu nyi kwipfo maata walai waidiki.” (Kyamba wuka kiwokyonyi Yesu aweichi walya walamwidikye nyi wahya na ulya echimtwaṟa nyio u.) 65Nalyo kahamba, “Nkyo kimaduma ngamuwia, Kwipfo aidima icha na kokopfo shila nyi ichu ai mṟamtse nyi Wande oko.”
66Kipfa kya madedo-ha, wandu wa ipfo kiloshyonyi wafoi wakawuya na numa walakihendesane-se nao. 67Nahong'u Yesu kawesa walya ikumi na wawi, “Kulako nanyo mokunda ikuhendya ngesa?” 68 Simon Petro kamhalwo, “Hoi Mndumii lukuhendye ko u ngesa? Nyio iyo uwode madedo haende moo fo mlungana. 69Naso lomekuwutya-ho ikuidikya lukakumanya ke iyo nyi ukeri Mwele chu o Ruwa.” 70Yesu kawahalwo, “A chio inyi njilemusambuṟa nyo ikumi na wawi? Na ipfo kiidi kyanu umuho kawuya iwa mkumbi?” 71Yesu alehamba ado kya Yuda Iskariote ai mana o Simon. Kyamba nao nyio alehenda imtwaṟa ma ili awei umu o walya ikumi na wawi.
Yesu na wana wa mae
Chwazi Kounye ya:
YOHANE 6: KIM2
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Kimochi Bible © Bible Society of Tanzania, 2016.