YOHANE 7
7
1Nahong'u ili numa numa Yesu naweida kulya Galilaya. Kyamba alalekunda itengeta kulya Yudaya kipfa wasongoru wa Wayuda wawekundi imbaha. 2 Na Mkonu mnene fo Wayuda fomanya Matengo iwei kufui. 3Nahong'u wanawamae wakambia, “Kure kunu nohende ishika kulya Yerusalemu kundu na wa kiloshyonyi kyapfo wawone ngata tsi tsapfo otana. 4Kyamba kwipfo mndu etana kindo kiṟika namanyikye isangenyi-pfo. Kokoya owuta shindo shii shidi henda kuloṟe-ng'u na wuyana wu.” (5Kyamba ma wanawamae wawememwidikie-pfo.) 6Nahong'u Yesu kawawia, “Kiheri kyako kyamshikapfo. Indi nyo kiheri kii kyanu kyo kihianyi na mkonu yose. 7Ma wuyana wu woidima imusuo nyopfo. Indi inyi wanjisuo kipfa kya kiṟingishyo kyako njiwikye kimaduma kyawo njihamba ke mawuto hawo hai mawicho. 8Nyo kudoyenyi na kulya mkonu ii mnene. Inyi njihenda ido napfo mkonu yo mnenepfo kipfa heri lyako lilandeshika ihoya.” 9Amdeda nawo ado o amonyi kakaa kulya Galilaya.
Yesu ai Mfirinyi mnene fo Matengo
10Kyasia wanawamae wamedo napfo kya mkonu iya mnene iipfo nao Yesu kawedo napfo kyaṟo kilawei kya pata. 11Wasongoru wa Wayuda walya wakawa wempfula-pfula ili lya mkonu iya mnene wakahamba, “Alewo o nyiku-aya ngesa?”
12Na wandu walya wafoi waweiho wakachila mnu kyake. Walya maata wakahamba, “O ai mcha wyo.” Maata wakahamba, “Ote nyi adekesha wandu.” 13Ma kudo kulakae-pfo mndu adeda kyake na pata kipfa nyi waowoye wasongoru walya wa Wayuda.
14Nahong'u mkonu iya mnene ishikie kyenga Yesu kahenda kulya hekalunyi kadamia-ho echilosha wandu. 15Nahong'u Wayuda walya wakaṟihio wakahamba, “A mndu chu nyi wuda aichi mapfundo nao alalesoma shule?” 16Nahong'u Yesu kawahalwo kahamba, “Mloshye yo yako njilosha nayo chi yako inyipfo kya indi nyi ya ichu alenjiduma. 17Mndu akundi iṟunda shilya Ruwa akundi nyio echimanya kya mloshye yo yako kokoya nyi ipfo ko Ruwa iwukye ang'u kokoya nyi ngadeda kiwukye koko inyi njimonyi. 18Ichu ekyekuhambia kyake tupu o apfula iwikyo kiṟumi o amonyi. Indi mndu atambahanya iwonya ichu alemduma kiṟumi o akeri mhendeli alawode mtaambo, o lohi. 19Alewo chio Mose amunengye wuwawaso? Na kunu kiidi kyanu kuipfo ma umu aiindia wuwawaso wupfo. Kimaduma nyi ki ili mukundi injiwaha?” 20Wandu walya wakuwumbie-ho wakahalwo. “Nyi uisuko! Nyiwu akundi ikuwaha?”
21Yesu kahalwo kawawia, “Nyi ngata imu njiletana nanyo mukaṟihio kyayo. 22 Mose nyi amwinengye mṟumo fo odino, Ma chi ipfo ko Mose fuwukyepfo kya indi nyi ipfo ko waku walya. Nanyo mokedina mndu na mkonu fo Sabato. 23 Kyasia kokoya mndu naidino ili lya Sabato kundu wuwawaso wo Mose wulahende itahachyo nkili monjiwadya nyashi ili njilechiṟa mndu pyu mkonu fo Sabato? 24Mulawone modumbwo mondu mochiadanya ora lumu. Dumbwonyi mdumbuye fo sungusihu.”
Alae ichu nyi Mesia?
25Nahong'u wandu maata wa kulya Yerusalemu wakahamba, “Alewo chio ichu wawempfulya mweke fombaha? 26Ambuyenyi! Nyi aiwaikimba na pata walambie ma kindo. Kulako wasongoru walemanya ke nyio Kristo ngesa? 27Kya indi mndu chu nyi lumwichi kundu awukye, na kiheri Kristo echicha kwipfo mndu echimanya kundo echichapfo. Kyaindi so luichi kundu awukie.”
28Lyo likaenenga Yesu ipfo hekalunyi kundo ailosha kaira ṟu kahamba, “Ee-da na muwenjiichi na kundo njiwukye na muweichi da. Na inyi njicheye kui chila yako njimonyipfo. Kwipfo mokilohi alenjiduma, nao ma mulamwichi nyo. 29Inyi njimwichi, kyamba nyi ipfo koke njiwukye nao nyi anjidumye.”
30Nahong'u wakawa wepfula mweke fombada mondu, ma kulakae-pfo mndu alekaria imleshia owokonyi kipfa kiheri kyake kilawemshike. 31Nahong'u ipfo maminginyi fo wandu wafoi-ho wakawuta-ho imwidikya o, wakahamba, “Kiheri Kristo echicha a nechiwika shichano shing'anyie iishi ichu alewika ngesa?”
Waringi wadumo iwada Yesu
32Wafarisayo wakaicho wandu waideda kya Yesu shiwehewehe shidi naho wakohanyi walya wang'anyi na Wafarisayo wakasangana wakaduma wasoṟo wawo wahende imbada. 33Yesu kahamba, “Nyi kiheri sa kyangu njitsinda-se nanyo njihende ko ichu alenjiduma. 34Mochinjiwalya mulechinjikoya. Kyamba kundo inyi njechikaa moidima ishika-ho nyopfo.” 35Nahong'u Wasongoru wa Wayuda walya wakadeda wo wenyi na wenyi, “Akawo mndu chu nyi hanga aihenda napfo naso lude lulamkoya-se? Kulako akunda ishika ko Wayuda walya wanyanyaṟikye ipfo masangenyi ha Wagriki nahendelosha-pfo Wagriki wo? 36Kimaduma nkiki ili ahamba, mochinjiwalya mulechinjikoya na ipfo kundo inyi njechikaa moidima ishika-ho nyopfo?”
Meda ya mṟinga fuwode moo
37 Naho ili komshika mkonu fulya mnene foimarisya nafo fui mtoṟu kota ingi Yesu kahoṟoka-ho kaira ṟu ling'anyi kahamba, “Kokoya kwiho mndu awodo nyoda nakucheye na koko nache inyo. 38 Mndu kanjiidikya inyi kyake kyechiwa chando kiikiṟehye kehamba, ke mndu chu ipfo mrimenyi foke kochisoka-pfo meda ya mra fo mṟinga fuwode moo.” 39Nakyo nyi alededa kya macheyenyi ha fo Mumuyo Mwele, fulya wandu wamwidikye wekaa wafuambie. Kyamba mandi halya Mumuyo Mwele fulawemsoke kipfa Yesu alawemeng'anyisho.
Mpaṟakano fo wandu kya mbonyi tsa Yesu
40Wandu maata wa ipfo maminginyi fo wandu wekiicho adeda adi wakahamba, “Ichu nyi lohi ai mwikimbi ulya.” 41Wengi wakahamba, “Ichu nyio Kristo.” Wengi wakahamba, “Alewo Kristo nawukye kulya Galilaya? 42 Maṟeho Maele hahambieki? Hahambye, ke Kristo echicha awukye kisharinyi kya Dawidi,” na echifeo ipfo Betlehemu ipfo mṟinyi fo Dawidi. 43Nahong'u mamingi fulya fo wandu fukadumbukana kawi kimaduma kyake. 44Kukawekaa-pfo wandu wangu wakundi imbada indi kulakaepfo mombada.
Wasongoru wa Wayuda walawode iidikia
45Nahong'u wasoṟo walya wadume wakawuya na kulya ko wakohanyi wanene na Wafarisayo. Nawo wakawawia, “A nyi ki kyaima mulamwende?” 46Wasoṟo walya wakahalwo, “Kulandewoneke msa adeda cha mndu chupfo.” 47Wafarisayo wakawahalwo, “Nanyo namuiwatandawushe? 48Mlemewona mndu msongoru ma umu tupu amemwidikya ang'u o ipfo ko Wafarisayo? 49Kya indi moṟimboho fu fo wandu fulaichi wuwawaso, wo Mose; wai wasese!”
50 Umu-ho nyi Nikodemo ulya alesahya Yesu kacha, nao nyi o ipfo kiidi kyawo kawawia. 51“Alewo wuwawaso wu luwode nyi wokewonya mndu owingo kulawode nyi ammaa yadanyo komeshika itichyo kilya kyake aletana ngesa?” 52Nawo wakahalwo wakambia, “Kulako na iyo nyi uwukye kulya Galilaya? Suma Maṟehyo Maele teṟe nomanye, ke kulya Galilaya kochikure-pfo mwikimbi manyale-pfo.” [ 53Wakahenda orio mndu na kanyi koke.
Mndu mka mṟuhui
Chwazi Kounye ya:
YOHANE 7: KIM2
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Kimochi Bible © Bible Society of Tanzania, 2016.