Luka 22
22
Inza shʼuYuda amwambiliyʼuYesu
1-2: Mat. 26,1-5. Mal. 14,1. 2.
1Uwene nyenʼuchaka wa makati amasitaṿiluzizyo we vakuti uPasa izina apalamiye. 2Avene navashiputʼavapiti navamanyakalata vahayanganʼizya kumugoga, she vahanyilagʼavantu.
3-6: Mat. 26,14-16. Mal. 14,10. 11.
3NkandʼuSetano wʼayinjiye mwa Yuda we vamupiyʼilya wa mu-Kalyoti, wʼali wa vishumi navavili. 4Wʼahavala kuvashiputʼavapiti nakuvatwale, ahayanga navo izya kumwambililʼuYesu. 5Pʼavene vahaseshela, vahitinkana ukumulipilʼimpiya. 6Pʼahitiha. Pʼahanzʼapinza apa kumwambilila pavusitʼava-ntʼavinji.
Ukuyananya isha kulya sha kumpelela
7-23: Mat. 26,17-29. Mal. 14,12-25.
7Pisiku lya makati amasitaṿiluzizyo lihinza, ilya kuvolelʼahagonzi ha Pasa. 8PʼuYesu ahavatumʼavaPeteli nuYohani, ahati: Muvale muhayananye uPasa tuhalyanje. 9Avene vahati: Wati tuhayananye poshi? 10Uwenʼahavavuzya ahati: Yenyi, inga muvazilʼukufiha munkaya mula, pe mulihomana numuntu, wʼavegayʼinsonta ya minzi. We muhamulandate, muhinjile nawo munyumba mwengʼakwinjila. 11Muhayanje nawo numuhatanyumba muhatinji: Umusambilizi akukuvuzya ukuti inyumba ya kulila mumwo ahagonzi ha Pasa nane navasundikwa vane yili kwi? 12Pe muliyagʼuwene akuvasontelʼinyumbʼimpiti ya kwigulu, mwe vaye mumwo niṿwa kutendamila. Mwe muhayananye. 13Pe vahavala vahaga inza she lilyo lyʼavavu-zizye. Pe vahayananizyʼuPasa.
UYesu akulya sha kumpelela poka navasundikwa vakwe
14Ilelo pe lwe vafishe pahavalilizyo, pʼahatendama navapositili. 15Pʼahavavuzya ahati: Nasungwa kwe kusungwa kwa nalyoli ukuti tulye swenti uPasa uno nane namwe, lwe suti nchilʼukuyimba. 16She nkuvavuzyʼine nkuti: Ntalivuyizya nohavili ukulyʼuPasa uno ukufiha lula lwe zilunjisile mushinamwene sha Mulungu. 17Pʼahasendʼishikombe, ahasalifwa ahati: Alʼishikombʼishi, mugavane mwemwe. 18She nkuvavuzyʼine nkuti: Nkwanda shinishi, ntalivuyizya nohavili ukungʼwelʼilya nsanga zya mampensyʼili, nkuvala nkufiha pupo pe shinzilʼishinamwene sha Mulungu. 19Pʼahasendʼumukati, ahasalifwa, ahawumensulanya, ahavapa ahati: Uno we muvili wane wʼakuvafwila mwenemwe. She muhonzyaje vovulo, shima havanje aha kunkumbushila nene. 20Shope nishikombe vovulo lwe valiye iṿwa shamazuva, ahati: Ishikombʼishi lwe lumfingwi ulwa mumavanda gane ge gakwitiha pazyinyu. 21Mwenye lelo! Umuhono wʼuno wʼakunanilila wʼali nane panapa pameza. 22UwenʼuMwanamuntu we washi wʼakuvala inza she zizyo zihomelezilwe nzila. Nkandi ye mwe, we muntu wʼukumwanilila. 23Pʼavene vahandʼukuvuzilizanya vahati: Wunanu panapa wʼakuvomba zinizi?
Uvupiti vwa nalyoli
25. 26: Mat. 20,25-27. Mal. 10,42-44.
24Pe gahanda gope namadali mwe vavaliye aga kuti: Amwʼunanu wʼakuvʼumupiti swenti mwe tuvaliye? 25Uwenʼahavavuzya ahati: Navamwene va vakunzi vakuvakonzya, nave vavalemeyʼamahʼavantu vavo vakuvataha ukuva vasungansi. 26Imwe nyene mutahonzyaje vovulo. Uno wenga mupiti kulʼimwe, we pakuti ayipelajʼukuva munsi kuli vonti; uwenʼuno wenga wa kulongola kwilongolela, we pakuti ayipelajʼukuva wa kuvavombelʼavamwavo. 27Nuno wʼatendimʼukulya nuno wʼakutelamihʼiṿwa kulya—umupiti wʼunanu? Te ula wʼakutendama? Ine nyene mulʼimwe njipezilʼukuva ne wa kuvavombelʼimwe. 28Nkandʼimwe mudiliye, mwe mwumishizizye ukuva nane lwe nkulingwa. 29Pe nane nkwe mbapanjʼuvumwene namwenemwe inza she nanʼuTata ampiyʼuvumwene, 30ukuti muhalye ukuti muhangʼwele pameza yane muvumwene vwane, ukuti muhatendamaje paṿitengo ṿwa vumwene, muhalongajʼinkolo zyonti ishumi nazivili zya Yisilayili.
Ukuyihana kwa Peteli kwakuvwilwa nuYesu
31-34: Mat. 26,31-35. Mal. 14,27-31. Yoh. 13,36-38.
31We Simoni, Simoni, yenyʼuSetano avalaṿilʼimwe atili mbapementaje inza shʼumuntu akupementʼuvulezi. 32Nkandʼine nkulaviyʼiwe ulwitiho lwaho ukuti lutadumushe. Nawe lelo inga lumo inga uyinzilʼukupinduha nohavili, pʼuve uvajimṿwajʼamaha avamwinyu. 33Uwenʼahamu vuzya ahati: Mwene, njisenginye nzilʼine ukulandatana nawe namujela namuvufwe. 34Uwene nyenʼahati: Uleshe nkuvuzye nene, we Peteli, we musanyʼuno lwʼinkandʼishili nukuvilishila, she pʼuyihanile hatatu kukwane iwe utili ntamumanyilʼine.
35Pʼahavavuzilizya ahati: Pala pe nkavatuma, pala pe mili kwe ndali ukusenda nimbugulu, ye ndali nimpayo, zye ndali nindyato, pe mwapotwaga yimo lelo? Avene vahati: Ha naṿimo. 36Pʼahavavuzya ahati: Shinishi nyene uno wengʼali nimbugulu pʼayisende, yope nimpayo vovulo. Nkandi wuyo wʼate naṿwo naṿimo, wʼakazyajʼinkanzu yakwe, ayanzʼishipanga. 37She nkuvavuzyʼine nkuti: Lisyaye suti izwi lye lisimṿilwe ukwinza kulʼine, lye likuti: Vamusanginye navilanyankomelezyo. She gontʼamazwi ge gakunjangʼine, gakwinza gakulunjiha. 38Avene vahati: Mwene, yenya ṿiṿino iṿipanga ṿivili. Pʼuwenʼahati: Ṿijiye.
Getesimani
39-46: Mat. 26,30; 36-46. Mal. 14,26; 32-42.
39Pʼahafuma kunzi, ahavala kwigamba lya Mavula inza shʼahahonzyaga shima. Vope navasundikwa vakwe vahamulandata. 40Ilelo lwʼavazilʼukufiha, pʼahavavuzya ahati: Simuputaje ulutazyo ukuti lutavagwilaje. 41Uwenʼahaseguha kumwavo, ahavala ahalinga pe hapeleleyʼahatambwi aha kusumbilʼivwe. Pʼahasugamila pansi, ahaputa, 42ahati: We Tata, inga witihagʼiwe ishikombʼishi shipitilile papane! Nkandi ne washʼine zye nkasimʼine, manyi wenewe zyengʼukasimʼiwe, zye zyinzaje. 43Pʼahamwitushizyʼuhavizya wa kumwanya, ahamujimṿwʼamaha. 44Ilelʼumwoyo lwʼakwelela nishitetemwi, pʼahapitilizya nkani ukuputa. Pʼamatwinsi gakwe gahava fwe malagaṿula ga mavanda lwe gakugwa pansi. 45Pʼahavuha mwʼahaputaga, ahavala pe valʼavasundikwa vakwe, ahaga vakasitʼutulo twa kuswimililwa. 46Ahayanga navo ahati: Pe mukukata shonʼutulo shinishi? Simuvushe muputaje ulutazyo ukuti lutavagwilaje.
Ukulemwa kwa Yesu
47-53: Mat. 26,47-56. Mal. 14,43-49. Yoh. 18,2-11.
47Ilelo lwʼamakuyangʼamazwi ganagʼuwene, yenyi, pe valʼavantʼimpuga, pʼali nuYuda uwʼishumi navavili alongoleye kwilongolela, ahapalamila kwa Yesu, ahati imufipe. 48UwenʼuYesu pʼahamuvuzya ahati: We Yuda, ukumwanililʼuMwanamuntu nulufipo? 49Avene lelo ve vali nawʼuYesu lwe vaziwenyi kwe zikuvalila, pe vahamuvuzilizya vahati: Mwene, ingavanga tuvadibe nishipanga? 50Pe wokʼuwamwavo ahamudibʼumunyamata wa washiputʼumupiti, ahamusengʼikutwi lya kumulilo. 51PʼuYesu ahavamula ahati: Mwe, leshi! Pʼahamupalamansyʼikutwi, pe lihamela nohavili. 52PʼuYesu ahayanga navo navashiputʼavapiti navasungatempeli navasongo ve vamwinzile ahati: Lwe mwinzilʼukundemʼine pe muli fwe ngati mutili tukuvalʼukumulemʼumupumaṿintu, musenzite niṿipanga namakunku. 53Shima lwe twizizye swenti mwa tempeli, pe mutandemaga, nkandi panapa he havalilizyo hinyu hanaha, ge maha ga mushisi ganaga.
UPeteli akuyihana kwa Yesu
54-62: Mat. 26,57; 58; 69-75. Mal. 14,53; 54; 66-72. Yoh. 18,12-18; 25-27.
54Pe vahamulema, vahamudendemula, vahavalʼukwinjila nawo munyumba ya washiputʼumupiti. UwenʼuPeteli ahalandata ukutali. 55Pe vahapembʼumwoto paluvungano pahati, pe vahatendama. Wope nuPeteli ahatendama navo. 56Pe wokʼumuzyʼumwantanda ahamwenya lwʼatendime mushenjelezi sha mwoto, ahamutontomela, ahati: Wope nawununo ayanga numuntʼula. 57Uwenʼahahana ahati: We mwantanda, ntamumanyile nakumo. 58Lwe vizizye hansi, pʼahayanga uwamwavʼumuntu ahati: We nawenewe we wamwavo wa vala. UwenʼuPeteli ahati: Ha muntu we, ine ndali. 59Ilelo lwe hashilinkine havili ahavalilizyo hoka, pʼahavuhʼukusimishizya uwamwavo ahati: Nalyoli wope nawununo avanga nawo ula. She muGalilayi. 60UwenʼuPeteli ahati: We muntu, muzimanyile zyʼukuyanga. Ilelo pe apashezi panapo lwʼakuyanga vovulo, pʼinkanda ihavilishila. 61PʼuMwene ahamushevelʼuPeteli. PʼuPeteli ahakumbuhʼizwi lyʼuMwene amuvuzizye lyʼatili: Lwʼinkanda ishili nukuvilishila, pʼuyihanile hatatu kukwane. 62Pʼahafuma kunzi, ahakutʼamansozi nahavwila.
63-65: Mat. 26,67; 68. Mal. 14,55-64.
63Avene lelʼavantu ve vamulemilʼuYesu vahamwizizya, vahamuhoma. 64Vahamugwinchila kuminso, ilelo vahamuvuzilizya vahati: Ukwo, kuvwaga lelo, unanu wʼakuhomile? 65Havili vahamuliga nizinji izya musamʼinyinji.
UYesu kuwashiputʼumupiti
66-71: Mat. 26,59-66. Mal. 14,55-64.
66Vazile lelo lwe kushiye shanzanche, pe vahavungana navahombe va vantu navashiputʼavapiti navamanyakalata, vahamudendemula kubalaza lyavo. 67Vahati: Inga we Chilisiti wenewe, pʼutuvuzyaje. Uwenʼahamula ahati: Apene penga natinji mbavuzye, pe mutangitiha. 68Inga natinji mbavuzilizye zimo, pe mutanganamula. 69Akwanda shinishi uMwanamuntu akutendama kumuhonʼumulilo wa maha gakwe uMulungu. 70Pe vonti vahati: Ingavanga lelo we Mwana wa Mulungu wenewe? Pʼuwenʼahati: Inza she lilyo mukuyanga, nkwe nene. 71Pʼavene vahavuzanya vahati: Pe twatinji tuzyanze zyashʼizinji izya kumulonjelela? She swenti twiṿuye zyʼakuyanga mwilomu.
Chwazi Kounye ya:
Luka 22: NYi1965
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Nyiha New Testament © British and Foreign Bible Society, 1965.