Luk. 24
24
Ayarun a Yesu
(Mat. 28:1-10; Mar. 16:1-8; Yoa. 20:1-10)
1Taparacu akoloŋit ŋina ke Esabit, todilokis ŋaberu nalyal ekodito akimyet ŋina akukunyon ŋina etemokinito ikes. 2Toryamut ikes amoru kikokoriyor alokek ka alyal, 3ido tolomasi tooma; nai nyeryamut akuwan ŋina ke Ekapolon Yesu. 4Ani eriŋa ikes ewuasi a nen eŋayaŋayato a ŋakiro a ŋun, towua ŋinapeipaki ŋikilyok ŋiarei ŋulu anapito ŋilowi ŋulu amilimilete alodiye kec. 5Tobul ŋaberu nooi kijuuroto; kiŋita ŋikilyok ŋul ikes temasi, “Kaanukiro iwaritotor iyes ituŋanan ŋini eyari lotuŋa ŋulu etwakito? 6Emam iŋes a ne, anerae ayaru. Totamutu ŋina paaran ikilimonokinia iŋes iyes, ŋina ayakar iŋes Galileya ŋina abaakar, 7‘Itemokino Lokoku a Ituŋanan kipotokinoe nakan a ŋikasecak, kibubukinoe lomusalaba, ido toyaru kelunyar ŋirwa ŋiuni!’ ”
8Totamut nai ŋaberu ŋakiro ŋuna abala Yesu ŋun, 9toboŋosi analyal, tolimokis ŋulutomon ka epei ka ŋituŋa ŋuluce daadaŋ ŋakiro ŋun. 10Arae ŋaberu ŋun Maria Magadalena, Joanna ka Maria toto a Yakobo ta ŋakecerukitos; ikes alimokinete ŋikasyomak ŋakiro ŋun daadaŋ. 11Nai tobas ŋikasyomak erae ŋakiro ŋuna alimokinete ŋaberu ikes alyokonu, towout akinup. 12(Nai tonyou Petero kipiiri nalyal. Todol iŋes nalyal tokukokin toripik, kiŋolik ŋilowi ŋulu sek aenitere akuwan a Yesu ebilakina make eya nalyal. Toboŋo iŋes lore eŋayaŋayat pa eyeni ŋuna kepotu kitiyakin.)
Alorot a ŋolo elosi Emmaus
(Mar. 16:12-13)
13Akoloŋit ŋinapei ŋin, alosete ŋikewuapak a Yesu ŋiarei lore ŋolo anyaritae Emmaus, neni arae ŋakilomitae ŋatomon ka apei alo Yerusalem. 14Eanete ikes ŋakiro daadaŋ ŋuna apotu kitiyakin. 15Apaki ŋina eaniata ikes, todita Yesu ikes elosete, torukosi kaapei. 16Kiŋolikis ikes Yesu, nai kibiler nyeyan ikes iŋes. 17Kiŋit Yesu ikes tema, “Anukiro ŋuna ianete iyes alorot nu?” Towua ikes esiliyorito. 18Toboŋok epei kec ŋolo anyaritae Kileopa iŋes tema, “Iyoŋ bon irae epeyonon alo Yerusalem, ŋolo nyiyeni ŋakiro ŋuna etiyakin a nen ŋirwa lupei bien lu a?”
19Tema Yesu iŋisi ikes, “Anukiro?” Toboŋokis ikes temasi, “Ŋakiro ŋuna etiyakin neni a Yesu a ŋolo a Nasaret. Arae iŋes kire ekadwaran ŋolo ka Akuj, ŋolo etiyae ŋakujuwuanisya, nabo etatami ŋakiro ŋuna apolok alokiŋaren Akuj ka alokiŋaren ŋituŋa. 20Apotu ŋisacaradotin ŋulu apolok ka ŋikarikok totubut atemar itemokino iŋes toarae; kibubukis iŋes lomusalaba. 21Ikigeno sek isua atemar kori iŋes eiuni ŋituŋa ŋulu a Isirael! Nabo, erae tokona ŋirwa ŋiuni alunyarosi ŋinapei etiyakinotor ŋakiro ŋun. 22Nai ikituumikis isua ŋaceberu ŋuna erae ŋarukitos kosi; kedilokinito ikes taparacu nalyal a Yesu, 23nai nyeryamut akuwan keŋ. Toboŋut ikes ebasi ebe ikianyu atakanikinet ŋina a ŋimalaikan a ŋulu abasi ayaru iŋes. 24Toloto ŋice aneni kosi nalyal, torukaut ikote nenipei abasi ŋaberu, nai nyiŋolikis iŋes.”
25Tolimok Yesu ikes tema, “Okoe egogoŋ iyes ŋakyes! Etyono ŋitai kus akinup atipei ŋakiro daadaŋ ŋuna a ŋikadwarak. 26Nyiyenete iyes atemar etemokino Kristo toryamu ŋican, ikotere tolomarya napolou keŋ a?” 27Kisyak nai iŋes akisileerekin ikes ŋakiro ŋuna ka Akuj ŋuna igiritae Nakigireta aŋuna keŋ, ameun alokitaaboi a ŋulu a Moses tari lokadwarak daadaŋ.
28Ani eapiyarete ikes diye ere ŋolo alosete, tosub acamit Yesu akiporor; 29nai kimaimaa ikes iŋes temasi, “Bua apena lore kosi, anerae awar ka eryoniu akwap.” Tolot iŋes toloma tooma, toruko ka ikes. 30Ani iboikinosi Yesu ka ikes akimuj alomesa, tolemu iŋes amugati, kilipak ka tonyilinyili inak ikes. 31Toŋaar ŋatameta kec, toyena iŋes, nai topuripuryaar iŋes anakonyen kec. 32Kirworikinos ikes temasi, “Pa mono ariraete ŋitai yok ka alakara apaki ŋina erworor iŋes neni yok alorot ka ŋina ikisileerekinio iŋes iwon ŋuna igiritae Nakigireta a?”
33Torotokis ikes atipei, toboŋosi Yerusalem. Torukaut ŋulutomon ka epei ka ŋuluce ecunakina iwapei, 34tolimokis ikes temasi, “Erae kire ŋakiro ŋun! Ayaru Ekapolon atakanu daŋ neni a Simoni!”
35Kitatamikis ŋikewuapak ŋuluarei ŋul ikes ŋakiro ŋuna atakanikinito ikes alorot ka epite ŋolo ayeniata ikes Ekapolon apaki ŋina anyilinyiliya iŋes amugati.
Totakanu Yesu lokasyomak keŋ
(Mat. 28:16-20; Mar. 16:14-18; Yoa. 20:19-23; Ŋitic. 1:6-8)
36Ani eriŋa ikes itatamete ŋakiro nu, towo Yesu alokidiŋ kec tolimu tema, “Ekisil toyai neni kus.”
37Tobul ikes nooi temasi kori ikiŋolik ekipye. 38Nai tolimok Yesu ikes tema, “Anukiro eryebete ŋitai kus? Nyo elalaa aŋayaŋayat alotai kus? 39Kiŋolikisi ŋakaakan ka ŋakaakejen; erae ayoŋ. Totapae ayoŋ kiŋolikis; emamukar ekipye akuwan ka ŋakoyo ikwaŋina tokona iteoto iyes ayakar ayoŋ.”
40Ani kelimu Yesu ŋun, kitoodik iŋes ikes ŋakan ka ŋakejen keŋ. 41Nai eriŋa ikes jik nyenupa aŋuna ka alelyan ka aumokinit ŋina apolon nooi. Aŋun, kiŋit Yesu ikes tema, “Iyakatar iyes ibore idio ŋini nyamat a?” 42Inakis ikes iŋes atubet ŋina ke ekolya a ŋolo apeitoi. 43Kijau iŋes, tonyam alokiŋaren kec.
44Tolimok Yesu ikes tema, “Erae ŋakiro nu ŋuna paaran akalimokinit ayoŋ iyes eriŋa iwon ikirukit; ŋakiro daadaŋ ŋuna egiritae a ŋuna kaŋ Lokisila ŋulu a Moses ka nakigireta ŋuna a ŋikadwarak ta lokirukisyo a Daudi; itemokino daadaŋ kiyookin.”
45Toŋaaros ŋatameta kec toyenut ŋuna igiritae Nakigireta. 46Tolimok ikes tema, “Nugu ikes ŋuna igiritae atemar itemokino Kristo toryamu ŋican, ido toyaru kelunyar ŋirwa ŋiuni. 47Itemokino kitatamae akiki ka akisyon ŋasecisya lobukui daadaŋ alokiro keŋ, akisyakin alo Yerusalem. 48Irae iyes ŋisuudae a ŋakiro a nu. 49Eyakuuni ayoŋ neni kus ŋolo ikiik Papa iyes. Nai itemokino iyes kidareut a ne alo Yerusalem, akitodol akoloŋit ŋina iryamuniata iyes apedor ŋina ebunit alokidiama.”
Yaarae Yesu nakuj
(Mar. 16:19-20; Ŋitic. 1:9-11)
50Tosodi toriko iŋes ikes Betania. Kikyaa iŋes ŋakeekan a nen, kiterereŋ ikes. 51Ani eriŋa iŋes iterereŋi ikes, kikyaarae iŋes alokiŋaren kec, tolot nakuj. 52Toryediko ikes, kilipa neni keŋ; ani irikakin, toboŋosi Yerusalem elakara nooi, 53ido toloto akiboi alo Kai ka Akuj, ipurosi Akuj jwi jwi ka elelyanete.
Chwazi Kounye ya:
Luk. 24: NIB2008
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Ngakarimojong Interconfessional Bible © Bible Society of Uganda, 2008.