Neyemi 4
4
Lènmi sòti pou kontrarye travay la
1 # 4.1-23: Koresponn ak chapit 3.33—4.22 nan tèks ebre a. Lè Sanbala vin konnen nou menm jwif #Ney 2.10 yo nou t'ap rebati miray ranpa a, li fache, li move. 2Li konmanse pase nou nan betiz. Li t'ap di devan moun pa l yo ak devan sòlda lame peyi Samari a:
— Kisa jwif yo konprann y'ap fè la a? Yo ta renmen rebati lavil la. Yo konprann avèk tout bèt y'ap ofri pou touye yo, nan yon jou yo pral fini? Yo mete nan tèt yo avèk demoli ki fin tounen pousyè ak sann dife yo ka fè wòch pou rebati lavil la.
3Tobija, moun peyi Amon an, te kanpe bò kote Sanbala. Li t'ap di:
— Anhan! Y'ap rebati! Kite yon chat mawon vole sou miray wòch yo a, sa kont pou jete l atè!
4Lè #Sòm 79.12; 123.3,4 sa a, mwen menm, Neyemi, mwen lapriyè Bondye. Mwen di l:
— O Bondye papa nou! Tande jan y'ap pase nou nan betiz! Sa yo ta renmen wè rive nou an, se sa ki pou rive yo! Se yo ki pou wont! Se pou lènmi vin fè yo prizonye epi pou li depòte yo tout nan yon lòt peyi. 5Pa #Sòm 109.14,15; Jer 18.23 padonnen sa yo fè ki mal. Pa janm bliye peche yo fè a, paske yo t'ap pale moun ki t'ap rebati lavil ou a mal.
6Se konsa, nou t'ap rebati ranpa a. Anvan lontan, ranpa a te gentan rive nan mwatye wotè, paske pèp la te sòti pou l te fè travay la.
7Lè #Ney 2.10 Sanbala ak Tobija ansanm ak moun Arabi yo, moun Amon yo ak moun Achdòd yo tande travay reparasyon miray ranpa lavil Jerizalèm yo t'ap mache, epi twou ki te nan miray yo te konmanse bouche, yo fè gwo kòlè, yo fache. 8Yo #Sòm 83.3-5 mete tèt yo ansanm pou yo vin atake lavil Jerizalèm, pou yo bay pwoblèm. 9Men, #Mak 14.38 nou lapriyè Bondye nou an, epi nou mete moun ap veye lajounen kou lannwit, pou pwoteje nou.
10Men, moun peyi Jida yo t'ap plede di:
— Nou fin fèb nan pote chay!
Gen twòp vye ranble pou n netwaye!
Nou p'ap janm fin rebati miray sa a!
11Lènmi nou yo menm, bò pa yo, t'ap di:
— San yo pa konnen, san yo pa wè anyen, n'ap gentan nan mitan yo. N'ap masakre yo, n'ap fè travay la sispann.
12Men, chak fwa lènmi nou yo moute vin atake nou, jwif ki t'ap viv nan mitan yo te vin avèti nou. Konsa konsa, an dis fwa. 13Lè konsa, mwen ranje pèp la dèyè ranpa a, chak fanmi apa, avèk nepe yo, frenn yo ak banza yo. Mwen mete yo kote miray la pat ankò fini an. 14Lè #Det 1.29; 7.21; 10.17; 2 Sam 10.12 m'wè pèp la te gen kè sote, mwen leve, mwen pale ak chèf yo ak majistra yo ak tout rès pèp la, mwen di yo:
— Nou pa bezwen pè moun sa yo! Chonje jan Senyè a gen pouvwa, jan li fè moun respekte li. Annou goumen pou moun menm ras ak nou, pou pitit fi nou, pou pitit gason nou, pou madanm nou ak kay nou.
15Lè #Jòb 5.12 lènmi nou yo wè nou te konnen sa yo t'ap konplote a, yo vin konprann Bondye te sòti pou gate plan yo. Apre sa, nou tounen al travay nan miray ranpa a, chak moun bò pa yo.
16Depi lè sa a, mwatye nan gason yo al nan travay, lòt mwatye a t'ap veye avèk frenn yo, pwotèj pou bra yo, banza yo ak gwo plak fè sou lestonmak yo pou pwoteje yo. Tout chèf yo te la dèyè pèp Jida a 17ki t'ap rebati ranpa a. Tout moun ki t'ap bwote materyo te gen zam tou. Yo t'ap travay ak yon men, nan lòt men an yo te kenbe zam yo. 18Moun ki t'ap travay yo menm te toujou gen yon nepe pase nan ren yo. Nèg ki te konn kònen klewon an te toujou bò kote m. 19Mwen di chèf yo, majistra yo ansanm ak tout rès pèp la:
— Chantye a se yon gwo chantye. Travay la gaye, kifè nou yonn pa pre lòt sou ranpa a. 20Depi #Egz 14.14,25; Det 1.30; 3.22; Joz 23.10 nou tande klewon an bay siyal la, n'a kouri vin sanble bò kote m. Bondye nou an va goumen pou nou.
21Se konsa, chak jou, depi bajou kase jouk zetwal parèt nan syèl la, mwatye nan nou t'ap mennen travay la sou ranpa a, lòt mwatye a t'ap veye avèk zam yo nan men yo.
22Nan menm epòk la, mwen pale ak pèp la. Mwen di yo konsa:
— Se pou tout moun rete pase nwit lavil Jerizalèm ansanm ak domestik yo. Konsa, n'a pase tout nwit la ap veye. Lajounen, n'a travay.
23Se konsa, lannwit, nou pa janm wete rad sou nou, ni mwen, ni frè parèy mwen yo, ni domestik nou yo, ni gad kò m yo. Nou tout nou te gen zam nou bò kote nou.
Chwazi Kounye ya:
Neyemi 4: HAT98
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Haitian Creole DC Bible © Societé Biblique Haïtienne, 1998.