Levitik 13
13
Regleman sou maladi po
1Senyè a pale ak Moyiz ansanm ak Arawon, li di yo konsa:
2— Si #Det 24.8 yon moun wè yon kote sou po kò l anfle, ou ankò si li wè yon bouton osinon yon tach parèt sou po l ki ta vle sanble konmansman yon move maladi po ki ka kontaminen lòt moun, y'a mennen l bay Arawon, prèt la, ou ankò bay yonn nan pitit li yo ki prèt tou. 3Prèt la va egzaminen kote ki malad la. Si plim yo vin tou blan epi si maladi a fouye chè a ti kras, l'a konnen se yon maladi atrapan ki ka kontaminen lòt moun. Lè prèt la wè sa, l'a fè konnen moun lan pa nan kondisyon pou li fè sèvis Bondye. 4Men si kote po a anfle a tou blan san li pa fouye, si plim yo vin tou blan, prèt la va fèmen moun lan yon kote poukont li pandan sèt jou ankò. 5Sou setyèm jou a, prèt la va egzaminen l ankò. Si li wè bouton an rete menm jan an, li pa laji sou po a, prèt la va fèmen moun lan pou kont li pou sèt jou ankò. 6Apre #Lev 11.25 sa, prèt la va egzaminen l ankò. Si bouton an cheche, si li pa laji kò l sou po a, prèt la va fè konnen moun lan nan kondisyon pou l fè sèvis Bondye. Se yon bouton ase li te genyen. Lè sa a, moun lan va lave rad li, epi l'ap nan kondisyon pou l fè sèvis pou Bondye. 7Men si bouton an vin pi laj sou po a, apre prèt la te fin di moun lan bon lè li te wè l la, se pou moun lan parèt devan prèt la ankò. 8Prèt la va egzaminen l ankò. Si li wè bouton an vin pi laj sou po a, prèt la va fè konnen moun lan pa nan kondisyon pou fè sèvis Bondye. Se yon move maladi po li genyen!
9Lè yon moun va gen yon move maladi po sou li, y'a mennen l bay prèt la. 10Prèt #Nonb 12.10,12; 2 Wa 5.27; Mat 8.4; Lik 17.14 la va egzaminen li. Si li wè yon bouton blan sou po a ki fè plim yo vin tou blan, si bouton an plen postim, 11se va yon move maladi po ki chita sou li. Prèt la va fè konnen nonm lan pa nan kondisyon pou fè sèvis pou Bondye. Li p'ap bezwen fèmen l yon kote pou kont li, paske se bagay ki klè, nonm lan pa nan kondisyon pou fè sèvis pou Bondye. 12Men, si maladi a gaye sou tout kò l, si li kouvri ak bouton depi nan tèt jouk nan pye, kifè kote prèt la voye je l li wè se bouton, 13prèt la va egzaminen l ankò. Si maladi a kouvri tout kò l, prèt la va di moun lan toujou nan kondisyon pou fè sèvis Bondye. Depi tout kò l vin tou blan, li nan kondisyon pou fè sèvis Bondye. 14Men, jou yon bouton pete, li p'ap nan kondisyon pou fè sèvis Bondye. 15Prèt la va egzaminen l ankò. Si li wè yon bouton pete, l'a fè konnen nonm lan pa nan kondisyon pou fè sèvis Bondye. Depi bouton an pete se yon move maladi po li genyen, nonm lan pa nan kondisyon pou fè sèvis Bondye. 16Men, lè bouton an va konmanse geri, po a konmanse vin blan ankò, moun lan va tounen al jwenn prèt la. 17Prèt la va egzaminen l ankò. Si li wè bouton an vin tou blan, prèt la va fè konnen nonm lan nan kondisyon pou fè sèvis Bondye.
18Si yon moun gen yon apse ki geri, 19men #Lev 13.24 kote apse a te ye a vin anfle, ou ankò yon ti bouton wouj anba po a vin parèt, se pou l al wè prèt la. 20Prèt la va egzamnen li. Si bouton an genlè yon ti jan pi fon pase rès po a, epi si plim ki ladan yo vin tou blan, prèt la va fè konnen moun lan pa nan kondisyon pou fè sèvis Bondye. Se yon move maladi po k'ap parèt sou mak apse a. 21Men prèt la va egzaminen li. Si li wè plim ki ladan yo pa blan, si bouton an pa pi fon pase rès po a, si li kòmanse chanje koulè, prèt la va fèmen moun lan yon kote poukont li pandan sèt jou. 22Si bouton an gaye sou tout kò l, prèt la va fè konnen moun lan pa nan kondisyon pou fè sèvis Bondye. Se yon move maladi po li genyen. 23Men, #Lev 13.28 si bouton an rete jan l te ye a, y'a konnen se mak apse a ase li ye. Prèt la va fè konnen moun lan pa gen anyen, li toujou nan kondisyon pou fè sèvis Bondye.
24Ou #Lev 13.19 ankò, lè yon moun boule nan dife, si lè li konmanse geri, po a vin yon ti jan wouj e blan, 25rèt la va egzaminen li. Si li wè plim yo vin blan epi si tach la genlè pi fon pase rès po a, y'a konnen se yon move maladi po k'ap devlope sou boule a. Prèt la va fè konnen moun lan pa nan kondisyon pou fè sèvis Bondye. Se yon move maladi po li genyen. 26Men, si lè prèt la egzaminen l li pa jwenn pwal blan ladan l, epi tach la pa pi fon pase rès po a, men li ta vle chanje koulè, prèt la va fèmen l yon kote pou kont li pou sèt jou. 27Sou setyèm jou a, prèt la va egzaminen l ankò. Si li wè tach la ap gaye, l'a konnen se yon move maladi po li genyen. Lè sa a, prèt la va fè konnen moun lan pa nan kondisyon pou l fè sèvis Bondye. 28Men, #Lev 13.23 si tach la rete jan l te ye a, si li pa gaye sou po a, si se koulè a ase ki chanje, l'a konnen se mak boule a ase li ye. Prèt la va fè konnen moun lan toujou nan kondisyon pou fè sèvis Bondye, paske se boule a k'ap geri.
29Lè yon gason osinon yon fanm gen yon kote nan cheve l osinon nan bab li ki fè yon plak, 30prèt la va egzaminen plak la. Si li genlè pi fon pase rès po a, si li gen cheve yon ti jan jòn, fen fen ladan l, l'a konnen se pyas moun lan genyen. Se yon move maladi po ki parèt nan cheve l osinon nan bab li. Prèt la va fè konnen moun lan pa nan kondisyon pou fè sèvis Bondye. 31Men, lè prèt la egzaminen plak pyas la, si li wè genlè li pa pi fon pase rès po a, epi cheve ki ladan l yo yon ti jan jòn, prèt la va fèmen moun lan yon kote pou kont li pou sèt jou. 32Sou setyèm jou a, prèt la va egzaminen maleng lan ankò. Si pyas la gaye, si cheve ki ladan l yo pa vin jòn, si li genlè pa pi fon pase rès po a, 33moun lan va koupe tout cheve nan tèt li san l pa manyen pyas la. Apre sa, prèt la va fèmen l yon kote pou kont li pou sèt jou ankò. 34Sou setyèm jou a, prèt la va egzaminen l ankò. Si pyas la pa laji sou po a, si li pa fouye po a, prèt la va fè konnen moun lan nan kondisyon pou fè sèvis Bondye. Moun lan menm va lave rad sou li, epi l'a nan kondisyon pou fè sèvis Bondye ankò. 35Men, si apre prèt la te fin di moun lan nan bon kondisyon an, pyas la gaye tout bon vre sou po a, 36prèt la va egzaminen l ankò. Si pyas la gaye vre sou po a, li pa bezwen chache wè si li gen cheve jòn ankò. L'a tou konnen moun lan pa nan kondisyon pou fè sèvis Bondye. 37Men si li wè pyas la rete jan l te ye a, epi cheve nwa ap pouse sou li, l'a tou konnen pyas la geri, epi prèt la va fè konnen moun lan nan kondisyon pou fè sèvis Bondye.
38Lè yon gason osinon yon fanm gen ti tach blan ki parèt sou po l, 39prèt la va egzaminen l. Si tach yo yon ti koulè blan sal, l'a konnen se yon ti gratèl ki parèt sou po a, moun lan toujou nan kondisyon pou fè sèvis Bondye.
40Lè yon nonm pèdi tout cheve nan tèt li, li chòv. Sa pa vle di li pa nan kondisyon pou fè sèvis Bondye. 41Konsa tou, lè yon moun pèdi cheve sou tout devan tèt li, li demi chòv. Sa pa vle di li pa nan kondisyon pou fè sèvis Bondye. 42Men, si kote l chòv la yon ti tach koulè wouj-blan parèt, se ka yon move maladi po k'ap leve sou kò l. 43Lè sa a, prèt la va egzaminen l. Si plak la gen yon ti koulè wouj-blan tankou lè moun gen move maladi po sou kò yo, 44l'a konnen se yon moun ki gen move maladi po. Prèt la va fè konnen moun lan pa nan kondisyon pou fè sèvis Bondye, akòz move maladi po ki parèt sou tèt li a. 45Lè #Lev 10.6; Lam 4.15; Eze 24.17,22; Mi 3.7 yon moun gen yon move maladi po, l'a mete vye rad chire sou li. L'a kite tèt li san penyen, l'a kouvri figi l depi anba nen l desann, epi kote l pase l'a pran rele: Men moun malad! Men moun malad! 46Pandan #Nonb 5.2; 12.14,15; 2 Wa 7.3; 15.5; Lik 17.12 tout tan maladi a va sou li, li p'ap nan kondisyon pou fè sèvis Bondye. Se yon moun ki gen move maladi po li ye. L'a rete yon kote pou kont li, nan yon kay andeyò limit kote moun rete.
Regleman sou rad kanni
47Lè yon rad fèt an lenn nèt osinon an twal fen blan nèt bay mak tankou li ta vle kanni, #13.47: kanni: Nan lang ebre a yo te sèvi ak menm mo a ni pou maladi po ni pou kanni ki parèt sou rad osinon sou lòt bagay. 48ou ankò lè nan yon moso twal, fil dwat yo osinon fil travè yo, kit yo fèt an lenn ou ankò an kenaf, bay mak tankou yo ta vle kanni, ou ankò lè yon moso po osinon yon bagay fèt an po bay mak tankou li ta vle kanni, 49si kote ki vle kanni an gen yon ti koulè vèt osinon wouj, sa vle di se kanni l'ap kanni. Se pou nou pote l moutre prèt la. 50Prèt la va pran l, l'a egzaminen l epi l'a fèmen bagay ki vle kanni an yon kote pou sèt jou. 51Sou #Lev 14.44 setyèm jou a, prèt la va egzaminen l ankò. Si li wè kanni an gaye sou twal la, osinon li mache nan fil dwat yo osinon nan fil travè yo, oswa sou po a, osinon sou bagay fèt ak po, sa vle di se kanni l'ap kanni vre. Moun k'ap sèvi Bondye pa ka sèvi avè l ankò. 52Prèt la va boule bagay ki kanni an, paske se yon move maladi k'ap manje tout rad la. Se pou yo boule l nan dife.
53Men, si lè prèt la egzaminen l, li jwenn kanni an pa gaye nan twal la osinon nan po a, 54prèt la va bay lòd pou yo lave l. Apre sa, l'a fèmen l ankò yon kote pou sèt jou. 55Sou setyèm jou a, la egzaminen l ankò. Si li wè kote ki te vle kanni an rete menm jan an, menm si li pa gaye sou rès twal la, bagay la pa nan bon kondisyon, moun k'ap sèvi Bondye pa ka sèvi avè l. Se pou yo boule l nan dife, kanni an te mèt sou lanvè ou sou landrèt li. 56Men, si lè prèt la ap egzaminen l dezyèm fwa a, li wè kanni an te pèdi koulè, fwa sa a, l'a chire kote ki te kanni nan twal la osinon nan po a. Ou ankò, l'a wete fil dwat ou fil travè ki te kanni nan twal la. 57Si apre sa, kanni an parèt ankò epi li konmanse gaye nan rès rad la, mèt rad la va boule l. 58Si apre yo lave yon rad, kanni an disparèt, y'a lave l yon dezyèm fwa. Se lè sa a rad la va nan bon kondisyon, moun k'ap sèvi Bondye ka sèvi avè l.
59Men regleman pou nou swiv lè yon rad fèt an lenn osinon an twal fen blan bay mak tankou li ta vle kanni, ou ankò lè nan yon moso twal, fil dwat osinon fil travè yo, kit yo fèt an lenn ou ankò an kenaf, bay mak tankou li ta vle kanni, ou ankò lè yon moso po osinon nenpòt bagay ki fèt an po bay mak tankou li ta vle kanni. Se konsa n'a konnen si moun k'ap sèvi Bondye ka sèvi osinon pa ka sèvi ak yo.
Chwazi Kounye ya:
Levitik 13: HAT98
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Haitian Creole DC Bible © Societé Biblique Haïtienne, 1998.