Travay 11:1-18

Apòt yo ansanm ak frè yo ki te nan Jide te tande ki jan moun ki pa jwif yo te resevwa pawòl Bondye a tou. Lè Pyè tounen moute Jerizalèm, jwif ki te kwè yo tanmen kritike li. Yo di li konsa: — Apa ou antre kay moun ki pa sikonsi yo epi ou manje ak yo met sou li! Lè sa a, Pyè rakonte yo sa k te pase nan tout ti detay. Li di yo: — Mwen te lavil Jope, mwen t'ap lapriyè, lè m fè yon vizyon. Mwen wè yon bagay ki t'ap desann vin jwenn mwen, tankou yon gwo dra mare nan kat bout, ki t'ap desann sot nan syèl la. Li rive toupre mwen. Lè m gade byen gade, mwen wè tout kalite bèt andedan li: bèt kat pat, bèt nan bwa, bèt ki trennen sou vant ak zwazo. Epi m tande yon vwa ki di m konsa: Leve non, Pyè, touye, manje. Men mwen di: Non, Mèt. Mwen pa janm mete move manje osinon manje ki pa bon pou moun k'ap sèvi Bondye nan bouch mwen. Menm vwa a pale ankò nan syèl la, li di mwen konsa: Bagay Bondye di ki bon pou moun k'ap sèvi l, pa di l pa bon pou yo. An twa fwa sa repete. Epi bagay la moute tounen nan syèl la. Menm lè a, twa moun ki te sòti Sezare vin rive nan kay kote m te ye a. Yo te voye yo chache mwen. Lespri a di m pati ak yo san rete ap kalkile. Sis frè sa yo te al ansanm avè m tou Sezare. Nou tout nou antre lakay Kònèy. Kònèy rakonte nou ki jan l te wè yon zanj Bondye kanpe nan mitan lakay li. Zanj lan di li: Voye yon moun lavil Jope al rele Simon (ki gen yon ti non Pyè). Simon sa a va di ou pawòl ki pou sove ou ansanm ak tout fanmi ou. Mwen te konmanse pale lè Sentespri a desann sou yo menm jan li te desann sou nou premye jou a. Lè sa a, mwen vin chonje sa Senyè a te di: Jan te batize nan dlo, men nou menm nou gen pou n resevwa batèm nan Sentespri a. Konsa, Bondye te bay moun sa yo menm kado li te ban nou an lè n te mete konfyans nou nan Senyè Jezikri. Kisa m te ye menm pou m te fè tèt ak Bondye? Lè yo fin tande pawòl sa yo, yo sispann kritike l, yo pran fè lwanj Bondye. Yo t'ap di: Se vre wi. Bondye bay moun ki pa jwif yo chans pou yo chanje, pou yo ka resevwa lavi tou.