1 Samyèl 16:14-23

Lespri Senyè a te kite Sayil, epi Senyè a voye yon move lespri sou li ki t'ap toumante l. Moun k'ap sèvi Sayil yo di l konsa: — Gade! Ou konnen Senyè a voye yon move lespri sou ou k'ap toumante ou! Mèt, annik pase yon lòd, epi nou menm ki la avè ou, n'a chache yon moun ki konn jwe gita. Konsa, chak fwa move lespri a va vin sou ou, moun lan va jwe pou ou, epi w'a santi yon soulajman. Sayil di moun k'ap sèvi l yo: — Al chache yon moun ki konn jwe mizik mennen ban mwen. Yonn nan mesye yo di konsa: — Izayi, moun lavil Betleyèm lan, gen yon pitit gason ki konn jwe mizik. Se yon vanyan gason, yon bon sòlda ki gen bon pawòl nan bouch li. Lèfini, li byen kanpe. Senyè a avèk li. Se konsa Sayil voye kèk mesaje bò kote Izayi pou di li: — Voye David, pitit gason ou ki konn okipe mouton ou yo, ban mwen. Izayi pran yon veso plen diven, yon jenn ti kabrit ak yon bourik chaje pen, li bay David pou li bay Sayil. Epi li voye li al jwenn wa a. Se konsa David al jwenn Sayil ki pran l pou sèvi l. Sayil te vin renmen David anpil. Li pran l pou pote zam li yo. Sayil voye di Izayi konsa: — Tanpri, kite David rete avè m. Mwen renmen l anpil. Depi lè sa a, chak fwa move lespri Bondye te voye a desann sou Sayil, David pran gita a epi li tonbe jwe. Lè konsa, move lespri a kite l, epi Sayil te soulaje, li te santi l byen ankò.