1 Wa 20
20
Lagè ak peyi Siri
1Bennadad, wa peyi Siri a, reyini #1 Wa 15.18; 16.24 tout lame li a. Trannde lòt wa, avèk tout chwal yo ak cha lagè yo, vin mete tèt ansanm avè l. Bennadad mache sou lavil Samari. Li sènen l, li atake l. 2Li voye mesaje anndan lavil la bò kote Akab, wa peyi Izrayèl la, 3pou di li:
— Wa Bennadad voye di ou tout bagay ou gen an lò ak an ajan se pou li yo ye. Tout madanm ou yo ak tout pi bon pitit gason ou yo se pou li yo ye tou.
4Wa Akab reponn:
— Di wa Bennadad, mèt mwen, se jan li vle! Li mèt pran m ansanm ak tou sa m genyen.
5Mesaje yo tounen ankò vin di Akab:
— Men sa Bennadad voye di ou: Mwen te voye mande ou ban mwen tou sa ou gen ki fèt ak lò epi ak lajan, tout madanm ak tout pitit gason ou yo. 6Kounyeya, denmen vè lè konsa, m'ap voye moun pa m yo pou yo fouye palè ou la ak kay tout moun pa ou yo, pou yo pran tou sa y'a jwenn ki gen valè nan je yo.
7Wa #2 Wa 5.7 Akab fè rele tout chèf fanmi ki nan peyi a, li di yo:
— Jan nou wè l' la, nonm sa a soti pou li pran tou sa nou genyen. Li voye mande mwen madanm mwen yo, pitit gason mwen yo ak tout bagay lò, bagay lajan mwen genyen. Mwen pa refize li anyen.
8Chèf fanmi yo ansanm ak pèp la di l konsa:
— Pa koute l, pa dakò avè l!
9Lè sa a, Akab di mesaje Bennadab yo:
— Ale di mèt mwen, wa Bennadab, m te dakò ak sa li te mande m premye fwa a. Men, sa l mande fwa sa a, m pa ka fè l.
Mesaje yo pati, y'al pote repons lan bay Bennadad. 10Bennadab #1 Wa 19.2 voye yo tounen al di Akab:
— M'ap vini ak anpil moun pou m kraze lavil Samari. P'ap gen ase demoli pou m bay chak moun ki avè m yo ti kras pou yo pote ale sitèlman y'ap anpil. Si m pa fè sa, se pou bondye yo ban m pi gwo pinisyon ki genyen.
11Wa #Pwo 27.1 Akab voye reponn li:
— Yon sòlda pa fèt pou l ap vante tèt li anvan l'al goumen.
12Bennadad t'ap bwè ak lòt wa yo anba tant yo lè yo pote repons Akab la ba li. Lamenm, li bay moun pa l yo lòd pou yo mache sou lavil Samari. Se konsa, y'al pare pou atake. 13Lè #1 Wa 18.36; Eze 6.7 sa a, yon pwofèt Bondye vin jwenn Akab, li di l konsa:
— Men sa Senyè a voye di ou: Ou wè tout kantite sòlda sa yo? Enben, mwen pral lage yo nan men ou jòdi a, konsa w'a konnen se mwen menm ki Senyè a.
14Akab mande l:
— Ki moun ou pral fè lage yo nan men m jòdi a?
Pwofèt la reponn li:
— Senyè a voye di ou se jenn sòlda ki sou lòd gouvènè pwovens yo ki pral fè l.
Wa mande ankò:
— Ki moun ki pral atake anvan?
Pwofèt la reponn:
— Ou menm.
15Lamenm, wa a fè rele jenn sòlda ki te sou lòd gouvènè pwovens yo. Li jwenn desantrannde (232) sòlda antou. Apre sa, li fè rele tout lame pèp Izrayèl la, li jwenn sètmil (7.000) gason.
16Vè midi, yo sòti al atake pandan Bennadad ansanm ak trannde lòt wa ki t'ap mache avè l yo t'ap bwè anba tant yo. 17Se jenn sòlda yo ki t'ap mache devan. Bennadad te voye al wè jan sa ye bò kay moun pèp Izrayèl yo. Yo vin di li yo wè yon gwoup sòlda ki t'ap sòti lavil Samari. 18Lè sa a, li di:
— M pa bezwen konnen si y'ap vin pou goumen osinon pou mande lapè, kenbe yo vivan mennen ban mwen.
19Jenn sòlda gouvènè yo sòti nan lavil la pou al atake. Yo t'ap mache devan, rès lame a t'ap swiv yo. 20Yo chak yo touye moun ki te vin pou goumen ak yo a. Moun peyi Siri yo pran kouri, moun Izrayèl yo menm t'ap kouri dèyè yo. Bennadad menm resi chape kò l sou chwal ansanm ak kèk lòt kavalye. 21Wa Akab vin atake lè sa a, li touye chwal moun Siri yo, li kraze cha lagè yo. Li bat moun Siri yo byen bat. 22Apre #2 Sam 11.1 sa, pwofèt la al jwenn wa Akab, li di l konsa:
— Ou mèt tounen kounyeya, mete lame ou la anfòm. Kalkile byen sou sa ou pral fè, paske nan ennan, dat pou dat, wa peyi Siri a ap tounen vin atake ou ankò.
Dezyèm atak wa peyi Siri a
23Chèf ki te avèk wa Bennadad yo vin di l:
— Bondye pèp Izrayèl yo se bondye mòn yo ye. Se poutèt sa yo bat nou jan yo bat nou an. Men, si nou goumen ak yo nan tè plat, wè pa wè, n'ap bat yo. 24Kounyeya, men sa ou pral fè. Wete kòmandman an nan men lòt wa yo, mete chèf pa ou nan plas yo. 25Ou menm ou pral moute yon gwo lame tankou lame ou pèdi a, ak menm kantite chwal ak cha lagè ou te gen anvan an. Nou pral goumen ak moun pèp Izrayèl yo nan plenn. W'ap wè fwa sa a n'ap bat yo.
Wa Bennadad dakò, li fè sa chèf yo te di l fè a. 26Ennan apre, dat pou dat, li reyini tout sòlda moun peyi Siri yo, li mennen yo jouk lavil Afèk pou y'al atake moun peyi Izrayèl yo. 27Akab reyini tout lame pèp Izrayèl la, li ba yo zam ak pwovizyon. Yo sòti al kontre moun Siri yo. Yo separe fè de gwoup, yo moute kan yo devan lame moun Siri yo. Sòlda peyi Izrayèl yo te sanble ak de ti bann kabrit devan lame moun Siri a menm ki te kouvri tout peyi a.
28Yon pwofèt Bondye vin jwenn Akab, wa Izrayèl la, li di l konsa:
— Men mesay Senyè a voye ba ou: Paske moun Siri yo di se yon bondye mòn mwen ye, mwen pa konn tè plat, mwen pral lage tout gwo lame sa a nan men ou. Konsa w'a konnen se mwen menm ki Senyè a.
29Pandan sèt jou, moun Siri yo ak moun Izrayèl yo rete nan kan yo, yonn anfas lòt. Sou setyèm jou a yo konmanse goumen. Moun Izrayèl yo touye sanmil (100.000) moun Siri. 30Sa ki chape yo kouri ale lavil Afèk. Lè yo rive la, miray lavil la tonbe sou yo, li touye vennsètmil (27.000) sòlda ki te rete yo. Bennadad tou te chape kò l nan lagè a. Li antre nan yon kay, l'al kache nan yon pyès jouk nan fon. 31Moun pa l yo vin jwenn li, yo di l konsa:
— Nou tande jan wa peyi Izrayèl yo se moun ki gen bon kè. Ban nou otorizasyon pou n'al jwenn wa peyi Izrayèl la. N'ap mete rad sak sou nou tankou moun yo fè prizonye. Ou pa janm konnen li ka sove lavi ou.
32Se konsa yo mete rad sak sou yo tankou moun ki nan lapenn, yo plotonnen moso kòd nan kou yo, y'al jwenn Akab, yo di l konsa:
— Bennadad voye di ou, monwa, se esklav ou li ye. Tanpri, pa touye l.
Akab reponn:
— An! Mesye vivan toujou. Mwen byen kontan! Se yon frè li ye pou mwen wi!
33Moun Bennadad yo pran sa pou yon bon siy, yo repete pawòl ki te fenk sot nan bouch wa a, yo di l konsa:
— Bennadad, se frè monwa!
Akab reponn:
— Al chache l mennen ban mwen!
Bennadad sòti kote l te ye a, li parèt devan Akab, Akab fè l moute sou cha pa l ansanm avè l. 34Bennadad di li:
— M'ap renmèt ou tout lavil papa m te pran nan men papa ou yo. Ou mèt louvri boutik nan lavil Damas pou vann, menm jan papa m te fè l lavil Samari.
Akab reponn li:
— Si se konsa, w'ap pase yon kontra avè m, mwen menm m'ap kite ou al fè wout ou.
Akab pase yon kontra avèk Bennadad, lèfini li kite l al fè wout li.
Bondye kondannen Akab
35Nan #1 Wa 13.17,18; 2 Wa 2.3; 4.1,38 menm epòk sa a, Senyè a pale ak yon pwofèt nan gwoup pwofèt li yo. Li ba li lòd pou li mande yon lòt pwofèt ba l kou. Men lòt pwofèt la derefize. 36Lè #1 Wa 13.24 sa a, premye pwofèt la di l konsa:
— Poutèt ou derefize obeyi lòd Senyè a, separe n'a separe, yon lyon ap touye ou.
Konsa vre, ale premye pwofèt la ale, yon lyon vin rive, li touye lòt pwofèt la.
37Apre sa, premye pwofèt la kontre yon lòt moun, li mande l pou li ba l kou. Nonm lan frape l byen fò, jouk li mete san l deyò. 38Lèfini, #1 Sam 28.8 pwofèt la kouvri figi l ak yon moso twal pou moun pa rekonèt li, l'al kanpe bò wout la ap tann wa a pase. 39Lè #2 Wa 10.24 wa a vin ap pase, pwofèt la pran pale byen fò, li di konsa:
— Monwa, mwen te nan mitan batay la, mwen t'ap goumen lè yon sòlda mennen yon lènmi li te fè prizonye. Li di m konsa: Veyè mesye pou mwen. Si ou kite l chape anba men ou, m'ap touye ou osinon w'ap peye twamil (3.000) pyès an ajan pou li. 40Men, #Lik 19.22 monwa, pandan m okipe ap fè lòt bagay, prizonye a sove.
Wa Izrayèl la di l konsa:
— Se ou menm ki kondannen tèt ou, lèfini ou tou di sa ou gen pou peye pou sa ou fè a!
41Pwofèt la prese wete moso twal ki te bouche figi l la. Lamenm wa a rekonèt se yonn nan pwofèt yo. 42Pwofèt la di wa a:
— Men mesay Senyè a voye di ou: Poutèt ou kite moun mwen te bay lòd pou yo touye a chape, se ou menm ki pral peye pou li. Ou pral mouri. Se lame ou ki pral peye pou lame pa l. Yo pral mouri.
43Se konsa, wa peyi Izrayèl la tounen lakay li lavil Samari, li te boulvèse, min li byen mare.
Chwazi Kounye ya:
1 Wa 20: HAT98
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Haitian Creole DC Bible © Societé Biblique Haïtienne, 1998.