GENESIS 26
26
Gerar ah Isak a Um mi Thu
1Abraham um liau mi silo hen pâmnâk dang a hawng tlung le, Isak chu Philistia lalchem Abimelek Gerar ah a um mi sinah a va kal. 2LALPA chu Isak sinah â langh le, hi hâwi hen a ti: “Aigupta ah kal lo hen um, ka nan tinâk ram ah hin um ko. 3Hinah um ko, na sinah ka um lai le, mal ka nan sâwm lai. Hi ram tla zawzawng hi na thlâk tla leh nangmah rangah ka nan pêk lai. Na pa Abraham sinah, thu ka tiamh mi khawm ka theihkumza lai. 4Vân ah mi ârfi zat hen thlâk tla ka nan pêk lai. Hi ram zawzawng tla hi ka pêk na lai. Na thlâk tla mal ka sâwm na mi hâwi hen phun zawzawng nih an hawng ka deih lai. 5Abraham nih ka dân leh thu a ngâi hen a zûl ruangah mal ka nan sâwm lai,” a ti.
6Churawhchun, Isak chu Gerar ah a um. 7Chunah mi tla nih a nupi thâwngthâng an deih le, “Ka farnu,” a ti. Chu ram mi tla nih a nupi Rebek mêlṭha tak an duh ruangah an thah lai ti a ṭih ruangah ka nupi a ti ngam lo. 8Isak chu chunah sâwt ual a um rawh chun, Abimelek nih a langawtkawt thawk hen a zauh le, Isak leh Rebek anna dâwt zia a muh na. 9Abimelek nih Isak sinah mi a fial le, hi hâwi hen a ti, “Na nupi asi ko mi! Zei rangah ka farnu na ti zia?” a ti. Anih nih, “Ka nupi ka ti chun nan ka thah lai ti ka ruat ruangah,” ti hen a sâng.
10“Kan lakah zei zia hi hâwi na ti?” a ti. Abimelek ber nih, “Ka minung âutal nih na nupi hi awl tak hen an ihpi lai le, kan sualnâk mawh chu nangmah mawh asi lai,” a ti. 11Abimelek nih mipi tla a ṭhih na le, “Âuzawng hi minung leh a nupi nehsawhtu chu thah an si lai,” a ti.
12Isak nih chu ram ah chun thlâi a chîng le, a tuh kum ah mi a leh zâ a tawng, LALPA nih mal a sâwm ruangah. 13A dingchang vima le, mi nei tak a hawng si. 14Dawrâ rual tla leh ranrual tla leh to-aw tla tam tak a nei ruangah Philistia mi nih amah chu an nahsuah rawh. 15Churawhchun, a pa Abraham a dam liauah an to-aw tla nih an chawh mi tikhur chu an silh piak hep na.
16Abimelek nih Isak sinah, “Kan ram kaltâk ving, kanmah ngâk hen thil na ti kho dauh rawh,” a ti.
17Churawhchun, Isak nih a kaltâk le, Gerar Kuam ah um mun a khuar le, chunah zeimaw tiang ding a um rawh. 18Abraham dam liauah tikhur a chawh le, a thih nûnah Philistia mi nih an khap mi chu a chawh nawlh fâwn. Isak nih chu tikhurchawh chu a pa nih a phuah ziatê hen a min a phuah nawlh.
19Isak to-aw tla nih tivakuam ah chun tikhur an chawh le, ti an tawng. 20Gerar mi dawrâpu leh Isak dawrâpu tla anna tawh le, ‘’Hi hi kanmah tâ asi,’’ ti hen. Isak nih chu tikhurchawh chu “Esek’’ (Tawhnâk) ti hen a sak.
21Isak to-aw tla nih tikhur dang an chawh nawlh le, chu lak khawm tawhnâk a um fâwn le, churuangah a min ah “Sitna’’ (Mêlmânâk) a ti. 22Chu thawk hen mun dangah â ṭhia1 le, tikhur dang a chawh nawlh. Hi lak lam chun tawhnâk a um lo rawh, churuangah a min ah “Rehobot’’ (Thawsuaknâk) ti hen a sak. “Tu lam chun, LALPA nih hi ram ah hin thawsuaknâk hawng kan pêk rawh le, hi ram ah hin kan sul-le-lam a tluang vima lai rawh,” a ti.
23Isak nih chu mun chu a kaltâk le, Bersheba ah a va kal. 24Chu zân ah chun a sinah LALPA â langh le, hi hâwi hen a ti, “Kei hi na pa Abraham Pathian kasi, lâu rîlmâl lah; na sinah ka um, ka to-aw Abraham sinah thu ka tiamh mi ruangah mal ka nan sâwm lai le, thlâk tam tak ka nan pêk lai,” a ti. 25Isak nih chunah mâichâm a siam le, LALPA a sawnh. Chunah um mun a khuar nawlh le, a to-aw tla nih tikhur dang an chawh.
Abimelek Leh Isak Karah Remnâk
26Abimelek chu Gerar thawk hen ti dân ding simhtu Ahuzat leh a kawrsen hotu Phikol hen Isak sinah an kal. 27Churawhchun, Isak nih, “A lânah nan ram ah um ding nan ka duh lo le, nan ka hua thlo mi, zei zia keimah muh ding hen nan hawng zia,” a ti.
28Annih nih an sâng le, “Tu chun LALPA na sinah a um ti kan theih le, nang leh kannih karah remnâk bir tak siam ding ṭha kan ti. 29Kannih nih nganfâk zeikhawm kan pêk lo mi hâwi hen nang khawm nih hawng kan pêk bâk lo ding hen thu na tiam ding kan duh,” an ti. “Na lakah khua kan ruat le, thlangam tê hen kan kaltir le, tu chun LALPA nih mal an sâwm tak ti a lang,” an ti.
30Isak nih an rangah puai a tuah piak na le, an din hen an ei rawh. 31A thâituan zîngtê ah mikip nih mah thutiam chiau siatsirh hen an birhtir. Isak nih, ‘dam bâk u’ ti hen hâwikawmh ṭha tak si hen an ṭian rawh.
32Chu ni lîlâ ah chun, Isak to-aw a hawng le, an tikhurchawh thu chu a hawng simh, “Tî kan tawng rawh” an ti. 33Chu tikhurchawh min chu ‘Shebah’ (Thutiamnâk) a ti. Chu chu asi Bersheba#26.33 BERSHEBA: Hebrai ah hi min umzia chu ‘Tiamh mi Tikhur’ ti mawh ‘Tikhur chawh Pasarih’ tinâk asi (21:31 khawm zauh.) khuapi nih min a putnâk san chu.
Ramdang Mi Esau Nupi Tla
34Esau chu kum sâwmli a tling ah Hit mi nungâk panih a umpi na, Beri fanu Judit leh Elon fanu Basemat an si. 35Rebek leh Isak um nuamtir lotu an si.
Chwazi Kounye ya:
GENESIS 26: BCLBV
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Bawm Common Language Bible © Bangladesh Bible Society, 2004. All rights reserved.