GENESIS 25
25
Abraham Thlâk Dang Tla
(1 Chr 1.32-33)
1Abraham nih nupi dang a umpi nawlh le, a min chu Keturah asi. 2Anih nih, Zimran, Joksan, Medan, Midian, Isbak leh Suah tla a ring na. 3Joksan fa tla chu, Sheba leh Dedan an si; Dedan thlâk chu Asurim, Letusim, leh Leummim an si. 4Midian fa tla chu Ephah, Epher, Hanok, Abida leh Eldah. Hi bang zawzawng hi Keturah thlâk tla an si.
5Abraham nih Isak chu thil zawzawng tlûnah thu a neihtir. 6Sikhawmsele, a dam liauah a nupi dang fa tla sin khawm ah thil tla a pêk na bâk. Hi bang a fapa tla hi saklei ram ah, a fapa Isak thawk hen ram lât takah a fial ving na.
Abraham Thihnâk leh Vûinâk
7-8Abraham chu kum zâ leh sâwmsarih leh panga a tling ah, tarkhên hen a thi rawh.
9A fapa Isak leh Ismael nih, Hit mi Zohar fapa Ephron tâ Mamre saklei mi phâisen ah, Makpela pûk ah an vûi rawh. 10Chu phâisen chu Abraham nih Hit mi tla thawk hen a châwk mi asi. Abraham leh a nupi Sari chu chunah an panih hen an vûi na. 11Abraham thih nûnah Pathian nih ‘Beer-lahai-roi’ (Hawng ka Muhtu a Nung mi Tikhurchawh) ti mi kiangah um mi a fapa Isak rangah mal a sâwm.
Ismael Thlâk Tla
(1 Chr 1.28-31)
12Ismael, Aigupta ram ah Sari to-awnu Hagar nih, Abraham rangah a ring piak mi fapa tla chu, 13hi a tangah hin a sang sang hen an suak dân hen rîn asi: Nebaioth, Kedar, Adbeel, Mibsam, 14Misma, Dumah, Masa, 15Hadad, Tema, Jetur, Naphis, leh Kedemah an si. 16Phun leinih thlâktu tla chu an si, an min chu an khua leh an umnâk mun suangkhâng hen an sak. 17Ismael chu a thih liauah kum zâ leh sâwmthum pasarih upa hen a thi. 18Ismael thlâk tla chu Aigupta saklei, Asiria lampi Ravilah leh Sur anna rînâk ah an um. Abraham thlâk dang tla lakah a dangtê hen an um.
Esau leh Jakob Suaknâk Thu
19Hi hi Abraham fapa Isak thu chu asi. 20Isak chu kum sâwmli a tling ah Rebek a umpi, Rebek chu Laban farnu (Aramean mi Mesopotamia ram mi) Bethuel fanu asi. 21Rebek nih fa a nei lo ruangah Isak nih LALPA sinah thla a cham piak le, a thlachamnâk chu LALPA nih a sâng le, Rebek chu pumlâwng lo hen a um rawh. 22Faphîr a pâwi le, an suak lânah a nu paw sungah anna rem lo ving rawh. Rebek nih “Zei rangah ka lakah hi hâwi thil hi a hawng um aw?” a ti le, hawng sâng ding hen LALPA rangah a deih.
23LALPA nih a sinah,
“Na paw sungah phun nih an um;
Anna leido mi panih na ring lai,
Pakhat chu a pakhat dang ngâk hen a chak dauh lai;
A upa dauh mi nih a ngâksia dauh mi nâwl a zulh lai,” a ti.
24A fa ring tik chu a tlung rawh le, fapa phîr a ring. 25A suak masa mi chu a sen le, a vun a mul thûr, churuangah a min chu Esau#25.25 ESAU: Hebrai ah ‘mul’ tinâk asi. Hi min hi Seir a zauhtir. Esau thlâk tla nih a nehnûnah an luah mi ram Seir asi. ti hen an sak. 26A panihnâk chu Esau kedil tleih thlir bû hen a hawng suak, churuangah a min ah Jakob#25.26 JAKOB: Hi min umzia chu Hebrai ah ‘Kedil’ tinâk asi. an sak. An suak liauah Isak chu kum sâwmruk mi asi.
Esau Nih A Fatîr Sinâk A Zuar Mi
27Ngâksia tla chu an hawng lian dadauh le, Esau chu sakah leikâng mi, ram suak duh mi minung asi. Jakob chu in sungkhur ah um ziar mi minung asi. 28Isak nih, Esau rangah a sunhsak dauh le, Esau nih ramsa a kah mi a ei tâwn ruangah. Sikhawmsele Rebek nih chun Jakob a sunhsak dauh.
29Ni khat chu Jakob nih bâilep a suang liauah, Esau mâng ah a tâwi mi a hawng lût le, a sung a vâng le, 30Jakob sinah, “Buh ei lo hen ka um asi; kha zei lo sen chiar mi kha hawng ka pêk,” a ti. (Churuangah asi a min ah Edom#25.30 EDOM: Hebrai ah ‘Sen’ tinâk asi. an ti san chu.)
31Jakob nih a sâng le, “Na fa tîr sinâk kha na ka pêk chun ka nan pêk lai,” ti hen a sâng.
32Esau nih, “Si ko seh! ka thi awt thlo rawh; fa tîr sinâk zei me a ṭhatnâk a um?” a ti.
33Jakob nih, “Kan pêk lai, ti hen a masa hen siatsirh tâ rih,” a ti.
Esau nih siatsirh hen a fa tîr sinâk Jakob sinah a pêk rawh.
34Churawhchun, Jakob nih sang leh a zei lo suang chu a pêk rawh. A ei hen a din le, a thawk le, a kal ving. Chu chu Esau nih fa tîr a sinâk, zeikhawm a rêl lonâk chu asi.
Chwazi Kounye ya:
GENESIS 25: BCLBV
Pati Souliye
Pataje
Kopye
Ou vle gen souliye ou yo sere sou tout aparèy ou yo? Enskri oswa konekte
Bawm Common Language Bible © Bangladesh Bible Society, 2004. All rights reserved.