Kenese 26
26
‘Ua Alu ifo Isaako i Kira
1Na i ai fo‘i le oge i le nu‘u, ‘ae ‘ese le ulua‘i oge sa i ona pō o Aperaamo. ‘Ona alu ai lea o Isaako i Kira ‘iā Apimeleko le tupu o tagata o Filisitia. 2‘Ua fa‘aali mai le ALI‘I ‘iā te ia, ‘ua fa‘apea mai:
“‘Aua ‘e te alu ifo i Aikupito, a ‘ia e nofo i le nu‘u ‘ou te fai atu ai ‘iā te oe. 3‘Ia e nofo fa‘aaumau i lenei nu‘u ‘ou te i ai fo‘i ‘iā te oe, ma ‘ou fa‘amanuia ‘iā te oe, auā ‘ou te foa‘i atu ‘iā te oe ma au fānau ia nu‘u uma lava; ‘ou te fa‘ataunu‘uina fo‘i le tautoga na a‘u tautō ai ‘iā Aperaamo lou tamā.#Kene 22.16-18
4‘Ou te fa‘ato‘ateleina fo‘i au fānau e pei o fetū o le lagi ma ‘ou foa‘iina atu i au fānau ia nu‘u uma, o lau fānau fo‘i e manuia ai nu‘u uma o le lalolagi. 5Auā na fa‘alogo Aperaamo i a‘u ‘upu ma na tausi i a‘u sauniga, ma a‘u poloa‘iga ma a‘u fa‘atonuga ma a‘u tulafono.”
6‘Ona nofo ai lea o Isaako i Kira. 7‘Ona fesili mai ai lea o tagata o le nu‘u i lana avā, ‘ona fai atu ai lea o ia, “O lo‘u tuafafine ia;” auā na fefe o ia e fai atu, “O la‘u avā ia,” sa fa‘apea o ia, “Ne‘i fasia a‘u e tagata o le nu‘u ‘ona o Repeka; auā o ia ‘ua lālelei.”#Kene 12.13; 20.2 8‘Ua loa#26.8 ‘ua loa: po o ‘ua uma po o ‘ua leva. ‘ona nofo ai o ia, ‘ona va‘ai atu ai lea o Apimeleko le tupu o Filisitia i le fa‘amalama, fa‘auta fo‘i, ‘ua iloa, ‘ua ta‘a‘alo Isaako ma Repeka lana avā.#26.8 ta‘a‘alo Isaako ma Repeka lana avā: po o le momoe fa‘atasi Isaako ma Repeka lana avā. 9‘Ona vala‘au atu ai lea e Apimeleko ‘iā Isaako, ‘ua fa‘apea atu, “Fa‘auta ‘ea, o lau avā lava ia, pe se a fo‘i le mea na e fai mai ai, ‘o lo‘u tuafafine ia?’”
‘Ona fai mai ai lea o Isaako ‘iā te ia, “Auā na a‘u fa‘apea, ne‘i ‘ou oti ‘ona o ia.”
10‘Ona fa‘apea atu ai lea o Apimeleko, “Se a lenei mea ‘ua e faia ‘iā te i matou? ‘Ana mao atu se tasi o le nu‘u i lau avā po ‘ua o‘o mai ‘iā te i matou le agasala ‘ona o oe.” 11‘Ona fetalai atu ai lea o Apimeleko i le nu‘u uma, ‘ua fa‘apea atu, “O sē papa‘i atu i lenei tagata po o lana avā e matuā oti lava ia.”
12‘Ona lūlūina lea e Isaako o saito i lea nu‘u, na maua ai fo‘i le ta‘iselau i fua i lea tausaga; na fa‘amanuia fo‘i e le ALI‘I ‘iā te ia.#Kene 26.3; Fa‘ata 10.22 13‘Ua tagata ola lenei tagata, ‘ua tupu pea lava, ‘ua atili ai ‘ua o‘o ‘ina matuā tagata ola lava ia; 14auā sa ‘iā te ia le lafu mamoe ma lafu povi ma ‘au‘auna e to‘atele; ‘ua loto leaga fo‘i Filisitia ‘iā te ia. 15O vai‘eli uma fo‘i na ‘eli e ‘au‘auna a lona tamā i ona po o Aperaamo lona tamā, na tatanu e Filisitia ma fa‘atūtūmu i ‘ele‘ele.
16‘Ua fai atu fo‘i Apimeleko ‘iā Isaako, “‘Ia e alu ‘ese ‘iā te i matou auā ‘ua sili lava oe ‘iā te i matou.” 17‘Ona alu ‘ese ai lea o Isaako, ‘ua tō lona fale ‘ie i le vanu o Kira, ‘ua nofo ai. 18‘Ua toe ‘eli fo‘i e Isaako o vai‘eli na latou ‘eli i ona po Aperaamo lona tamā, auā na tatanu e Filisitia ‘ina ‘ua oti o Aperaamo; ‘ua ia fa‘aigoaina i igoa na fa‘aigoa ai e lona tamā.
19‘Ua ‘eli ‘au‘auna a Isaako i le vanu, ‘ona maua ai lea o le vaipuna. 20‘Ona fefinaua‘i ai lea o ē leoleo manu a Kira ma leoleo manu a Isaako, ‘ua fa‘apea ane, “O lo matou vai lea;” ‘ua ia fa‘aigoa le vai‘eli, o Eseki,#26.20 Eseki: po o le finauga. auā na latou fefinaua‘i ma ia.
21‘Ua latou toe ‘eli le tasi vai, ‘ona latou toe fefinaua‘i ai lea; ‘ua ia fa‘aigoa ai o Setani.#26.21; Setani: po o le misa. 22‘Ua tu‘ua e ia lea mea, ‘ua ‘eli le tasi vai; ‘ua latou lē fefinaua‘i ai, ‘ona ia fa‘aigoa ai lea o Reopo,#26.22 Reopo: po o le lautele. ‘ua fa‘apea ane, “Auā ‘ua fa‘alauteleina nei e le ALI‘I se mea e nonofo ai, tatou te uluola ai i le nu‘u.”
23‘Ona ia alu a‘e ai lea i lea mea i Peresepa. 24‘Ona fa‘aali mai ai lea o le ALI‘I ‘iā te ia i lea lava po, ‘ua fa‘apea mai, “O a‘u o le Atua o Aperaamo lou tamā; ‘aua ‘e te fefe, auā ‘ou te ‘iā te oe, ‘ou te fa‘amanuia fo‘i ‘iā te oe, ma fa‘ato‘ateleina lau fānau, ‘ona o la‘u ‘au‘auna o Aperaamo.”#Kene 15.1; 17.7; 24.12; 28.13, 15; Eso 3.6 25‘Ua ia fai ai le fatafaitaulaga ma vala‘au i le suafa o le ALI‘I; ‘ua ia tō ai fo‘i lona fale ‘ie, ‘ua ‘eli ai fo‘i e ‘au‘auna a Isaako le vai‘eli.
O le Feagaiga a Isaako ma Apimeleko
26‘Ona alu atu ai lea ‘iā te ia Apimeleko mai Kira, o i latou ma Aasata o le tasi o ana uō, ‘atoa ma Fikolu, le ali‘i e pule i ana ‘au.#Kene 21.22 27‘Ona fai ane ai lea o Isaako ‘iā te i latou, “Se a le mea ‘ua ‘outou ō mai ai ‘iā te a‘u, auā ‘ua ‘outou ‘ino‘ino ‘iā te a‘u, ‘ua ‘outou tulia fo‘i a‘u?”#Kene 26.16; Fa‘ama 11.7
28‘Ona latou fai atu ai lea, “‘Ua matou matuā iloa ‘ua ‘iā te oe le ALI‘I, ‘ona matou fa‘apea ai lea, ‘iā tatou faia nei se tautoga o i matou lava ma oe, ‘ia tatou faia fo‘i la tatou mavaega ma oe; 29‘e te lē agaleaga mai lava ‘iā te i matou, pei ‘ona matou lē tagofia oe, pei ‘ona matou faia fo‘i ‘iā te oe na o le lelei, ma matou tu‘u atu ‘iā te oe e alu ma le filemū; ‘ua fa‘amanuia nei oe e le ALI‘I.” 30‘Ua ia sauni se taumafataga mo i latou, ‘ua latou ‘a‘ai ma inu. 31‘Ua latou tula‘i i le taeao, ‘ua tautō le tasi i le tasi, ‘ona tu‘uina atu lea o i latou e Isaako, ‘ona latou ō ‘ese ai lea ‘iā te ia ma le filemū.
32O lea lava aso ‘ua ō mai ai ‘au‘auna a Isaako, ‘ua ta‘u mai ai ‘iā te ia i le vai‘eli na latou ‘elia, ‘ua fa‘apea mai ‘iā te ia, “‘Ua matou maua le vai.” 33‘Ua ia fa‘aigoa ai o Sepa,#26.33 Sepa: po o o le tautō. o le mea lea ‘ua igoa ai le ‘a‘ai o Peresepa, ‘ua o‘o i lenei aso.
O Avā a Esau
34‘Ua o‘o Esau i ona tausaga e fagafulu, ‘ona fai avā, ai lea ‘iā Iutiti le afafine o Peeri, o le sa Hetī ma Pasemeta le afafine o Aluna o le sa Hetī. 35‘Ua fai i lā‘ua ma fa‘atigā loto ‘iā Isaako ma Repeka.
Trenutno odabrano:
Kenese 26: RSCB
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Revised Samoan Catholic Bible © Bible Society of the South Pacific, 2010.