Luka 20
20
Aha Yesu nɔɔ se ɛla mbʋ́ ɛlakɩ yɔ?
(Mat 21.23-27; Mrk 11.27-33)
1Nakʋyʋ wiye Yesu wɩlaɣ ɛyáa Laŋhɛzɩyɛ Tɔm Ɛsɔ ɖɩɣa taa ḿbʋ́ lɛ, cɔjɔnaa sɔsaa nɛ paɣtʋ wɩlɩyaa nɛ Yuda ñɩma sɔsaa powolo 2pɔpɔzɩ-ɩ se: «Aha-ŋ nɔɔ se ŋla lakasɩ ńzɩ́? Aha-ŋ waɖɛ se ŋla ḿbʋ́?» 3Peeɖe Yesu heyi-wɛ se: «Ma ɖɔɖɔ, mɔnpɔzʋʋ-mɩ tɔm kʋɖʋmtʋ. Iheyi-m nɛ mana se 4Ɛsɔ yaa ɛyáa tiyini Yohanɛɛsɩ se ɛla ɛyáa lɩm sɔʋ sɔnzɩ?» 5Ɛlɛ́, pɔyɔɔdɩnɩ ɖama se: «Yee ɖicosaa se: ‹Ɛsɔ tiyini-i› yɔ, ɛpɔzʋʋ-ɖʋ se: ‹Nɛ pɩla ɛzɩma ɖɩtamʋ ɛ-tɔm yɔ?› 6Ŋgʋ́, ɖɩtɔm se: ‹Ɛyáa tiyini-i› yɔ, ɛyáa samaɣ tɩŋa yakɩ-ɖʋ pɛɛ nɛ ɖɩsɩ. Mbʋ́ pʋyɔɔ yɔ, kɛtɛm sɩm se Yohanɛɛsɩ kɛkɛ náyʋ.» 7Peeɖe pocosi Yesu se: «Đɩtasɩ weyi etiyi-i yɔ.» 8Ɛ́lɛ́ ñocosi-wɛ se: «Yee ḿbʋ́ ma ɖɔɖɔ maaheyiɣ-mɩ weyi ɛha-m nɔɔ ŋ́gá yɔ.»
Tɩŋ weyi popuu i-pee sʋlʋm yɔ ɩ-hayɩm taa tʋmlaɖaa kañadɩnaa nabɛyɛ tɔm
(Mat 21.33-46; Mrk 12.1-12)
9Pʋwayɩ lɛ, Yesu pazɩ ɛyáa tuuu eduuye se: «Abalʋ nɔɔyʋ wɛnɩ ḿbʋ́ nɛ ɛsɔ tɩŋ weyi popuu i-pee sʋlʋm yɔ. Ɛtɛma lɛ, ɛkpaɣ ɛyáa se pɔcɔŋnɩ-ɩ ɩ-yɔɔ nɛ ɛɖɛɛ nʋmɔʋ ŋgʋ́ kɩ-taa eleɖiɣ yɔ. 10Pɩkɛdaa lɛ, pɩtalɩ pee koyuu. Peeɖe ɛkʋsɩ e-tiyiyu nɔɔyʋ se ewolo ɛ-tʋmlaɖaa ḿbá pɔ-cɔlɔ nɛ pehiɣ-i pʋyʋ nɛ ewona. Tiyiyu ɛnʋ ɛtalaa lɛ, pakpa-ɩ pamabɩ-ɩ nɛ pɔɖɔɔnɩ-ɩ nɛ ɛpɩsɩ ndaakpasɩ. 11Pʋwayɩ lɛ, hayɩm tʋ ɛnʋ ɛtasɩ tiyiyu lɛlʋ kʋsʋʋ nɛ etiyi-i. Ɛlɛ́, tʋmlaɖaa ḿbá pakpa ɛ́lɛ́ ɖɔɖɔ pamabɩ-ɩ nɛ patʋʋ-ɩ nɛ pɔɖɔɔnɩ-ɩ nɛ ɛpɩsɩ ndaakpasɩ. 12Ɛtasɩ tozo tʋ tiyuu nɛ pama ɛ́lɛ́ ɖɔɖɔ nɛ ɛ-yɔɔ lɩɩ calɩm nɛ pɔlɔ-ɩ nɛ hayɩm wayɩ. 13Peeɖe hayɩm tʋ ɛnʋ ɛtɔm se: ‹Ɛzɩma malakɩ lee? Mɛntɛzɩɣ tiyuu man-pɩyalʋ kʋsɔɔlʋ. Pʋtɔmaɣ yɔ, paañam-ɩ.› 14Ɛ́lɛ́ talaa nɛ pana-ɩ lɛ, peheyi ɖama se: ‹Ɩnaɣ weyi ɛkaɣ tɩɣyʋʋ ɛ-caa ñɩm yɔ. Đɩkʋ-ɩ nɛ ɖɩtɩɣyɩ-pʋ.› 15Peeɖe pakpa-ɩ palɩzɩ-ɩ nɛ hayɩm ḿbʋ́ pʋ-wayɩ nɛ pakʋ-ɩ. Tɔɔ! Hayɩm tʋ ɛnʋ, ɛbɛ ɛlakɩ ɛ-tʋmlaɖaa ḿbá? 16Ɛkɔŋ nɛ ɛkʋ-wɛ nɛ ɛcaa ɛyáa kɩfama nɛ pɔcɔŋnɩ-ɩ ɛ-hayɩm ḿbʋ́ pʋ-yɔɔ.»
Ɛyáa samaɣ nɩ tɔm ńdʋ́ lɛ, kɔtɔ se: «Kaza! Pɩɩtɩɩlakɩ ḿbʋ́ kpem!» 17Peeɖe Yesu cɔnɩ pɛ-ɛsɩndaa pɩŋŋ nɛ ɛpɔzɩ-wɛ se: «Yee ḿbʋ́ tɔm ndʋ́ pama Ɛsɔtɔm Takayaɣ taa se:
‹Pɩyɛ nɖɩ́ kuduyiŋ mayaa kpaɣaɣ pɔlɔ yɔ,
ńɖɩ́ pɩsɩnɩ ɖɩkɩlɩ wazaɣ atɩŋa payɩ lɛɛlɛɛyɔ› yɔ, tɩ-tɔbʋʋ se we?
18Meheyiɣ-mɩ se: yee pɩcɩbɩ nɔɔyʋ nɛ ɛtɔlɩ pɩyɛ ńɖɩ́ ɖɩ-yɔɔ yɔ, ɛmɩzɩɣ kpɛdɛɛɛ. Yee pɩcɩbɩ nɔɔyʋ nɛ ɖɩtɔlɩ ɛ-yɔɔ yɔ, ɖɩnaŋɩɣ-ɩ naŋa naŋa.»
Pʋwɛɛ se pɛhɛyɩ wiyaʋ sɔsɔ lambuu yaa we?
(Mat 22.15-22; Mrk 12.13-17)
19Yesu tɩyɔɔdɩ ḿbʋ́ lɛ, paɣtʋ wɩlɩyaa nɛ cɔjɔnaa sɔsaa pañɩnɩɣ se pakpa-ɩ kpaagbaa. Mbʋ́ pʋyɔɔ yɔ, pasɩm se ḿbá etuuni eduuye ńɖɩ́. Ɛlɛ́, sɔɔndʋ kpaɣaɣ-wɛ nɛ ɛyáa mbá paawɛ peeɖe yɔ. 20Peeɖe papazɩ Yesu cɔŋʋʋ nɛ paɖʋ mbá peyiliɣ ɛyáa se pɛkɛ kʋtʋʋzaa yɔ se powolo pañɩ ɛ-nɔɔ cɔlɔ tɔm. Palakaɣ ḿbʋ́ se pehiɣ-i pakpa-ɩ nɛ paɖʋzɩ ɛjaɖɛ ñʋndɩnaa nesi taa. 21Pʋ-yɔɔ peheyi-i se: «Wɩlɩyʋ! Đɩsɩm ɖeu se tɔm ndʋ́ ŋyɔɔdʋʋ nɛ ndʋ́ ŋwɩlɩɣ yɔ, tɩkɛ toovenim. Ŋtakpaɣ ɛyáa tɔm nɛ ŋlabɩnɩ tʋmɩyɛ. Ɛlɛ́, mbʋ́ Ɛsɔ liu wɛɛ se ɛyáa ɛla yɔ, pu-toovenim ŋwɩlɩɣ. 22Heyi-ɖʋ nɛ ɖɩna se ɖa-paɣtʋ haɣ waɖɛ se pɛhɛyɩ Room wiyaʋ sɔsɔ lambuu yaa pataahɛyɩ-ɩ?» 23Ɛlɛ́, Yesu ñɛtɛm nɩʋ pɩ-taa se pañɩkɩ-ɩ tɔm kɩñɩbʋ. Pʋ-yɔɔ eheyi-wɛ se: 24«Ɩkɔnɩ-m liidiye pɔɔyaɣ nakɛyɛ nɛ mana.» Powoni-kɛ lɛ, ɛpɔzɩ-wɛ se: «A-ñʋʋ nɛ a-hɩɖɛ pɛwɛ kɔ-yɔɔ cɩnɛ?» Pocosi-i se: «Room wiyaʋ sɔsɔ.» 25Peeɖe Yesu heyi-wɛ se: «Yee ḿbʋ́, ɩcɛlɩ Room wiyaʋ sɔsɔ mbʋ́ pɩkɛ ɛ-ñɩm yɔ nɛ piyele ɩcɛlɩ Ɛsɔ mbʋ́ pɩkɛ ɛ́lɛ́ ñɩm yɔ.» 26Tɔm ndʋ́ Yesu yɔɔdɩ ɛyáa taa ḿbʋ́ yɔ, yiliyaa ḿbá patana kawanaɣ nakɛyɛ tɩ-taa. Peeɖe pɩɖɩɣzɩ-wɛ nɛ Yesu tɔm cosuu nɛ posu ɖiɣ ɖiɣ.
Sɩɖaa kaɣ fem naa we?
(Mat 22.23-33; Mrk 12.18-27)
27Pɩkɛdaa lɛ, Saduki ŋgbɛyɛ taa ñɩma mbá pɔtɔŋ se sɩɖaa eefeŋ yɔ, pa-taa nabɛyɛ wolo Yesu cɔlɔ. Powoba lɛ, peheyi-i se: 28«Wɩlɩyʋ! Mooyiizi ma ɛ-paɣtʋ taa se: ‹Yee ɛyʋ ɛwɛnɩ ɖalʋ nɛ ɛ-ɖalʋ ɛnʋ ɛsɩ nɛ eyele ɛ-halʋ nɛ ɛfɛyɩnɩ-ɩ pɩɣa yɔ, pʋwɛɛ se pʋdʋ ɛhɔ lelu ɛnʋ nɛ ehiɣni-i pɩɣa ɛ-ɖalʋ lone taa.› 29Tɔɔ! Abalʋ nɔɔyʋ nɛ e-newaa pɛwɛnɩ ḿbʋ́, pɛwɛ lʋbɛ. Abalʋ ɛnʋ ɛkpaɣ halʋ. Pɩlabɩ pɩnzɩ cabɩ lɛ, ɛsɩ, ɛlɛ́ halʋ ɛnʋ ɛfɛyɩnɩ-ɩ pɩɣa. 30Peeɖe e-neu hɔm lelu ɛnʋ nɛ pɩlabɩ pazɩ lɛ, ɛ́lɛ́ sɩ ɖɔɖɔ. 31Tozo tʋ ñɔhɔm-ɩ nɛ ɛ́lɛ́ sɩ ɖɔɖɔ. Pɩla ḿbʋ́ nɛ pɔkɔɔ pasɩ pa-lʋbɛ. Halʋ ɛnʋ ɛfɛyɩnɩ pa-taa nɔɔyʋ nɛ pɩɣa. 32Pa-wayɩ lɛ, halʋ ɛnʋ ɛsɩ ɖɔɖɔ. 33Lɛɛlɛɛyɔ, ɖɩpɔzʋʋ-ŋ se: sɩɖaa fem wiye lɛ, pa-taa weyi ɛtɩnɩ halʋ ɛnʋ? Ŋgʋ́, patɩŋa pakpaɣ-ɩ!» 34Peeɖe Yesu cosi-wɛ se: «Kedeŋa yɔɔ cɩnɛ abalaa kpakɩɣ halaa nɛ halaa ñawalɩɣ abalaa. 35Ɛlɛ́, ɛyáa mbá pamʋnaa se pefemni sɩm taa nɛ pasʋʋ Kewiyaɣ ŋgá kakaɣ kɔm yɔ ka-taa yɔ, halɩkpaɣyɛ ɛɛtasɩɣ wɛʋ pɛ-hɛkʋ taa. 36Paatasɩɣ sɩbʋ ɖɔɖɔ, mbʋ́ pʋyɔɔ yɔ, pɛwɛɣ ɛzɩ Ɛsɔ tiyiyaa yɔ. Ɛsɔ kɔŋ-wɛ kpaɣʋ ɛzɩ e-piya yɔ, mbʋ́ pʋyɔɔ yɔ, pasɩba nɛ pefe. 37Piyele sɩɖaa fem tɔm lɛ, Mooyiizi maɣmaɣ kɛtɛm pʋ-tɔm yɔɔdʋʋ ɛ-takayaɣ taa ɖenɖe ɛma hɔɖaɣ miŋ mʋ́ʋ tɔm yɔ. Ɛyɔɔdaa se Kɩpaɣlʋ lɛ Abraham nɛ Izaakɩ nɛ Yakɔɔbʋ pɛ-Ɛsɔ. 38Pʋ-yɔɔ lɛ, Ɛsɔ tɛkɛ sɩɖaa Ɛsɔ, ɛlɛ́, wezuu tɩnaa ñɩnʋ ɛkɛnaa. Mbʋ́ pʋyɔɔ yɔ, ɛ-ñɩma tɩŋa payɩ wɛ wezuu.» 39Peeɖe paɣtʋ wɩlɩyaa taa nabɛyɛ tɔm se: «Wɩlɩyʋ! Ŋyɔɔdɩ camɩyɛ.» 40Pɔyɔɔdɩ ḿbʋ́, mbʋ́ pʋyɔɔ yɔ, patakatɩɣ se patasɩ-ɩ tɔm natʋyʋ pɔzʋʋ.
Weyi Ɛsɔ Lɩzaa yɔ nɛ Daaviidi pɔ-tɔm
(Mat 22.41-46; Mrk 12.35-37)
41Pʋwayɩ lɛ, Yesu pɔzɩ-wɛ se: «Pɩlabɩ ɛzɩma nɛ pɔtɔŋ se Weyi Ɛsɔ Lɩzaa Yɔ ɛkɛ Daaviidi sayɩ? 42Ŋgʋ́, Daaviidi maɣmaɣ ma Keɣsi Takayaɣ taa se:
‹Kɩpaɣlʋ Ɛsɔ heyi man-Kɩpaɣlʋ se:
caɣ mɔn-cɔlɔ lone kɩbanɖɛ taa
43nɛ pʋkɔɔ pɩsɩɩnɩ alɩwaatʋ ndʋ́ moluzi ño-koyindinaa ñɛ-tɛɛ kpem yɔ.›
44Daaviidi maɣmaɣ ñayaɣ Weyi Ɛsɔ Lɩzaa Yɔ se Kɩpaɣlʋ. Ɛzɩma ɛtasɩɣ kɛʋ Daaviidi ɛnʋ ɛ-sayɩ ɖɔɖɔ yɔ?»
Ɖɩtaala ɛzɩ paɣtʋ wɩlɩyaa yɔ
(Mat 23.1-36; Mrk 12.38-40)
45Ɛyáa samaɣ tɩŋa welesaɣ Yesu tɔm ḿbʋ́ lɛ, eheyi ɛ-tɔmkpɛlɩkɩyaa se: 46«Ɩɖɔkɩ mɩ-tɩ nɛ paɣtʋ wɩlɩyaa. Mbʋ́ pʋyɔɔ yɔ, pɔsɔɔlɩ tokonaa sɔsaa suu nɛ pɔcɔʋ. Pɔsɔɔlaa ɖɔɖɔ se pɛsɛɣ-wɛ nɛ ñamtʋ ɛyáa ɖikpeɣliye taa. Pañɩnɩɣ se pacaɣ ɖɩjaɣyɛ sɔsɔɖɛ taa Ɛsɔ ɖɩsɛyɛ ndɩ ndɩ nɛ kazandʋ pa-taa. 47Ḿbá ɖɔɖɔ hɔɔzʋʋnɩ lelaa nesi taa mbʋ́ pɩtɩŋa payɩ pɛwɛna yɔ. Pɛsɛɣ Ɛsɔ nɛ pɩɖaɣlɩɣ se pɩwɩlɩ se ḿbá lɛ ɛyáa kɩbama. Meheyiɣ-mɩ se kɩyakʋ ŋgʋ́ Ɛsɔ kɔŋ se ɛhʋʋnɩ ɛyáa yɔ, ɛɖʋʋ-wɛ kʋñɔŋ ŋgʋ́ kɩfɛyɩ ɖaɣʋ yɔ.»
Trenutno odabrano:
Luka 20: KABI
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
