Luka 17
17
Lɛɣtʋ ndʋ́ Yesu tasɩɣ ɛyáa yɔ
(Mat 18.6-7,21-22; Mrk 9.42)
1Yesu tasɩ heyuu ɛ-tɔmkpɛlɩkɩyaa se: «Mbʋ́ piyeki se ɛyáa ɛla kɩwɛɛkɩm yɔ, pʋwɛ tam. Ɛlɛ́, pʋtɔɔ weyi pɩtɩŋɩɣnɩ ɛ-yɔɔ yɔ. 2Pɩkɩlɩ wee wee se pɛlɛɛ e-liu tɛɛ pɩyɛ sɔsɔɖɛ nɛ powoni pɛpɛɖɩ teŋgu taa ɖenɖe ɛzɩ eeyele nɛ mbá patakpaɣ-wɛ payaa pʋyʋ yɔ pa-taa nɔɔyʋ la kɩwɛɛkɩm yɔ. 3Pʋ-yɔɔ lɛ, ɩɖɔkɩ mɩ-tɩ camɩyɛ!
Yee ña-taabalʋ nɔɔyʋ ɛyʋsɩnɩ-ŋ yɔ, heyi-i se mbʋ́ ɛlaba yɔ pɩfɛyɩ ɖeu. Yee etisaa nɛ ɛlɛɣzɩ wɛtʋ lɛ, ŋkpaɣ ŋkpeɣ-i. 4Yee evemiye kʋɖʋmɖɩyɛ taa ɛyʋsɩnɩ-ŋ tam lʋbɛ nɛ ɛkɔŋ tam nɛ ewiɣni-ŋ se ɛyʋsɩnɩ-ŋ yɔ, kpaɣ ŋkpeɣ-i.»
Lidaʋ ɖoŋ tɔm
5Yesu tɛm yɔɔdʋʋ ḿbʋ́ lɛ, e-tiyiyaa heyi-i se: «Kɩpaɣlʋ! Yele nɛ ɖɩtɛzɩ lidaʋ wɛnaʋ.» 6Peeɖe ecosi-wɛ se: «Yee ɩɩwɛnɩ lidaʋ ñɩɩɩ ɛzɩ piye nɖɩ́ ɖɩkɩlɩ kɔzʋʋ yɔ yɔ, ɩpɩzaɣ se iheyi tɩʋ sɔsɔʋ kʋnɛ se: ‹Kpɛzɩ ŋwolo ŋsɩŋ teŋgu taa!› Nɛ kɩla ḿbʋ́ ɖɔɖɔ.»
Yesu tiyiyaa wɛ ɖɔɖɔ ɛzɩ tʋmlaɖaa lɛlaa yɔ
7Yesu tasɩ-wɛ pɔzʋʋ se: «Yee mɩ-taa nɔɔyʋ ɛwɛnɩ tʋmlaɖʋ nɛ ɛhayɩɣ-ɩ yaa eɖiyiɣ-i wondu, ɛlɩɣnɩ hayɩm ɛtalɩ lɛ, ɩmaɣzɩɣ se pʋdʋ heyiɣ-i se we? Eheyiɣ-i se: ‹Caɣ nɛ ŋtɔɔ› yaa 8‹Wolo ŋlɛɣzɩ wondu nɛ ŋwolo ŋlabɩ-m tɔɔnaɣ nɛ ŋkɔna. Mɛntɛm tɔɔʋ nɛ mɔñɔɔ lɛ, ŋŋcaɣ ŋtɔɔ nɛ ŋñɔɔ?› 9Tʋmlaɖʋ ɛnʋ, ɛ-caa sɛɣ-ɩ mbʋ́ ɛlaba yɔ pʋ-yɔɔ yaa we? 10Ḿbʋ́ ɖɔɖɔ pʋwɛnɩ-mɩ. Yee ɩkɔm ɩla mbʋ́ Ɛsɔ kaɖʋ-mɩ yɔ nɛ pɩtɛ lɛ, ɩtɔ se: ‹Đɩtamʋnɩ se ɖɩkɛ tʋmlaɖaa. Mbʋ́ pɩɩwɛɛ se ɖɩla yɔ, ḿbʋ́ ɖɩlaba.› »
Yesu laba nɛ canasɩ hiu yɔɔ cɛ
11Yesu kʋyaa se ewoki Yeruusalɛm lɛ, ɛtɩŋnɩ Samaarɩɩ nɛ Galilee pa-ageeta taa. 12Pɩkɛdaa lɛ, ɛñɔtɩnɩ tɛtʋ cikpetu natʋyʋ. Ɛsʋwaɣ tɩ-taa lɛ, canasɩ nasɩyɩ hiu kʋyɩ se sɩkatɩɣ-ɩ. Ɛlɛ́, sɩsɩŋ poliŋ 13nɛ sɩmakɩ kubusi se: «Wɩlɩyʋ! Yesu! Na ɖa-pʋtɔdɩyɛ.» 14Yesu na-sɩ lɛ, eheyi-sɩ se: «Iwolo ɩwɩlɩ mɩ-tɩ cɔjɔnaa nɛ pana.» Sɩkpaɣ nʋmɔʋ se siwoki lɛ, sɩ-yɔɔ cɛ. 15Sɩ-taa lɛɛka nawa se kɔ-yɔɔ cɛba lɛ, kakpaɣ nʋmɔʋ pɩsʋʋ yɔɔ nɛ kokou nɛ kasaŋ Ɛsɔ kpamm. 16Katalɩ Yesu cɔlɔ lɛ, koluŋ ɛ-tɛɛ nɛ kɛsɛɛ-ɩ. Ŋgʋ́, kaakɛ Samaarɩɩ tʋ. 17Peeɖe Yesu tɔm se: «Pɩtɛkɛ ɛyáa hiu yɔɔ cɛbɩna naa we? Nɛ kʋɖʋm fɛyɩ hiu ñɛwɛ le yɔ? 18Pɩlabɩ ɛzɩma pa-taa nɔɔyʋ tatɩɩmaɣzɩ se ɛpɩsɩɣ ɛsa Ɛsɔ ɛzɩ ɛgɔm ɛnɛ yɔ?» 19Peeɖe Yesu heyi Samaarɩɩ tʋ ɛnʋ se: «Kʋyɩ ŋkpe, ñe-lidaʋ yabɩ ña-ñʋʋ.»
Ɛsɔ Kewiyaɣ tɛm talʋʋ
(Mat 24.23-28, 37-41)
20Nakʋyʋ wiye Farɩsɩ ñɩma pɔzɩ Yesu se: «Đooye Ɛsɔ Kewiyaɣ kaɣ kɔm» Peeɖe ecosi-wɛ se: «Ɛsɔ Kewiyaɣ kɔŋʋʋ yɔ, nɔɔyʋ ɛɛpɩzɩɣ ɛna-kɛ. 21Paakaɣ yɔɔdʋʋ se kɛwɛ cɩnɛ yaa peeɖe yɔ. Ɛlɛ́, ɩtɩlɩ ɖeu se kɛtɛm wɛʋ mɩ-hɛkʋ taa.»
Kɩyakʋ ŋgʋ́ ɛyʋ pɩyalʋ kaɣ kɔm yɔ
22Ɛtɛm yɔɔdʋʋ ḿbʋ́ lɛ, eheyi ɛ-tɔmkpɛlɩkɩyaa se: «Alɩwaatʋ natʋyʋ kɔŋ nɛ ɩñɩnɩ se ɩna Ɛyʋ Pɩyalʋ kɩyakʋ kʋɖʋmʋʋ maɣmaɣ, ɛlɛ́, ɩɩnaɣ-ɩ. 23Pɔkɔŋ-mɩ heyuu se ɛwɛ cɩnɛ yaa peeɖe yɔ. Ɛlɛ́, ɩtaase iwolo se ɩñɩnɩɣ-ɩ. 24Kɩyakʋ ŋgʋ́ Ɛyʋ Pɩyalʋ lɩzɩɣ ɛ-tɩ nɛ ɛwɩlɩ yɔ, pʋwɛɣ ɛzɩ tɛʋ ñɩlɩsʋʋ ɛsɔdaa nɛ pɩnaɣ paa le yɔ. 25Ɛlɛ́, pʋcɔ pɩla ḿbʋ́ lɛ, pʋwɛɛ se ɛtɔɔ kʋñɔŋ siŋŋ nɛ lɛɛlɛɛyɔ ɛyáa panɛ pekizi-i. 26Alɩwaatʋ ńdʋ́ lɛ, pɩlakɩ ɖɔɖɔ ɛzɩ pɩɩlabʋ Nowee alɩwaatʋ taa yɔ: 27ɛyáa tɔkaɣ nɛ pɔñɔʋ nɛ abalaa kpakɩɣ halaa nɛ halaa ñawalɩɣ nɛ pʋkɔɔ pɩsɩɩnɩ kɩyakʋ ŋgʋ́ Nowee sʋ kpɩyʋʋ sɔsɔʋ taa nɛ tɛʋ sɔsɔʋ pazɩ nɩʋ nɛ kʋkʋ ɛyáa tɩŋa payɩ yɔ. 28Pɩlakɩ ɖɔɖɔ ɛzɩ pɩɩlabʋ Looti alɩwaatʋ taa yɔ: ɛyáa tɔkaɣ nɛ pɔñɔʋ nɛ payakɩ wondu nɛ pɛpɛdɩɣ nɛ pahayɩɣ nɛ pamaɣ kuduyiŋ. 29Ɛlɛ́, puwiye nɖɩ́ Looti kʋyɩ Sodom yɔ, miŋ nɛ mamala palɩnɩ ɛsɔdaa ɛzɩ tɛʋ nɩɣʋ yɔ nɛ pitii pɩñaɣ patɩŋa payɩ. 30Kɩyakʋ ŋgʋ́ Ɛyʋ Pɩyalʋ lɩzɩɣ ɛ-tɩ nɛ ɛwɩlɩ yɔ, ḿbʋ́ ɖɔɖɔ pɩkaɣ labʋ.
31Puwiye ńɖɩ́, putudi nɔɔyʋ e-kuduyuu ñʋʋ taa yɔ, pɩtaacɩbɩ-ɩ se etiki ɛsʋʋ kɩ-tɛɛ nɛ ɛkpaɣ ɛ-ñɩm. Yaa yee putudi nɔɔyʋ hayɩm taa yɔ, pɩtaacɩbɩ-ɩ se ɛpɩsɩɣ ɖɩɣa. 32Ɩtɔzɩ Looti halʋ tɔm. 33Weyi ɛñɩnɩɣ se ɛcaɣ wezuu tam yɔ, ɛtɛŋnɩ-kʋ lesuu. Weyi ɛ́lɛ́ lesiɣ-kʋ yɔ, ehikiɣ-kʋ. 34Mankaɖɩɣ-mɩ se: puwiye ńɖɩ́ lɛ, ɛyáa naalɛ pɩzɩɣ pɛhɛnɩ ñalʋʋ kʋɖʋmʋʋ yɔɔ ɖoó taa nɛ pakpaɣ kʋɖʋm nɛ piyele lɛlʋ. 35Halaa naalɛ pɩzɩɣ pɛwɛɛ namɩyɛ yɔɔ nɛ pakpaɣ kʋɖʋm nɛ piyele lɛlʋ. [ 36Abalaa naalɛ pɩzɩɣ pɛwɛɛ hayɩm taa nɛ pakpaɣ kʋɖʋm nɛ piyele lɛlʋ.»] 37Peeɖe ɛ-tɔmkpɛlɩkɩyaa pɔzɩ-ɩ se: «Kɩpaɣlʋ! Le pɩkaɣ labʋ ḿbʋ́?» Ɛlɛ́, etuu-wɛ eduuye se: «Namɖazʋʋ wayɩ kpeliŋ fɛtɩɣ.»
Trenutno odabrano:
Luka 17: KABI
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
