Yohanɛɛsɩ 8

Halʋ acɛyɛ tʋ nɔɔyʋ tɔm

1Ɛyáa kpema lɛ, Yesu kʋyɩ nɛ ewolo ɛkpa Somiŋ Pʋʋ yɔɔ. 2Kifem tanaŋ tɛɛ cu lɛ, ɛpɩsɩ Ɛsɔ ɖɩɣa taa nɛ ɛyáa samaɣ tɩŋa wolo ɛ-cɔlɔ nɛ ɛcaɣ nɛ ɛpazɩ-kɛ wɩlʋʋ Ɛsɔtɔm. 3Pɩkɛdaa lɛ, Paɣtʋ wɩlɩyaa nɛ Farɩsɩ ñɩma patanɩ halʋ nɔɔyʋ. Ɛlakaɣ acɛyɛ nɛ patam-ɩ. Peeɖe pasɩnzɩ-ɩ ɛyáa hɛkʋ taa 4nɛ peheyi Yesu se: «Wɩlɩyʋ! Halʋ ɛnɛ, ɛlakaɣ acɛyɛ nɛ ɖɩtam-ɩ. 5Mooyiizi ɖʋ paɣtʋ taa se payaɣ pɩtɛ halaa ḿbá pɛɛ nɛ pasɩ. Ña yɔ, ñɔtɔŋ se we?» 6Pɔpɔzɩ-ɩ ḿbʋ́ se pañɩ ɛ-nɔɔ cɔlɔ tɔm nɛ pana ndʋ́ paawana nɛ pakʋyɩ ɛ-yɔɔ yɔ.

Ɛlɛ́, Yesu luŋ nɛ ɛmaɣnɩ e-niye tataa. 7Pɛ-ɛsɩyɛ sɛnɩ pɔzʋʋ ḿbʋ́ lɛ, ɛkʋyɩ nɛ eheyi-wɛ se: «Mɩ-taa weyi ɛnaɣ se ɛtala kɩwɛɛkɩm nabʋyʋ kaʋ yɔ, ɛcalɩ kpaɣʋ pɩyɛ nɛ ɛyaɣ halʋ ɛnɛ.» 8Ɛlɛ́, ɛɖaɣnɩ luŋuu nɛ ɛwɛɛ ɛmaɣ tataa. 9Panɩ tɔm ńdʋ́ ḿbʋ́ lɛ, pa-taa sɔsaa calɩ lɔyʋʋ kʋɖʋm kʋɖʋm nɛ pɛɖɛɛ patɩŋa payɩ nɛ piyele halʋ ɛnʋ e-ɖeke koŋ Yesu ɛsɩndaa. 10Peeɖe ɛkʋyaa nɛ ɛpɔzɩ-ɩ se: «Đɔ-kɔɔ, pɛwɛ le tɛ? Pa-taa nɔɔyʋ tasɩŋ se ɛkʋ ñɔ-tɔm naa we?» 11Halʋ ɛnʋ ecosi-i se: «Kɩpaɣlʋ! Nɔɔyʋ tasɩŋ.» Peeɖe Yesu heyi-i se: «Wolo ŋɖɛɛ, ma ɖɔɖɔ maakʋʋ ñɔ-tɔm. Ɛlɛ́, taatasɩ kɩwɛɛkɩm labʋ.»

Yesu lɛ kedeŋa kpeekpe ñalɩmɩyɛ

12Yesu tasɩ ɛyáa samaɣ heyuu se: «Ma lɛ ɛyáa kpeekpe ñalɩmɩyɛ. Weyi ɛtɩŋɩɣ ma-wayɩ yɔ, ɛɛɖɔŋ cɩkpɛndʋʋ taa kaʋ. Ɛlɛ́, ehikiɣ ñalɩmɩyɛ nɖɩ́ ɖɩhaɣ wezuu yɔ.» 13Peeɖe Farɩsɩ ñɩma heyi-i se: «Ña-tɩ tɩŋa ŋlɩzɩɣnɩ ña-aseɣɖe! Yee ḿbʋ́ ñɔ-tɔm tɛkɛ toovenim.» 14Yesu cosi-wɛ se: «Paa malɩzɩɣ man-tɩ tɩŋa ma-aseɣɖe yɔ, mɔyɔɔdʋʋ toovenim. Mbʋ́ pʋyɔɔ yɔ, mansɩm ɖenɖe malɩnaa nɛ ɖenɖe mowoki yɔ. Mɩ lɛ, ɩtasɩ ɖenɖe malɩnaa nɛ ɖenɖe mowoki yɔ. 15Ɩhʋʋnɩ ɛyáa tɔm ɛzɩ ɛyáa tɩŋa lakʋʋ yɔ. Ma lɛ, maahʋʋnɩ nɔɔyʋ. 16Ɛlɛ́, yee mahʋʋnɩ nɔɔyʋ yɔ, mahʋʋnɩ-ɩ nɛ toovenim. Mbʋ́ pʋyɔɔ yɔ, pɩtɛkɛ men-ɖeke mahʋʋnɩnɩ-ɩ, ɛlɛ́, ma nɛ man-Caa, ɛnʋ tiyini-m. 17Paɖʋ mɩ-paɣtʋ taa se: yee ɛyáa naalɛ ɩlɩzɩ aseɣɖe kʋɖʋmɖɩyɛ nabʋyʋ yɔɔ yɔ, pɩkɛɣ toovenim. 18Malɩzɩɣ man-tɩ tɩŋa ma-aseɣɖe, man-Caa weyi etiyi-m yɔ, ɛlɩzɩɣ-ɖɩ ɖɔɖɔ.» 19Peeɖe pɔpɔzɩ-ɩ se: «Le ña-Caa wɛɛ?» Ecosi-wɛ se: «Yee ɩɩsɩm-m yɔ, ɩɩsɩm ɖɔɖɔ man-Caa. Ɩtasɩm-m, ɩtasɩ ɖɔɖɔ man-Caa.»

20Yesu yɔɔdaɣ ḿbʋ́ lɛ, ɛɛwɛ Ɛsɔ ɖɩɣa taa haɖɛ aɖakaɣ cɔlɔ nɛ ɛwɩlɩɣ ɛyáa Ɛsɔtɔm. Nɔɔyʋ taakpa-ɩ, mbʋ́ pʋyɔɔ yɔ, ɛ-alɩwaatʋ taatalɩda.

Yesu yɔɔdʋʋ se ɛpɩsɩɣ ɛ-caa cɔlɔ

21Yesu tasɩ ɛyáa samaɣ heyuu se: «Mɛnɖɛɣ, ɩkɔŋ-m ñɩnʋʋ. Ɛlɛ́, ɩkɔŋ sɩbʋ mɩ-kɩwɛɛkɩm taa. Ɩɩpɩzɩɣ iwolo ɖenɖe mowoki yɔ.» 22Peeɖe Yuda ñɩma pɔzɩ pa-tɩ se: «Ɛtɔŋʋʋ se ɖɩɩpɩzɩɣ ɖiwolo ɖenɖe ewoki yɔ, ɛkʋʋ ɛ-tɩ yaa we?» 23Yesu heyi-wɛ se: «Mɩ-tɛ lɛ kedeŋa yɔɔ cɩnɛ. Ɛlɛ́, ma mɛn-tɛ lɛ ɛsɔdaa. Ɩkɛ kedeŋa yɔɔ cɩnɛ ñɩma, ɛlɛ́, ma mɛntɛkɛ kɔ-yɔɔ ñɩnʋ. 24Pʋ-yɔɔ meheyi-mɩ se yee itetisi se: ‹Ma lɛ weyi mɛnkɛnaa yɔ› yɔ, ɩsɩkɩ mɩ-kɩwɛɛkɩm taa.» 25Peeɖe pɔpɔzɩ-ɩ se: «Ña lɛ anɩ?» Ecosi-wɛ se: «Se we maacalɩ-mɩ heyuu tɛ? 26Mɛwɛnɩ tɔm sakɩyɛ se mɔyɔɔdʋʋ nɛ mahʋʋnɩ-mɩ. Ɛlɛ́, weyi etiyi-m yɔ, ɛyɔɔdʋʋ toovenim. Ndʋ́ eheyi-m yɔ, ti-ɖeke meheyiɣ ɛyáa.»

27Ɛlɛ́, pataaɖiɣzini se ɛ-Caa tɔm ɛyɔɔdaɣ. 28Peeɖe Yesu heyi-wɛ se: «Alɩwaatʋ ndʋ́ ɩkpazɩɣ Ɛyʋ Pɩyalʋ kaamaŋkaɣ yɔɔ yɔ, ɩtɩlɩɣ se: ‹Ma lɛ weyi mɛnkɛnaa yɔ.› Ɩtɩlɩɣ ɖɔɖɔ se maalakɩ pʋyʋ nɛ ma-maɣmaɣ mɔn-sɔɔlɩm: tɔm ndʋ́ man-Caa wɩlɩ-m yɔ, ńdʋ́ mɔyɔɔdʋʋ. 29Weyi etiyi-m yɔ, ɛwɛ mɔn-cɔlɔ, eteyebi-m men-ɖeke. Mbʋ́ pʋyɔɔ yɔ, malakɩ mbʋ́ pɩkɛdɩnɩ-ɩ yɔ alɩwaatʋ tɩŋa.» 30Yesu yɔɔdaɣ ḿbʋ́ lɛ, ɛyáa sakɩyɛ wɛnɩ lidaʋ ɛ-yɔɔ.

Toovenim lɩnɩ Ɛsɔ cɔlɔ

31Peeɖe Yesu heyi Yuda ñɩma mbá pɛwɛnɩ lidaʋ ɛ-yɔɔ yɔ se: «Yee ɩwɛɛ ɩɖɔŋ mɔn-tɔm yɔɔ yɔ, ɩkɛɣ mɔn-tɔmkpɛlɩkɩyaa siŋŋ. 32Pʋbʋ, ɩtɩlɩɣ toovenim nɛ toovenim ḿbʋ́ piyele nɛ ɩwɛɛ mɩ-tɩ yɔɔ.» 33Ɛlɛ́, pocosi-i se: «Đɩkɛ Abraham liɖe taa ñɩma. Đɩtɛkɛ nɔɔyʋ yomaa kaʋ lɛ, ɛzɩma ŋheyiɣ-ɖʋ se ɖɩkɔŋ ɖa-tɩ yɔɔ wɛʋ yɔ?» 34Peeɖe Yesu heyi-wɛ se: «Toovenim lɛ, mankaɖɩɣ-mɩ se: weyi ɛlakɩ kɩwɛɛkɩm yɔ, ɛkɛ pu-yom. 35Yom ɛɛwɛɣ ɖɩɣa ŋgá ka-taa ɛwɛɛ yɔ tam. Ɛlɛ́, abalɩbɩɣa ŋgá palʋlɩ peeɖe yɔ, kaka ñɛwɛɣ ka-taa tam. 36Pʋ-yɔɔ lɛ, yee Caa Pɩyalʋ eholi-mɩ yɔ, ɩwɛɣ mɩ-tɩ yɔɔ kpem. 37Manawa se ɩkɛ Abraham liɖe taa ñɩma. Ɛlɛ́, ɩcaɣ se ɩkʋ-m, mbʋ́ pʋyɔɔ yɔ, mɔn-tɔm fɛyɩnɩ ɖɩjaɣyɛ mɩ-taa. 38Mbʋ́ mana man-Caa cɔlɔ yɔ, pʋ-tɔm mɛnkɛdɩɣ-mɩ. Ḿbʋ́ ɖɔɖɔ mɩ mɩlakɩ mbʋ́ mɩ-caa heyi-mɩ yɔ.» 39Peeɖe pocosi-i se: «Đa-caa lɛ Abraham.» Ɛlɛ́, Yesu heyi-wɛ se: «Yee ḿbʋ́ ɩla mbʋ́ Abraham laba yɔ. 40Meheyi-mɩ toovenim tɔm ndʋ́ Ɛsɔ heyi-m yɔ, ɛlɛ́, lɛɛlɛɛyɔ ɩcaɣ se ɩkʋ-m. Ŋgʋ́, Abraham ñatala nabʋyʋ ḿbʋ́. 41Mbʋ́ mɩ-caa lakɩ yɔ ɩlakɩ.» Peeɖe pocosi-i se: «Đɩtɛkɛ habɩŋ taa piya, Caa kʋɖʋm koŋ ɖɩwɛna, ɛnʋ lɛ Ɛsɔ.»

42Ɛlɛ́, Yesu heyi-wɛ se: «Yee toovenim Ɛsɔ ɛɛkɛ mɩ-Caa yɔ, ɩɩsɔɔlɩ-m. Mbʋ́ pʋyɔɔ yɔ, ɛ-cɔlɔ malɩnaa nɛ mɔnkɔɔ mɛwɛɛ cɩnɛ. Pɩtɛkɛ mon-ɖoŋ mɔnkɔmnaa, ɛlɛ́, ɛnʋ tiyini-m. 43Pɩlabɩ ɛzɩma nɛ ɩɩnɩɣ tɔm ndʋ́ meheyiɣ-mɩ yɔ tɩ-tɔbʋʋ? Pʋwɛ ḿbʋ́, mbʋ́ pʋyɔɔ yɔ, ɩɩpɩzɩɣ iwelesi mɔn-tɔm. 44Mɩ-caa lɛ eleeu. Mbʋ́ e-liu wɛɛ yɔ, ḿbʋ́ ɩsɔɔlɩ labʋ. Ɛkɛ ɛyáa kʋyʋ ɖooo kiɖe tɛɛ. Ɛɛɖɔŋ toovenim nʋmɔʋ taa, mbʋ́ pʋyɔɔ yɔ, toovenim ḿbʋ́, pɩfɛyɩ ɛ-taa. Ɛkʋyʋʋ cɛtʋʋ lɛ, ɛyɔɔdʋʋ ɛzɩ ɛ-maɣmaɣ ɛwɛʋ yɔ: ɛkɛ cɛtɩyʋ, ɛ-cɔlɔ cɛtɩm lɩɣna. 45Ɛlɛ́, ma mɔyɔɔdʋʋ toovenim yɔɔ iitisiɣ mɔn-tɔm. 46Mɩ-taa anɩ pɩzɩɣ ɛwɩlɩ-m se malabɩ kɩwɛɛkɩm? Yee mɔyɔɔdʋʋ toovenim lɛ, pɩlabɩ ɛzɩma iitisiɣ mɔn-tɔm yɔ? 47Weyi ɛkɛ Ɛsɔ ñɩnʋ yɔ, ewelesiɣ ɛ-tɔm. Ɛlɛ́, mɩ mɩtɛkɛ ɛ-ñɩma, pʋ-yɔɔ iiwelesiɣ ɛ-tɔm.»

Yesu nɛ Abraham pɔ-tɔm

48Yesu yɔɔdɩ ḿbʋ́ lɛ, Yuda ñɩma pɔzɩ-ɩ se: «Đɩfɛyɩnɩ toovenim se ɖɩyɔɔdɩ se ŋkɛ Samaarɩɩ tʋ nɛ ŋtɛ ŋke aleewaa naa we?» 49Ɛlɛ́, ecosi-wɛ se: «Menteke aleewaa, ɛlɛ́, man-Caa manɖʋʋ hɩɖɛ nɛ mɩ mɩwɛɛkɩɣ ma-ñɩnɖɛ! 50Ma lɛ, maañɩnɩɣ mon-koboyaɣ. Ɛlɛ́, nɔɔyʋ wɛɛ, ɛnʋ ñɩnɩɣnɩ-kɛ, ɛnʋ hʋʋnɩ tɔm. 51Toovenim lɛ, meheyiɣ-mɩ se: weyi ɛɖɔŋ mɔn-tɔm yɔɔ yɔ, ɛɛsɩkɩ kaʋ.» 52Peeɖe Yuda ñɩma heyi-i se: «Lɛɛlɛɛyɔ ɖɩnawa se ŋkem aleewaa yɔ! Abraham sɩba, náyaa ñasɩ nɛ ña ñɔtɔŋ se weyi ɛɖɔŋ ñɔ-tɔm yɔɔ yɔ, ɛɛsɩkɩ kaʋ! 53Ŋmaɣzɩɣ se ŋkɩlɩ ɖɔ-cɔzɔ Abraham weyi ɛsɩba yɔ yaa we? Náyaa ñasɩba ɖɔɖɔ, ŋmaɣzɩɣ se ña lɛ anɩ kpem?» 54Peeɖe Yesu cosi-wɛ se: «Yee ma-maɣmaɣ meyekina se ma-hɩɖɛ ɛsɛɛ yɔ, pɩfɛyɩnɩ waɣzaɣ nakɛyɛ. Ɛlɛ́, man-Caa yekina se ɖɩsɛɛ. Ɛnʋ ɩtɔŋ se ɛnʋ lɛ mɩ-Ɛsɔ. 55Ŋgʋ́, ɩtasɩm-ɩ. Ɛlɛ́, ma mansɩm-ɩ. Yee maatɔm se mantasɩm-ɩ yɔ, maakɛ cɛtɩyʋ ɛzɩ mɩ yɔ. Ma lɛ, mansɩm-ɩ nɛ mɔnɖɔŋ ɛ-tɔm yɔɔ. 56Mɩ-cɔzɔ Abraham taa labɩ leleŋ siŋŋ se ɛnaɣ kɩyakʋ ŋgʋ́ mɔnkɔŋ yɔ. Ɛna-kʋ ɖɔɖɔ nɛ ɛ-taa hʋlʋmɩ.» 57Peeɖe Yuda ñɩma pɔzɩ-ɩ se: «Ŋtatalɩdɩ pɩnzɩ nɩɩnʋwa nɛ ŋtɔŋ se ŋna Abraham yaa we?» 58Ecosi-wɛ se: «Toovenim lɛ, meheyiɣ-mɩ se maawɛɛ nɛ pʋcɔ palʋlɩ Abraham.»

59Pʋ-yɔɔ pakpaɣ pɛɛ se payakɩ-ɩ. Ɛlɛ́, ɛmɛlɩ nɛ ɛlɩɩnɩ Ɛsɔ ɖɩɣa taa nɛ ɛɖɛɛ.

Trenutno odabrano:

Yohanɛɛsɩ 8: KABI

Istaknuto

Podijeli

Kopiraj