San Mateo 15

Attho Jesúspaꞌ eñotatenanet ama añeyeꞌ yaꞌsosyatenaye Partsokop ñeñth yerraꞌyen yenamoth

(Mr. 7.1-23)

1Allempoña fariseoneshaꞌ ñamha ñeñth atarr etsotayenayeñ ñoñets ñeñth ateth anareth judioneshakop ñetñapaꞌ arroth waxhaꞌtet Jerusaléñoth. Xhaxhaꞌtet Jesúseshopaꞌ ateth otyesoset:

2—Esoꞌmareꞌtña peyochreshaꞌñapaꞌ kexhpoerretña ñeñth ateth yeyxheꞌth ya awath yatañneshowen. Ñeñthoꞌmar oꞌwañ eꞌpotaꞌtetña Partsokop allempo rrenet.

3Ñañapaꞌ ateth otanet:

—Sapaꞌxhoꞌña ñeñthoꞌmareꞌtrraña sathpareꞌteññañña samha Yompor poꞌñoñ ñeñth ateth anareth allochñapaꞌ eꞌñech sañeña seyxheña eꞌñe setsotayen. 4Ñewa, poꞌñoxhkaꞌye yeñoteñ Yomporpaꞌ ateth oteney: “Semorrenteñothpaꞌ semhchaꞌnaꞌchchaꞌ sompor ñamha sachor.” Elloña ñamha poꞌpoñoneth ateth oteney: “Ñerraꞌm eseshaꞌ sasareꞌteneꞌ pompor ñamha pachor ñeñthpaꞌ moetsetepaꞌ.” 5Tharraña sañapaꞌ amaña attheyeꞌ sepeno tharroꞌmar sapaꞌ xhaña ateth sotyen:

—Ñerraꞌm eseshaꞌ ateth oteneꞌ pompor ñamha pachor: “Ñeñth nechen oꞌch napapeñpaꞌ tharraña amach napape theꞌpaꞌ oꞌch neneꞌ Yomporekop” 6ñeñthña acheñerpaꞌ sañapaꞌ atethchaꞌ soteñ: “Phokoppaꞌ ama pallteno oꞌch es phaph phamoꞌmteꞌ.” Sapaꞌ atthokaꞌyeña sewaporeꞌteññañña Yompor poꞌñoñ allochñapaꞌ eꞌñech aña setsoten ñeñth eꞌñe sañeña seyxheña. 7Sapaꞌ atarrkaꞌye ommoñathneshas tharroꞌmar atarr seshkareꞌten amaña Yomporeyeꞌña sesherbeno. Isaíaspaꞌ eꞌñe kowen aꞌmhtaneꞌth Yompor poꞌñoñ, saña theꞌpaꞌ eꞌñe ateth sepena ateth oteꞌth; allempopaꞌ ateth ot Yompor:

8Ñeñth acheñenesharpaꞌ eꞌñe poenamotha kowentatennanetañ; poeyoxhretoñapaꞌ ama xhenaneto ñeñth kowen nenten na.

9Eꞌñe orrena maꞌyochennet, ñeñth ateth yexhatannenetpaꞌ ñeñthpaꞌ eꞌñe acheña nayeꞌth awath pokthaphña.

10Allempoña Jesúspaꞌ xhoreꞌtan acheñeneshaꞌ ñeñth shontetsa, ñetñapaꞌ ateth otanet:

—Sañapaꞌ eꞌñepaꞌchña kowen seꞌmhñoten allochñapaꞌ atthoch eꞌñe kowen xhaponasa seyoxhro. 11Ama añeyeꞌ yaꞌsosyatenaye Partsokop ñeñth yerraꞌyen yenamoth. Añkaꞌyeña yaꞌsosyateneꞌ yeñoñ ñeñth xhaꞌnets yenamoth ñeñth ateth yeñosatseꞌtyen.

12Allñapaꞌ ateth oteñaꞌ poeyochreshaꞌ:

—¿Peñoteñeꞌt fariseoneshaꞌñapaꞌ allempo eꞌmonapet peñoñ ñeñth ateth photyenanet ñetñapaꞌ xha atsrreꞌmoet?

13Ñañapaꞌ ateth tomaꞌntatanet ñeñthchaꞌ ateth apharethterra fariseoneshaꞌ, ñeñthpaꞌ ateth otanet:

—Allowen narmetsoxhno ñeñth ama añeyeꞌ nareꞌtaye Apa ñeñth poeꞌntañoꞌtsen ñeñthñapaꞌ aꞌmareꞌtarethetwerrach. 14Ñetpaꞌ ottetepaꞌtha. Ñetpaꞌ eꞌñe ateth penet ñerraꞌmrratheꞌ poesheñarr ñeñth aporoꞌyethpaꞌ ñapaꞌ oꞌch echaꞌnman poꞌpsheñeñ ñeñth parro aporoꞌyethekmoet. Allempo ateth penet ñerraꞌm arrorothontha echaꞌnmannaꞌtnomoet epsheñoꞌmaret xhach shoraꞌnmoset arrorotho. Arrpaꞌ allowa ñeñth ateth tomaꞌntatanet ateth ñerraꞌm ya allempo ama yokthapeꞌcherraꞌ ñeñth kowentetsa Yomporekop amach errothenoth yokthapeꞌchache poꞌpsheñeñ ñeñth ama eñotenaye ñeñth kowen enten Yompor.

15Allempoña Pedropaꞌ ateth ot:

—Yapaꞌ xhochña peserrpareꞌtatey eꞌñe kowen eñotoxhen ñeñth ateth petmaꞌntatena ñorraꞌ.

16Ñañapaꞌ ateth otanet:

—Amaꞌt sapaꞌxhoꞌña amaꞌtña señoteñaꞌ. 17Sapaꞌ amaꞌt xhennasoña seyoxhro ñeñth yerraꞌyen yenamothpaꞌ alla sen yatho ñeñthpaꞌ xhokmach yener aꞌyo. 18Añña ñeñth xhaꞌnets yenamoth ñeñth attho yeñosatseꞌtyen ñeñthpaꞌ eꞌñe yeyoxhroth wena ñeñthña xhokma yaꞌsosyateneꞌña Partsokop. 19Eꞌñe yeyoxhroth wena kothaphñats ñeñth amaꞌt mameshapaꞌ ama kowenayaye, ñeñthpaꞌ añ: moetsannaꞌteñets, chetapretannaꞌteñets, kañoreshaꞌteñets, etatsreꞌtyeñets, tomaꞌtamphsannaꞌteñets, sasareꞌteñets. 20Ñeñth allowen sosyaꞌtsañexhno ñeñth wetsa yeyoxhroth ñeñthña poꞌñoxh yaꞌsosyateneꞌ Partsokop. Tharraña allempo yerrallmeꞌchyen amaꞌt ama yeꞌpotaꞌtyesopaꞌ ñeñthpaꞌ amaña ñeñtheyeꞌña yaꞌsosyatenayeña Partsokop.

Attho poesheñarr koyaneshaꞌ ñeñth ama judioneshayaye ñapaꞌ atarr yemtapana Jesús

(Mr. 7.24-30)

21Awerrerr Jesús allothpaꞌ alla xhap allampaño anets Tiro ñamha Sidón. 22Allñapaꞌ oꞌ wapa poesheñarr koyaneshaꞌ ñeñth alloꞌmarneshaꞌ ñeñth cananoꞌmarneshaꞌ. Ñañapaꞌ allentha rranareꞌtospaꞌ ateth otos:

—Pemoerayeꞌchosna, Nepapareshachaꞌ phapaꞌ ñeñtheph Davidnaꞌtareph. Na nakñeꞌtherpaꞌ atarr moeroxhtateñ oneñeth.

23Jesúsñapaꞌ amaꞌt mameshapaꞌ ama eñoranaꞌteño. Attheñapaꞌ oꞌ ponemhya poeyochreshaꞌ otoset:

—Peꞌmhñochñakaꞌye thekma allochñapaꞌ oꞌch awerr, xhakaꞌye kothaꞌneney perranareꞌtnomoeꞌ.

24Ñañapaꞌ ateth otanet:

—Napaꞌ eꞌñe añekpa allsensarethen ñeñth israelenaꞌtarneshakop; ñetpaꞌ eꞌñe ateth nentenanet ñerraꞌm carneroxhno ñeñth payaꞌtyetsa.

25Koyaneshaꞌña ñeñth ama israelenaꞌtareyayepaꞌ ñañapaꞌ allentha on eꞌñe ñesho konkorposñañapaꞌ ateth otos:

—Xhoña Nepapareshachaꞌ pebensamphsayeꞌcherrnan nakñeꞌther.

26Jesúsñapaꞌ tomaꞌntatana acheñeneshaꞌ ñeñth ama israelenaꞌtarneshayaye ñeñthoꞌmarña ateth och:

—Ama pokteyaye oꞌch yeprratampes yakñethar poerrar oꞌch yewaporeꞌtampes alloꞌtsen ochek oꞌch rreꞌ ñamha ochek.

27Koyaneshaꞌñapaꞌ ateth otererr:

—Amaꞌt attheñ Nepapareshachaꞌ tharraña amaꞌt ochekpaꞌxhoꞌña rraꞌyenan ñeñth aꞌshoreꞌtatyen pamoꞌmteꞌ poꞌmesaphnaxho.

28Allempoña Jesúspaꞌ ateth otererr:

—Xhepaꞌt nesñeshachaꞌ atarr nanak peyemtenna ñeñthepñapaꞌ atthetepaꞌch phokop ateth pemnen pha.

Pakñeꞌtherñapaꞌ allorokma korrerra.

Attho Jesúspaꞌ aꞌkrraterranerr poꞌpotantañ atsnañethexhno

29Awerrerr Jesús allothpaꞌ alla oñem saꞌpatophñoꞌmar eꞌñe Galileaso. Allothpaꞌ awoꞌ aspentho allñapaꞌ anorros. 30Allñapaꞌ alla waxherrñañerr shonteꞌ acheñeneshaꞌ. Wapatyerrñañeterr chekaꞌrepaxhno, mankoxhno, aporoꞌyethexhno, opananeshaxhno ñamha wapatoñet shonteꞌ poꞌpotantañexhno. Ñeñthñapaꞌ alla nanatyesosñañet paꞌrrphoth. Ñañapaꞌ eꞌñe aꞌkrratyeswerranet. 31Allña acheñeneshaꞌpaꞌ xha atarr kowanrrorteñet allempo eñchet attho opanaxhno xha eñoraꞌyerrtsa, mankoxhnopaꞌxhoꞌña xha kowenetyerrtsa, chekaꞌrepaxhnopaꞌxhoꞌña xha chopeꞌchyerrets, aporoꞌyethexhnopaꞌxhoꞌña xha eꞌñe kowen kowaꞌyerrets. Ateth eꞌñe kowen eñchetpaꞌ allowenetñapaꞌ kowentateññañet israelneshaꞌ Poꞌyomporer.

Allempo Jesúspaꞌ rratenan shonteꞌ acheñeneshaꞌ, ñeñthña acheñeneshaꞌpaꞌ alloꞌtsen paꞌtatsoch mil

(Mr. 8.1-10)

32Allempoña Jesúspaꞌ agotan poeyochreshaꞌpaꞌ ateth otapanet:

—Napaꞌ xha atarr nemoereña allowen acheñeneshaꞌ ñeñth shontetsa arr. Oꞌ maꞌpamtoset nesho ama eñallmeñeto ñeñthchaꞌ rret. Ama pokteyeꞌ nenteñe oꞌch awanerret eꞌñe paꞌchporrñeshaꞌ theꞌt ama aꞌñsheꞌmterreto thoño.

33Poeyochreshaꞌñapaꞌ ateth otoset:

—Errawachkaꞌye yentña allpon rreñets ñeñthchaꞌ yerrach shonteꞌ acheñ, arrpaꞌ amayakaꞌye.

34Jesúsñapaꞌ ateth oterraneterr:

—Sapaꞌ ¿errponaꞌt sechenña pan?

Ñetñapaꞌ otereterr:

—Eꞌñekaꞌye kanxhrra ñamha koñeꞌth kakatholleshaꞌ.

35Allempoñapaꞌ otan acheñeneshaꞌ:

—Theꞌpaꞌ sanorrxhaꞌtyes patso.

36Allñapaꞌ agapan ñeñth kanxherr pan ñamha kakatholleshaꞌ. Agapwepaꞌ oꞌ parasyosoꞌtenanerr Pompor allothñapaꞌ oꞌ shotaꞌtan pan, shetseꞌtan ñamha kak, apanatyesan poeyochreshaꞌ. Ñetñapaꞌ oꞌ epatyeset ñamet allowen acheñeneshaꞌ eꞌñe epaꞌwet. 37Allempoñapaꞌ oꞌ rrallmeꞌchet allowenet, eꞌñe yetrraꞌtwawet. Oꞌ eꞌñe yetwawetpaꞌ xha aꞌpchatyeset ñeñthñapaꞌ aꞌyapaxheret. Ñeñthña aꞌyapaxherretpaꞌ xhepaꞌtchaꞌ chorrats kanxherr kañther eꞌñe thamoꞌyareꞌ. 38Ñeñth rrallmeꞌchats atarr aton acheñeneshaꞌ ñatoꞌ alloꞌtsentheꞌ paꞌtatsoch mil ñeñth eꞌñe yakmaneshocheꞌ. Ellonethñapaꞌ alloꞌtsaꞌyen ñamha koyaneshaxhno ñamha cheshaneshaxhno. 39Allempoña Jesúspaꞌ soꞌtnerran acheñeneshaꞌpaꞌ awerr, aꞌtapos noñthopaꞌ awamperr oꞌch awoꞌ anetso ñeñth paꞌsoꞌcheñ Magdala.

Trenutno odabrano:

San Mateo 15: ame

Istaknuto

Podijeli

Kopiraj