JONI 6
6
Sa vakani ira na tamata e le lima na udolu ko Jisu, 115. Sa lako voli e dela ni wai ko Jisu, 1621. O ira na tamata era muri koya ki Kapenaumi. A sa vunauci ira ko Jisu me ra gumatua e na ka vakayalo, 2258. Eso vei ira na nona tisaipeli era sa vosakudrukudru, 5965. Sa tukuna ko Pita ni sa Luve ni Kalou ko Jisu; a sa tukuna ko Jisu ni sa dua vei ira sa tamata ca, 6671.
1Sa oti na veika oqo, sa qai lako ko Jisu ki tai kadua ni wasawasa mai Kalili, mai Taiperia. 2A sa lewe vuqa sara era sa muri koya, ni ra raica na veika-mana sa kitaka ko koya vei ira sa tauvi-mate. 3A sa cabeta na ulu-ni-vanua ko Jisu, a sa tiko sobu maikina kei ira na nona tisaipeli. 4A sa voleka na kana vata ni lako-sivia era sa dauia na kai Jutia. 5Ni sa qai ta cake ko Jisu, ka raica ni ra sa lewe vuqa sara sa lako mai vua, sa kaya vei Filipi, Eda na volia maivei na madrai, me ra kana kina ko ira oqo? 6Sa kaya na ka oqo me vakatovolei koya: ni sa kila ko koya na ka sa nakita me kitaka. 7Sa kaya vua ko Filipi, Ena sega ni rauti ira na madrai sa voli e na pene e rua na drau, me ra tauyadua vakalailai ga. 8E dua vei ira na nona tisaipeli, ko Adriu, a taci i Saimoni Pita, sa kaya vei koya, 9Sa tiko eke e dua na gonetagane sa tu vua e lima nai buli madrai parile, ka rua na ika: ia ka yaga vakacava oqo vei ira na lewe vuqa vakaoqo?
10A sa kaya ko Jisu, Vosa vei ira na tamata me ra tiko sobu. Ia sa levu na co e na yasana ko ya. A ra sa tiko sobu na tamata, era sa lewe lima beka na udolu. 11A sa taura na veibuli madrai ko Jisu, ka vakavinavinaka, ka vota vei ira na tisaipeli, ia ko ira na tisaipeli, vei ira sa tiko sobu; ka vaka talega kina na ika me rauti ira. 12Ia ni ra sa mamau, sa kaya ko koya vei ira na nona tisaipeli, Kumuna vata na tikina lalai sa vo, me kakua ni yali e dua na ka. 13Era sa qai tomika vata, ka vakasinaita nai su e tinikarua e na tikina lalai ni buli madrai parile e lima, sa vo vei ira sa kana.
14Ia ko ira na tamata, ni ra sa raica na cakacaka-mana sa kitaka ko Jisu, era sa kaya, Sai koya dina oqo na parofita ko ya e dodonu me lako mai ki vuravura. 15Ia ni sa kila ko Jisu era sa nakita me lako mai ka tauri koya vakaukauwa me ra bulia me tui, sa lako duadua tale yani ki na ulu-ni-vanua.
16Ia ni sa qai yakavi mai, sa lako sobu ko ira na nona tisaipeli ki matasawa, 17ka vodoka na waqa, ka lakova na wasawasa ki Kapenaumi. A sa qai butobuto mai na vanua, a sa sega ni yaco vei ira ko Jisu. 18A sa vakabiau na wai e na vuku ni cagi levu sa liwa. 19Ia ni ra sa voce yani e tolu na maili ka vakacaca, era sa raici Jisu ni sa lako voli e dela ni wai, ka torova na waqa: a ra sa rere. 20A sa kaya vei ira ko koya, Koi au oqo; kakua ni rere. 21Era sa qai vinakata me vodo ki waqa ko koya: a sa qai udu vakasauri na waqa ki na vanua era sa lako kina.
22E na mataka, ko ira na lewe vuqa era sa tu e na tai kadua ni wai, ni ra sa raica sa sega maikea e dua tani na velovelo, ko ya ga ka vodoka ko ira na nona tisaipeli, a sa sega ni vodo vata ki na velovelo kei ira na nona tisaipeli ko Jisu, ia ko ira na nona tisaipeli era a soko yani vakai ira ga; 23(ia ka sa lako mai eso na velovelo mai Taiperia, sa voleka ki na yasana era a kana madrai kina, ni sa vakavinavinaka oti na Turaga:) 24ni ra sa raica na lewe vuqa sa sega ni tiko maikea ko Jisu, se ko iratou na nona tisaipeli, era sa vodo talega ki waqa, ka lako yani ki Kapenaumi, me vakasaqarai Jisu.
25Ia ni ra sa kunei koya mai tai kadua, era sa kaya vua, Vakavuvuli, ko sa lako mai kike ninaica? 26Sa vosa vei ira ko Jisu, ka kaya, E dina, e dina, au sa kaya vei kemudou, Dou sa sega ni vakasaqarai au ni dou sa raica na veika-mana, ni dou a kania ga na veibuli madrai, ka sa mamau kina. 27Dou kakua ni oca me kemudou na kakana sa oti rawa, ia me kemudou ga na kakana sa tu ki na bula tawa mudu, o koya ena solia vei kemudou na Luve ni tamata: ni sai koya sa vakadinadinataka na Kalou ko Tamana.
28Era sa qai kaya vua, A cava me keitou cakava, me keitou kitaka kina na cakacaka sa vinaka vua na Kalou? 29Sa vosa ko Jisu, ka kaya vei ira, Sai koya oqo na cakacaka sa vinaka vua na Kalou, mo dou vakabauti koya sa tala mai ko koya.
30Era sa qai kaya vua, A cava nai vakadinadina ko sa cakava, me keitou raica ka vakabauti iko? a cava ko sa kitaka? 31a noda qase era a kania na mana e na veikau; me vaka sa volai, Sa solia vei ira ko koya na madrai mai lomalagi me ra kania.
32Sa qai kaya vei ira ko Jisu, E dina, e dina, au sa kaya vei kemudou, Sa segai ko Mosese ka solia vei kemudou na madrai ko ya mai lomalagi; ko Tamaqu ga sa solia vei kemudou na madrai dina mai lomalagi. 33Ni sai koya oqo na madrai maivua na Kalou, ko koya sa lako sobu mai lomalagi, a sa solia na bula vei ira na kai vuravura. 34Era sa qai kaya vua, Kemuni na Turaga, solia tikoga mai vei keimami na madrai oqo.
35A sa kaya vei ira ko Jisu, Koi au na madrai ni bula: ko koya sa lako mai vei au, ena sega ni viakana; ia ko koya sa vakabauti au, ena sega ni viagunu tale. 36Ia kau a kaya vei kemudou, Dou a raici au, ia dou a sega ni vakabauta. 37Ko ira kecega sa solia mai vei au ko Tamaqu, era na lako mai vei au: ia ko koya ena lako mai vei au, au na sega sara ni biuta tani. 38Niu sa sega ni lako sobu mai lomalagi meu kitaka na lomaqu, meu kitaka ga na loma i koya sa talai au mai. 39Ia sai koya oqo na loma i Koya sa talai au mai, meu kakua ni vakayalia e dua vei ira sa solia mai vei au ko koya, ka meu vakatura cake tale e na siga maimuri. 40Ia sai koya oqo na loma i Tamaqu, me ra rawata yadua na bula tawa mudu ko ira sa raica na Luvena, ka vakabauti koya; ia kau na vakaturi koya cake e na siga maimuri.
41Sa qai vosakudrukudrutaki koya ko ira na kai Jutia, ni sa kaya, Oi au na madrai sa lako sobu mai lomalagi. 42A ra sa kaya, Sa sega li ni ko Jisu ko koya oqo, a luve i Josefa, a tamana kei na tinana eda kila? sa qai kaya vakacava mai ko koya, Au sa lako sobu mai lomalagi?
43Sa vosa ko Jisu, ka kaya vei ira, Dou kakua ni vosakudrukudru. 44E sega ni lako rawa mai vei au e dua na tamata, kevaka sa sega ni vakayarayarataki koya ko Tamaqu sa talai au mai: ia kau na vakaturi koya cake e na siga maimuri. 45Sa vola na parofita eso, Ena vakavulici ira kecega na Kalou. A ra sa lako mai kina vei au ko ira yadua era sa rogoci Tamaqu, ka sa vakavulici. 46Ia ka sega ni raici Tamaqu e dua na tamata; ko koya duaduaga sa lako maivua na Kalou, sa raici Tamaqu ko koya.
47E dina, e dina, au sa kaya vei kemudou, O koya sa vakabauti au sa rawata na bula tawa mudu. 48Koi au na madrai ni bula. 49Sa kania na mana mai na veikau ko ira na nomudou qase, a ra sa mate ga. 50Sai koya oqo na madrai, sa lako sobu mai lomalagi, me ra kania na tamata, ka sega ni mate. 51Koi au na madrai bula sa lako sobu mai lomalagi; kevaka sa dua e kania na madrai oqo, ena bula ka tawa mudu: ia na madrai kau na solia sa lewequ, o koya kau na solia me bula kina ko ira na kai vuravura.
52Era sa qai veileti vakai ira na kai Jutia, ka kaya, Sa solia rawa vakacava na tamata oqo na lewena me da kania?
53Sa qai kaya vei ira ko Jisu, E dina, e dina, au sa kaya vei kemudou, Kevaka dou sa sega ni kania na lewe ni Luve ni tamata, ka gunuva na nona dra, sa sega vei kemudou na bula. 54O koya sa kania na lewequ, ka gunuva na noqu dra, sa rawata na bula tawa mudu; ia kau na vakaturi koya cake e na siga maimuri. 55Ni sa kakana dina na lewequ, a sa ka-ni-gunu dina na noqu dra. 56O koya sa kania na lewequ, ka gunuva na noqu dra, sa tu vei au, koi au talega au sa tu vei koya. 57Me vaka sa bula tiko ko Tamaqu sa talai au mai, au sa bula talega e na vuku i Tamaqu; sa vaka talega kina ko koya sa kani au, ena bula e na vukuqu. 58Sai koya oqo na madrai sa lako sobu mai lomalagi: sa sega ni tautauvata kei na mana sa kania ko ira na nomudou qase, a ra sa mate ga: ko koya sa kania na madrai oqo, ena bula ka tawa mudu.
59Sa vosataka na veika oqo ko koya e na vale ni lotu, ni sa vakatavuvuli tiko mai Kapenaumi.
60Era lewe vuqa vei ira na nona tisaipeli ni ra rogoca era sa kaya, A vosa dredre oqo: ko cei sa vakabauta rawa? 61Ni sa kila ko Jisu e na lomana, ni ra sa vosakudrukudru na nona tisaipeli e na ka oqo, sa kaya vei ira, Sa vakatarabetaki kemudou na ka oqo, ne? 62Ena vakabeka evei kevaka dou na raica na Luve ni tamata ni sa lako cake ki na tikina ka tiko kina eliu. 63Na yalo sa solia na bula: na lewena sa sega ni yaga: a vosa kau vosataka vei kemudou sa vakayalo, ka sa vu-ni-bula. 64Ia ka so vei kemudou sa sega ni vakabauta. Ni sa kilai ira mai nai vakatekivu ko Jisu era sa sega ni vakabauti koya, kei koya ena soli koya yani. 65A sa kaya, O koya oqo kau a kaya kina vei kemudou, Sa sega e dua na tamata sa lako rawa mai vei au, kevaka sa sega ni solia vua ko Tamaqu.
66A ka oqo era sa suka tani kina e le vuqa vei ira na nona tisaipeli, a ra sa sega tale ni lako vata kaya. 67Sa qai kaya ko Jisu vei ira na lewe tinikarua, Dou sa via lako tani talega koi kemudou? 68Sa qai kaya vua ko Saimoni Pita, Kemuni na Turaga, keitou na lako vei cei? sa tu ga vei kemuni na vosa ni bula tawa mudu: 69ia keitou sa vakabauta ka kila, ni sai Kemuni na Karisito, na Luve ni Kalou bula. 70Sa kaya vei ira ko Jisu, Au a sega li ni digitaki kemudou na lewe tinikarua, ia ka sa dua vei kemudou sa nonai to na tevoro? 71Sa vosataki Jutasa Isikarioti, na luve i Saimoni, ni sai koya oqo ena soli koya yani, a sa dua vei ira na le tinikarua ko koya.
Trenutno odabrano:
JONI 6: FOV
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Vakavakadewa Makawa (Fijian Old Version) © Bible Society of the South Pacific
