JONI 1
1
Sa tukuni ni sa Kalou ko koya na Vosa, ka yaco talega me tamata, 118. Ai tukutuku i Joni, 1939. Erau sa kacivi mei talatala i Jisu ko Adriu kei Pita. Eratou sa veikune ko Jisu kei Filipi kei Nacanieli, 4051.
1E Nai vakatekivu sa bula ko koya na Vosa, a rau sa tiko vata kei na Kalou ko koya na Vosa, a sa Kalou ko koya na Vosa. 2E nai vakatekivu erau sa tiko vata ko koya oqo kei na Kalou, 3Sa cakava na ka kecega ko koya; a sa sega e dua na ka sa caka, me sega ni cakava ko koya. 4Sa tu vei koya na bula; ia na rarama ni tamata na bula. 5A sa cilava na butobuto na rarama; ia na butobuto sa sega ni kunea.
6Sa dua na tamata sa talai mai vua na Kalou, a yacana ko Joni. 7O koya oqo sa lako mai me dautukutuku, me tukuni koya na Rarama, me ra vakabauta na tamata kecega e na vukuna. 8Sa sega ni rarama ko ya ko koya, ia sa nonai tavi me tukuna ga na Rarama.
9Sai koya ga oqo na Rarama dina, sa lako mai ki vuravura ka vakararamataki ira na tamata kecega. 10Sa tiko e vuravura ko koya, a sai koya ka caka kina ko vuravura, ia ka sega ni kilai koya ko ira na kai vuravura. 11Sa lako mai ko koya kivei ira na kai nona, ka sega ni vakabauti koya ko ira na kai nona. 12Ia ko ira kecega sa vakabauti koya, sa solia vei ira ko koya me ra yaco rawa me ra luve ni Kalou, vei ira sa vakabauta na yacana: 13era sa vakasucumi, e sega e na vukudra na qase, se na sucu vakayago, se na veitalia ni tamata, mai vua ga na Kalou.
14A sa yaco me tamata ko koya na Vosa, ka tiko vata kei keda, (ia keitou a raica na nonai ukuuku, ni sa vaka nai ukuuku ni Le dua bauga sa vakatuburi maivei Tamana,) sa sinai e na loloma kei na dina.
15Sa tukuni koya ko Joni ka kacivaka, ka kaya, Sai koya oqo kau a vosataka, O koya sa muri au sa uasivi cake vei keirau: ni sa liu vei keirau ko koya.
16Ia eda sa rawata kecega, mai na ka sa sinai tu vua, a loloma sa vakaikuritaki. 17Ia ko Mosese sa soli kina na vunau; ko Jisu Karisito sa yaco kina na loloma kei na dina. 18E sega e dua na tamata sa raica na Kalou e na dua na gauna; na Luvena ga e dua bauga, sa vakatubura ko koya, ko koya sa tiko e na lomasere i Tamana, sa tukuni koya.
19IA sai koya oqo nai tukutuku i Joni, ni sa tala eso na bete ka so na luve i Livai ko ira na kai Jutia mai Jerusalemi me ra tarogi koya, Ko cei beka ko iko? 20A sa tukuna ko koya, ka sega ni cakitaka; ka tukuna ga, Au sa sega ni koya na Karisito koi au. 21A ra sa tarogi koya, Ko cei tale? ko Ilaija beka? A sa kaya ko koya, E segai. Ko iko beka na parofita ko ya? A sa kaya ko koya, E segai. 22Era sa qai kaya vua, Ko cei beka ko iko? me keitou tukuna vei ira sa talai keitou: ko sa tukuni iko mei cei? 23Sa kaya ko koya, Koi au na domo ni dua sa kacikaci e loma ni veico, Vakadodonutaka na sala i Jiova me vaka sa kaya ko Aisea na parofita.
24Ia ko ira sa talai, era sa talai maivei ira na Farisi. 25A ra sa tarogi koya, ka kaya vua, Ko sa qai veipapitaisotaki e na vuku ni cava, ni ko sa sega ni koya na Karisito, se ko Ilaija, se na parofita ko ya? 26Sa vosa vei ira ko Joni, ka kaya, Au sa veipapitaisotaki e na wai: ia ka sa tu e na kemudou maliwa e dua dou sa sega ni kila; 27sai koya oqo, sa muri au ka sa uasivi cake vei au, ia na wa ni nonai vava kau sa sega ni yaga meu sereka. 28Sa caka na veika oqo mai Pecani e na tai kadua ni Joritani, a tikina sa veipapitaisotaki kina ko Joni.
29E na mataka sa raici Jisu ko Joni ni sa lako tiko mai vua, a sa kaya, Raica na Lami ni Kalou, ko koya sa kauta tani na nodrai valavala ca na kai vuravura! 30Sai koya oqo kau a tukuna, Sa muri au e dua na tamata, sa uasivi cake vei au; ni sa liu vei keirau. 31Ia kau a sega ni kilai koya; ia me ra kilai koya ko ira na Isireli, ko koya oqo kau sa lako mai kina ka veipapitaisotaki e na wai.
32A sa tukuna ko Joni, ka kaya, Au a raica na Yalo Tabu ni sa lako sobu mai lomalagi me vaka na ruve, a sa mai toka vua: 33ia kau a sega ni kilai koya eliu: ia ko koya sa talai au mai meu veipapitaisotaki e na wai, sa kaya ga vei au, O koya ko na raica ni sa lako sobu kina na Yalo Tabu, a sa mai toka vua, sai koya oqo sa veipapitaisotaki e na Yalo Tabu. 34Ia kau a raica, ka tukuna ni sai koya oqo na luve ni Kalou.
35E na mataka sa tu tale ko Joni, ka lewe rua na nona tisaipeli; 36a sa vakaraici Jisu ni sa lako, a sa kaya, Raica na Lami ni Kalou! 37A sa rogoca na nona vosa koi rau na tisaipeli, ka rau sa muri Jisu. 38Sa qai vuki ko Jisu, ka raici rau ni rau sa muria, ka kaya vei rau, A cava drau sa vakasaqara? Erau sa qai kaya vua, Rapai, (a kenai balebale, Vakavuvuli,) ko sa tiko maivei? 39Sa kaya vei rau ko koya, Lako mai ka raica. Erau sa lako, ka raica na yasana sa tiko kina ko koya, ka ratou sa tiko vata kaya e na siga ko ya: a sa voleka nai katini ni aua.
40Sa dua vei rau sa rogoci Joni, ka muri Koya, ko Adriu na taci i Saimoni Pita. 41Sa kunea eliu na tuakana ko Saimoni, ka kaya vua, Keitou sa kunea na Mesaia; (a kenai balebale, na Karisito.) 42A sa kauti koya kivei Jisu. Ia sa vakaraici koya ko Jisu, ka kaya, O iko ko Saimoni na luve i Jona: ko na vakatokai ko Kifa: (a kenai balebale ko Pita.)
43E na mataka sa via lako yani ki Kalili ko Jisu, a sa kunei Filipi, ka kaya vua, Muri au. 44A kai Peciseita ko Filipi, a nodrau koro ko Adriu kei Pita.
45Sa kunei Nacanieli ko Filipi, ka kaya vua, Keitou sa kunei koya sa volavola kina ko Mosese e na vunau, kei ira talega na parofita, ko Jisu na kai Nasareci, a luve i Josefa. 46A sa kaya vua ko Nacanieli, E tubu rawa beka mai Nasareci e dua na ka vinaka? Sa kaya vua ko Filipi, Lako mai mo raica.
47Sa raici Nacanieli ko Jisu ni sa lako tiko mai vua, a sa kaya ni sa tukuni koya, Raica e dua na luve i Isireli dina, sa sega vei koya na dauveivakaisini! 48Sa kaya vua ko Nacanieli, O ni sa kilai au maivei? Sa vosa ko Jisu, ka kaya vua, Ni sa bera ni kacivi iko ko Filipi, ni ko a tiko e ruku ni lolo, au a raici iko. 49Sa vosa ko Nacanieli, ka kaya vua. Vakavuvuli, koi kemuni na Luve ni Kalou, koi kemuni na nodra Tui na Isireli. 50Sa vosa ko Jisu, ka kaya vua, Niu sa kaya vei iko, Au a raici iko e ruku ni lolo, ko sa vakabauta, ne? ko na raica na veika sa uasivia oqo. 51A sa kaya vua ko koya, E dina, e dina, au sa kaya vei kemudou, E na gauna maimuri dou na raici lomalagi ni sa tawase, kei ira na agilose ni Kalou ni ra sa lako cake ka lako sobu vua na Luve ni tamata.
Trenutno odabrano:
JONI 1: FOV
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Vakavakadewa Makawa (Fijian Old Version) © Bible Society of the South Pacific
