NAI VAKATEKIVU 8
8
Sa lako sobu na wai, 1-5. Sa vakatala na reveni ko Noa mai na waqa, 6,7, kei na ruve, 8-12. Sa mamaca na qele, 13,14. Sa biuta na waqa ko Noa kei ira era tiko kaya, 15-19. Sa vakacabora nai soro ko Noa, a sa vosa vua ko Jiova, 20-22
1A sa nanumi Noa na Kalou, kei na ka bula kecega, kei na manumanu kecega sa tiko vata kaya e waqa; a sa vakaliwava na cagi na Kalou e dela i vuravura; a sa cegu na wai; 2a sa sogoti nai vurevure ni wai titobu, kei nai sogo kei lomalagi, a sa tarovi na uca mai lomalagi; 3a sa lesu tikoga na wai mai dela i vuravura: ia ni sa oti e dua na drau ka limasagavulu na bogi, sa qai lailai sobu na wai.
4A sa kasa na waqa e dela ni veiulu-ni-vanua mai Ararata, e na kenai kavitu ni vula, e na kenai katinikavitu ni siga ni vula. 5A sa lako sobu tiko na wai, ka yacova nai katini ni vula: ia e na kenai katini ni vula, e nai matai ni siga ni vula, sa qai rairai na dela ni veiulu-ni-vanua.
6Ia sa bogi vasagavulu, sa qai dolava ko Noa na katuba ni waqa ka cakava ko koya: 7a sa vakatala e dua na reveni, a sa lako yani ka dauveivukayaki, ka me maca mada na wai mai dela i vuravura: 8a sa vakatala e dua na ruve, ka me raica se sa lailai sobu na wai mai na dela ni vanua, se segai: 9ia na ruve sa sega ni kunea e dua na vanua me ro kina, a sa lesu tale vua ki waqa, ni sa tiko na wai e dela i vuravura taucoko: a sa dodoka na ligana, ka taura, ka kauta tale vua ki loma ni waqa. 10A sa bogi vitu tale, sa vakatala tale na ruve mai na waqa: 11a sa lesu tale mai vua na ruve e na yakavi; ka raica, sa tiko e gusuna e dua na drau ni olive, sa miniki: a sa kila kina ko Noa ni sa lailai sobu na wai mai dela ni vanua. 12A sa wawa tiko ka bogi vitu tale, a sa vakatala tale na ruve, a sa sega ni lesu tale mai vei koya.
13Ia e na kenai kaono na drau ka dua na yabaki, e nai matai ni vula, e nai matai ni siga ni vula, sa qai maca na wai mai dela i vuravura: a sa luvata tani nai ubi ni waqa ko Noa, a sa rai voli, ka kunea ni sa mamaca na vanua. 14Ia e na kenai karua ni vula, e na kena i karuasagavulu ka vitu ni siga ni vula, sa qai mamaca sara na vanua.
15A sa vosa vei Noa na Kalou, ka kaya, 16Mo lako tani e na waqa, ko iko, kei na watimu, kei iratou na luvemu, kei na watidratou na luvemu: 17ka mo kauta vata kei iko na ka bula kecega sa tiko kei iko io, na mataqali manumanu kecega, na manumanu vuka, kei na manumanu e yavai va, kei na ka kecega sa qasi voli e dela i vuravura; me ra tubu vakalevu e vuravura, ka luvea, ka me ra ka levu mai, e vuravura. 18A sa lako tani ko Noa, kei iratou vata kaya na luvena, kei na watina, kei na watidratou na luvena: 19a manumanu e sega ni lasa kecega, a ka kecega sa qasi voli, kei na manumanu vuka kecega, kei na ka kecega sa bula voli e dela i vuravura, me vaka na kedra mataqali, era sa lako tani mai na waqa.
20A sa cakava ko Noa e dua nai cabocabo-ni-soro vei Jiova; a sa taura eso vei ira na manumanu kecega e yavai va sa savasava, ka so vei ira na manumanu vuka kecega sa savasava, a sa vakacabora nai soro kama e nai cabocabo-ni-soro. 21A sa boica nai boi ni veivinakati ko Jiova: a sa kaya e lomana ko Jiova, Sa dina sa ka ca e nanuma na loma ni tamata mai na gauna sa cauravou kina; ia ka'u na sega ga ni vakarusai vuravura tale e na vuku ni tamata; ka'u na sega talega ni cudruva na ka kecega sa bula, me vaka na ka ka'u sa kitaka oti: 22ni sa tiko ko vuravura, ena sega ni mudu na vula i teitei kei na vula i kelikeli, kei na liliwa kei na katakata, kei na vula i katakata kei na vula i liliwa, kei na siga kei na bogi.
Trenutno odabrano:
NAI VAKATEKIVU 8: FOV
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Vakavakadewa Makawa (Fijian Old Version) © Bible Society of the South Pacific