NAI VAKATEKIVU 4
4
Sa sucu ko Keni kei Epeli, 1,2. A nodraui soro, 3-7. Sa vakamatei Epeli ko Keni, 8. Sa tarogi koya ko Jiova, ka cudruva, 9-15. A kawa i Keni, 16-18. Sa veikaruani ko Lemeki, 19-24. Sa sucu ko Seci, 25,26.
1A rau sa veiyacovi ko Atama kei Ivi na watina; a sa kunekune ko koya, a sa vakasucumi Keni, a sa kaya, Au sa rawata e dua na tagane maivei Jiova. 2A sa vakasucu tale, ka vakasucumi Epeli na tacina. Ia ko Epeli sa dauvakana sipi; a sa daucaka were ko Keni.
3Sa oti bogi vica, sa kauta mai ko Keni eso na vuata ni vanua mei madrali vei Jiova. 4Ko Epeli talega, sa kauta mai eso na ulumatua ni nona sipi, ka so na kedra uro. A sa vakadonui Epeli ko Jiova, kei na nonai madrali: 5ia ka sa sega ni vakadonui Keni ko koya, se na nonai madrali. A sa cudru vakalevu ko Keni, a sa rai dua tani na matana. 6A sa kaya vei Keni ko Jiova, A cava ko sa cudru kina? Ka cava sa rai dua tani kina na matamu? 7Kevaka ko sa caka vinaka, ko na sega li ni vinakati? Ia kevaka ko sa sega ni caka vinaka, sa koto nai valavala ca mai na katuba. Ia ena qaravi iko ko koya, ko na lewai koya talega.
8A sa kaya vei Epeli na tacina ko Keni, Daru lako ki na were; ia ni rau a tiko e na were, sa qai tu cake ko Keni vei Epeli na tacina, ka vakamatei koya.
9A sa kaya vei Keni ko Jiova, Sa evei na tacimu ko Epeli? A sa kaya ko koya, Au sa sega ni kila: koi au beka nai vakatawa i taciqu? 10A sa kaya ko koya, A cava ko sa kitaka? a dra ni tacimu sa tagi vei au mai na qele: 11ia oqo, ko sa qai cudruvi e na vanua oqo, o koya sa gunuva na dra ni tacimu ko sa vakamatea: 12ni ko sa wereca na vanua, ena sega tiko ni bulabula me vua vei iko; ko na dauveidroyaki ka tiko sese e vuravura. 13A sa kaya vei Jiova ko Keni, Ai sau ni noqui valavala ca sa levu sara, au sega ni vosota rawa: 14raica, ko ni sa vakasevi au edaidai mai na vanua oqo; ka'u na vuni talega mai na matamuni; au na dauveidroyaki ka tiko sese e vuravura; ia, ena yaco, ko koya sa kunei au ena vakamatei au. 15A sa kaya vua ko Jiova, O koya sa na vakamatei Keni, ena saumi vakavitu. A sa vakatakilakilataki Keni ko Jiova, me kakua ni mokuti koya e dua ni sa kunea.
16A sa lako tani mai na mata i Jiova ko Keni, ka la'ki tiko ki na vanua ko Noti, vaka ki na tu-i-cake mai Iteni. 17A sa veiyacovi tale kei na watina ko Keni; a sa kunekune ko koya, a sa vakasucumi Inoki: a sa tara e dua na koro ko koya, ka vakatoka na koro e na yaca ni luvena ko Inoki. 18A sa sucu ko Irati na luve i Inoki: a sa sucu ko Meujeli na luve i Irati: a sa sucu ko Mecuseeli na luve i Meujeli: a sa sucu ko Lemeki na luve i Mecuseeli.
19A sa vakawati ko Lemeki kei na le rua na yalewa: a yacana e dua ko Eta, a yacana nai karua ko Sila. 20A sa vakasucumi Jepali ko Eta: ko koya na tamadra era sa dautiko e na vale laca, kei ira era dauvakana manumanu e yavai va. 21Ia na yaca i tacina ko Jupali: ko koya na tamadra kecega era dau ni api kei na kove. 22Ko Sila talega, sa vakasucumi Tupali-keni, a nodra i vakavuvuli kecega na matai ni parasa kei na aironi: ia na gane i Tupali-keni ko Neama. 23A sa kaya ko Lemeki vei rau na watina,
I Eta kei Sila, drau rogoca na noqu vosa;
Koi kemudrau na wati i
Lemeki, drau vakarorogo ki na ka ka'u sa kaya:
Ni'u sa vakamatea e dua na tamata ka'u sa mavoa kina:
Kei na cauravou ka'u sa lauti kina:
24Kevaka sa vakavitu na kenai sau e na vuku i Keni, Ena vakavitusagavulu ka vitu vakaidina e na vuku i Lemeki.
25A sa veiyacovi tale kei na watina ko Atama; a sa vakasucuma ko koya e dua na luvena tagane, a sa vakayacani koya ko Seci: ni sa kaya, Sa solia mai vei au na Kalou e dua na kawa mei sosomi kei Epeli, ka vakamatea ko Keni.
26A sa sucu e dua na luve i Seci ka tagane; a sa vakayacani koya ko Inosi: e na gauna ko ya, era qai vakatekivu kina na tamata me vakatokai ira e na yaca i Jiova.
Trenutno odabrano:
NAI VAKATEKIVU 4: FOV
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Vakavakadewa Makawa (Fijian Old Version) © Bible Society of the South Pacific