NAI VAKATEKIVU 13
13
Erau sa lesu mai Ijipita ko Eparama kei Loti, 1-4. Erau sa qai dui tikotiko ko Eparama kei Loti, 5-9. Sa la'ki tiko ki Sotoma ko Loti, 10-13. Sa vosavakalougatataki Eparama ko Jiova, 14-18.
1A sa lako tani e Ijipita ko Eparama, ko koya, kei na watina, kei na nona ka kecega, a sa lako vata kaya ko Loti, vaka ki na Ceva. 2A sa vutuniyau sara ko Eparama, e na manumanu e yavai va, e na siliva, kei na koula. 3A sa lako ko koya e na nona lako tu mai na Ceva ka yaco ki Peceli, ki na yasana ka tiko kina eliu na nona vale laca, e na macawa i Peceli kei Ai; 4ki na yasana sa tu kina nai cabocabo-ni-soro, ka cakava kina eliu ko koya: a sa masuta maikea na yaca i Jiova ko Eparama.
5Io ko Loti talega, ko koya erau a lako vata kei Eparama, sa taukena na qele ni sipi, kei na qele ni pulumokau, kei na vale laca. 6A sa sega ni rauti rau na vanua me rau tiko vata: ni sa levu na nodrau ka, sa dredre kina me rau tiko vata. 7A ra sa dauveileti nai vakatawa ni manumanu e yava i va i Eparama, kei nai vakatawa ni manumanu e yavai va i Loti: a ra sa tiko e na vanua na kai Kenani kei na lewe ni Veikoro lalai. 8A sa kaya vei Loti ko Eparama, Me kakua mada na veileti vei kedaru, se vei ira na noqu i vakatawa ni manumanu kei ira na nomu i vakatawa ni manumanu; ni daru sa veiwekani: 9sa sega li ni tiko e matamu na vanua taucoko? me daru tawase mada ne? kevaka ko lako ki nai mawi, ka'u na qai lako ki nai matau; se ko lako ki nai matau, ka'u na qai lako ki nai mawi.
10A sa ta cake ko Loti, ka raica na Buca taucoko sa volita na Joritani, e na sala vaka ki Soa, ni sa vuqa na kena wai e na veiyasana kecega, ni sa bera na nona vakarusai Sotoma kei Komora ko Jiova, io sa vaka na were i Jiova, sa vaka na vanua ko Ijipita. 11A sa digitaka ko Loti na Buca taucoko sa volita na Joritani me nona; a sa qai lako vaka ki na tu-i-cake ko Loti: ka rau a dui tawase. 12Sa tiko e na vanua ko Kenani ko Eparama, a sa tiko ko Loti e na veikoro mai na Buca sa volita, a sa la'ki birika na nona vale laca vaka ki Sotoma. 13A ra sa tamata ca na kai Sotoma, kai valavala ca sara e na mata i Jiova.
14A sa kaya vei Eparama ko Jiova, ni sa tawase tani vua ko Loti, Mo ta cake mada, ka rai yani e na tikina ko tu kina, ia mo rai vaka ki na tokalau, kei na ceva, kei na vanua ki na tu-i-cake, kei na vanua ki ra; 15ia na vanua taucoko ko sa raica ka'u na solia vei iko, kei ira na nomu kawa me ra taukena ka tawa mudu. 16Ia ka'u na vakalewevuqataki ira na nomu kawa me ra vaka na kuvu ni soso: ia kevaka sa wilika rawa na kuvu ni soso e dua na tamata, ena qai wili rawa na nomu kawa. 17Mo cavu tu, mo lako voli e na vanua, e na kena balavu, kei na kena raraba; ni'u na solia vei iko.
18A sa cavuta na nona vale laca ko Eparama, ka la'ki tiko mai na kau eso mai Mamire, ko koya mai Epironi, a sa cakava maikea e dua nai cabocabo-ni-soro vei Jiova.
Trenutno odabrano:
NAI VAKATEKIVU 13: FOV
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Vakavakadewa Makawa (Fijian Old Version) © Bible Society of the South Pacific