ปือบูวัจ 4
4
เปโตร ฌางัน โยฮัน กือนา รีฆะ ดัฮ
1ตานา กูญา ดูวา อูรัก ตืองัฮ มือเลา ฌางัน ลูมอฮ ซือมียา_ อาดา โกะ ซามี ฌางัน กือปาลา ลูมอฮ ฌาฆา รูมัฮ มือญือมัฮ ตูฮัด_ ฌางัน ลูมอฮ ซะดูซี กูญา มาแรฮ ดาปัจ กูญา ดูวา อูรัก อีตู. 2กูญา ฆาโดฮ ฮาตี_ ซาเบะ ดูวา อูรัก อีตู อาฌัยํ โกะ ซือมียา บาญะ_ มือญาเระ ปาซัน ลาฆู ฮีโดะ ปาเระ เดะ มาตี_ บือกะ เยซู ฮีโดะ ปาเระ ดัฮ. 3โกะ ลูมอฮ ซามี รีฆะ เปโตร ฌางัน โยฮัน_ กานัก ตาโรฮ เดะ ปือฌารา_ ฌู รอจ กะ ปาฆี_ ซาเบะ อารี อีตู ปะฮือญา_ นะ มาลับ ดัฮ. 4ตาปี เดะ ลูมอฮ ซือมียา นู ดืองัยํ ปือมือเลา อีตู_ อาดา บาญะ อูรัก ปือจายา_ บูวัจ บรี อาดา ลูมอฮ ซือมียา ปือจายา_ ฆามะ บือเลฮ ลีมา รีบู อูรัก.
5ตานา จรัฮ ปาฆี_ โกะ ลูมอฮ กือปาลา_ ลูมอฮ อูรัก ตูฮา_ ลูมอฮ ซือมียา อาฌัยํ ลาฆู ปือมือซัด นะ ตูฮัด_ กูญา ปาคัจ มาแรฮ บือมุน เดะ นังฆรี เยรูซาเลม. 6อาดา ฌูฆา อานัด_ นู ฌาดี กือปาลา ซามี. อาดา กายาฟัด_ โยฮัน_ อาเลกซันเดอ_ ฌางัน ลูมอฮ นะบรานะ นะ กือปาลา ซามี_ ซือมูฮา. 7ลูมอฮ กูญา บรี เปโตร ฌางัน โยฮัน ดูวา อูรัก_ บือดีรี เดะ ตืองัฮ_ กูญา ตาญา จะ_ “นู กาเญา บูวัจ บรี ซือมียา อีตู ลือฆา เตอ_ กาเญา บูวัจ ฌางัน ปือมือฆัฮ นู ดีฮา? กาเญา บูวัจ เดะ ปือนามา นะ ซาปา เลอ?”
8เปโตร เตอ_ ญา ปือนอฮ ฌางัน ซือมืองัจ นะ ตูฮัด มือเลา ฌางัน กูญา จะ_ “กาเญา นู ฌาดี โกะ กือปาลา ลูมอฮ ซือมียา_ ฌางัน โกะ อูรัก ตูฮา เออ. 9กาเญา นะ ซาซัจ กามี เดะ อารี อีนี เฆอ_ ปาซัน ปือบูวัจ นู บาฌิ_ นู บรี อูรัก เตด ซือนัง ญาวา อีนี_ ตือฆัยํ อูรัจ ดัฮ กะฮามี? 10กะฆีเตอ_ บรี กาเญา_ ฌางัน ลูมอฮ บักซา อิซราเอน ซือมูฮา_ ตาฮู จะ_ อาดา เยซู คริด ซือมียา ตูโปะ นาซาเรด_ นู กาเญา กาจิก เดะ กายู ปลีตัก ดัฮ_ นู ตูฮัด เดะ อาตัซ บรี ฮีโดะ ปาเระ เดะ มาตี ดัฮ. ปือนามา นะ ญา เลอ_ นู บูวัจ บรี ซือมียา อีนี บือดีรี เดะ ตืองัฮ กาเญา_ ฌาดี ซือมียา ตือฆัยํ อูรัจ ดัฮ. 11เยซู เลอ_ ฌาดี ซือมียา นู ซูรัจ ปือมือเลา นะ ตูฮัด มือเลา ปาซัน ญา จะ
“ ‘บาตู บือซัยํ อีตู_ นู กาเญา_ โกะ ตูกัก กรือฌา รูมัฮ_ ตีงัน บูวัก ดัฮ
บาตู อีตู เลอ_ ปาเระ มาแรฮ ฌาดี บาตู กือปาลา ซาฆี ดัฮ #
มปต 118.22 ’. ”
12“เดะ ซือมียา อาซิก นู ดีฮา โปด_ ฮอย ซาปา นะ บรี ฮีโดะ ลือปัซ บาฌิ. กรานา เดะ บาวัฮ ลาแงะ_ ฮอย ปือนามา อาซิก_ นู ตูฮัด บรี กะ ลูมอฮ ซือมียา_ นู นะ ตูโลก กีตา บรี ฮีโดะ ลือปัซ บาฌิ ดัฮ. ฮอย ลาลู เลอ.” เปโตร ญา จะ.
13ลูมอฮ ซือมียา ลีฮัจ จะ_ เปโตร ฌางัน โยฮัน ฮาตี บรานี กะฆีเตอ. กูญา ตาฮู จะ_ ดูวา อูรัก อีตู_ ฌาดี ซือมียา เตด บือเลฮ บลาฌัยํ ซูรัจ_ บูกัด ซือมียา บือซัยํ. กะฆีเตอ กูญา ปือและ ฮาตี ซูโงฮ. กูญา ลีฮัจ จะ_ กือดูวา อูรัก อีตู ฌาดี ซือมียา_ นู บือเลฮ ตูโรจ บือซามา ฌางัน เยซู ดัฮ. 14วะตู กูญา ลีฮัจ บือฆารี ซือมียา นู กือนา ปือบือลา บรี ลือฆา ดัฮ_ ญา อาดา บือดีรี บือซามา เปโตร ฌางัน โยฮัน_ กูญา ฮอย ปือมือเลา นามา นะ ตีกัฮ บือเลฮ เลอ. 15กะฆีเตอ_ กูญา ซูโรฮ ดูวา อูรัก อีตู_ บรี ตรือเบะ ปี กะ ลูวัยํ ตือปัจ บือมุน บือกีรา. กูญา ซือมูฮา บือกีรา บือซามา_ 16มือเลา จะ_ “กีตา นะ บูวัจ กะฮามี ฌางัน กูญา อีนี? โกะ ซือมียา นู ดูโดะ เดะ นังฆรี เยรูซาเลม ซือมูฮา_ ลีฮัจ ดัฮ จะ_ นู กูญา บือเลฮ บูวัจ ปือนานา นู ซีดี ซูโงฮ. กีตา กีปัซ ลาฆู อีนี_ เตด บือเลฮ ดัฮ. 17ตาปี กีตา ตีเมา บรี ลาฆู อีนี_ นะ กรือจัย ลาฆี_ กะ ลูมอฮ ซือมียา บาญะ. กะฆีเตอ_ บรี กีตา มืออารับ กะ กูญา_ ตีเมา บรี กูญา มือเลา ฌางัน ซาปา_ ปาซัน ปือนามา นะ เยซู อีนี.” กูญา จะ.
18กะฆีเตอ_ กูญา ปาเงน กือดูวา อูรัก อีตู_ บรี บาลิ มาแรฮ_ ปือซัด กูญา จะ_ “ปาซัน ปือนามา นะ เยซู อีนี เตอ_ ฌางัน ซือโบจ_ ฌางัน อาฌัยํ นามา ลาลู เลอ.”
19ตาปี เปโตร ฌางัน โยฮัน ตีกัฮ กูญา จะ_ “กาเญา ฆาโดฮ บรีงัจ ลีฮัจ_ ลาฆู นู ดีฮา กือนา เดะ ฮาตี นะ ตูฮัด? นะ มือนีงัย กะ กาเญา_ เฆอ จะ_ นะ มือนีงัย กะ ตูฮัด? 20ตาปี โซะ กามี เตอ_ ลาฆู มานามา นู กามี ลีฮัจ บือฆารี ดัฮ_ ดืองัยํ ดัฮ_ ลาฆู อีตู กามี นะ บราดู มือญาเระ_ เตด บือเลฮ ดัฮ เลอ.” กูญา จะ.
21กะฆีเตอ โกะ ซือมียา บือมุน บือกีรา_ มืออารับ กะ ดูวา อูรัก อีตู กือมัซๆ ลาฆี_ บารู ปลือปัซ กูญา ปี เลอ. กูญา ลีฮัจ จะ_ นะ กรัจ ฮูโกบ กูญา_ เตด บือเลฮ ดัฮ_ กรานา โกะ ซือมียา บาญะ ซือมูฮา_ มือโอจ กะ ตูฮัด_ ปาซัน ลาฆู นู บือฌาดี ดัฮ. 22ซือมียา นู กือนา ปือบือลา บรี ลือฆา ดัฮ_ เดะ ปือนานา ซีดี อีตู_ ญา เลอ_ อูมอยํ ปัจ ปูโลฮ ตาโฮด ลือเบฮ ดัฮ.
ลูมอฮ ซือมียา ปือจายา บือซาโวจ บือซามา
23ตานา กือนา ปลือปัซ ดัฮ_ กูญา ดูวา อูรัก ปี ดาปัจ ลูมอฮ ซือมียา นะ กูญา_ มือญาเระ ลาฆู นู ลูมอฮ ซามี ซัยํบือซัยํ_ โกะ อูรัก ตูฮา_ มือเลา ดัฮ_ ซือมูฮา. 24ซูดัฮ กูญา ซือมูฮา มือนีงัย ดัฮ_ กูญา ปาคัจ รือมา ฮาตี บือซาโวจ กะ ตูฮัด เดะ อาตัซ_ มือเลา จะ_ “โอ ตูฮัด เออ_ เกา เลอ_ ฌาดี ตูฮัด นู บือฌาดี ลาแงะ ฌางัน ดือนียา ฌางัน ลาโวจ ดัฮ_ บือฌาดี โกะ บือนา บารัก เดะ ดาลับ_ ราตา ซือมูฮา. 25เกา เลอ_ บือเลฮ ซูโรฮ ราฌา ดาวิด นู ฌาดี บีลาแก นะ กามี_ บรี ญา มือเลา โกะ ปือมือเลา นะ เกา. ซือมืองัจ นะ เกา_ ซือมืองัจ นู บาฌิ บือซรี เตอ_ บือเลฮ บาวา ญา_ นู ฌาดี ซือมียา บือกรือฌา นะ เกา_ บรี ญา มือเลา จะ
“บูวัจ นามา_ ลูมอฮ บักซา อาซิก บืออีเซด ซือมูฮา?
บูวัจ นามา_ ลูมอฮ ซือมียา ปาคัจ บือกีรา ลาฆู ฌาฮัจ_ นู เตด ฌาดี นามา?
26 ลูมอฮ ราฌา เดะ ดือนียา_
กูญา ซียะ นะ บือปรัก
ลูมอฮ ซือมียา ปือบือลา ดือนียา_
กูญา บือมุน บือซามา
บีดา นะ บือลาวัด ฌางัน ตูฮัด บือซัยํ เดะ อาตัซ
นะ บือลาวัด ฌางัน ราฌา นู บรี ซือลามัจ นะ ญา #
มปต 2.1-2
.” ญา จะ.
27“ซูโงฮ เลอ_ ราฌา เฮโรด_ ฌางัน ปอนตัด ปีลาด_ กูญา บือเลฮ บือมุน ฌางัน ลูมอฮ บักซา อาซิก_ ฌางัน ลูมอฮ บักซา อิซราเอน_ บีดา นะ บือลาวัด ฌางัน เยซู_ ซือมียา บือกรือฌา นู บาฌิ บือซรี นะ เกา เตอ_ นู เกา ตืองะ ดัฮ_ ฌาดี ราฌา นู บรี ซือลามัจ. 28กูญา อีตู บรีงัจ นะ บูวัจ กะฮามี โปด_ ฌาดี ลาฆู นู เกา บือเลฮ ตือตู ฮาตี_ ตะเดะ ดูลู_ นะ บรี ฌาดี กะฆีเตอ. เกา ตือตู ฮาตี นะ บูวัจ กะฆีเตอ_ ฌางัน ปือมือฆัฮ นะ เกา_ ตูโรจ บือกะ ฮาตี นะ เกา เลอ. 29วะตู อีนี_ ตูฮัด เออ_ ลีฮัจ เลอ_ กูญา ปือซัด บลารัก กะฮามี ดัฮ. มีตา เดะ ตูฮัด_ บรี กามี นู ปราโซฮ นะ เกา เตอ_ บรี กามี บรานี มือเลา ปือมือเลา นะ เกา เลอ. 30มีตา บรี ตูฮัด อาเงา ตางัน นู มือฆัฮ_ บรี ปือบือลา ซือมียา_ บรี ซือนัง ญาวา. บรี กามี บูวัจ ปือนานา ซีดี_ นู ปือและ ซูโงฮ_ เดะ ปือนามา นะ เยซู_ ซือมียา บือกรือฌา นู บาฌิ บือซรี นะ เกา เลอ.” กูญา จะ.
31กาลา กูญา บือซาโวจ ดัฮ_ ตือปัจ นู กูญา บือมุน บือซามา_ บรีเงาะ โตระ. กูญา ซือมูฮา_ ปือนอฮ ฌางัน ซือมืองัจ นะ ตูฮัด. กูญา ฮาตี บรานี_ ปาคัจ มือเลา ปือมือเลา นะ ตูฮัด.
ลูมอฮ ซือมียา ปือจายา ซามาๆ ซา ฮาตี
32ลูมอฮ ซือมียา นู ปือจายา_ กูญา บือปาคัจ บือซามา_ ซา ฮาตี ซือมูฮา. ฮอย ซาปา มือเลา จะ_ โกะ ซือบารัก นู ญา อาดา_ ฌาดี ซือบารัก นะ อีซี ญา ตะอาซิก. ตาปี โกะ ซือบารัก ราตา ซือมูฮา_ กูญา ซูโรฮ บือซามา-ซามา. 33ลูมอฮ ปือญูโรฮ นะ ตูฮัด ปือนอฮ ฌางัน นู มือฆัฮ ซูโงฮ_ มือเลา ฌาดี ซะซรี จะ_ “ตูฮัด เยซู_ ญา ฮีโดะ ปาเระ เดะ มาตี ดัฮ.” ตูฮัด ญา ฮาลัย บรี ซือลามัจ บาญะ ซูโงฮ_ กะ ลูมอฮ ปือจายา_ ราตา ซือมียา. 34เดะ ลูมอฮ กูญา_ ฮอย ซาปา นู ฮาฌะ_ ซาเบะ ซือมียา ดีฮา อาดา ตือปัจ ตานัฮ_ อาดา รูมัฮ_ กูญา นะ ฌูวัน. ดูเวะ รือฆา ซือบารัก นู ฌูวัน อีตู_ 35กูญา นะ อาเมด มาแรฮ_ กีเรบ เดะ โกะ ปือญูโรฮ. โกะ ปือญูโรฮ โปด_ นะ ฮาฆิ ดูเวะ อีตู_ บรี กะ ราตา ซือมียา นู ฮาฌะ. 36อาดา ซือมียา ซืออูรัก_ ปือนามา โยเซบ_ ญา ฌาดี ซืออูรัก เดะ ลูมอฮ เลวี_ นู มาแรฮ เดะ ปูเลา ซัยปรัด ดัฮ. โกะ ปือญูโรฮ ตืองะ ปือนามา กะ ญา จะ_ บานาบัด_ ฌาดี จะ_ ซือมียา นู ปูโฌะ ฮาตี กาวัด. 37บานาบัด ปี ฌูวัน ตือปัจ ตานัฮ นะ ญา ซือตือปัจ_ อาเมด ดูเวะ มาแรฮ กีเรบ เดะ โกะ ปือญูโรฮ นะ ตูฮัด.
Trenutno odabrano:
ปือบูวัจ 4: ULBIBLE
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj