Mateo 5
5
U Tolay Hide a Pagpalaán nu Diyos
(Lukas 6:20-23)
1Nadid tu pákketa ni Jesus tu makpal a tolay ay simmangkay siya tu badit a buked. Sakay inumetnod siya hod para magtoldu. Immunonod nikuna u disepulus na hide sakay inumetnod hide tu harapan na. 2Sakay sinapulan na hide a tinolduwan. Kinagi na,
3“Pinagpala nu Diyos u tolay hide a umasa nikuna tu atanan a pangangailangan de,
dipu u Diyos u hare de. Siya u mangpospos nide.
4Pinagpala nu Diyos u malungkut hide,
dipu hide u pahapahaán nu Diyos.
5Pinagpala nu Diyos u awan hide mapagmataas,
dipu hide u makaalap tu atanan a inpanantu nu Diyos.
6Pinagpala nu Diyos u tolay hide a masoh a tahod a manggimet tu kaluuben nu Diyos,
dipo hide u tulungan nu Diyos tánni magimet de u kaluuben na.
7Pinagpala nu Diyos u makákkagbiyán tu agum,
dipo hide u kagbiyan nu Diyos.
8Pinagpala nu Diyos u tolay hide a awan dán ti agum a pagserbiyán nan u Diyos la,
dipo hide u maketa nikuna.
9Pinagpala nu Diyos u tagaayus tu magdima hide,
dipo hide u madulawan a anak nu Diyos.
10Pinagpala nu Diyos u dáddustaán hide a tolay dipo gimitán de u kaluuben nu Diyos,
hide u katolayan tu kahareyan na.
11Pinagpala kam nu Diyos ni insultuwán di kam sakay dustaán sakay bintangán di kam ti sare-sare
dipo disepulus takam. 12Konna labi hod u ginággimet nu tolay hide tu propeta ko hide tu itod. Magkasayaan kam a tahod dipo dakál u gantimpala moy ti langet.”
U Disepulus ni Jesus ay Kumán a Asen sakay Demlag
(Markos 9:50; Lukas 14:34-35)
13Kinagi pa ni Jesus nide “Hikam ay kumán a asen ti munduway. Ni mawan u lasa nu asen, awan dán ti paraan a mesoli pa u lasa na. Awan dán ti serbi u asen kaya ibut dálla sakay gággemmakan dálla nu katolayan.
14Hikam be ay kumán a demlag ti munduway. Awan ti makapángtagu tu essa a banuwan a hod tu toktok nu buked. 15Sakay awan ti tolay a mangtab ti simbuwan sakay takáppan na ti baldi. Nan itupo na iye tu lamisaan tánni mademlagan u he tu disalad nu bilay. 16Konna la be hod u gimitán moy, ipeta moy u demlag moy tu tolay hide tánni ketan de u mágkaganda moy a gimet. Tán para puriyán de u Ama moy ti langet.”
U Toldu ni Jesus Tungkul tu Kautusan nu Diyos a Intád ni Moises
17Kinagi pa ni Jesus nide “Dyan moy isipán a immangayák he para ibutan u Kautusan ni Moises oni u intáttoldu nu Propeta hide a upos nu Diyos. Awanák immangay he para ibutan hide nan ipaliwanag sakay tupadán iye hide. 18Pakatandaan moy iye, hanggan atoy pa u langet sakay u luta ay matupad u atanan a nesulat tu Kautusan. 19Kanya ni ti deya man u awan sumunud tu maski essa tu kautusan dipo isipán na a awan iye pinakamahalaga sakay mangtoldu ti konna hina ay magin pinakababa tu kahariyan nu Diyos. Pero ni ti deya man u sumunud sakay mángtoldu tu katolayan tu kautusan ay magin mataas a tolay tu kahariyan nu Diyos. 20Kanya ikagi ku nikam a paghariyan kam la nu Diyos ni tatahoden moy a sunudán u kautusan nu Diyos. U kássunud moy tu kautusan ay dapat mas humigit pa tu págsunud nu Pariseo hide sakay tu maistu hide nu Kautusan ni Moises.”
Nagtoldu Ti Jesus Tungkul tu Iyamut
21Kinagi pa ni Jesus, “Nasaneg moy a intoldu de tu nunu moy hide a ‘Dyan ka mamuno sakay u makabuno ay parusaan nu Diyos#5:21 Basaan tu Exodo 20:13; Deuteronomio 5:17.’ 22Pero nadid ay ikagi ko nikam a ni deya u mágngál tu kákkapatkákka na ay parusaan nu Diyos. Sakay ni ti deya u manginsulto ay hatulan nu Sanedrin#5:22 U ngahan nu grupo a pinakamataas a tagapangasiwa nu Judio hide. Sakay ni ti deya man u magkagi tu kákkapatkákka na a ‘Awan ka ti serbi a tolay’ ay parusaan nu Diyos ti impiyerno.
23Kanya ni magalay ka tu lugar nu pággalayan sakay naalaala mo a te kasalanan ka tu kapatkákka mo ay 24iwahak mu padla u alay mo tu atubang nu pággalayan sakay angay ka pa mákpagkasundu nikuna. Káttapos ay maari ka dán a sole a magalay.
25Ni te mángkaso niko ay ayusán mu dán u problema bagu kam a humarap tu huwes. Dipo ni hod ka dán hod sakay natalo ka tu kaso ay ipepireso ka nu huwes tu pulis. 26Talaga a awan ka makaluwas tu piresuwan hanggan awan mo mabayaden u atanan a utang mo.”
Nagtoldu ti Jesus Tungkul tu Kasalanan a Pángngibábbey
27Kinagi pa ni Jesus “Nasaneg moy a intoldu de tu nunu moy hide a ‘Dyan ka mangalunya.#5:27 Basaan tu Exodo 20:14; Deuteronomio 5:18.’ 28Pero nadid itoldu ko nikam a ni ti deya man u umileng la tu bábbey a te soh a dumuhog ay nagkasala dán ti pángngibábbey tu isip na. 29Kanya ni u kawanan mo a mata ay u dahilan nu págkasala mo ay lábwetán mo sakay ibut mo. Mas maganda pa a mawanan ka ti essa a parte nu bággi mo kasera ni meimpiyerno u atanan a bággi mo. 30Sakay ni u kawanan mo a kamát u dahilan nu págkasala mo ay káttolán mo sakay ibut mo. Mas maganda pa a mawanan ka ti essa a parte nu bággi mo kasera ni me impiyerno u atanan a bággi mo.”
U Toldu ni Jesus Tungkul tu Pághiwalay tu Kabanga
31Kinagi pa ni Jesus “Nasaneg moy a intoldu de tu nunu moy hide a ‘Ni hiwalayan nu lállake u kabanga na ay kailangan a atádden u kabanga na ti katibayan nu pághiwalay de.’#5:31 Basaan tu Deuteronomio 24:1 32Pero nadid ay itoldu ko nikam a ni ti deya man u humiwalay tu kabanga na a bábbey maski awan nangilállake ay nagkasala siya dipo siya u te dahilan ni mákkabanga a huway u bábbey. U lállake a kumabanga be nikuna sakay u bábbey ay nagkasala ti pángngalunya.”
U Toldu ni Jesus Tungkul tu Pánnumpa.
33Kinagi pa ni Jesus “Nasaneg moy a intoldu de tu nunu moy hide a ‘Dyan mo sidaán u pinanumpaan mo a pananto nan tupadán mo u pinanumpaan mo tu Panginoon.#5:33 Basaan tu Exodo 20:7; Levitico 19:12; Deuteronomio 23:21.’ 34Pero nadid ay itoldu ko nikam a dyan kam manumpa ni magpanantu kam. Dyan moy kagiyán a sistigu moy u langet dipo hod u trono nu Diyos. 35Sakay dyan moy kagiyán a sistigu moy u mundu dipo u Diyos be u tagapamahala he. Sakay dyan moy be kagiyán a sistigu moy u Jerusalem dipo itod u banuwan nu Diyos a pinakamataas a hari. 36Sakay dyan ka manumpa a ‘Maski ni matayák nadid,’ dipo awan mo kaya a baguwán u kurol nu maski essa tu buuk mo. 37Mas maganda a kagiyán mu dálla a ‘O’ ni kaya mo o ni ‘Awan’ ni awan mo kaya a gimitán. Dipo u págsumpa ay gábwat ni Satanas.”
U Toldu ni Jesus Tungkul tu Pággante
38Kinagi pa ni Jesus “Nasaneg moy a intoldu de tu nunu moy hide a ‘Ni ti deya u makasida ti mata ay bayaden na la be ti mata sakay u makasida ti ngipán ay bayaden na la be ti ngipán.#5:38 Basaan ti Exodo 21:24; Levitico 24:20; Deuteronomio 19:21.’ 39Pero kagiyán ku nikam nadid a dyan kam gumante tu tolay a nanggimet nikam ti madukás. Nan ni te mangdapang niko ay ipadapang mu pa u dilupot. 40Ni ikaso di ka para la maalap de u badu mo ay iyatád mu dálla pate u dyaket mo. 41Ni ipilit a ipasakbet nu essa a tolay u karga na niko ti essa a kilometro ay sakbitán mo u karga na ti duwwa a kilometro. 42Atádden mo u mangaged niko sakay paáddiman mo u mangáddem niko.”
Mahalán Mo U Kadima Mo Dyan La U Kaibigan Mo
(Lukas 6:27-28, 32-36)
43Kinagi pa ni Jesus “Nasaneg moy a intoldu de tu nunu moy hide a ‘Mahalán mo u kaibigan mo sakay kaiyamutan mo u kadima mo.’ 44Pero iye u ikagi ko nikam, mahalán moy u kadima moy sakay ipagdasal moy u mangdusta nikam. 45Tánni magin tunay kam a anak nu Ama moy a atoy ti langet. Dipo atádden na a parehas ti sinag sakay uden u mabait sakay u madukás a tolay. 46Ni u mahalán moy la ay u magmahal la nikam ay bakin gantimpalaan kam pa nu Diyos? Awan beman a gággimitán moy labe u gággimitán nu tagakolekta ti buwes hide a mágdaya? 47Sakay ni u áuhunán moy ay u kaibigan moy la, ánya u nagimet moy a mas maganda kasera tu awan ko hide disepulus. Konna labe hina u gággimitán nu tolay a awan maniwala tu Diyos. 48Kanya dapat a awan kam ti kapintasan konna tu Ama moy a hod ti langet a awan ti kapintasan.”
Trenutno odabrano:
Mateo 5: MBJC
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Pahanan Agta New Testament © Philippine Bible Society and Wycliffe Bible Translators, Inc., 2017.
