Mateo 3
3
Nagtoldu ti Juan a Magbawtismo Tungkul tu Págsisi sakay tu Pághari nu Diyos
(Markos 1:1-8; Lukas 3:1-9, 15-17; Juan 1:19-28)
1Nadid kállipas nu makpal a taon#3:1 Manga 28 a taon u agwat nu kapitulo 1 sakay 2. sakay nágyan padla ti Jesus ti Nazaret ay dummemát tu kaparangan ti Judea u essa a tolay a u ngahan na ay ti Juan a mágbawtismo. Sakay nágyan siya hod sakay nagsapul a nagtoldu. 2Kinagi na “Adággen moy u kasalanan moy dipo adeni dán a maghare u Diyos nikitam.” 3Ti Juan u kinagi ni propeta Isaias tu itod pa a “Te magtoldu a mabegsák tu kaparangan. Itoldu na a dapat ihanda mo u sadili mo a tumagbu tu Panginoon#3:3 Basaán tu Isaias 40:3.”
4U badu ni Juan ay gimet tu nalade a buuk nu hayup a kamelyo#3:4 U badu ni Juan ay halos kapareho tu badu ni propeta a Elias tu Dati a Tipan. Basaán tu 2 Hari 1:8; Zacarias 13:4.. U sinturon na ay gimet be tu koblet nu hayup. Sakay u kákkanán na ay haksa sakay bisa ni pitukan. 5Ummangay nikuna a mágsaneg u taga Jerusalem, taga Judea sakay u mágyan hide tu banuwan hide a namagdibilew tu dinom a Jordan. 6Intapat de u kasalanan de sakay tulos hide a binawtismuwan ni Juan tu dinom a Jordan.
7Pero pákketa ni Juan a makpal a miyembro nu Pariseo sakay Saduseo u umadeni nikuna para magpabawtismo ay pinagkagiyan na hide “Hikam a mágkadukás a tolay, deya u nagkagi nikam a ni magpabawtismu kam ay maiwasan moy u parusa nu Diyos? 8Ipeta moy u págsisi moy tu pamamagitan nu págsunud moy tu Diyos. 9Sakay dyan moy be isipán a makaligtas kam tu parusa nu Diyos dipo lahe kam ni Abraham. Dipo ikagi ko nikam a kaya nu Diyos a gimitán i bituwáy hide a magin lahe ni Abraham. 10Maski nadid ay inhanda dán nu Diyos u wasay a págkáttol tu gimugimut nu kayokayo. Dipo u kayo a awan ti maganda a bunga ay káttulán sakay ibut tu apoy. 11Bawtismuwan ko ti dinom u tolay hide bilang tanda nu págsisi de pero u Tagapagligtas a dumemát ay mas makapangyariyan nan nikán. Awanák pa ngane karapatdapat a magin utusan na a tagatawed nu sapatus na. Siya u magbawtismo nikam tu Banal a Ispiritu sakay tu apoy. 12Siya u maghatul tu atanan a tolay. Ihiwalay na u mabait a tolay hide sakay tu madukás a tolay hide. Konna tu essa a tolay a ihiwalay na u bunga hide tu yaut. Puhunán na u bunga hide tu bilay na sakay tutudán na u yaut hide. Kanya magsisi kam tánni awan na kam parusaan tu apoy a awan maadaadáp a konna tu yaut a tinutod nu tolay.”
Binawtismuwan ni Juan ti Jesus a Anak nu Diyos
(Markos 1:9-11; 3:21-22)
13Nadid dummemát ti Jesus ti Jordan a gábwat ti Galilea para magpabawtismo ni Juan tu dinom. 14Pero gusto ni Juan a hadlangan u plano ni Jesus kanya kinagi na nikuna “Hikán nakwa u kailangan a bawtismuwan mo pero nadid hiko pa u inumangay nikán.” 15Pero tinábbeg siya ni Jesus, “Pabayan mo padla a mangyari iye nadid. Dipo tu gimitán ta nadid ay matupad ta u atanan a utus nu Diyos a gimitán ta.” Kanya pinumayag ti Juan a bawtismuwan na ti Jesus. 16Káttapos a nabawtismuwan ti Jesus ay inumawas siya tu dinom. Pagdaka a binumukas u langet sakay netan na u Ispiritu nu Diyos a inumogsad a kumán a kalapate sakay inumapon nikuna. 17Tapos te boses a nasaneg a gábwat ti langet a nagkagi a “Siya u Anak ko a mahal ko. Masayaák a tahod nikuna#3:17 Basaan tu Awit 2:7; Isaias 42:1..”
Trenutno odabrano:
Mateo 3: MBJC
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Pahanan Agta New Testament © Philippine Bible Society and Wycliffe Bible Translators, Inc., 2017.
