Mateo 10
10
Nagpili ti Jesus ti Sapulo ay ti Duwwa a Apostol
(Markos 3:13-19; Lukas 6:12-16)
1Pinauwet ni Jesus u sapulo ay ti duwwa a disepulus na sakay inatádden na hide ti kapangyariyan a magpalayas ti madukás a ispirito. Inatádden na be hide ti kapangyariyan a magpapiyya tu atanan a sakisaket. 2Sa iye u ngahangahan nu sapulo ay ti duwwa a disepulus a nginahanan na be hide a apostol na: U purumero ay ti Simon, u palayaw na ay Pedro, ti Andres a kapatkákka ni Pedro, ti Santiago sakay ti Juan a anak ni Zebedeo, 3ti Felipe sakay ti Bartolome, ti Tomas sakay ti Mateo a taga kolekta ti buwes, ti Santiago a anak ni Alfeo sakay ti Tadeo, 4ti Simon a miyembro nu essa a grupo a gusto a mapalaya u Israelita hide tu taga Roma. Sakay ti Judas Iscariote a nángtokyon ni Jesus.
5Inutusan sakay pinagbilinan hide ni Jesus a “Dyan kam umangay tu lugar nu awan hide Judio oni tu banuwan nu Samaritano hide. 6Angay moy tolduwan u Israelita la hide, u netawtaw a tupa hide nu Diyos. 7Itoldu moy nide a ‘Adeni dán a maghare u Diyos nikitam.’ 8Pagpiyyaán moy u te saket hide sakay biyagán moy u patay hide. Pagpiyyaán moy be u te ketong hide sakay palayasán moy u demonyo hide tu hinayup. Nakaalap kam a awan ti bayad kanya iyatád moy be a awan ti bayad. 9Tu lakad moy ay dyan kam magtawed ti pilak, 10págasákkan ti badu, pagbihisan, reserba a sinelas sakay sahukod dipo u manggagawa ay dapat la a pakanán nu pinagserbiyan na hide.”
11Sakay kinagi pa ni Jesus “Maski hádya man a banuwan o baryo u angayan moy ay magehyok kam ti tolay a karapatdapat a tulusan sakay hod kam a tumulos nikuna hanggan awan kam lumakad. 12Tu kassáddáp moy tu bilay na ay batiyán moy u makábbilay ti ‘Pagpalaán kam nu Diyos ti kapayapaan.’ 13Ni awan karapatdapat u mágyan hod ay bawiyán moy u bati moy pero ni karapatdapat hide ay dyan moy bawiyán. 14Ni u tolay hide tu essa a bilay oni banuwan ay awan mágsaneg nikam ay ipagpag moy u alikabuk tu tikatikád moy sakay lakaden moy hide#10:14 Pagpagpag ti alikabok: Essa a kaugaliyan nu Judio hide a gusto kagiyan ay awan malinis tu pangileng nu Diyos u tolay hide a magyan ti itona a lugar. Kailangan hide a magsisi. . 15Pakatandaan moy iye: Tu Aldew nu Pághukom ay mas maparusaan nu Diyos u tolay hide a napagpagan moy ti alikabuk nan tu mágkadukás hide a tolay a mágyan tu itod a panahun tu banuwan a Sodoma sakay Gomorra.”
Dustaán nu Tolay Hide U Disepulus Hide ni Jesus
(Markos 13:9-13; Lukas 12:2-9—21:12-17)
16Kinagi pa ni Jesus tu sapulo ay ti duwwa a apostol na “Pakatandaan moy, paangayán takam tu tolay hide a umád nikán. Kumán kam a tupa a indátton tu bállog nu mágkatapang hide a hayup. Kanya ilagen moy hide konna tu biklat a alisto umilag dipo tukoy na a mepadukás siya. Pero magin mabait kam nide konna tu kalapate. 17Magingat kam dipo ikasu di kam sakay haplitán di kam tu sinagoga de hide. 18Dipo disepulus takam ay ikaso di kam be tu gubernador sakay tu hare hide. Siya dán itod u odas moy a magbahagi nide sakay tu awan hide Judio tungkul nikán. 19Dyan kam mabalisa ni kodya kam a magupos oni ánya i ikagi moyay, dipo káddemát nu odas ay ipaisip nu Diyos u ikagi moy. 20Bakán a hikam u maggupos nan u Ispirito nu Ama tu pamamagitan moy.”
21Sakay kinagi pa ni Jesus nide “Ipabuno nu kapatkákka na u kapatkákka na a mannámpalataya, konna labe u gimitán nu ama hide tu anak de hide. Magrebelde u anak hide tu dáddakál de sakay ipabuno de be. 22Kaiyamutan di kam dipo tu pániwala moy nikán. Pero u matapat nikán hanggan matay ay siya la u maligtas. 23Ni dustaán di kam tu essa banuwan ay guminan kam tu iba. Kagiyán ku nikam a awan moy pa maangayan u atanan a banuwan ti Israel ay makademáták dán a Anak nu Tolay.”
24Kinagi pa ni Jesus nide “Awan ti disepulus a humigit pa tu tagapagtuldu na. U utusan be ay awan mataas tu amu na 25U madanas nu tagapagtoldu ay madanas labe nu disepulus na. Madanas labe nu utusan u madanas nu amo. Ni hikán a tagapagtoldu moy ay nginahanan de a Satanas mas grabe u ingahan de nikam a disepulus ko hide.”
Dyan Manteng ti Tolay, Manalig tu Diyos
26Kinagi pa ni Jesus nide “Kanya dyan kam manteng tu tolay hide. Awan ti netagu a awan meluwas sakay atanan a sekreto ay matukuyan. 27U atanan a kinagi ko nikam tu diham ay ikagi moy a atanan tu demlag sakay u nasaneg moy a inyanasas ko nikam ay ipákhaw moy para masaneg nu atanan. 28Sakay dyan moy kantingan u makabuno tu bággi moy pero awan makabuno tu kaliduwa nan dapat kantingan moy u Diyos a makabuno tu bággi sakay kaliduwa moy ti impiyerno. 29Awan beman mura la ni ilako u dignás hide? Maski mura la hide ay awan hide matay ni awan kaluuban nu Ama moy. 30Mas lalo u pangalaga na nikam, tukoy na u bilang nu buuk moy. 31Kanya dyan kam manteng mas mahalaga kam tu Diyos kasera tu dignás hide.” 32Kinagi pa ni Jesus tu disepulus na hide “Ni ti deya man u magtapat tu tolay hide a disepulus ko siya ay itapat ku be nama ko ti langet a disepulus ko siya. 33Pero ni ti deya u tumanggi a disepulus ko siya tu agum ay itanggi ku be siya nama ko.”
Mas Higit a Mahalán ti Jesus Nan tu Pamilya
(Lukas 12:51-53; 14:26-27)
34Kinagi pa ni Jesus tu disepulus na hide “Dyan moy isipán a immangayák he para mangpayapa ti munduwáy. Nan immangayák he para mamáglaban u tolay hide. 35Kalabanán nu awan maniwala nikán u naniwala. Mamáglaban u anak a lállake sakay u ama na, u ina sakay tu anak na a bábbey. Sakay mamáglaban be u magkatugngan a bábbey. 36U magin kalaban nu essa a tolay a naniwala ay u kasabilay na labe. 37Ni ti deya u mas magmahal tu ama na sakay tu ina na nan nikán ay awan karapatdapat a magin disepulus ko. Sakay ni ti deya be u mas magmahal tu anak na hide nan nikán ay awan karapatdapat a magin disepulus ko. 38Sakay ni ti deya be u awan makatággád tu kahirapan tu kássunud nikán ay awan karapatdapat a magin disepulus ko. 39Ni ti deya man u umád a maniwala nikán dipo kakengan na u biyag na ay mawanan, pero ni ti deya man u mawanan ti biyag dipo tu pániwala na nikán ay magkahod ti biyag a awan ti katapusan.”
Gantimpalaan nu Diyos U Tolay Na Hide
(Markos 9:41)
40Kinagi pa ni Jesus nide “Ni ti deya u mangtanggap nikam ay tinanggapák di be. Sakay u mangtanggap nikán ay tinanggap de u Ama a nangutus nikán. 41Ni ti deya u mangtanggap tu essa a propeta dipo siya ay propeta nu Diyos ay makatanggap be gábwat tu Diyos ti gantimpala a nelaan para tu essa propeta. Sakay ni ti deya u mangtanggap tu essa a malinis a tolay dipo tu kabaitan na ay makatanggap be ti gantimpala a nelaan para tu malinis a tolay. 42Sakay ni ti deya u mangatád maski essa baso a dinom tu pinakababa a disepulus ko ay kagiyán ko nikam a talaga makatanggap siya ti gantimpala a gábwat tu Diyos.”
Trenutno odabrano:
Mateo 10: MBJC
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Pahanan Agta New Testament © Philippine Bible Society and Wycliffe Bible Translators, Inc., 2017.
