ARING KELESING 26
26
Ishak melo' ha' Gerar
1Nei nah lien aya' té' daléh atih, dep pah lien aleng alem urip Abraham dih. Avin tavit lien anan tei nah Ishak ha' Gerar ha' Abimelekh laja' daha' Filistin. 2Tuhan petula batung Na' men iha' dahin kuma', “Meng nah im tei ha' daléh Mesir, murip nah im té' daléh aleng seng Ek bara men ika' anih. 3#Ar Kel 22:16-18Murip nah im ha' daléh anih, awi ji kelunan aleng nyakei dih tua. Akui seng tugung ika' dahin masi ika', Akui seng ma'uk lim daléh anih men ika' dahin men pahu-pahu ka', Akui seng pela'ung jaji kui aleng uh Ek na men tamam Abraham, 4Akui pah seng na pahu ka' kahum awi kelawing ha' langit, dahin seng ma'uk lim daléh anih men pahu ka', men pahu ka' pah lim bengsa' kelunan té' usun tana anih seng ala asi, 5avin Abraham uh ngioh Dahuk, dahin petuboh tebara Kui dahin teneng pa'en ha' té' lim ha'ut na'an katuk Kui.”
6Ishak pah murip ha' Gerar. 7#Ar Kel 12:13; 20:2 En daha' alem daléh atih teng nah iha' marung hawan na', ken na' nyu'ei daha', “Harik anih,” avin takut ha' kuma' iha' hawan na', avin kurin na' alem kenep na', “Tana' kui bara Ribka hawak na'a mina daha' alem daléh anih lematei si' akui ji'ek, avin daha' ngivah té' Ribka, avin iha' ji doh aleng kajau.” 8Té' nah ji hangun iha' uh dara melo' té' alem daléh anan, en Abimelekh laja' daha' Filistin atih nyineng nah men ba, beka' peji tudu sikah Ishak dawa' Ribka hawan na' atih. 9Pelalau Abimelekh muvui Ishak dahin kuma' men iha', “Na' nun ka' kuma' iha' harim, bi hawam ha' nan.” Ken Ishak men iha', “Té' pah akui kuma' nunan dipa bahi akui en daha' lematei tavit doh kui nan.”
10Bi Abimelekh kuma', “Na' nun ka' na barik nunih té' kamé'? Awi té' ji la'ung men pahu anih uh tei kehuak tudu dahin hawam, ika' kah aleng na kamé' sala anan.” 11Iha' Abimelekh duan daha' lim-lim, ken na', “Hi-hi aleng ivit kelunan anih dahin doh na' lahuh, daha' en lematei.”
12Na luma' nah Ishak té' tana atih alem duman anan, iha' pah pelalau besoh, ji atuh hangun petepulet kahum na' men'uh beni na', avin Tuhan masi iha' pa'en. 13Avin ha' nunan iha' nei-nei kaya', tei-tei dara, sa'-sa' kaya' pah iha'. 14Iha' hipun kahum kading, duba, sapi', dahin kahum nyam alem amin na', ateng daha' Filistin mi'en té' iha'. 15Lim lesung aleng en panyin Abraham ngalé' men alem urip Abraham taman na' atih té' murip men'a, en daha' Filistin havun tana lim nah.
16Ken Abimelekh men Ishak, “Bulak nah im men hang amé' anih, avin ika' uh lalau kaya' ka' men'uh kamé.” 17Leka' nah Ishak men inan, tei nah iha' na uma ha' datah Gerar, tinan nah iha' murip. 18Uh anan en Ishak ngalé nah lesung aleng en taman na' na menuna' aleng uh en daha' Filistin havun men'uh Abraham matei atih dih. En na' na aran lesung atih ngioh aran na' pa'en, aleng en taman na' na menuna' dih loh kah.
19Tegu daha' panyin Ishak ngalé' té' datah atih, petgu té' tatah ata' itung aleng kasih lan pah kalé' daha'. 20Pano' nah daha' daléh Gerar nan, daha' aleng puboh hulung daha' dahin daha' aleng puboh hulung Ishak tih. Ken daha', “Itung anih anun amé'.” Iha' nah Ishak na aran lesung anan Esek, avin daha' pano' dahin na' tinan.
21En daha' ngalé' pah ji lesung la'an, beka' pano' loh kah daha' té' ji atih, iha' nah iha' na aran lesung anan Sitna. 22Ishak tei pasan, ngalé' ji lesung aleng ha' béh la'an, nusi' nah daha' pano' té' anan. Iha' na aran lesung atih Rehobot, alem na', “Kerei inih Tuhan uh ma'uk avan aleng layang men itam, deng nah itam nei-nei kahum té' alem daléh anih.”
23Men'uh anan tei nah iha' ha' Bersyeba. 24Malem anan Tuhan petula batung Na' men Ishak dahin kuma' men iha', “Akui anih nah Allah tamam Abraham, meng im takut, té' kah Akui, dahin Akui seng masi ika' dahin mi'at-mi'at na pahu ka' kahum, tavit Abraham panyin kui atih.” 25Iha' nah Ishak na ji avo' tinan ngavan na' ma'uk bun usu na' men Tuhan. Iha' pah na lepau na' tinan lahuh dahin nyihu panyin na' ngalé' na lesung tinan lahuh.
Ishak dahin Abimelekh piah kenep
26 #
Ar Kel 21:22
Nei nah Abimelekh men Gerar dahin Ahuzat ji kelunan bakéh na', dahin Pikhol kepala' seladu na' lahuh, tei pala Ishak. 27Bi ken Ishak men dalo', “Nei na' nun kelo' ha' akui? Nusi' kelo' mi'en té' akui dih iah? Bi ikam kah aleng uh muga akui lap men tana kam dih.”
28Bi ken dalo' nyu'ei iha', “Kamé' uh jam Tuhan té' tugung ika' pa'en, iha' nah kamé' kuma', Sayu nah itam na ji supah aleng lan-lan té' hang tam. Sayu nah kamé' petageng jaji amé' dahim, 29ja ika' em na ket aleng ji'ek té' kamé', awi kamé' em peletu na ji'ek té' ika' anih, kamé' uh na sayu tua té' ika', dahin mekoh ika' tei lihei sayu-sayu nunih. Tuhan aleng masi ika'.” 30Iha' nah Ishak na ji pahlung men dalo', dalo' pah kuman dahin du'i. 31Jihima pesun-pesun supah nah dalo'. Uh anan Ishak jamat dalo' tei leka', dalo' pah melek Ishak tinan dahin em té' nun-nun tusah.
32Tegu dau anan nei nah panyin Ishak bara iha' marung lesung aleng uh en daha' ngalé', dahin kuma' men iha', “Kamé' uh pesuk ata'.” 33En na' na nah aran lesung atih Syeba. Avin ha' nunan, daléh atih aran na' Bersyeba, ateng kerei inih.
Hawan Esau
34Urip Esau uh pat-pulu duman iha' nah iha' ala Yudit, anak Beeri men daha' pahu Het, dahin ala Basmat, anak Elon aleng men daha' pahu Het lahuh, jadi' hawan na'. 35Dua' doh atih aleng ngebahat kenep Ishak dawa' Ribka.
Trenutno odabrano:
ARING KELESING 26: TDK1990
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Bible in Today's Dahun Kayan Version © Bible Society of Malaysia, 1990.