ARING KELESING 19
19
Sodom dahin Gomora kelalau sala
1Levi dau ji hangun nei nah dua' meliket ha' daléh Sodom. Lot pah melo' té' ba kelahen daléh Sodom nan. Tegu Lot nyineng dawa' anan, biti nah iha' pelalau tei pala dawa', dahin nyepukun tei nukem ha' tana, dahin kuma', 2“U amei, nei nah nyangei ha' uma panyin kua' anih, dahin mayau nah kudek kua', tudu kua' dahik malem anih, jima nah kua' tei mejoh anau kua' nan amei.” Ken dawa' nyu'ei, “Bei nah, kawa' seng tudu hawang tua anih.”
3Bi avin iha' kalalé' ma'eng dawa', nyangei nah dawa' tei ha' uma na', iha' nah iha' petmei ket en dawa' kani, dahin misak luti aleng em té' tavah, en dawa' kani.
4Bi em payan dalo' tudu, daha' laké' daléh Sodom atih nei, daha' nyemaké' dahin daha' aleng dekaya' pah lahuh nei, ketu-ketu daha' laké' té' daléh anan pepeng teliling uma anan. 5Pelalau daha' medéng Lot, ken daha', “Hiro' nah kelunan aleng nei ha' ika' malem anih dih tei? Sayu im geri daha' musang men kamé', ja kamé' na aleng kenep amé' té' dawa si'.” 6Tei nah Lot pala daha' hawang, dahin mekep ba tegu iha' musang, 7pelalau iha' kuma', “U kelo' harik, meng nah ikam na ket aleng ji'ek nutih. 8Ikam pah jam akui té' dua' anak doh aleng em payan ga' daha' laké'. Bei nah akui em geri dawa' musang pala ikam, té' dawa' deng kah ikam na nun-nun ket aleng kenep kam, bi men dawa' kelunan anih meng kam na nun-nun té' dawa', avin dawa' anih nei nyakei té' alem uma kui.”
9Bi daha' kuma', “Hayang nah kamé'. Ika' aleng nei daméh ké', beka' ika' semakéh petneng itam! Ika' nah en amé' puyah lepek, no' ka' mun puyah dawa' kelunan anan.” Pelalau daha' tei ngeden tua tei mesen Lot, dahin mukan na iha', daha' pah tei jeleng ketamen ngenep nasa' na'. 10Bi dawa' kelunan anan dih mejat usu Lot tei halem uma anan, dahin mekep ba ketamen. 11Iha' dawa' anan dih na matan daha' lim buta', daha' aleng dekaya' dahin daha' nyam, ja daha' em jam hino' avan ba ketamen anan té'.
Lot lap men daléh Sodom
12Dawa' dua' la'ung anan meteng Lot, “Nuno', té' pahu ka' hinih, awi divan ka' aleng laké' dahin divan ka' aleng doh? Ketu-ketu panak ka' aleng murip té' alem daléh anih, sayu im geri ikam lap men inih, 13avin kawa' seng nasa' daléh anih, avin kahum nah tuten dahin selalang daha' té' daléh anih ha' unan Tuhan. Iha' nah Tuhan nyihu kawa' nei nasa' daléh anih.”
14Musang nah Lot tei tengaran dahin dua' laké' aleng seng divan na', ken na' men dawa', “Biti nah, lap nah kua' men inih, avin Tuhan seng nasa' daléh anih.” Bi tegu dawa' kelenghi dahun Lot nunan dawa' kuma' iha' awi kiso' tua na dawa'.
15Jihima pesun-pesun alem ha' ham-ham loh kah, nei nah dua' meliket anan najen Lot, ken dawa', “Salet! Biti nah kua', lap nah men inih, geri doh ka' dahin anak ka' aleng doh, ja kelo' em matei kenan ji'ek daha' aleng alem daléh anih.” 16#2 Pet 2:7 Mahen lelan pah Lot tei leka'. Iha' nah dawa' laké' anan mejat usu Lot dahin doh na', dahin dawa' dua' anak na' atih lahuh, pelalau geri dalo' musang men alem daléh anan, avin Tuhan ngenep masi dalo'. 17Tegu dawa' meliket anan uh geri dalo' musang men inan, ken ji meliket anan men dalo', “Lap nah men inih, ja kelo' takau. Meng kelo' nyili ha' la'ung la'an, meng kelo' ngeta' té' alem datah Yordan anih. Lap nah tei ha' ngalang, ja kelo' em matei tavin tua lahuh.”
18Ken Lot men meliket anan, “U amei, meng im na ket anan ga' té' kalo'. 19Nuno' pah ika' uh masi akui dahin uh bara-bara halam ka' men akui, dahin uh puboh urip kui. Awi akui tei lap ha' ngalang aleng su anan, nusi' kui deng tei, avin adang ukum anan nei té' akui na akui matei. 20Nuno' daléh aleng da'uk anan aleng té' jeleng tinan, deng kui tei lap nyingau hinan kurim iah? Bareng daléh anan em da'uk iah? Nunan nah akui deng ala urip, em ga' tusah anan.”
21Ken meliket atih men iha', “Sayu kah, ket aleng im akei anan, deng kah akui ma'uk na' men ika', daléh aleng im bara anan nusi' kui seng nasa' na'. 22Leka' nah im salet avin nusi' kui deng na nun-nun alem ika' em payan tei ateng hinan.” Iha' nah daha' na aran daléh anan Zoar.
Sodom dahin Gomora ga' tasa'
23Tegu matan dau uh nei tula iha' Lot ateng ha' daléh Zoar. 24#Mat 10:15; 11:23-24; Lk 10:12; 17:29; 2 Pet 2:6; Yud 7 Men'uh anan Tuhan menei usan apui té' daléh Sodom dahin Gomora, aleng en Tuhan nei men langit, 25dahin nasa' daléh-daléh atih dahin datah-datah Yordan dahin lim huang daléh atih, dahin lim-lim tuvuh daha' lahuh aleng té' té tana anan. 26#Lk 17:32 Alem Lot dawa' hawan na' lap, beka' hawan na' nyili ha' la'ung, pelalau batung na' balui ji jihé' hia'.
27Jihima sepangen-sepangen Abraham ma'un tudu pelalau tei nekring té' avan na' tengaran Tuhan atih dih, 28pelalau ha' nyineng daléh Sodom dahin Gomora, dahin lim-lim datah hungei Yordan, dahin nyineng lisun aleng kelalau lalé', awi jam lisun daha' nyavet luma' dih tua. 29Nunan nah tegu Allah nasa' daléh-daléh ha' datah Yordan nan, dahin nasa' kuri-kuri daléh aleng ngavan Lot atih dih lahuh. Alem ha' nunan Tuhan hituk té' jaji Na' dahin Abraham menuna'. Iha' nah iha' nyihu Lot lap men daléh anan, ja iha' em matei tavin dahin kelunan alem daléh anan.
Pa'un daha' pahu Moab dahin daha' Amon
30Avin Lot takut murip ha' daléh Zoar, bulak nah iha' tei ha' ngalang, melo' té' ji luvang bato' aya' dahin dawa' anak doh na'. 31Ken anak doh na' aleng dekaya' men harin na' aleng da'uk, “Taman tu' nih uh muku aya', nusi' té' laké' ha' béh nei dahin tu' awi barik kelunan kahum té' usun tana anih. 32Avin ha' hunan, sayu nah itu' ma'uk ata' agun men tamei, ja ha' mavuk, nurei itu' tei tudu dahin na', ja itu' hipun pahu aleng men tamei,” ken na'. 33Malem anan en dawa' harin na' pekavuk nah taman dawa'. Tegu taman dawa' anan mavuk, tei nah ji aleng dekaya' men dawa' tudu dahin taman dawa', taman dawa' pah em jam.
34Jihima anan tei nah doh aleng dekaya' anan pala harin na' aleng da'uk, dahin kuma' men iha', “Malem dih akui uh tudu dahin tamei, bi malem anih sayu tu' pekavuk iha' la'an, ja ka' tei tudu dahin na' lahuh, nurei ha' seng té' pahu men taman tu'.” 35Nunan nah dawa' harin na' nan pekavuk taman dawa'. Tegu iha' uh mavuk, tei nah ji aleng da'uk anan tudu dahin taman dawa' nan la'an. Avin taman dawa' uh mavuk, nusi' nah peletu iha' jam dawa' anak na' nan tei tudu dahin na'. 36Avin ha' nutih, mali nah dawa' lim kenan taman dawa' anan. 37Uh anan nganak nah doh aleng dekaya' men dawa', anak na' laké ha'. Iha' na aran na' Moab, iha' nah aring pahu daha' Moab ateng kerei inih. 38Nganak pah doh aleng da'uk men dawa', laké' loh kah anak na', iha' na aran na' Ben-Ami, iha' nah pahu daha' Amon ateng kerei inih.
Trenutno odabrano:
ARING KELESING 19: TDK1990
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Bible in Today's Dahun Kayan Version © Bible Society of Malaysia, 1990.