मर्कुस 16
16
येसु मोर्लकमाटे जिइकेभइल
(मति २८:१-८; लुका २४:१-१२; युहन्ना २०:१-१०)
1नात्लिक-दिन बितिसक्लपाछु मरियम मग्दलिनि, याकुबक उइया मरियम र सलोमिइ येसुक लासयँ दलिके लागि बासालाहार तेल किन्ल। 2हसे हप्ताक पइला दिन बेहेनक घाम झुल्कतेखना उसब चिहानयँ जइल। 3जइतिन् कर्तेखना उसबेइ एक-अर्कसे कहल, “चिहानक मुहुके ढाक्ल पाथर हाम्र लागि कोनेइ हाटाइ देइत्? 4किकेकने उसे पाथर धेरइ बड्क रहइ। तर उसब चिहानयँ पुग्तेखना त पाथर हाटाइसक्ल देख्ल। 5हसे चिहानभितर पोसिकुन चाहातेखना त, उसबेइ एक जेना गोरो लुगा लागाल तन्धेरि मानुसके दाइनेपट्टि बोसिराख्ल देखिकुन उसब बेस्के डाराल।”
6तर उहाइ उसब्के कहल, “झुनडाराओ, तोहेसब नासरतक येसुके खोज्तिन बाटउ, जोख्राके क्रुसयँ टाङ्ल रहइ। तर ओनेन् त जिउतिकुन उठिकेभइल बाटत। ओनेन्के राख्ल ठाउ चाहउ, ओनेन् इछिका नइजे बाटत। 7आबे जाओ र ओनेन्क चेलासब र खास करिकुन पत्रुसके कइदेओ, कि ओनेन् तेउह्रसब्क आघु-आघु गालिल जइतिन् बाटत। ओनेनेइ कहिकेभइल जस्नइ तोहेसब ओनेन्के उछिका देख्ताहाउ।”
8हसे उसब चिहानकमाटे निस्किकुन भाग्ल। उसब डरेइ अचम्म मान्तिन थुरथुर कापि राख्लगुनेइ कोख्राहुके केहाउ नइजेकहल, किकेकने उसब साच्चिकइ डाराल रहत।
येसु मरियम मग्दलिनिलघि देखार पोरिकेभइल
(मति २८:९-१०; युहन्ना २०:११-१८)
9[पइलाहिँ येसुइ मरियम मग्दलिनिक देहिकमाटे सातोटा भुतसब निस्काइकेभइल रहत। उहइ मरियम मग्दलिनिकलघि येसु जिउत भइकुन हप्ताक पइला दिन बेहेनिहिँ देखार पोरिकेभइल। 10र उसे येसुक चेलासब्कलघि पुग्तेखना उसब बिलाप कर्तिन रोइराख्ते रहत। उहाइ उसब्के कहलि, 11“येसु मोर्लकमाटे जिउत भइल बाटत। मोइ आफ्नइ आँखिइ देख्ल।” तर उसबेइ उक्र कुरा नइजेपतेल।
येसु दुइ जेना चेलालघि देखार पोरिकेभइल
(लुका २४:१३-३५)
12उपाछु दुइ जेना चेलासब गाउपटि हिठिकुन जाइराख्ते बेलायँ येसु उसब्क आघु अर्कइ रुपयँ देखार पोरिकेभइल। 13हसे उसबेइ पुनु जाइकुन सभइके बाताल। तइपुनु उसब्क कुरा कोलोउयेइ पुनु बिस्वास नइजेकर्ल।
येसु एघार चेलासब्कलघि देखार पोरिकेभइल
(मति २८:१६-२०; लुका २४:३६-४९; युहन्ना २०:१९-२३; प्रेरित १:६-८)
14उपाछु एघार जेना चेलासब खइलाहार कुरा खाइराख्ते बेलायँ येसु उसब्कलघि देखार पोरिकेभइल। हसे उसबेइ आफ्न मनके कठोर पार्ल, र ओनेन् मोर्लकमाटे जिउतल कुरा सुनाते पुनु बिस्वास नइजेकर्ल गुनेइ, उसब्के ओनेनेइ हप्काइके भइल। 15हसे ओनेनेइ उसब्के कहिकेभइल, “सन्सारक सभइ ठाउयँ जाइकुन सारा सिरिस्टिके सुसमचार प्रचार करउ। 16बिस्वास करिकुन बप्तिस्मा लेलाहारसबेइ उदार पाउताहात्, तर बिस्वास नइजेकर्लाहारसब चाहिँ दोसि ठहर्तात्। 17हसे बिस्वास कर्लाहारसाङ इसे चिनासब भइत, मेर नाउयँ उसबेइ भुतसब धापाताहात्, र लउठा भासायँ बोराताहात्, 18र उसबेइ सापसब धर्ताहात्, हसे बिखालु कुरा पिउने पुनु उसब्के केहाउ हानि नाभओइ। उसबेइ रोगिउप्र आफ्न हाथ राख्नेपार रोगिसब निक भइताहात्।”
येसु सोर्ग लेजाइकेभइल
(लुका २४:५०-५३; प्रेरित १:९-११)
19येसु उसबसाङ बोराइसक्लपाछु सोर्ग लेजाइकेभइल, र परमेसोरक दाइने हाथपटि बोसिकेभइल। 20उपाछु उसे चेलासबेइ सभइ ठाउयँ जाइकुन प्रचार करिके थाल्ल। र प्रभुइ पुनु उसबसाङ काम करिकेभइल, हसे धेरइ अचम्मक चिनासब्कमाटे सुसमचारके साच्चिकइ हखइ कइकुन पर्मान देल।]
Trenutno odabrano:
मर्कुस 16: DRY
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© 2024 (Active), Mother Tongue Translators Society and Wycliffe Bible Translators, Inc. All rights reserved.
