الإنجيل زي ما كتبه مَتَّى 6
6
الصّدقة
1أنتبهوا من إنكم تتقصدوا تسووا الخير قدام الناس بس عشان يشوفوكم: و إلا ترا أبوكم إلا في السماوات ما بيكافئكم خير. 2إدا تصدقت على أحد، لا تقعد تنفخ في البوق وتنشر الخبر، زي ما يسووا المنافقين في المعابد والشوارع عشان يمدحوهم الناس. بأمانة أقول ليكم: هم حصلوا جزاهم. 3لكن أنت، لما تتصدق على أحد، لا تخلي حتى الإيد اليسار تعرف وش تسوي الإيد اليمين. 4تصدق في السر، و أبوك السماوي إلا يشوف في السر، هو بيجازيك.
الصّلاة
5و لما تصلوا، لا تصيروا زي المنافقين إلا يحبوا أنهم يصلّوا و هم واقفين في المعابد و في زوايا الشّوارع عشان الناس تشوفهم. بأمانة أقول ليكم: چدي هم حصلوا على جزاهم. 6لكن أنت لما تصلّي، أدخل غرفتك، سكر عليك الباب، وصلي لأبوك إلا في السر. و أبوك إلا يشوف ألا صار في السر، هو إلا بيجازيك. 7و لما تصلوا، لا تكرروا كلام فاضي زي ما يسووا الوثنيين، مفكرين إنهم بكثرة الكلام، بيستجاب ليهم. 8لا تصيروا زيهم، لأن أبوكم يعرف أحتياجاتكم قبل ما تسألوه.
9فصلوا زي هالصلاة: أبونا إلا في السماوات، يارب أسمك دايما يتقدس بين الناس. 10و يارب يجي ملكوتك، و يارب تصير مشيئتك عليّ الأرض زي ما هي في السما. 11أعطينا الخبز ألا يكفينا اليوم، 12وأغفر لينا خطايانا زي ما أحنا نغفر عن إلي يغلطوا علينا. 13ولا تسمح لينا ندخل في تجّربة تغوينا، لكن نجينا من الشرير، لأن لك الملك و القوّة و المجد الى الأبد. آمين.
14و بعدين قال : إدا غفرتوا للناس زلاتهم، أبوكم السماوي يغفر ليكم زلاتكم. 15و إدا ما غفرتوا للناس زلاتهم، ما بيغفر ليكم أبوكم السماوي زلاتكم.
الصّوم
16و لما تصوموا، لا تخلّوا وجوهكم معفوسة، المنافقين بس هم إلا يغيروا وجوههم عشان يراووا الناس إنهم صايمين. بأمانة أقول ليكم إنهم حصلوا على جزاهم. 17لكن أنت، لما تصوم، أغسل وجهك، و دهن راسك، 18عشان ما تبين للناس إنك صايم، لكن بس لأبوك إلا في السر. و أبوك إلا يشوف في السر، هو إلا بيجازيك.
الكنوز في السما
19لا تكنزوا ليكم كنوز على الأرض، مكان إلا يفسدها السوس والصدا، ويدوروا عنها الحرامية عشان يبوقوها. 20لكن أكنزوا ليكم كنوز في السما، مكان ما يقدر السوس والصدا يوصل ليها، ولا يدروا عنها الحرامية عشان يبوقوها. 21المكان إلي فيه كنزك، هناك بعد يكون قلبك!
22العُيون مصباح الجسد و إدا كانت عيونك سليمة، بيصير جسدك كله منور. 23و إدا ما كانت عيونك سليمة، بيكون جسمك كله مظلم. و إدا كان النور إلا فيك مظلّم، ف وش أشد من هالظلام!
24ما يقدر أحد يصير عبد لسيدين: لأنه يا إما يبغض واحد منهم و يحب الثاني، أو إنه يكرس حياته لواحد ويحقر الثاني. ما تقدروا تصيروا عبيد لله و الفلوس في نفس الوقت.
لا تهتموا
25و لهدا الشي أقول ليكم: لا تشيلوا هم معيشتكم، وش تاكلوا وويش تشربوا، ولا لأجسامكم وش تلبسوا. مو الحياة أكثر من الأكل بس، و الجسم أكثر من اللبس؟ 26فكّروا وتأملوا في طيور السما: لا تزرع ولا تحصد ولا تجمع أكلها في مخازن، وأبوكم السماوي هو إلا يعيلها. مو أنتون قيمتكم أحسن منها بواجد؟ 27منهو فيكم إدا حمل كل هالهموم يقدر أن يطوّل في عمره حتى لو ساعة وحدة؟ 28وليش تحملوا هم اللبس؟ فكّروا و تأملوا في ورد البساتين و كيف ينموا ما يتعب ولا يحرث 29ولكني أقول ليكم: حتى سليمان في قمة مجده ما لبس شي يعادل وحدة منها في جمالها! 30إدا كان الله يتكفل أنه يكسي الحشايش البرية، مع أنها اليوم موجودة و بكرا بتنرمى في النار- في الفُرن، أنتون يا إلا إيمانكم ضعيف مو أولى من أن هو يوفر ليكم ملابس؟ 31لا تشيلوا هم و تقولوا: وش ناكل؟ أو: وش نشرب؟ أو: وش نلبس؟ 32هدي أمور يسعوا ليها أهل الدنيا. وأبوكم السماوي يعرف حاجتكم إلى كل هالأشياء. 33لكن أنتون، أطلبوا أول شي ملكوت الله وبره، كل هالأمور بتنعطى ليكم. 34لا تهتموا بأمور بكرا، لأن بكرا له نصيبه من الإهتمام. كل يوم يكفيه باللي فيه من مصايب!
Trenutno odabrano:
الإنجيل زي ما كتبه مَتَّى 6: QNAV
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Qatifi New Arabic Version © 2024 Strategic Resource Group
