Matyiu 8
8
1O Mâ‐a hubakidi oviya ukodi, bebimba beněně be vitanakidi Mâ. 2Ka moto a diyakidi na egâlani a viya ka kaliya Mâ, na, Upangiyi, oningě wa panga o te na ngudi e yongakě ’mba. 3Ka Jisus a hambidě enâ ’aju, ka Mâ‐a kupaně mâ, na, Mbi pangindi; yongaka. Elěngiaha, tepě ka egâlan‘ ’aju ya yongwě. 4Ka Jisus a vâ na ju, na, Bandamakidě, o langwake moto; ndi kěkě, na nâvě wa levidě nyolo ’âvě prist; wa vě ivě ja Mosěs i sombiyakidě ka tali o bâ‐ba jadi:
5O Jisus a pâkidi o Kapěrnaum, sěnturiân e vakindi o Mâ‐a jadi, e ka hâhâlâkidě Mâ, 6na, Upangiyi, uhayi muamě u nd‘ o mboka bya na ebědi ya nyolo limbelimbe, mehiyo meněně mětě. 7Ka Jisus a vâ na mâ, na, Mbi ka viyandi ka yongě mâ. 8Ka sěnturiân a yavwana, na, Upangiyi, mbi ’bě weyango na o pâkâ o ibomako ja unyuwa muamě; ndi kalaka ndaga pa, vâkâna moto ’amě a yongindi. 9Ikabojana mbi ndi moto a pangakudwě, n‘ umba‐mbi pangakiya tepě sâjě: mba vâ na ekaně, na, Kěkě, na mâ‐a vala; n‘ upâkwě, na, Vaka, na mâ‐a viya; na moto ’amě, na, Hak‘ ekae, na mâ‐a ha yâ. 10Jisus a mamakind‘ o Mâ‐a yokakidi, ka Mâ‐a vâ na ba vitakidě, na, Mbi vâki n‘ inyěni pâkwěpâkwě, na, Mbi ’bě duwango ikamidě ka ’kadi, tombe o Israěl. 11Ndi Mbi vâki n‘ inyěni, na, Baitě ba ka viyandi o ’hiki na o manga, ba ka diyandi na Ebraham‘, na Aisak, na Jekâb o ipangiya ja Hěvěn: 12ndi bana ba ipangiya ba ka uhwěndi o ivititi via yaviděngo: ovoně, o ka diyandi mbembe na ikalidě ja mahonga. 13Ka Jisus a vâ na sěnturiân, na, Kěkě: ka ’vě o di kamiděngo, e hamake o âvě‐o Mâ jadi. Na moto ’aju n‘ a yongaka o iwěla tědině.
14O Jisus a vakidi o ndabo ’a Pitě, ka Mâ‐a yěně nyangwě ya mwad‘ ’aju bya na ebědi ya ivěvu. 15Ka Mâ‐a kupaně ikadu jaju, ka ivěvu ja dika mâ: na mâ‐a ’muwa, na mâ‐a ka hakiya bâ. 16O kolo e pâkidi, ka bâ‐ba vana ba diyakidi na děvil baitě o Mâ‐a jadi: ka Mâ‐a duma malina mabe na ndag‘ ’aju, ka Mâ‐a yongě ba diyakidi ba běkě běhěpi. 17Ovaně nd‘ o ya usâki Iseya e kalakidi e ka hohanganě, na, Mâ mětě a nângindi ikâhâ jahu, ka Mâ‐a bapě bebědi beahu.
18O Jisus a yěněkidi bebimba beněně ulwaniděngo Mâ, ka Mâ‐a sombiyě na ba kěke o mwid‘ upâkwě: 19Ka Ulěndi umbâkâ mu‐a viya ka vâ na ju, na Uyokwanidi, mbi ka vitěnd‘ âvě iboko viâvě vi ka valě viěhěpi. 20Ka Jisus a vâ na ju, na, Mehingi me na beboboka, na lonâni la oba na mumbu; ndi Mwana moto a ibě na iboko via nangidě molo. 21Ka ’yokwed‘ ’aju epâkwě ya vâ na ju, na, Upangiyi, hulwakidě ’mba, mbi t‘ o vala mbi tonge paia tongango. 22Ndi Jisus a vâki na ju, na, Vitakě ’Mba: bekengo be tongake bekengo beabu.
23O Mâ‐a vamakidi o elende, ka beyokwedi beaju bea vitaně Mâ. 24Umbwakiyate, ukudi uněně u vungakindi o ndalo, kwanga nala o elende e ka vihamakudwě na mekeba; ndi A diyakindi o viyâ. 25Ka beyokwedi beaju bea viya o Mâ‐a jadi, ka bâ‐ba ’mudě Mâ, na, Upangiyi, yongakě hwě: ho jelindi. 26Ka Mâ‐a vâ na bâ, na, O bangaka lěni nande, inyěni ba ikamidě ’hâlě? Ka Mâ‐a ’muwa, na Mâ‐a kandidě mepupě na manga; ka uděmbě uněně mua wa. 27Ka bato tě ba mama, na, I lě nja jângâ ě ja momo ekadi, i jadi tombekete mepupě na manga bea yokiyate Mâ.
28O Mâ‐a pâkidi o mwid‘ upâkwě, o ehe ya Gěrgasin, bamo babale ba diyakidi na děvil ba lataki na Mâ, ba vakiya oviya o malonga, na jeku iitě, ovaně nd‘ o moto a ha yâlâkidě o tomba o njeya těně. 29Umbwakiyate, ka bâ‐ba yama, na, Eahu na nâvě e lě na, Jisus, âvě Mwana. Anyambě? O ma viyandi ono ’kava ka jelě hwě egombe e t‘ o pâ? 30Yaviděngo na bâ, o diyakindi na bokweya boa ngweya boněně bo jaka. 31Ka děvil ja hâhâlidě Mâ, na, Bâbâkâ hwě ho kěkě ka ngiya o bokweya boa ngweya bo jadi, oningě Wa věngidě hwě. 32Ka Mâ‐a vâ na jâ na, kěkěni. O jâ ivengěměkidi ka jâ ja, vala ka ngiya o bokweya tě bwa ngweya bo jadi ka bokweya tě bwěhěpi bwa hubamidě umbila umbâkâ o mbelenge o manga ka bwâ bwa pela o miba. 33Ka ba ma jakidě jâ ba valanidě membilě o mboka, ka bâ ba languwa beěhěpi be hamakidi; na o pělě ’a ba diyakidi na děvil tepě. 34Umbwakiyate, ka mboka yěhěpi ya valanidě ka lata na Jisus: o bâ ba yěněki Mâ, ba hâhâlâkidi Mâ, na, a věngěměke o betěbe beabu.
Trenutno odabrano:
Matyiu 8: BNG1895
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Published by the American Bible Society in 1895.
