Matyiu 6
6
1Bandamakiděni iha ja bwamu boanyu o boho boa bato iyěněně na bâ; oningě nonaně vâkâna wa pahiyeni mahomano o Hângw‘ ’anyu A didi o Hěvěn a jadi.
2Nandi oningě o haka bova boâvě, o lângâke ’heba bâ ka menoki ba hakě o ndabo ja Anyambě na o mehěngě, na ovaně nd‘ o ba ka bendwě na bato. Pâkwěpâkwě, Mbi vâki n‘ inyěni, na, ba na mahomano mabu. 3Ndi o âvě o haka bova, en‘ âvě ya ’měngwě e yowake nyanga ya en‘ ’âvě eyomi e hakě; 4na ovaně nd‘ o ivěně jâvě i ka diyě ’kutakuta: na Hângwě a yěněkě ’kutakuta Mâ mětě a ka homanaka ’vě o bwebwe.
5Oningě o kalakiya, o diyake ka menoki ba jadi: ikabojana ba tândâkândi o kaliya těmetěme o ndabo ja Anyambě, na o mani ma mehěngě, na ovaně nd‘ o bâ‐ba ka yěněně na bato. Pâkwěpâkwě, Mbi vâki n‘ inyěni, Ba na mahomano n‘ imabu. 6Ndi âvě, o âvě o ka kaliya, ngakiya o bědi ’âvě, wa diba jâmbě jâvě, na nâvě o ka kalakiya Hângwě a jadi ’kutakuta: na Hângwě a yěněkě ’kutakuta, A ka homanaka ’vě o bwebwe. 7Nd‘ oningě o kalakiyani, o timbakiyeni ndaga botimbakiya o naně, panika bato ba ha ’wě Anyambě: ikabojana ba piviyaki na ba ka yokwěndi na iyavidě ja ikaliya. 8O kwanaki bâni: ikabojana Hângw‘ ’anyu A yowuděte beanyu be vahakě ovaně o t‘ o uwi Mâni. 9Nandi, kalakiyani kakana: Hangw‘ ’ahu a jad‘ o Hěvěn, dina jâvě i diyake hole. 10Ipangiya jâvě i vake. Upango muâvě u hamake o he, ka m‘ u jad‘ oba. 11Věkě hwě o buhwa těkabo beja bea buhwa ka buhwa. 12Na, nâvě o ka iyakidě hwě mabe mahu panika hwě ho iyakidě ba hakě hwě bobe. 13O valakidě hwě o iyějudwě, ndi věngěkidě hwě o bobe: ikabojana ipangiya, na ngudi, n‘ ivenda be nd‘ ibeâvě. Aměn. 14Ikabojana, oningě o yiděngěni bato belemě beabu, Hângw‘ ’anyu a jad‘ o Hěvěn a ka yidě tepě ’nyěni. 15Ndi oningě o yiděni bato belemě beabu, Hângw‘ ’anyu a yide tepě ’nyěni belemě beanyu.
16Tepě, oningě o hindinakani, o diyakeni panika menoki ba boho boa ngěbě; ikabojana ba ulwakidi meoho meabu, na ovaně nd‘ o bâ‐ba ka yěněně na bato na ba hindinakandi. Pâkwěpâkwě, Mbi vâki n‘ inyěni, na, Ba na mahomano n‘ imabu. 17Nd‘ âvě, o âvě o hindinakě, hakiya mavulě o molo muâvě, na nâvě wa tuka boho boâvě; 18ovaně nd‘ âvě o ka měndě o yowaně na bato na o hindinakandi, ndi kabo na Hângwě a jadi ’kutakuta: na Hângwě, a yěněkě ’kutakuta, a ka homanand‘ âvě o bwebwe.
19O kumakiděni hik‘ ’anyu o he, o jadi na nyělělě na nyanga be jongolakidě, o meyibi me tubakě na meâ me ka ibaka: 20ndi kumakiděni hik‘ ’anyu o Hěvěn, o nyělělě na nyanga be ha jongolakidě, na o myibi me ha tubaka na meâ mya iba. 21Ikabojana o hik‘ ’anyu e jadi, melema meanyu me ka diya tepě ovoně. 22Bwe ya nyolo ndi dihâ: ndi oningě dihâ jâvě i tamwingě bwam‘, nyolo ’âvě yěhěpi e ka londi na bwe. 23Ndi oningě dihâ jâvě i diyingě bobe, nyolo ’âvě yěhěpi e ka londi n‘ ivititi. Ndi oningě bwe e di na nâvě ya b‘ ivititi, ivititi těvině vi ndi viněně. 24O ibě na moto a ka yâlě o dilě bahangwě babale: ikabojana a nd‘ a binaka umbâkâ, na mâ‐a tândâ upâkwě; tombe nonaně, vâkâna a ka bweyiděnd‘ umbâkâ na mâ‐a pějě upâkwě. Wa yâlěni o dilě Anyambě na Mamon. 25Ovaně nd‘ Umba‐mbi vâkě n‘ inyěni, na, O nakakeni eměnâ ’anyu, ibeanyu be ka jě, n‘ ibeanyu be ka mâtě; tombe na bea nyolo janyu ibeanyu be ka bâtě. Eměnâ e ibě wa na beja, nyolo wa n‘ ibâtâ? 26Umbwakiyateni lonâni la oba nyang‘ ’abu e ha liyaka, na lâ la benjaka, na lâ la kumakidě o mandabo; ndi Hângw‘ ’anyu a jad‘ o Hěvěn a bombakate lâ. O ’běni wa na lâ? 27Nja didi ’nyěni o jadi a didi a badaka ekulu bwaba ka hamba ’nâ o utě muaju na bonakaka? 28Ndi, o nakaka lě ni ’bâtâ nande? Hilakěteni manga ma ’hiki ka mâ‐ma tombwakě; maa haka ehavu, na mâ‐maa vihaka: 29ndi Mbi vâki n‘ inyěni, na, O věngě lě Sâlâmân n‘ ivenda jaju jěhěpi, au bâtâkudwě ka manga těkama. 30Ndi pě lě Anyambě, a bâtidě lě behavu bea ’hiki be jadi o buhwa, vakě bea tumbwě, a bâtidě ’nyěni wa, inyěni ba ikamidě ’hâlě? 31Ndi, o nakakeni, na, Ho ka ja lě nde? ndi, Ho ka mâtâ lě nde? ndi, Ho ka bâtudwě lě nande? 32(Ikabojana Betomba be vahakandi belombo těkabe): ikabojana Hângw‘ ’anyu a jad‘ o Hěvěn a te yowěngo na o ndini belombo těkabe beěhěpi na mala. 33Ndi vahakani o bohoboho ipangiya ja Anyambě na bwamu boaju: vâkâna belombo těkabe beěhěpi be ka badudwěndi ’nyěni. 34O nakakeni vakě; ikabojana vakě e ka naki belombo beaju mětě. Bobe boa buhwa bo kokango na boâ.
Trenutno odabrano:
Matyiu 6: BNG1895
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
Published by the American Bible Society in 1895.
