Nai Vakatekivu 16
16
Sa soli Ekari vei Eparama ko Serei, a sa sucu kina ko Isimeeli.
1IA ko Serei na wati i Eparama sa sega ni vakaluvea vua: a sa dua na nona vada, na kai Ijipita, a yacana ko Ekari. 2A sa kaya vei Eparama ko Serei, Raica, sa tarovi au ko Jiova meʼu kakua ni vakaluveni: mo laʼki curu mada vua na noqu vada;: deʼu na vakaivakawa vua. A sa vakarorogo vei Serei ko Eparama. 3A sa tini na yabaki sa tiko e na vanua ko Kenani ko Eparama, a sa qai kauti Ekari na nona vada na kai Ijipita ko Serei na wati i Eparama, a sa solia vei Eparama na watina me watina. 4A sa curu vei Ekari ko koya, a sa kunekune ko koya: ia ni sa raica sa; kunekune ko koya, sa qai beci e matana na nona marama. 5A sa kaya vei Eparama ko Serei, O sa ca e na ka kaʼu sa vakacacani kina: au a solia na noqu vada ki na loma-seremu; ia ni sa raica ko koya sa kunekune, au sa beci e matana: me lewai kedaru mada ko Jiova. 6A sa kaya vei Serei ko Eparama, Raica, na nomu vada sa tiko e ligamu; mo cakava vua na ka e vinaka vei iko. Ia ni sa vakararawataki koya ko Serei, sa drotaka na matana. 7A sa kunei koya ko koya na Agilose i Jiova mai na dua na mata-ni-wai mai na lekutu, io mai na mata-ni-wai e na sala ki Suri. 8A sa kaya ko koya, I Ekari, na vada i Serei, o sa lako maivei? o sa lako talega kivei? A sa kaya, Au sa drotaki Serei na noqu marama. 9A sa kaya vua ko koya na Agilose i Jiova, Mo lesu tale mada vua na nomu marama, ka vakamalumalumutaki iko vua. 10Sa kaya talega vua ko koya na Agilose i Jiova, Au na vakalevutaka vakalevu na nomu kawa, ka me kakua ni wiliki rawa e na vuku ni kena levu. 11Sa kaya talega vua ko koya na Agilose i Jiova, Raica, ko sa bukete, ko na vakasuouma talega na goneatagane, ia ko na vakayacana mada ko Isimeeli [A Kalou ena rogoca]; ni sa rogoca na nomu rarawa ko Jiova; 12ia ena tamata kila ko koya; a ligana ena via vakacacana na tamata kecega, kei na liga ni tamata kecega ena via vakacacani koya; ia ena tiko ko koya e na matadra na wekana kecega. 13A sa vakatoka ko koya na yaca i Jiova, ko koya ka vosa vua, O iko na Kalou sa raici au tiko: ni sa kaya, Eke tale niʼu a nanumi koya beka sa dauvakaraici au? 14O koya sa vakayacana kina na mata-ni-wai ko ya ko Pieri-leai-roi [Na mata-ni-wai i Koya sa bula, i Koya sa raici au]: raica, sa tiko e na maliwa kei Ketesa kei Pereti. 15A sa vakasucuma vei Eparama e dua na luvena tagane ko Ekari; a sa vakatoka ko Eparama na yaca ni luvena, ka vakasucuma vua ko Ekari, ko Isimeeli. 16A sa walusagavulu ka ono na yabaki i Eparama, ni sa vakasucumi Isimeeli vei Eparama ko Ekari.
Trenutno odabrano:
Nai Vakatekivu 16: FIJ1864
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
First full Bible in the Fijian language © British and Foreign Bible Society, 1864.