Chenesis 5
5
1Ilʋppak osh Alam isht‐atiaka isht annoa holisso hoke. Chitokaka yʋt hatak a̱ ikbi tuk nitak fehna ka̱ Chitokaka hak o̱ holba ho̱ ikbi tok.
2Nakni, micha tek itatuklo ho̱ ikbi tok; mihmʋt yukpali cha, tobʋt okla nitak makinli ho̱ hohchifo ha̱ Alam hochifo tok.
3Atuk o̱ Alam ʋt okcha̱yʋt ahanta tok afʋmmi tahlepa achʋfa cha, pokoli tuchina mʋt, ʋlla nakni ilap chohmi, micha ilap holba ho̱ tobachi tok; micha hohchifo ha̱ Selh hochifo tok.
4Atuk osh Selh a̱ tobachi hayʋt nitak ahanta kʋt afʋmmi tahlepa untuchina tok; micha ushi ʋhleha, micha ushetik ʋhleha ha̱ tobachi tok.
5Mihma nitak moma Alam ʋt okcha̱yʋt ahanta kʋt afʋmmi tahlepa chakkali cha, pokoli tuchina tok; atuk osh illi tok.
6Atuk o̱ Selh ʋt okcha̱yʋt ahanta tok afʋmmi tahlepa achʋfa cha tahlapi mʋt Enos a̱ tobachi tok.
7Atuk osh Selh ʋt Enos a̱ tobachi hayʋt afʋmmi tahlepa untuchina cha untuklo ho̱ okcha̱yʋt ahanta cha, ushi ʋhleha, micha ushetik ʋhleha ha̱ tobachi tok.
8Mihma nitak moma Selh ʋt ahanta kʋt afʋmmi tahlepa chakkali cha, auah tuklo tok; atuk osh illi tok.
9Atuk o̱ Enos ʋt okcha̱yʋt ahanta tok afʋmmi pokoli chakkali mʋt Kainan a̱ tobachi tok.
10Atuk osh Enos ʋt Kainan a̱ tobachi hayʋt afʋmmi tahlepa untuchina cha auah tahlapi ho̱ okcha̱yʋt ahanta cha, ushi ʋhleha, micha ushetik ʋhleha ha̱ tobachi tok.
11Mihma nitak moma Enos ʋt ahanta kʋt afʋmmi tahlepa chakkali cha tahlapi tok; atuk osh illi tok.
12Atuk o̱ Kainan ʋt okcha̱yʋt ahanta tok afʋmmi pokoli untuklo mʋt, Mahalaleel a̱ tobachi tok.
13Atuk osh Kainan ʋt Mahalaleel a̱ tobachi hayʋt afʋmmi tahlepa untuchina cha pokoli ushta ho̱ okcha̱yʋt ahanta cha ushi ʋlheha micha ushetik ʋhleha ha̱ tobachi tok.
14Mihma nitak moma Kainan ʋt ahanta kʋt afʋmmi tahlepa chakkali cha pokoli tok; atuk osh illi tok.
15Atuk o̱ Mahalaleel ʋt okcha̱yʋt ahanta tok afʋmmi pokoli hannali akucha tahlapi mʋt, Chalet a̱ tobachi tok.
16Atuk osh Mahalaleel ʋt Chalet a̱ tobachi hayʋt afʋmmi tahlepa untuchina cha pokoli tuchina ho̱ okcha̱yʋt ahanta cha, ushi ʋhleha micha ushetik ʋhleha ha̱ tobachi tok.
17Mihma nitak moma Mahalaleel ʋt ahanta kʋt afʋmmi tahlepa untuchina cha pokoli chakkali akucha tahlapi tok; atuk osh illi tok.
18Atuk o̱ Chalet ʋt okcha̱yʋt ahanta tok afʋmmi tahlepa achʋfa cha, pokoli hannali akucha tuklo mʋt Enok a̱ tobachi tok.
19Atuk osh Chalet ʋt Enok a̱ tobachi hayʋt afʋmmi tahlepa untuchina ho̱ okcha̱yʋt ahanta cha ushi ʋhleha micha ushetik ʋhleha ha̱ tobachi tok.
20Mihma nitak moma Chalet ʋt ahanta kʋt afʋmmi tahlepa chakkali cha, pokoli hannali akucha tuklo tok atuk osh illi tok.
21Atuk o̱ Enok ʋt okcha̱yʋt ahanta tok afʋmmi pokoli hannali akucha tahlapi mʋt Mehluselah ya̱ tobachi tok.
22Atuk osh Enok ʋt Mehluselah ya̱ tobachi hayʋt Chitokaka ya̱ ibanowʋt ahanta na afʋmmi tahlepa tuchina cha, ushi ʋhleha, micha ushetik ʋhleha ha̱ tobachi tok.
23Mihma nitak moma Enok ʋt ahanta kʋt afʋmmi tahlepa tuchina cha pokoli hannali akucha tahlapi tok.
24Micha Enok ʋt Chitokaka ya̱ ibano̱ho̱wa tok, atuk osh iksho tok: Chitokaka yʋt ishi tuk oka.
25Atuk o̱ Mehluselah ʋt okcha̱yʋt ahanta tok afʋmmi tahlepa achʋfa cha, pokoli untuchina akucha untuklo mʋt Lamek a̱ tobachi tok.
26Atuk osh Mehluselah ʋt Lamek a̱ tobachi hayʋt afʋmmi tahlepa untuklo cha, pokoli untuchina akucha tuklo ho̱ okcha̱yʋt ahanta cha, ushi ʋhleha micha ushetik ʋhleha ha̱ tobachi tok.
27Mihma nitak moma Mehluselah yʋt ahanta kʋt afʋmmi tahlepa chakkali cha, pokoli hannali akucha chakkali tok: atuk osh illi tok.
28Atuk o̱ Lamek ʋt okcha̱yʋt ahanta tok afʋmmi tahlepa achʋfa cha pokoli untuchina akucha tuklo mʋt ʋlla nakni yo̱ tobachi tok.
29Micha hohchifo ha̱ Noah hochifot, Ilʋppak osh Chihowah yʋt yakni ya̱ kalakshichi tuk ak o̱, pibbak na toksʋli a pilbʋsha pulla ka̱ pi hopohlʋla hi oke, achi tok.
30Atuk osh Lamek ʋt Noah ya̱ tobachi ha yʋt afʋmmi tahlepa tahlapi cha pokoli chakkali akucha tahlapi ho̱ okcha̱yʋt ahanta cha, ushi ʋhleha, micha ushetik ʋhleha ha̱ tobachi tok.
31Mihma nitak moma Lamek ʋt ahanta kʋt afʋmmi tahlepa untuklo cha, pokoli untuklo akucha untuklo tok: atuk osh illi tok.
32Mihma Noah hʋt afʋmmi tahlepa tahlapi tok: mihmʋt Noah hʋt Shem, Ham, micha Chafelh a̱ tobachi tok.
Trenutno odabrano:
Chenesis 5: CHH
Istaknuto
Podijeli
Kopiraj
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fhr.png&w=128&q=75)
Želiš li svoje istaknute stihove spremiti na sve svoje uređaje? Prijavi se ili registriraj
Published by the American Bible Society 1848-1886, reprinted 1913