မဿဲ 3
3
ဗတ္တိဇံယောဟန်ရဲ့ ဟောပြောဟှူကြောန်း
(မာကု ၁.၁–၈; လုကာ ၃.၁–၁၈; ယောဟန် ၁.၁၉–၂၈)
1အယ်ကာလမာ ဗတ္တိဇံယောဟန်ဟှာ ပေါ်လာဘီး ယုဒပြည် ကန္တာရမာ စဘီး ဟောပြောလေဟှယ်။ 2#မ ၄.၁၇; မာ ၁.၁၅“နောန်ဒရဂေ့ပါ။ ကောန်းဂန်နိုင်ငံတော်ဟှာ တည်ခါနီးနေဘီ!” ဆိုဘီး ကြေညာဟှယ်။ 3ပရောဖက်ဟေရှာယ ဟောပြောဟှားဇာဟှ
“ ‘ဘုရားသခင်ရဲ့ လမ်းဟှို ပြင်ဆင်ဟှားဂေ့!
လမ်းခရီးတော်ဟှို ဖ္လောန့်တန်းအောန် လောက်ဂေ့ပါ’
တောကန္တာရထဲမာ လူတယော့‑က် ကြွေးကြော်နေဟှယ်” ဆိုဇာဟှာ အယ်မူယောဟန်ဟှို ပြောနေဇာဖြစ်ဟှယ်။
4ယောဟန်ဟှာ ကုလားအုတ်ရဲ့ မွီးန လောက်ဟှားဟှူဝတ်န သားရေခါးဗတ်ဟှို ခါးမာပတ်ဟှားဘီး ကျိုင်းကောန်န တောပျားရယ်ဟှို စားလေဟှယ်။ 5အယ်ခီမာ ယေရုရှလင်ဗြို့၊ ယုဒပြည် တပြည်လောင်းန ယော်ဒန်မ္လစ်နားဟှ လူလေဟှာ ယောဟန်နားဟှို ရော့‑က်လာဂေ့ဘီး 6သူးနို့ရဲ့ ပြစ်လေဟှို ဝန်ခံဂေ့ဟှိကြောန့် ယော်ဒန်မ္လစ်မာ ယောဟန်အားဖြင့် ဗတ္တိဇံခံဂေ့ဟှယ်။
7 #
မ ၁၂.၃၄; ၂၃.၃၃ ဖာရိရှဲန ဇဒ္ဒုကဲလေလည်း ဗတ္တိဇံခံယူဟှို့ လာဂေ့ဇာဟှို ဗြင်ရခီမာ ယောဟန်ဟှ “ဝှေ့ မွီဗွေးမျိုးလေ၊ က္လရော့‑က်လာမယ့် ဘေးဒန်ဟှ လွတ်ဟှို့တွပ် နန်းနို့လေဟှို ဖယ်သူဟှ ဒိပေးလိုက်နူး။ 8နောန်ဒန ထိုက်တန်ဟှူ ကျင့်ဟှို ကျင့်ဂေ့။ 9#ယော ၈.၃၃အာဗြဟံဟှ နို့လေရဲ့ဖ ဖြစ်ဟှယ် ဆိုဘီး ပြောရောင်န နန်းနို့လေ ပြစ်ဒန်ဟှ လွှတ်လေ့မယ် ဆိုဘီး ထန်ဂေ့န။ နန်းနို့ဟှို ငါပြောမယ်။ ဘုရားသခင်ဟှာ အယ်က္လော့‑က်ခဲလေဟှနေဘီး အာဗြဟံရဲ့ မ္လေးမ္လစ်လေဟှို ဖန်ဆင်းနိုင်ဟှယ်! 10#မ ၇.၁၉သစ်ပန်လေရဲ့ ပြစ်လေနားမာ ကတ်ပထားဟှားကြောန့် သီးကောန်းဟှို သီးဘဲဟှူ သစ်ပန်တိုင်းဟှို ခွတ်ပစ်ဘီးဟှာ မီးထဲဟှို ပစ်ခ္လလေ့မယ်။ 11နန်းနို့လေ နောန်ဒရဟှူကြောန့် ငါဟှာ ရေန ဗတ္တိဇံပေးဟှယ်။ ငါ့နော့‑က်ဟှ ကြွလာဟှူသူဟှာ သန့်ရှင်းဟှူဝိညာဉ်တော်န မီးန နန်းနို့လေဟှို ဗတ္တိဇံပေးလေ့မယ်။ အယ်သူဟှာ ငါ့ထတ်ပိုဘီး ကီးမြတ်လေဟှယ်။ ငါဟှာ သူ့ရဲ့ ခေနပ်ကြိုးဟှို ခလွတ်ပေးဟှို့ဟှိုမှထိုက်ဟှ။ 12လတ်ထဲမာ ဗားပ္လာဟှို့တွပ် ဂေါဟှိုကိုင်ဘီး သူ့ဗားလန်းပ္လန်ဟှို ရှင်းလေ့မယ်။ ဂျောင်န ဗားလေဟှိုလည်း ဗားဂတ်ထဲဟှို ထဲ့ဘီးဟှာ ဗားဖျင်းလေဟှို သေနိုင်ဘဲဟှူမီးန ရှို့လေ့မယ်” ဆိုဘီး ယောဟန်ဟှ ဟောပြောလေဟှယ်။
ယေရှု ဗတ္တိဇံခံဟှူကြောန်း
(မာကု ၁.၉–၁၁; လုကာ ၃.၂၁,၂၂)
13အယ်ခီမာ ယေရှုဟှ ယောဟန်နားဟှို ဗတ္တိဇံခံယူဟှို့တွပ် ဂါလိလဲပြည်ဟှနေဘီး ယော်ဒန်မ္လစ်ဟှို ကြွလာလေဟှယ်။ 14အယ်ဘေမဲ့ ယောဟန်ဟှ “ကျွန်တော်ဟှာ ကိုယ်တော်နားမာ ဗတ္တိဇံခံယူရဟှို့ဇာဟှို ကိုယ်တော်ဟှာ ကျွန်တော်နားဟှို ကြွလာတော်မူဟှယ်လော” ဆိုဘီးဟှာ ဆီးတားလေဟှယ်။
15ယေရှုဟှ “တရားလေ အားလောင်းဂူဟှို ကူအောန် ကျင့်သင့်ဟှူကြောန့် ခု ခွမ့်ပေးပါ” ဆိုဘီး ပ္လန်ပြောတော်မူဟှယ်။ အယ်ကြောန့် ယောဟန်ဟှာ ဘောတူလေဟှယ်။
16ယေရှုဟှာ ဗတ္တိဇံခံယူဘီး ရေထဲဟှ ထလိုက်ဟှူန ကောန်းဂန်ဘောင် ပွမ့်ဟှားဘီး ဘုရားသခင်ရဲ့ ဝိညာဉ်တော်ဟှာ ချိုးငှတ်မျိုး ဆင်းလာဘီး ကိုယ်တော်ထတ်မာ နားလေဟှယ်။ 17#မ ၁၂.၁၈; ၁၇.၅; မာ ၁.၁၁; လု ၉.၃၅အယ်ဘီးန “အယ်သူဟှာ ငါနှစ်သက်မြတ်နိုးဟှူ ငါ့ရဲ့ ရှစ်သား ဖြစ်ဟှယ်” ဆိုဘီး ကောန်းဂန်ဘောင်ဟှနေ သံတော်ဟှို ကြားရလေဟှယ်။
Trenutno odabrano:
မဿဲ 3: NTDWB24
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
The New Testament in Dawei Language © The Word for the World International and The Dawei Bible Translation Committee, 2024.
