Luka 8
8
Yesu rapu wenanu menda para paisimiya ei
1Gupuma werepe nanere ongepusi aomare Yesu nipu mo andaa ree andanu raayo para pange mo enge enge andanu para pamuala ara Godena Ki Rambuao-aya Eina Epe Angele wenaalinu raayosi para la eiri pamisaya. Gupula ara mo ki laapo pereyoma angena laapopu alinu pange nipu rapu paisimiya.
2Gupuma ambala ririna monde koae remonu ralu rumboma wamo pu pange monde yainyanu wamo puma ma-epeaisaya wena mendapare pange Yesu rapu pamuaisimiya. Wena menda pange Makedala andasu para ipisaya wena nipuna bi Meariri, nipuna pu para koae remo kalele ki pereyaoma mendane kina laapopu remo ralu rumbaisaya wena, nipu rapu pange pamisaya. 3Gupuma mo Erodina anda andere-aisaya kalu ali menda nipuna biri Susa, nipuna werena bi Dioana, nipu mendaa au pisaya. Wena menda nipuna biri Susana pange wenanu menda paranumi Yesu para pange nipuna kou nane raluaisimiya alinu para pange olemolenu pange muni rapu alala pula ara rambamea eiri pamuaisimiya.
Wai alenu poae alina siapi angele lea ei
(Madiu 13:1-9; Maka 4:1-9)
4Wenaali andapupe ree anda menda menda para aoma epala puma wenaali andapu mombelisimiyandare Yesumi go siapi angele la alisaya.
5Ali mendame e mapu para wai alenu menda polameya mea ipuma epa randalea loma Yesumi gupi lisaya. Go wai alenuri e mapu para epa randalayapare mendane wainuri porana lopaya, lisaya. Go payapare mo porana lopaya einuri wenaalinuna angeme rambuarimiyapare yaanumi epa yokoma nameya, lisaya. 6Wai alenu mendaparenuri kananu wia lena mandaa lopaya, lisaya. Gupuma mendane wai alere opisayapare, go kana mandaa wisaya suri renge renge na-lisaya eimi opolame pi nono pumare kera waru na-pi kapuyoma ora komainyaripaya, lisaya. 7Wai alenu menda parare, mambo reke reke ae repana ae paranu lopaya, lisaya. Gupuma monde mambo reke reke ae repanasinu ae para lopaya eimiri mo repana rekenumi mambeaoma opapere ana na-paya, lisaya. 8Gupuma mo wai alenu menda parare epe suna randalapa lopoma opaya, lisaya. Mo epe suna lopaya wai alenuri gore epe rupa opoma kili komea komeamere gore kilinu ali ria supu ora maidala paya, lisaya. Go einu raayosi lo pereyoma lalore, gore gupi lisaya. Kale ayale deandare gore pangape, lisaya.
Yesumi siapi angelenu kama lisaya einuna ree lisaya ei
(Madiu 13:10-17; Maka 4:10-12)
9Yesuna kou nane raluaisimiya alinumi Yesu para angaa meala ara lalore, Go siapina ree naa la giae, lisimiya. 10Yesumi nimuna angele yango liada ara lalore, Godena Ki Rambuao-aya Lena kundiri pi einu nimi repara kone sialiminyayanda ambala walea.
Go peapare mo mendaparenu repara
siapi angelenumi komea loayo eiri nimumi andoma
pange angele pangoma kone na-winyayanda,
lisaya.
Mo wai alenu randalisaya alina siapi angelena ree Yesumi walisaya ei
(Madiu 13:18-23; Maka 4:13-20)
11Gupuma Yesumi nimu para lalore, Go siapi lalo einuna reere gurupa, lisaya. Monde wai alere Godena angele wi ei, lisaya. 12Mo mapu ree naini wai alenu lopea eiri, angele pangoaeme wenaalinu mandana aeme, lisaya. Go peapare ande Sadani ipuma ande angele nimuna pu para yoko muma nimumi go angele repara kone na-rulaoma rambami ei na-minyayanda go au puaya. 13Mo kananu wia lena lopaya eiri wenaali menda parame, Godena angele pangoma raname komoma midamepare ora pida ma-punyaoma na-midame. Nimumi pa riambo komea kone rulaoma la andala ei ipula dinare nimu lopala pimi. 14Monde mambo reke reke ae repana ae para lopisaya wai alenu mandare angele pangoma aeme wenaalinu mandayapare go suna kenda pe einu pange amo aunu pange go suna aunu repara kone rulao-aeme einumi nimu ma-koyao-aya pange nimuna kiliri na-porea.
15Mo epe alena lopaya wai alenuri angele pangoma irulo ripinyuma pange angele pangoma epe wenaalinu pu ma-irulaoma go au pa pa eiri puma nimumi kili edeme, lisaya.
Lamepa rala aya eiri na-kea puame
(Maka 4:21-25)
16Yesumi lala ara lalore, Ali mendame lamepa keoma badi rolea para na-suaya o ale mendame na-kea pua aya, lisaya. Go au na-piri mo lamepa suaya lena wenaali epa konda pambala pula ara pename andala pula peme rupa suaya, lisaya.
17Ale menda kundiripu wia lere kama nane penameyao epa wilia pange ale menda rorepalimi eiri paa na-penameyao ma-epeleme, lisaya.
18Gupuma pange nimimi angele pangoaeme rupa pange waru andoalepape. Akepeare mendame ale menda kone wiliandare gore nipu ora waru kone ma-sialimi, lisaya. Go peapare ali mendame ale menda kone na-wiliandare onge ei pange nipumi kone wi kone wili eiri pane mupalimi, lisaya.
Yesuna ama pange amenu nipuna angele wia ei
(Madiu 12:46-50; Maka 3:31-35)
19Gupuma Yesuna ama pange amenumi Yesu andola ipisimiyapare, nipu repara pope-na-lisaya. Akepeare wenaali andapupeme nipu ma-kopoliaisimiya.
20Go einare mendame Yesu para ipuma lalore, Nena ama pange nena amenu raayome nee andolame ipuma kama epa aeme, lisaya.
21Go einare Yesumi mo wenaali para mo alina angele yango liada ara lalore, Godena angele pangoma puaeme wenaalinuri na ama pange na amenu aeme, lisaya.
Yesumi pokiki andaai ma-loraisaya ei
(Madiu 8:23-27; Maka 4:35-41)
22Yapi mendame Yesu nipuna kou nane raluaisimiya alinu rapu puma kawaso mendana pua opasiaisimiya. Nipumi mo alinu para lalore, No ipa lee mone ree nane bainya, lisaya. Gore nimu pulu-aisimiya.
23Mo kawaso pulu-ainya Yesu nipu kawaso rupara u palisaya. Go gole wange wangepu pokiki ora andaai mo ipa lee kouna ipisaya. Go einare mo ipare kawaso rupara angulapape puma mo kawaso para rumbilisaya eimi mo kawaso rana mena kungiduame rapisaya. 24Go einare Yesuna kou nane raluaisimiya alinumi puma Yesu pua ma-rekoma lalore, Andaa Alio, Andaa Alio, naa rana mena ambia apo komalemanda, lisimiya. Gupuma Yesu nipu rekomare monde puri waru pale pokiki para pange mo ipa kaisa laapo para, Waa, loma lisayandare monde pokiki pange ipa momogo laapo laapona puri pereyoma ipame wala lewa lewa na-pula ara loraisipiya. 25Go au pisayandare Yesu nipuna kou nane raluaisimiya alinu para lalore, Nimina kone rulaeme einuri a para wimipae, loma angaa misaya. Go lisayandare mo alinumi paalame waru komala ara kone menda menda andapu wisimiya. Nimuna nimunale angele angele andapu waru lala ara lalore, Go aliri apiyapae, lisimiya. Nipumiri mo pokiki ipa momogo laapo para angele lande eina mo pokiki ipa momogo laapome nipuna angele pangoma lorapende, lisimiya.
Yesu nipumi koae remonu piri ali menda ma-epeaisaya ei
(Madiu 8:28-34; Maka 5:1-20)
26Gonde pokiki ma-pereyaomare Yesu pange nipuna kou nane raluaisimiya alinu rapu mo Gerasa andasu para kawasona puma opopaisimiya. Go Gerasa andasuri ipa lee one panare Galili andasu winyaloma mone pana wi andasu menda. 27Yesu nipumi mo kawaso minyapalaoma mo ipa ree nane pula ara koae remonu piri ali menda go ree anda para piruma nimu mandala ipisaya. Ora ambalande aya eiri ipuma ambia pangere nipuri aka na-korao-aisaya pange nipuri anda para na-ao-paluaisaya pange nipuri mo komoae alinu ma-suaisimiya apenda paranu ao-aisaya. 28Go alimiri Yesu andomare wi waru lala ara Yesuna ange para andainyaoma suna rulopisaya. Monde koae remo piri alimi wi andapu loma lalore, Yesuo, neere Gode su yaa laapo waruma alenda alendanu raayo Ki Rambuao-aya Godena Nakiae, lisaya. Neemere ni para ake au pulame pilipae, lama lisaya. Neeme ni para rendaa na-giapeae, lama konge lisaya. 29Yesumi mo koae remo para lala ara lalore, Neeme go ali gioma pope, lisayanda go alimi go angele nipu para lisaya. Rana andapu mo koae remome mo ali waru lu ria pamuaisaya. Naare raayome alinu menda parame waru andere-ala pumare seinipunumi nipuna ki ange ma-rongaoma siala puaisimiya. Gupisimiyaparere nipumi mo seinipunu rungulu pambala puma go koae remomere mo ali wenaali na-ao-pali weambi pi su paranu karu pamuaisaya.
30Gore Yesumi nipu para angaa meala ara lalore, Nena biri apiyapae, lisaya. One mone remonu waru andapu nipu rupara konda pambaisimiyandare nipumi go angele yango liada ara lalore, Na biri Andapuae, lisaya. 31Gore mo koae remonu raayome puri waru paloma ara Yesu kongeyala ara lalore, Naa mo koae remonu nimuna yanginu mulameya maisamba pimi para ambe na-rapape, lisimiya.
32Mo mena andapu so kana repara aisimiya menanu waru andapupe enda nala aisimiya. Gupuma monde koae remonumi Yesu para puri pale angele loma lalore, Naare mo menanuna lo rupara konda pambao pida pomonalae, lisimiya. Go lisimiyandare Yesumi mo remonuna lo rupara konda pambao pida pulupa, loma rapaisaya. 33Go einare mo koae remonumi monde ali minyapalaoma ande menanuna lo rupara konda pambala paisimiya. Gore ande menanu monde raida para pisukulalumboma ipa lee para lopoma ipa noma ande menanu raayore koma piraisimiya.
34Gupisimiyandare ande menanu andere-aisimiya alinumiri go pisaya ei andoma pongola paisimiya. Nimumi e mapuna aisimiya wenaalinu para pange ree anda para aisimiya wenaalinu para go pa lo, pua la eiri pamisimiya. 35Go einare mo wenaali raayore mo la eiri paisimiya angele pangoma monde ipa lee para ande pisaya aunu andola paisimiya. Gupuma nimu Yesu repara ipuma ande remonu piruma pu yokaisimiyande ali akanu maraoma Yesuna ange para epe rupa pirisaya ei andoma nimu raayosi paalame komisimiya. 36Gupuma mendapareme go einu andoma Yesumi pisaya einu wenaalinu menda para mo koae remo pirandepare ambiare wala Yesumi ma-epeaoma epe rupa aya, lisimiya. 37Gore mo Gerasa andasu wenaalinumi paalame komala ara Yesu para lalore, Neeme naa giaoma puae, lisimiya. Gore Yesumi go angele pangoma kawasona pua opasiaoma paisaya.
38-39Gupuma mo koae remonumi minyapalaoma paisimiya alimi Yesu para kongeyala ara lalore, Ni nee rapu banae, lisaya. Gupi lisayapare Yesumi mo ali wala rapada ara lalore, Nee nena anda nane wala lekeya puma Godeme nee para pande einu raayo wenaali raayo para pua la alape, lisaya. Go einare monde alimi mo nipuna ree anda nane pumare Yesumi nipu rambamea einu raayosi wenaalinu para pua la alisaya.
Diairasina wane pange wee pupuaisaya wena pange Yesumi ma-epeaisaya ei
(Madiu 9:18-26; Maka 5:21-43)
40Yesu mo kawasona piruma ipa lee mone ree nane wala lekeya paisayandare wenaali waru andapumi nipu ipisaya ei andoma raname waru komisimiya. Akepeandare mo wenaalinumi maisamba arimiyapare ipisayanda go au pisimiya. 41-42Go dinare mo para aisimiya Godena angele kuruaeme andana kalu ali komea nipuna biri Diairasi ipuma Yesu repara epa kongeyala ara nipuna ora komea ae nongosi nipuna kuni gipa ki laapo pereyoma angena laapo perele nongo reesi para komolame rapalale na anda ipuae, loma epa lora pisaya. Gupi lisayanda Yesu pula-ainyaloma monde wenaali andapupe mendane mendaneyame ipuma epa mombea ara Yesu ma-rekepealuame andae nono pisimiya. 43Go epa mombelisimiya wenaalinu rupara wena menda nipuna sumba andala pisaya naarena wee andapu pupuala pisaya wena menda aisaya. Go au pulu-ainyaloma kuni gipa ki laapo pereya angena laapo ora misaya. Yainya andoae ali andapumi mo wena mulamula alala-ainya pu rendaame waru komisimiya pange mo wenana muni raayore mulamula kamboaisayapare nipuna wee na-rungulisaya. 44Gupuma mo wename mo wenaalinu angalapuna pumare Yesuna kou nane puma nipuna aka kuni pua waraisaya. Goleme ande wee pupuaisaya ei perelisaya. 45Yesumi mo wenaalinu para angaa meala ara lalore, Niri apimi wararipapae, lisaya.
Gupuma wenaali raayome lalore, Naa menda na-wararima, lisimiya. Gupuma Pidame Yesuna angele yango liada ara lalore, Andaa alio, go wenaalinumi nee ma-kopaliaoma go ma-rekepea rekepea pimi eiri andomayapare niri apimi wararipapae, lale, lisaya.
46Go lisayapare Yesumi lalore, Akepeare ni rupara wia puri menda repara puandare mendame ni ora wararipae, loma lalo lisaya. 47Mo wena nipumi pande ei Yesumi anda siaripa ei andomare panga piralore ana na-pea kone suma pururumi koma eiri ipuma Yesuna ange rolo para epa rulopisaya. Wenaali ambunana lee rona ara mo wename Yesu para la alala ara Yesu waraya einare pange nipu wararipayandare nipuna yainya rana komea perelisaya ei la alisaya. 48Go einare Yesumi mo wena para lalore, Na waneo, nena kone rulale eimi nena yainya go gole ma-epeadale nena pu para kuma pulu-ainyaloma puae, lisaya.
49Yesumi go angele pa lala-ainya angele ma-pamuae ali mendame monde kalu alina anda nane aoma Diairasi para ipuma epa ara lalore, Nena nongore ora komandele, mo Waloaya Ali para pu rendaa andapu na-pape, lisaya.
50Go lisayapare Yesumi mo alina angele pangoma Diairasi para lalore, Paalame na-komape. Kone rulae au komea pilindare nena nongosi ora wala rekelea, lisaya.
51Yesu mo anda para opo paisaya naaremere anda ruparare menda ali na-pena lisayapare Pida, Dioni, Dieimusi pange mo nongona ara angi laapo komea Yesu rapu anda rupara pua konda pambaisimiya.
52Wenaalinu go para ara mo nongosina koma suaisimiya. Go einare Yesumi mo wenaalinu para lalore, Koma su ree andapu na-dapape, lisaya. Go nongosiri ora na-komeapare, pa u paliala ara peale, lisaya.
53Go ei pangoma mo nongosi ora komandepare da kone suma Yesu ero laoma giri laisimiya. 54Go lisimiyandare Yesumi mo wenaali raayosi kama nane ralu liisimiya. Go peapare Yesumi mo nongosina ki muma andapu wi lala ara lalore, Nongosio, rekae, lisaya. 55Goleme mo nongosi repara endoaya ei wala ipisayandare mo nongosi wala rekisaya. Gupuma Yesumi mo ara angi repara lalore Enda menda adapae, lisaya. 56Go ei andisimiyandare, mo nongosina ara angi laapo rungula mealo pamboma pomome komisipiyapare, Yesumi mo nongosina ara angi laapo para angele rendaa pimi lalore, Wenaalinu menda para go pi einu menda na-la adapape, lisaya.
Trenutno odabrano:
Luka 8: POLENT23
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
