Luka 12
12
Yayapi aunu pimi einu repara kingi angele lisaya ei
(Madiu 10:26-27)
1Gupuma wenaali ora andapupe komea lena mombelisimiya eimi mendana ange mandaa menda popala pisimiya. Gupuma go au pulu-ainyalomare Yesu nipumi nipuna kou nane raluaisimiya alinu para angele ambala lala ara lalore, Nimimi mo Parisi alinuna palawa ma-poyao-ae danga andere-alepape, lisaya. Go danganu lalo eiri yayapi aununa lala, lisaya. 2Mendame kundiri pilimi alenu pange kundiripu peme alenu raayore werepe nanere Godeme ora penameyo wadea, lisaya. 3Go einare nimi raayore Simi kundiripu piri dame angelenu, raayosiri ambuname go angele wala pangeleme, lisaya. Mo anda panda rupara nimina niminale pawasi kunuma piri pora po sioma deme angelenuri penameyao ambuname pangenaya deme, lisaya.
Gode para paalame komoaya ei
(Madiu 10:28-31)
4Gupuma Yesu nipumi lala ara lalore, Na andami wenaalinu neme nimi para angele menda la giano, lisaya. Nimimi do kama ma-koyademe repaa repara paalame na-komalepape. Akepeare nimumi werepe nanere go aunu pumare ale menda koae ei wala pape-na-ya, lisaya. 5Go einare neme nimi para paalame komola peme ali gonda lo wadoa, lisaya. Gode para paalame waru komalepape, lisaya. Akepeandare Gode nipumi ali menda lu ma-komomare werepe nane repana ralae para rapapere nipu puri wia, lisaya. Ee, neme nimi para ora angelenu la gialo, nimimi nipu komea paalame komeleme, lisaya.
6Yaa wesonuri mendane kipuri peni laaposina rapao-aemepae, lisaya. Ee. Go peapare Gode nipumiri go enge yaasi komea komeare kone na-rungulaoma andere-ao-aya, lisaya. 7Gupuma Gode nipumi nimina kaluna aya irisinu raayosi ambala yarepema kone wia, lisaya. Go einare paalame na-komalepape, lisaya. Akepeandare go yaasinu repara pange kone wiapare nimi reparare ora andapupe kone waru suaya, lisaya. Gupuma nimimi go yaasinu lu angulaeme, lisaya.
Yesuna ei o Yesu rapu yanda liale eina angele lee ei
(Madiu 10:19-20; 10:32-33; 12:32)
8Yesu nipumi lala ara lalore, Neme nimi para ora la gialo, lisaya. Ali menda apimi wenaalina lee angaana ara na bi pangawa deandare gore Alina Si neme Gode nipuna eindiolonu nimuna lee angaana ara go alina bi pangawande doa, lisaya. 9Go peapare ali menda apimi wenaalina lee angaana ara Yesu na-ande deandare Alina Si neme Godena eindiolonu nimuna lee angaana ara go ali pange ni na-ande, doa, lisaya.
10Ali menda apimi Alina Si para koae angelenu deandare Godeme go alina koae angelenu repara kone na-sula peapare ali apimi mo Epe Yaakopi Sipiridi para ero ero angelenu deandare Godeme nipuna koae angele lee einu repara kone andapupe suma na-kunalia, lisaya.
11Godena angele kuruaeme anda paranu nimi koda laluameya pilimindare o gapamani alinumi o andere-aeme alinumi nimi koda laluameya pilimindare nimimi nimina kalu pape polameya da peme angele na-waidapape, lisaya. 12Akepeare go naarena Epe Yaakopi Sipiridimi nimimi da peme angelenu nipumi wadea, lisaya.
Yesumi amo alenu repara rana komala eina siapi angele lee ei
13Mo wenaali andapu aisimiya wenaali angalapuna ali komeame reka ara Yesu para angele menda lala ara lalore, Waloale alio, na rana pe eiri neeme na ame para angele gurupa la alape. Saana apana moe alenu raayosi rikana rumaoma mendane ei nena meala ara mendane einu ni para ginya, la alape, lisaya.
14Gupi lisayanda Yesu nipumi nipuna angele yango liada ara lalore, Ameo, neme mo moe alenu niipi laapo para rumanoyanda ni puriri apimi giapae, lisaya.
15Nipumi nimu para angele menda lalore, Nimimi olemole raayona wee pambada einu para waru andere-alepape, lisaya. Akepeandare ali menda nipu ora amo ali waru alapeyapare golere nipuna ora endo-aya eiri nipuna wilia lenumi ana na-ma-palia, lisaya.
16Gupi lomare Yesu nipumi siapi angele menda mo alinu nimu para lala ara lalore, Ambaisena amo ali menda nipuna suna siaya e mapuna epe enda andapu waru mandu aripaya, lisaya. 17Mo amo alimi nipunale kone siala ara lalore, Neme enda waru andapu muma na endanu manduma siape anda diale ae, laya. Go einare ambiare nemere ora ake au pulayapae, kone siaya, lisaya. 18Go einare nipumi nipunale lalore, Neme go aunda pula, laya. Neme nina enda siape andanu raayosi lakipi pambomare neme anda andaai penu puperere pula, laya, lisaya. Go au pumare go pula andanu para neme nina laisi kilinu pange na olemolenu raayosi sula, laya, lisaya. 19Gupumare neme nina gole gupi doa. Ni yakili ayae, doa, lisaya. Neme nina epe alenda alenda raayosi werepe kuni gipa andapu nani waidape alenu raayosi wiae, doa. Enda pa suaya lena ara laapo laapolo meala komea komealo mealo puma nala paliala pula ara pupudengi na-ne pa go au pa pa eiri pola, kone siaya, lisaya. Go puma nipuna rana pi eina rupara ao-padua, kone siaya, lisaya. 20Go angele layapare Gode nipumi mo ali para lalore, Neere keyali ali, laya, lisaya. Ambia rimbale para nena naarele peredea, laya, lisaya. Monde nena amu paende alenu raayosiri apimi minyambaliayapae, loma angaa meaya, lisaya.
21Gupuma Yesu nipumi nipuna angele pereyada ara lalore, Go auri mo amo alenu amu puaeme wenaali repara go au pilia. Go peapare go amo alenu amu puaeme wenaalinuri Godemere nimu amo wenaalinu na-aeme, kone suaya, lisaya.
Gode para kone rulao-aya eina walisaya ei
(Madiu 6:25-34)
22Gupuma Yesu nipumi go kou nane raluaisimiya alinu para la alalore gupi lisaya. Go einare neme nimi para lalo nimimi nimi komapeya nola peme enda o nimina yamola peme akanu repara kone konenu na-sialepape, lisaya. 23Enda noaya eiri epeleapare nimina endoaya eiri ora ririna, lisaya. Gurupa pange aka yamola eiri epeleapare nimuna endoaya eiri ora ririna, lisaya. 24Yaanu kone sialepape, lisaya. Nimumi wai alenu menda na-poaeme pange e mapunu puma endanu na-manduaeme pange enda suaeme andanu pange menda na-eleme, lisaya. Go peapare Godeme nimu enda aloaya, lisaya. Go einare Godeme kone sialore, Yaanuri ora epeleapare wenaali raayore pumi ora waru komoma amo ale mandana aeme, kone suayo, lisaya. 25Nimimi go alenu repara kone wilimi eimi nimina go suna andoma aeme ei na-ma-andalu palimi, lisaya. 26Go onge alesi gole mandana na-pilimindare gore mo mendane einu repara akepa kone kone sialemepae, lisaya. 27Nimimi repana kilinu andalepape. Nimumi pupudengi na-noaeme pange akanu na-rambulu yamo-aeme. Go peapare neme nimi para la gialo. Kini Solomono nipuna amo alenu waru supayapare nipumi go palawasinuna do pakemi akanu komenda na-siaya, lisaya. 28Mo rilipunuri pa riambo komea ao-aeme. Ambia aomare ruliri mo kiruaeme. Go pape rilipunuyapare Godena epe aulao-aya. Godeme go rilipunu go au piliandare nimiri manda epe rupa na-andere-alia kone widamepae. Nimina kone rulaeme eiri ongeisiyana-ae, lisaya.
29Go eina koae kone siala ara naare raayosi nimina nola pele enda pange nola pele ipa laapo repara kone konenu na-sualepape, lisaya. 30Akepeare go auri ora Gode repara kone na-rulao-aeme wenaalinumi komea go suna ara go konenu wilimi, lisaya. Nena Apamere neere go lenuri ora meainya kone wia, lisaya. 31Go au na-piri nipuna Ki Rambuao-aya Ei komea kone sualepape. Gupuma nipumi go alenu pa gualia, lisaya.
Godena Aya Lena wia amo einuna walisaya ei
(Madiu 6:19-21)
32Gupuma Yesumi lala ara lalore, Na repaasio, nimimi paalame na-komalepape, lisaya. Akepeare nimina Apamere nipuna kone siala arare nipuna Ki Rambuao-aya Lena ara nipu rapu piri menda andere-aliminya kone wia, lisaya. 33Nena alenu raayosi yodo muma go mili kanare gore narali wenaali repara alape, lisaya. Gupuma na-kurupula pea muni pasu aisa puma mipapae, lisaya, Nimimi Godena Aya Lena na-ongeda pea epepe amo alenu amu pipape, lisaya. Akepeare Godena Aya Lenare pake noaeme alinu pange pa piri alenumi pange na-ma-koyalimi, lisaya. 34Akepeare nena pu romba raayo mo nena amo alenu wia para kone pualia, lisaya.
Pupudengi noae wenaalinumi leeme leeme puma andambalimi lea ei
35-36Yesumi angele lala ara lalore, Nimimi mo pupudengi noaeme alinumi nimuna kalu aliri ali mendame pena nongo lamu mea eina mena yawe napeyanda wala mena lomboma anda nane epenaya maisambao-aeme rupa mandanare nimimi nimina akanu ambala yamoma ara wedambi kewomare one mone aunu epelea einu lee opoma leeme leeme pualepape, lisaya. Go eina go kalu ali ipuma nipumi para lombape rupa mareandare lambi lambi diandare gore runane piri pupudengi noaeme wenaalimi ora go gole pora gape lombeleme, lisaya. 37Go peaparere go kalu ali wala lekeya ipumare mo nipuna pupudengi nao-ae alinumi u na-pali pa nipu maisambao pidimindare gore go pupudengi nao-ae alinuri yakili ae alinuae, lisaya. Neme nimi para ora angelenu la gialo. Nimumi go au pisimiyanda nimuna kalu alimi nipuna mandaa aka koyo suma nipuna pupudengi nae wenaalinu enda nenaya enda nape lena ma-piraoma nipumi enda nenaya enda pana palia, lisaya. 38Nipu wenaali u palia pea lena u rumu rumuna epeleapare mo nipuna pupudengi nao-aeme wenaalinu u na-pali pa maisiambo alimindare gore nimuri yakili ae wenaalinu, lisaya. 39Gurupa mandanare anda reali mendame nipuna anda mo pake noae ali menda go naarena epelea lo kone wiliandare nipumi mo nipuna anda lambema popapa-na-ya waru andere-alia, lisaya. 40Gurupa mandanare Alina Si Nakiri nimi kone maraoma pa alepae loma aliminya epeleale nimimi pange lee opoma leeme leeme puma waru andere-alepape, lisaya.
Epe rupa pupudengi noaisaya ali pange koae rupa pupudengi noaisaya ali laapona angele lea ei
(Madiu 24:45-51)
41Gupuma Pida nipumi Yesu para lalore, Realio, neeme go lale siapi angelere naa para komea lalepae, o wenaali raayo para lalepae, loma angaa misaya.
42Go einare Reali nipumi nipuna angele yango liada ara lalore, go lisaya. Gimi na-kome pange ora epe kone waru rekele pu suma pupudengi nao-ae aliri apiyapae, lisaya. Go pupudengi noae aliri mo anda realimiri mo nipuna anda andere-ainyaya pange mo nipuna pupudengi nao-aeme wenaalinu para nimuna endanu nenaya enda nape naare miliandare enda rali rali palia, lisaya. 43Nipuna kalu ali wala perekeya epeleapare mo pupudengi nao-ae alimi mo pape lea einu ora epe rupa piliandare gore go pupudengi nao-ae ali nipuri yakili au waru pilia, loma lisaya. 44Neme nimi para ora angelenu lalo. Mo nipuna kalu alimiri nipuna olemole raayosi ma-andere-ainya dea, loma lisaya. 45-46Mo pupudengi noae alimi nipuna gole lala ara nipuna kalu ali ambe na-ipulae deandare nipuna konemere, go au pula, kone wilia. Go kone suma nipumi mo pupudengi nao-aeme wenanu pange alinu raayosiri pa marea lu perere pilia. Go au piliandare pa marea nipumi enda ipanu no pilia. Gupumare nipumi koae ipa neleandare nipumi keari pamilia. Mongo aunu pula ara nipuna kalu ali epola pea naarele kone na-wi ainyalomare gore go ruparare nipuna kalu ali opola epelea, lisaya. Gupumare mo kalu alimiri go pupudengi nao-ae aliri komena lumare mo angele na-pange wenaali rapu komea para ainya dea, lisaya.
47Mo pupudengi nao-ae alimiri nipuna kalu alimi pape lea aunu kone suma nipumi nipuna gole analaoma na-puma nipuna kalu alimi lea aunu na-piliandare gore go aliri mo kalu alimi raki luma ora rendaa andaai nelea, loma lisaya. 48Go peapare pupudengi nao-ae ali mendamere nipuna kalu alimi pinyaya pea ei kone na-wiapare pa nipuna kone para epele au piliapare pu koyaliandare podeyape rupa mandana deandare gore nipu pange pa ongepusi podeyalia, lisaya. Go einare Godeme ali menda ale menda andere-ainyayanda muma ma-aliandare gore go alimi go ale epe rupa andere-ainya kone wia. Gupuma Godeme ali menda ale menda ora waru andapupe andere-ainyayanda muma ma-aliandare gore go alimiri go alenu ora epe rupa waru andere-ainya kone wia.
Yesu aisaya eimi wenaali ma-rekele rekele paya ei
(Madiu 10:34-36)
49Gupuma Yesumi lala ara lalore, Ni epe auri repana lengaa lopaoma neme go su kiduame epawa, lisaya. Gupuma na ranare go repana ambe reena kone sialo, lisaya. 50Nemere rendaa andaai napeya eimi na pu para ambe perelena ae kone sialo eimi koae kone wida, lisaya. 51Nimina konemere neme go suna wia rendaa rendaanu kuma ma-paluameya epawa, kone sialemepae. Dia. Niri wenaali ma-rekele paluame epawa, lisaya. 52Ambia ara kini pumare repaasi menda mendane kipu wenaali ala pilimindare nimuna golere rekele puma repomere laapo repara yanda liala laapomere wala repo repara yanda liala pilimi, lisaya.
53Aranumi wala sinu rapu yanda liala pilimi pange sinumi wala apanu rapu yanda liala pilimi. Nongonumi pange anginu rapu yanda pala pilimi pange anginumi wanenu rapu yanda pala pilimi. Wenanumi nimuna alinuna anginu rapu yanda dimi pange ayanumi nimuna sina werenu rapu yanda liala pilimi, lisaya.
One mone aunu pulu pea naarele kone siape angele lee ei
(Madiu 16:2-3)
54Yesu nipumi mo wenaalinu para lala ara lalore, Nimimi mo koaa no naare pambala nane masuyame ipula ei andoma ambala wangepu lalore, Yai epelea, lemendare gore ora epea, lisaya. 55Gupuma mo kewa su naneyame pokiki ipulandare nimimi lalore, Riripu ora piliae, lemendare gore riripu ora pea, lisaya.
56Nimiri yayapi aunu puaeme alinu, lisaya. Nimimiri go su andoma wala so yaa andoma pumare gore ambiare yai epelea o pani pilia lomare ambala apo andalemepare wala ambia go naarena pi eina reere akepeanda kone na-sialemepae, lisaya.
Yesumi ape yanda puma yanda ma-paliape eina angele walisaya ei
(Madiu 5:25-26)
57Gupuma Yesumi lala ara lalore, Niminale ora rupare goyana lo rali pi auri akepea na-puaemepae, lisaya. 58Ali mendame nee koda laluameya piliandare gore kodana ambe nape arare niipina golere ambe ma-epealepape. Neeme go au na-pilindare gore nipumi nee so angele rumao-aya ali repara yoloma puma nipumi punupi alinuna kina ma-alomare nee dipula anda para ma-piralia. 59Gupuma nee go para piruma mo angele rumao-aya alimi gurupame opisi kambadeandare ora peni komeasinu menda pa sula puapana keyoma kambo pereyaomare gore gurupa kama nane epele, lisaya.
Trenutno odabrano:
Luka 12: POLENT23
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
