Dioni 2
2
Kaena ree anda nane wena lami ei
1Naare reponare Galili nane ae andasu menda Kaena ree anda para ali komeame wena lamisaya. Go para Yesuna ama pange aisaya. 2Yesu pange nipuna kou nane raluaisimiya alinu pange mo wena lamisaya lena andola epenaya ipulupae loma wi lisimiya. 3Monde waini ipa menda na-pirinyale, no pereyaisimiyandare Yesuna amame nipuna naki Yesu para lalore, Ande waini ipare no pereyaoma menda na-pia, lisaya.
4Gupuma Yesumi nipuna ama para lalore, Wenao, na pula pea eiri neeme go pa go pa lo ni para na-de, lisaya. Na naarele ambe na-ipula, lisaya.
5Go angele lisayanda Yesu nipuna amamere mo pupudengi nae alinu para lalore, Nipumi dea angele pangoma pipape, lisaya.
6Kaname wari andaa ipa kenange su mindipu mo para wisaya. Mo Isaraelimi mandu rangala pae alinuna randepeape ei Rudule Angele pulameya mo ipapenu suaisimiya. Ipape rando rando mo andaa duramo runguli einu mandana suaisaya. 7Yesumi mo pupudengi nae alinu para lalore, Mo kana ipapena ipa no rumbia rumbia pipa, lisaya. Go lisayandare mo alinumi mo ipapenuna rumbia rumbia pisimiya. 8Gupi ei perelisayanda Yesumi Ialore, Mendane einuri kenange mendana yupima mo enda pambala reali para ma-pua adapa, lisaya. Go lisayanda mo ipa menda para yupima ma-puma alisimiya. 9-10Gupisimiyanda mo alimi mea na-andisayapare ora waini ipame andisaya. Mo alimiri go waini ipa yupilisimiya ei para kone na-wisayapare mo pupudengi nae alinumi kone wisimiya. Go eina nipumi mo wenana reali para wi la muma nipu para lalore, Alinu raayome waini ipa ora epele ei ambala ale ale puaeme. Gupuma mo enda nola ipuaeme wenaalimi waini ipa waru andapu nomare werepe nane mo engeisinda kole waini ipa ale ale puaeme. Gupuaemepare neeme ora epe waini ipare ongesinda sese puma siaomare ambia go ale ale pili, lisaya.
11Yesumiri mo Galili nane ae Kaena ree anda para nipuna wele kongapu pi ei go para ambala paisaya. Go para ara nipuna wele kongapu andayaya eimi penameyao walisayanda nipuna kou nane raluaisimiya alinumi nipu para kone rulaisimiya.
12Go ei perelisayandare werepe nane Yesu pange nipuna ama pange nipuna amana sinu nipuna amenu pange nipuna kou nane raluaisimiya alinu raayo Kapeneame ree anda para go andanu raayo para pumare go para naarele ongepusi aisimiya.
Yesu Gode repara alinau puaisimiya andaa anda para paisaya ei
(Madiu 21:12-13; Maka 11:15-17; Luka 19:45-46)
13Mo Isaraelimi mandu rangala pae wenaalinuna Pasopa enda pambape naare lombae pupa pope naarena, enda pambo sulame aisimiya dina Yesuri mo Diurusaleme ree anda para paisaya. 14Yesumi mo Gode repara alinau puaisimiya andaa anda rupara puma andisayapare alinu menda parame gawa sipisipi menanu, yaa malipumi ande yaanu, alinu menda parame kambenaya siamba pirisimiya ei pange alinu menda parame nimuna rapuluma manda piri muni ropanali pu pirisimiya ei pange andisaya. 15Nipumi kope rungulinu mumare ponga pimipi puma kundu warumare raayo kama penaloma gawa sipisipi menanu pange ralu liisaya. Mo muni ropanali pu pisimiya alinuna rapulumanu pange lakipima landelu rumbe rumbe puma nimuna muninu pange ma-koyo rumbepe pisaya. 16Gupuma mo malipumi ande yaanu siamba pirisimiya alinu para lalore, Go leenu mu ria, kama nane pulupa. Na Apana andare kambanali puaeme makedi anda au na-ma-lalepape, lisaya. 17Nipuna kou nane raluaisimiya alinumi mo Godena angele wape pea ei gurupa kone wisimiya.
Godeo, nena anda ma-epeala pe kone sialo eiri
na lo para repana manda rea loma wape pea.
18Mo Isaraelimi mandu rangala pae alinumi nipuna angele yango lialuame lora pula ara lalore, Go pili auri nena bi wi ei naa para wadoameyare puri pale auri ai pilipae, lisimiya.
19Yesumi nimuna angele yango liada ara lalore, Gonde Gode repara alinau puaisimiya andaa anda lakipidimindare neme koro repona wala ma-minyasiaoma ainya doa, lisaya.
20Mo alinumi lalore, Gonde Godena andaa anda pula-ainya kuni gipa ali ria laapo pereyoma mendane ki pereyoma mendane kina komeapu ambala pereyapare neemere koro reponale wala ma-minyasiaoma ainya doame lalepae, lisimiya.
21Go lisimiyapare Yesumi monde Gode repara alinau puaisimiya andaa andana angele lisaya eiri nipuna do para gole lisaya. 22Go eina Yesu komisayandare Godeme wala ma-rekaisaya naarena Yesuna kou nane raluaisimiya alinumi mo lisaya angele kone suma niminyaisimiya. Gupuma mo Godena angele wape pea ei pange Yesumi lisaya angelenu pange ora pangoma kone rulaisimiya.
Yesumi wenaali raayona kone, kone suaya ei
23Monde Pasopa lombae pupa pope enda pambisimiya dinare Yesumi mo Diurusaleme ree anda para ara nipumi puri waru pale einu wenaali waru andapumi andoma Yesu para kone rulaisimiya.
24Gupisimiyapare Yesumi wenaali raayo nimuna pu para kone wisimiya einu waru kone sumare mo wenaali para kone na-rulada ara nimu rapu na-ralisaya.
25Wenaalina pu para wi einu Yesumi waru andisaya eina, ali mendame wenaalinuna puaeme einu nipu para la alape-nae-lisaya.
Trenutno odabrano:
Dioni 2: POLENT23
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
The New Testament in Pole Language of the Southern Highlands. Revised Edition 2023 © Bible Society of Papua New Guinea, 2023.
The New Testament in Pole Language of the Southern Highlands © Bible Society of Papua New Guinea, 1993.
