Luku 24
24
Ia Tetuleghu Ka Zisas
Matiu 28:1-8; Maki 16:1-8; Zone 20:1-10
1Ghe ka ia toraina fufughona Sade, ira fotati dike hiori ira bosoboru dike va tanariro, dike lao ghu ka ia lianga. 2Maneri dike la fini ia ghahipa kakaputuna ia lianga, neto kusu pidu lao ghereme mo. 3Ka ia haghele laodi maneri, e deo gedi ke la finini ghu ia tinina ia Lod Zisas. 4Maneri dike toraina zea fafahakadi ma, ghinina heve mo neke age dufuna ka ia tinina Zisas. Ka fafata ianimu lama, dike to podolo ghidi ghu, palu mane ta va vona poko sodu ta puina pelara ghiho. 5Ira fotati dike maughedi fuludu, dike maimanihi hinae ghu pekani, kenudi mo. Ianimu tuna ghe dike notoho nga ira mane, “?Ne heve ghe no hadui nga ka giliona lianga ini, hei ia ta doli? 6!Manei e deo ge au ghu aiahi! !Manei to tetu leghu ka ia leme! ?E deo ma ngana laoimuna ghau heve neke va kahe ghini ghauo aianihi Galili, 7ghini ia Tuuna Noni mu, edi toraina age namaha seboi, edi nai laoi ghu ka ira kamedi ira mane ta auri sasake, mala tupila ghinina ka hekefalahata, ghe geke tetu leghu nga manei ka ia va litona ravata, neke ghuao?”
8Ka ianimu ghe, dike ngana leghui nga tuna neke kahe ghuana mamu ianimu manei. 9Ianimu tuna ghe dike leghu lao nga sipadina ka ia lianga, dike la va kahe ghidi ghu leghu irahi nga ira tazoi kaike nona mane nonomoho, nia ira keha noni haro, e ghua. 10Fotati dike laora ka lianga ani mu Mere tanina Magidala, Zoana, Mere ia nona uke Zemesi, nia keharani e ghua. Maneri dike turi vanadi ira mane nonomoho heve neke to dufuna, 11ghe taghe turi ta deo fafahakana ma neke ghua ka maneri, deo ma ghu gedi ke va hohoghonai ghu. 12Ne ghua mo ianimu ghe, Pita neke purudu lao ka ia lianga neke la mato ghu. Manei neke rorogho va rero haghele lao, ghe ira pipihana kakato ta lineni lama, neke finirira. Ianimu lama ke ghahe surana ka malauo neke ghua, deona geke va fafahaki ghu heve mo neke dufuna.
Zisas Ne Podolo Ka Ia Hangana Ta Lao Emeusi
Maki 16:12-13
13Ka ravata haro ianimu lama, keha palu ghu ka ira mane ta nonofoi Zisas, dike ghaghahe dike lao ghu ka ia rekahana malau Emeusi, tazoi kaike kilomita peghuruna Zerusalemu. 14Ka ia ghaghahe ta lao ghu, palu mane irahi dike turi ghidi ira vahina leghutau dike dufuro nga. 15Di turi nonogele ghidi ghu maneri palu leghutau irahi, to rizu namo lao ghu Zisas la tataniga ghaghahe taremehadi ta laona ghu gheremedi mo. 16Ghe maneri palu deo ghe gedi ke fini avohi ghu manei mu Zisas ta ghuana, vununa God deo geke va malumuri ghu ta fini avohina manei.
17“?Heve mu no nonogele ghinina ghau palu ka ta ghaghahe ta age ini ghu?” neke ghua ghidi Zisas.
Maneri palu dike to tetu nodo ma, fifini muko hihingodira ira hihilidi. 18Ianimu tuna ghe neke ungene tughu nga Kiliopasi, ia keha mane ka maneri palu ghu, “?Heve, agho lama ka ira noni aiahi Zerusalemu, no deona go nomohori ghu mu vahina leghutau neke dufuro nga, ka ravata tato fuludu age idi?” neke ghua ghini.
19“?Leghutau heve?” neke ghua notohona Zisas.
“Ira leghutau neke dufuro ka Zisas, ia manena Nazareti. Manei mu kaike mane porofeti, neke riva ghidiro ira hahaima ta namanama. Manei mu kaike mane vari va kakahei ta toraina mana ta va hesini God, nia ira noni haroharo, e ghua. 20Ghe ira hiama ta kenu, nia ira keha mane babatu e ghua, dike sakomo hioi dike va ghahe laoi ghu ka Paelati, mala va puhini ghu manei ta toraina mala atungina. Maneri dike tupila ghini ghu ka kaike hekefalahata. 21Rangerangena ka ghai mu, manei lama mu ia Mesaea neke mala hio va dolinio Isiraeli, nake ghua. To age lito ravata ghu ghatunaina mu, taniga ia dufudi leghu irahi nga. 22Keha fotatira ka ia nilehe ghai dike leghuio manei, dike torai lao fufugho ka ia lianga fufughono, dike meha turi ghini ghu ka ia leghu mehadi, kaike nonomoho ta fefereana fuludu. 23!Maneri dike kaheina mu, ia tinina neke deo ghini aianimu, nia ira engizeli dike finirio aianimu ka kaike hahaima dike kaheina mu, Zisas neto ke doli, dike ghua! 24Keha manera ka ghai dike kave lao mala la fininina, ghe neke hohoghona mamu neke deo ghinina ia tinina Zisas, taghe dike to kaheio lama ira fotati.”
25Ianimu tuna ghe, neke va kahe ghidi nga Zisas, “!Ghau mu torai noni kingomu ma! Ta torai mamarutana vanamu ini va hohoghonarira ira leghu dike kangavariro nga ira porofeti ka ira Kakangava Ta Maduana. 26?E deo baini gedi ke kusu kahe kenu va totonui ghu ira porofeti mu, ia Mesaea e age vavahagala ghidi vahina leghutau irahi nga, ghe ge age hagheli nga ia nona pelarana varanga, ia ta ghua?” 27Ianimu tuna ghe neke va kahe ghidi nga Zisas ira tuturi ka ira kakangava Mosese, nia ira leghu porofeti nga e ghua, va fafahakarira leghu neke kaheriro nga ka ira Kakangava Ta Maduana, ghininana taghonai.
28Di meha namo ghu maneri ka ia rekahana malau Emeusi ka ta mala lao ani maneri, Zisas taghe ta kabai ghahe fuludu lao neke ghua; 29ghe maneri palu dike papadi, kahe ghuana iahi, “Au taremehamai; ravata ini to age namo saighona nia neto vai nagoromo e ghua,” dike ghua ghini. Haghele lao tuna manei, la au taremehadira, neke ghua. 30Ka ia nohe hinae maneri ta mahai ghu, manei neke hioi kaike kamotona bereti tei, neke kudo vehai ghu God, ghe neke kipei nga, neke vanadi ghu. 31Selu laoi ma ianimu, to tobehe ghu ira hibadi, fini avohina Zisas. Nia ka fafata ianimu lama, to ke ogoro haro ghu manei.
32Kahe ghua tuna iahi dike ghua maneri palu, “?Ka sisitona va ghilara neke auno ka hihingoda idi ghita palu, ka ia fafata turi taremehada manei ka hangana ani, va fafahaka vanadana ira Kakangava Ta Maduana, ba heve?” 33Tetu vonadira lama, dito ke leghu lao ghu Zerusalemu, ka dike au varighararo ira tazoi kaike mane nonomoho, nia ira keha noni dike nonofoio Zisas, e ghua. Di la sabara ghu maneri, ia pukuna noni aianimu dike kahe ghua iahi ka maneri palu, 34“!Ia Lod neto ke toraina tetu leghu mamu! !Manei neto ke podolo ka Pita!” 35Ianimu tuna ghe, dike turi nga ira palu mane dike sipadiro Emeusi, ghinina neke podolo ghidio Zisas ka ia fafata ghaghahedi ka ia hangana, dike age fini avohio ghu ka ia kipei manei ia bereti.
Zisas Ne Podolo Ghidi Ira Nona Noni Ta Nonofoi
Zone 20:19-23; 1 Koriniti 15:5-8
36Dike turi ngama maneri palu, toke la tetu ghu torai taghonai Zisas ka ia vari hoataidi, kahe ghuana iahi, “Bule e au ka ghau.”
37!Ghe maneri haroharo dike age puina maughedi fuludu, vununa tarungana noni bana nga dike fininina, dike ghua! 38“?Ne heve ghe, no maughemu nga?” neke ghua notohonana manei. “?Ne heve ghe no ngana palupalu nga ka nganganamu nira, ghinaguna ara? 39Mato mehari kamegu, ghahegu idi, o fini ghu ta toraina ara hohoghonana mamu. !Posi mehau o toraina avohi ghu, ta deona ga tarungana noni ghu ara, vununa ira tarungadi noni mu, edika kuru tinidi ghu, taghe ta fini mehai ini ghau ka ara!”
40Ka ngengene ani manei, manei neke va fini ghidi ira kamena, nia ira tabalana ghahena. 41Maneri dike tetu ngana palupalu ngama, taremehana faa vanadi va manemanena nia nodi ferena e ghua. Ianimu tuna ghe neke notohori nga. “?Ne au ghau mo keha leghutau mala mahai aiahi?” neke ghua ghidi. 42Maneri dike vanani lao kaike birusuna namari hetana, 43neke mahaini ghu manei ka kenudi ari.
44Ianimu tuna ghe neke kahe ghua nga iahi Zisas, “Ka ia au taremehamu ara sepao, ara nake va kahe ghini ghau ta torai meha hohoghodira ghatu ira leghu neke kangavariro nga Mosese, ira porofeti, nia ka ira Samu e ghua, ghinaguna ara.”
45Tobeheri tuna neke ghua manei ira nganganadi haro, mala va fafahakarira maneri leghu Kakangava Ta Maduana irahi nga. 46Ke kahe ghua tuna iahi neke ghua manei, “Uve, sepaoni neke kangavi ghu mamu, ta torai mala vavahagalana, ta lemena ghu ia Mesaea, nia ke age tetu leghu tuna ka ia va litona ravata ta ghuana. 47Ka ia babaolona ghu manei, ia nonomohona taghuru kai sasake ta ke fihiki lao ghu ka God mala kai hazarira ira sasakedi mu, e toraina age tuturi beana ghini ka ira leghu soloso nga, tatanigaina aianihi Zerusalemu. 48Ghau o toraina mala kahe kaveri leghutau dike dufu irahi. 49Ara a tuhu agei ka ghau ghatu, ia Tarunga Ta Maduana neke naiungene ghinio nogu Mama. Ghe o auna aiahi Zerusalemu, e la vuhai meha ghu ia Tarunga Ta Maduana, va foudu ghauna ka ia mana sipa mehana fate.”
Ia Vonaleghu
Maki 16:19; Ira Riva 1:9
50Ianimu tuna ghe neke batu ghidi lao nga Zisas ira nona noni ta nonofoi aianihi Betani, neke va tuhu vonari ghu ira kamena ka kolangana fate, va beanarira. 51Ka neke va beanario lama manei, to hio vonai ma ghu ka kolangana fate, ghahe kairira. 52Va totoana ghini tuna dike ghua, ghe dike leghu nga Zerusalemu, faa vanadina va ghazaghaza. 53Leleghu fafata maneri edi au ka giliona ia Sugana God helahela ghinina God.
Trenutno odabrano:
Luku 24: kji
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© 2022, Islands Bible Ministries. All rights reserved.
