Jovane 13
13
O Isus thovol e sikadenđe pingre
1Angleder e Bare đivesa i Pasha, džanglja o Isus kaj avol o sato te načhol tare kava sveto ko Dad. O Isus dži o krajo sikavola kobor manđol kolen so preperen lese ke kava sveto. 2Avilo vreme za ki večera. O beng e Judase, e čhavese e Simonese o Iskariotsko, već čhuta ano ilo te izdajil e Isuse. 3O Isus džanglja kaj o Dad dija le sa o vlast ane vasta thaj kaj taro Dol iklilo thaj ko Dol iril pe. 4Uštilo tari večera, uljarda po ogrtači, lija o peškiri thaj phanglja pe lesa. 5Pale gova čhorda paj ano lavori thaj lija te thovol e sikadenđe pingre thaj te kosol len e peškiresa savesa phanglja pe.
6Kana avilo dži o Simon Petar, vov vaćarda lese: “Gospode! Tu li mingre pingre ka thove?”
7O Isus vaćarda lese: “So me ćerav akana tu ni džane, al jekh đive ka džane.”
8O Petar vaćarda lese: “Nikad tu ni ka thove mingre pingre!”
O Isus vaćarda lese: “Te ni thodem tut, našti ave jekh tare mingre.”
9O Simon Petar phenda lese: “Gospode, onda thov na samo mingre pingre, nego i mingre vasta thaj mingro šoro!”
10O Isus vaćarda lese: “Kolese savo si najardo, trubul te thoven pe samo lese pingre, golese so si leso telo sa thodo! Thaj tumen sen thode, al na savore.” 11O Isus džanglja ko ka izdajil le, pa golese vaćarda: “Naj sen savore thode.”
12Kana thoda lenđe pingre, čhuta pe peste o ogrtači, pale bešlo ke piro than pašo astali thaj pučlja len: “Džanen li so ćerdem tumenđe? 13Tumen man akharen Učitelji thaj Gospod thaj šukar vaćaren, golese kaj me sem gova. 14Te me, tumaro Gospod thaj Učitelji, thodem tumare pingre, tegani i tumen trubun te thoven jekh averenđe pingre. 15Dijem tumen primer i tumen gija te ćeren sar so me ćerdem tumenđe. 16Čače, čače vaćarav tumenđe: o kandino naj po baro taro piro gospodari, ni o bičhaldo naj po baro tare kova savo bičhalda le. 17Golese kaj kava džanen, blagoslovime sen ako gova ćeren.”
O Isus vaćarol tare leso izdajniko
18“Ni vaćarav savorenđe tumenđe. Me džanav kolen kas birisadem! Al trubul te pherdol gova so si pisimo ano Sveto lil: ‘Kova savo xal mangro mancar, iril manđe po dumo.’#13,18 Ano grčki ačhol: “vazdol piri patum pe mande”.
19Vaćarav gova tumenđe akana, angleder nego so ka avol, gija kana gova ka avol, te pačan kaj Me Sem. 20Čače, čače vaćarav tumenđe: ko primil kole kas me bičhalav, man primil thaj ko primil man, primil kole so man bičhalda.”
21Kana vaćarda kava o Isus, leso duxo sasa uznemirimo, golese putarde vaćarda: “Čače, čače vaćarav tumenđe: jekh tumendar ka izdol man.”
22Tegani e sikade dikhlje pe maškar peste, golese kaj ni džanglje kastar gova vaćarol. 23Jekh tare lese sikade, kas o Isus but manglja, bešlo pašo Isus. 24O Simon Petar dija le znako thaj vaćarda: “Puč le kastar gova vaćarol.” 25Kava so bešlo pašo Isus, nakhlo popaše paše leste thaj pučlja le: “Gospode, ko si gova?”
26O Isus phenda: “Kova kase bolav o mangro ano čaro thaj dav le.” Tegani bolda o mangro ano čaro thaj dija e Judase, e čhavese e Simonese o Iskariotsko. 27Kana o Juda xalja, o Satana ulilo ane leste.
Tegani o Isus lese vaćarda: “Gova so manđe te ćere, ćer akana.” 28Khoni kolendar so bešle lesa pašo astali, ni haljarda sose o Isus vaćarda lese gova. 29Golese so ko Juda sasa i kutija e parencar, nesave dije gođi kaj o Isus phenol lese te džal te ćinol khanči xamase paše Bare đivesa, il te dol khanči e čororenđe. 30Pale gova so o Juda xalja o mangro, iklilo sigate. A sasa rat.
Nevo zapovest
31Kana o Juda iklilo, o Isus phenda: “Akana ka proslavil pe o Čhavo e Manušeso thaj o Dol ka proslavil pe ane leste. 32Ako o Dol ka proslavil pe ane leste, o Dol le ka proslavil ane peste thaj ka proslavil le sigate. 33Čhavoralen mingralen, vadži zala ka avav tumencar! Ka roden man, al sar so vaćardem e jevrejskone šorutnenđe, gija akana vaćarav i tumenđe: ‘Kaj me džav, odori tumen našti aven.’ 34Nevo zapovest dav tumen: Manđen jekh avere. Sar so me mangljem tumen, gija i tumen te manđen jekh avere. 35Pale gova savore ka pindžaren kaj tumen sen mingre sikade, te isi tumen o manglipe jekh averese.”
O Isus vaćarol kaj o Petar ka odreknil pe lestar
36O Simon Petar pučlja e Isuse: “Gospode, kaj dža?”
O Isus vaćarda lese: “Kaj me džav, tu akana našti dža pale mande, al pale gova ka dža.”
37O Petar pučlja le: “Gospode, sose akana našti džav pale tute? Me tuće ka dav i mingro džuvdipe!”
38O Isus pučlja le: “Ka de ćo džuvdipe manđe? Čače, čače vaćarav tuće, angleder so ka đilabol o bašno, trin droma ka vaćare kaj ni pindžare man.”
Trenutno odabrano:
Jovane 13: GSP
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
