Aba Vatowo 29
29
Yakobo ina Padani Aram goi Reitiyeli ivaalobode tetelina
1Tuwo ibóbwara ikavava, itaoya, e aiyuwoina iketoiya. Iketoiya ima isowóduwo boda bomatu dadavina idi kasa goi. 2Go ikandobala náuna moteoina goi doelu igite. Doeluyana kikina goi sipi yauwo aito sikaaiyaka madi tomatakavatayao. Bogina kuyagoi. Doeluyana moe sipi adi bwae. E doeluyana tobuna aubodaina moe gurewa gagaina. 3Neta sipi madabokidi bogina silamgogoidi doeluyana goi, e adi tomatakavatayao sima gurewayana siliu sikaibale masigava goi siyato go, sipi sivanimdi. Sipi sinim ikavava, e gurewayana sikabi, tobuna sikaubodemnei.
4E tuwo Yakobo ibala ina tomatakavatayadi ilumadadedi idigo kana,
‘Segowo, komi nako korotoimi?’
‘Kai Karani korotoima’, tauyadi kaedi.
5Yakobo idigo kana,
‘Go Nakori tubuna Lebani kooyagoi o geya?’
‘U, kaayagoi’, tauyadi kaedi.
6Tuwo Yakoboyana idigo kana,
‘Manakae? Tauyana dedevina gea geya?’
‘U, dedevina. Kudobāla natuna Reitiyeli goamo. Tamana Lebani ina sipi imemedi’, tauyadi kaedi.
7E Yakoboyana idigo kana,
‘Kaga unana sipi komedi? Ame dine, níyala ivakaigaga go! Ame geya idi tuta kolamgogoidi sabamgo manuna. Tuwo kovanīmdi baige kokaluvilemnēidi konavēdi limou sikáika.’
8‘Geya. Nava kaatuyáwata ana kadókana sipi madabokidi kalamgogoidi, namlieta baige gurewa kaliu kakaibale, e sipi kavanimdi’, tauyadi kaedi.
9E nava sibobóbwara, Reitiyeli isowóduwo ima tamana ina sipi imedi. Bogina kuyagoi. Tauyana sipi ana tomatakavata. 10E tutayana Yakobo ikandobala Reitiyeliyana igite doiyana ina sipi imemedi, Yakobo anetava go, gurewa iliu ikaibale, sipiyadi ivanimdi. 11Ivanimdi ikavava, ibala ina Reitiyeli iyowoi go, mana uyáwana itáiya. 12E idigo kana,
‘Yau Yakobo, tamam osiyana, Ribeka natuna.’
Tuwo livalayana Reitiyeli inove, ilokoina ina tamana ilatuwoko. 13E tutayana Lebani vala inove bego doiyana Yakobo ima, e ilokoina ina ivalobode. Ivalobode, ivayavau nakae iyowoi. Ikavava, ime ina vada goi. Amoko goi Yakobo ivatétala, ana kaibako ivateteli. 14Tuwo Lebaniyana idigo kana,
‘Moitamo, kita boda tayamo, ikaikaida tayamo.’
Tuwo tukówana tayamo goi Yakobo doiyana taiyao sikaaiyaka.
Yakobo Reya be Reitiyeli iinaidi tetelina
15Sikaiyaka aaa, tuta tayamo Lebani doiyana ilatuwoko, idigo kana,
‘Moitamo kom osiyagu, tauna neta kom kupaisewa yau manugu, latuwogu aemaisim. Kulatuwokoigu aivina goi aemaisim?’
16Ego Lebani natunao vevina adi taiyuwo sikaaiyaka, botomoya yoina Reya, e bogomane yoina Reitiyeli. 17Reyayana vavina kubuunuwaina#29:17 Kubuunuwaina: Isileli tubunao niyadi goi kadi, ‘Reya matana kubuunuwaidi.’ Ame nakona livalakaibala bego tauyana kubuunuwaina. Tomota Reya matana sigitedi siyagoi ina sinapu tauna kubuunuwaina. go, ana gómana Reitiyeli vavina gumaboina toina. 18E Yakobo Reitiyeli igite nuwona ikabi toina, tauna Lebani ilatuwoko idigo kana,
‘Bei apaaisewa tala ainima aiyuwo goi go, kom am bogomane Reitiyeli kutagone anai.’
19E Lebaniyana idigo kana,
‘Dedevina. Bei avinim, govila ituli ta koroto ima ikabi inai. Tuwo yaigu goi kwaiyāka kupaaisēwa gobe avinim.’
20Tuwo moitamo tala ainima aiyuwo goi ipaaisewa bego Reitiyeli ikabi inai go, ina Reitiyeli yaina pasina ina nuwonúwana paisewayana moe tuta giyaina.
21Sikaaiyaka, sikaaiyaka, tala ainima aiyuwoyadi sikavava, e Yakobo doiyana Lebani ilatuwoko, idigo kana,
‘Natum kuvinīgu monegu bei taiyao katuyuwo. Guna tuta bogina alukavave.’
22Tuwo Lebani idi nai aikanina gagaina iwodugu go, toni kasa liliudi iduduwedi sima taiyao sikáika. 23Sikáika ikavava, vanuwo bogina isabamgo, Lebani natuna Reya ikabi inave Yakobo yaina goi bego taiyao simasisi, e moe bogina bei sinai. Kina go Yakobo ina nuwonúwana kana, ‘Reitiyeli bogina anai.’ Go Reitiyeli geya, go sem Reya taiyao simasisi, sinai!#29:23 Sinai: Isileli tubunao idi sinapu nai manuna ame nakae. Tonai vavina maisina ivamou go, imatakipola. Tamana ivakede ina tonai koroto ina yoyou parai. Tauna Yakobo geya iyagoiyeta ava vavina ikabi unana vavinayana maisina ivamou be nakae vanuwo bogina ikamamaníwana. 24Ego Lebani ina vavina yoina Silipa ikabi, Reya ivini bego kina ina pákwana. 25E Yakobo ma monena simasisi vanuwo itomo, Yakobo itaoya ikandobala Reitiyeli geya, go sem Reya igitebabane. Tuwo ina doiyana Lebani ilatuwoko idigo kana,
‘Ame kaga kuguinuwe yau yaigu? Manakae? Yau im paisewa apaisewe Reitiyeli manuna gea geya? Moitamo Reitiyeli manuna ae? Go kom kaga unana kwatubaugu?’
26Go kina Lebaniyana idigo kana,
‘Moe geya kai ima sinapu geya. Geya itoboineyeta bogomane igiminai. 27Go tuwo, om inuwa. Nai aikanina ame tauyana manuna taguinūwe wiki ame goi. Ikavava, bogomane avinim kunai go, kom tala ainima aiyuwo tuwaina kupaaisēwa manugu.’
28Tuwo moitamo nakae Yakobo itagona. E aikayana silukavave, Lebani natuna Reitiyeli ikabi, Yakobo ivini monena. 29Ego Lebani ina pákwana yoina Bila ikabi, Reitiyeli ivini ina pákwana. 30Tuwo Yakobo Reitiyeli taiyao simasisi sinai. E Reitiyeli imatakoiye gagaina namlieta Reya. Tala ainima aiyuwo tuwaina ipaaisewa Lebani manuna.
Yakobo natunao adi bíbina tetelina
31E tuwo sikaaiyaka, ikandosobu Reya igite ana matakoi giyaina, tuwo ina guinuwa goi Reya itoboine ikéuwama, go sem Reitiyeli ikágala. 32Tuwo moitamo Reya ikéuwama ivenátuna, natuna koroto. Tuwo idigo kana,
‘Yauwe guna kaiyakomou bogina igite. Nakona ame tutayana monegu bei imatakoiyegu.’
Moe pasina tauna natuna ivayou Rubeni.#29:32 Rubeni: Ame youyana Isileli tubunao niyadi goi ana taiyakeka nakae Yauwe guna kaiyakomou igite. Ana yagoina moe kugite, gómana koroto.
33Aiyuwoina ikéuwama, ivenátuna, natuna koroto, kana,
‘Yauwe itagona aavenátuna unana inove bego Yakobo geya imatakoiyeguta.’
Tuwo natuna ivayou Simioni.#29:33 Simioni: Ame youyana ana yagoina moe totaiyakeka.
34Sivatonina ikéuwama ivenátuna, natuna koroto, kana,
‘Nakona ame tutayana monegu bei ilokategu. Natunao adi taito bogina avini.’
Tuwo natuna ivayou Livai.#29:34 Livai: Ame youyana Isileli tubunao niyadi goi ana taiyakeka nakae ituyuwegu.
35Sivavasina ikeuwamako ivenátuna, natuna koroto, kana,
‘Ame tutayana Yauwe ayapaliye.’
Tuwo natuna ivayou Yuda.#29:35 Yuda: Ame youyana Isileli tubunao niyadi goi ana taiyakeka nakae yapali. Go Reyayana ivenatunaupa.
Trenutno odabrano:
Aba Vatowo 29: GVS
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
© 2019, Wycliffe Bible Translators, Inc. All rights reserved.