Luke 6
6
Na Taro me Baleta na Siga ni Vakacecegu
(Maciu 12.1-8; Marika 2.23-28)
1 #
Vrua 23.25
Ia e na dua na Siga ni Vakacecegu, sa lako ko koya e loma ni veiwere ni sila; a ra sa doloka na veisola ni sila na nona tisaipeli, a ra sa qilia e na ligadra ka kania. 2Ia ka so vei ira na Farisi sa kaya vei ira, “A cava dou sa kitaka kina na ka e sega ni tara me caka e na Siga ni Vakacecegu?” 3A sa vosa ko Jisu, ka kaya vei ira, “Dou sa sega beka ni wilika na ka oqo, a ka sa kitaka ko Tevita, ni sa viakana, ko koya kei ira sa tiko vata kaya. 4#Vsoro 24.9#1Samu 21.1-6Ni sa curu ko koya ki na vale ni Kalou, ka taura ka kania na madrai dauraici, ka solia talega vei ira era sa tiko vata kaya; ko ya sa sega ni tara me ra kania na tani sa tara duaduaga vei ira na bete?” 5A sa kaya vei ira ko koya, “Sa Turaga talega ni Siga ni Vakacecegu na Luve ni Tamata.”
Na Tamata Liga Mate
(Maciu 12.9-14; Marika 3.1-6)
6Ia e na dua tale na Siga ni Vakacecegu, sa curu ko koya ki na valenilotu, ka vakatavuvuli, ka sa tiko kina e dua na tamata sa mate na ligana i matau. 7A ra sa vakaraici koya ko ira na vunivola kei ira na Farisi, se na ia na veivakabulai e na Siga ni Vakacecegu, se segai, me ra kunea na ka me beitaki koya kina. 8Ia ka sa kila na nodra nanuma ko koya, ka kaya vua na tamata sa mate na ligana, “Lako mai, ka mai tucake tu e ke.” A sa duri cake ko koya, ka tucake tu. 9Sa qai kaya vei ira ko Jisu, “Au na tarogi kemudou e na dua na ka, sa tara beka me caka na ka vinaka e na Siga ni Vakacecegu, se na ka ca? Me ia na veivakabulai, se na veivakarusai?” 10Ia ni sa rai vakavolivolita vei ira kecega ko koya, sa kaya vua na tamata, “Dodoka mai na ligamu.” A sa kitaka vakakina. A sa vakabulai na ligana, ka sa vinaka me vaka na ligana kadua. 11Ia era sa cudru vakalevu sara, ka ra sa veivosaki vakai ira se cava me ra kitaka vei Jisu.
Sa Digitaki Iratou nai Apositolo ko Jisu
(Maciu 10.1-4; Marika 3.13-19)
12Ia e na gauna ko ya, sa lako ko koya ki na ulunivanua me masu, a sa masu tiko vua na Kalou e na bogi ka siga vaka.
13Ia ni sa siga mai, sa kacivi ira na nona tisaipeli ka sa digitaki iratou e lewe tinikarua mai vei ira, ka sa vakatokai ira me apositolo: 14o Saimoni, ko koya sa vakayacana talega ko koya mei Pita, kei Adriu na tacina, ko Jemesa kei Joni, ko Filipe kei Pacolomiu, 15ko Maciu kei Tomasi, ko Jemesa na luve i Alifio, kei Saimoni sa vakatokai na Gugumatua, 16ko Jutasa na taci Jemesa, kei Jutasa Isikarioti, ko koya sa solia yani.
Sa Veivakatavulici ka Veivakabulai ko Jisu
(Maciu 4.23-25)
17A sa lako sobu vata kei ira ko koya, ka tu e na buca, ka ra sa lewe vuqa sara na nona tisaipeli, kei na tamata era lewe vuqa sara mai Jutia taucoko kei Jerusalemi, kei na baravi kei Taia kei Saitoni, era sa lako mai me ra rogoci koya, ka me ra vakabulai talega mai na nodra mate; 18kei ira talega sa vakacacani ira na yalo velavela eso; a ra sa vakabulai. 19A ra sa vakatovolea kecega na lewe vuqa me ra tarai koya, ni sa taka mai vei koya na kaukauwa mana, ka vakabulai ira kecega.
Na Kalougata kei na Kalouca
(Maciu 5.1-12)
20A sa ta cake vei ira na nona tisaipeli, ka kaya:
“Dou sa kalougata na dravudravua,
ni sa nomudou na matanitu ni Kalou.
21 Dou sa kalougata koi kemudou sa viakana edaidai,
ni dou na vakamamautaki.
Dou sa kalougata koi kemudou sa tagi edaidai,
ni dou na dredre.
22 #
1Pita 4.14
“Dou sa kalougata ni sa cati kemudou ko ira na tamata, ni ra sa vakatatabui kemudou, ka vakasewasewani kemudou, ka vakarogorogocataka na yacamudou, e na vukuna na Luve ni Tamata. 23#2Vei 36.16; Caka 7.52Dou reki e na siga ko ya, ka rika e na marau. Raica, sa levu na kenai sau vei kemudou mai lomalagi; ni ra sa kitaka vakakina ko ira na nodra qase vei ira na parofita.
24 “Ia dou na kalouca, koi kemudou sa vutuniyau,
ni dou sa qai rawata na nomudou vakacegu.
25 Dou na kalouca koi kemudou sa mamau tu oqo,
ni dou na qai viakana mai.
Dou na kalouca koi kemudou sa dredre tiko edaidai,
ni dou na qai rarawa ka tagi.
26 “Dou na kalouca, ni sa vosavakavinakataki kemudou na tamata kecega! Ni ra sa kitaka vakakina ko ira na nodra qase vei ira na parofita vakailasu.
Na Nodra Lomani na Meca
(Maciu 5.38-48; 7.12a)
27 “Ia ka’u sa kaya vei kemudou sa rogoca, Lomani ira na nomudou meca, caka vinaka vei ira sa cati kemudou, 28vosa vinaka vei ira sa rukaki kemudou, ka masulaki ira sa vakalialiai kemudou. 29Kevaka e dua sa sabica na balumu e dua, vagolea talega vua nai karua, ka mo kakua ni bureitaka na nomu kote vei koya sa kauta tani na nomu sote. 30Ia mo solia vei ira kecega sa mai kerekere vei iko; ka mo kakua ni taroga tale na nomu i yau vei koya sa kauta tani. 31#Maciu 7.12Ia me vaka dou sa vinakata me ra kitaka vei kemudou na tamata, dou kitaka vaka talega kina vei ira.
32 “Ia kevaka dou lomani ira sa lomani kemudou, ko cei me vakavinavinaka vei kemudou? Ia ko ira na tamata i valavala ca era sa lomani ira sa mai loloma vei ira. 33Ia kevaka dou sa caka vinaka vei ira ga sa caka vinaka vei kemudou, ko cei me vakavinavinaka vei kemudou? Ni sa cakacaka vakakina ko ira na tamata i valavala ca. 34Ia kevaka dou sa solia me tauri mada vei ira ga dou sa vakanuinui me rawata tale mai kina, ko cei me vakavinavinaka vei kemudou? Ni sa solia ko ira talega na tamata ca vei ira na tamata ca, me ra rawata tale na ka e tautauvata. 35Ia mo dou lomani ira na nomudou meca, ka caka vinaka, ka dausolisoli, ka sega ni namaka me soli lesu tale mai e dua na ka. Ena levu kina na kenai sau vei kemudou, ia dou na qai luve i Koya sa Cecere Sara, ni sa yalovinaka ko koya vei ira era sa sega ni dauvakavinavinaka kei ira sa tamata ca. 36O koya mo dou qai yalololoma, me vaka sa yalololoma na Tamamudou.
Na Vakalewai Ira na Tani
(Maciu 7.1-5)
37 “Ia dou kakua ni daulelewa, dou na qai sega ni lewai; dou kakua ni dauveibeitaki, dou na qai sega ni beitaki. Mo dou dauveivosoti, ka dou na vosoti; 38mo dou dausoli, ka na soli vei kemudou. Nai vakarau vinaka, ka tabaki sobu, ka kureitaki vata, ka vuabale, era na soli ki na lomaseremudou. Ia na kenai vakarau dou sa vakarautaka, ena vakarautaki tale vei kemudou.”
39 #
Maciu 15.14
A sa tukuna talega vei ira ko koya e dua na vosa vakatautauvata: “E rawata beka na mataboko me tubera na mataboko? Erau na sega beka ni lutu ruarua ki nai keli? 40#Maciu 10.24,25; Joni 13.16; 15.20Sa sega na tisaipeli me uasivi vua na nona i vakavuvuli, ia ko koya yadua ni sa yaco me vinaka sara, erau na qai tautauvata kei na nona i vakavuvuli. 41Ia ka vakaevei ni ko sa raica na malamala e na mata ni wekamu, ka ko sa sega ni nanuma na kau sa tu e matamu? 42Se ko na kaya vakacava vua na wekamu, ‘Na wekaqu, laiva me’u leuta tani mada na malamala sa tu e matamu,’ ia ko sa sega ni kunea na kau sa tu e matamu? O iko na dauveivakaisini, mo cavuta mada eliu na kau mai na matamu, ia ko na qai raica vinaka mo leuta na malamala sa tu e na mata ni wekamu.
Na Kau kei na Vuana
(Maciu 7.16-20; 12.33-35)
43 “Ni sa sega na kau vinaka me vuataka na vua ca; se na kau ca me vuataka na vua vinaka. 44#Maciu 12.33Ni sa kilai na kau kecega e na vuana. Sa sega ni veti na lolo mai na wa-vakavotona, se veti na vua-ni-vaini mai na wa-gadrogadroa. 45#Maciu 12.34A tamata vinaka sa kauta mai na ka vinaka mai na lololo vinaka ni lomana, kei na tamata ca sa kauta mai na ka ca mai na lololo ca ni lomana, ni sa dau vosataka na gusuda na ka sa sinai vakalevu e na lomada.
E Rua na Dautara Vale
(Maciu 7.24-27)
46 “Ia ka vakaevei ni dou sa vakatokai au me ‘Turaga, Turaga,’ ka sega ni cakava na ka ka’u sa kaya? 47O koya yadua sa lako mai vei au, ka rogoca na noqu vosa, ka cakava, au na vakatakila vei kemudou na tamata erau sa tautauvata kaya. 48Erau sa tautauvata kei na tamata sa tara e dua na vale, a sa kelikeli vakatitobu ka tauyavutaka e na dela ni vatu. Ia ni sa yaco na waluvu, sa coka vakaukauwa na vale ko ya na dobui, a sa sega ni yavalata rawa, ni sa tauyavutaki e na dela ni vatu. 49Ia ko koya sa rogoca ka sega ni cakava, erau sa tautauvata kei na tamata sa tara e dua na vale e na dela ni qele ka sega na kena yavu. Ni sa coka vakaukauwa mai na dobui, a sa bale sara kina; ia na ka levu na kena rusa na vale ko ya.”
Trenutno odabrano:
Luke 6: FRV21
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
