Joni 4
4
Ko Jisu kei na Yalewa ni Samaria
1Ni sa qai kila na Turaga ni ra sa rogoca ko ira na Farisi ni sa lewe vuqa sa vakalotutaka ko Jisu ka papitaisotaka, ka lewe lailai ga ko Joni 2(ia sa sega ni veipapitaisotaki ko Jisu, ko ira ga na nona tisaipeli), 3a sa biuti Jutia ko koya, ka lako tale ki Kalili. 4A sa koto na nona sala e loma ni vanua ko Samaria. 5#Vteki 33.19; Josua 24.32Sa qai yaco ki na dua na koro mai Samaria, a yacana ko Saika, e voleka ki na tiki ni vanua sa solia ko Jekope vei Josefa na luvena. 6A sa tu mai kina nai keli-wai nei Jekope. Ni sa oca ko Jisu e na nona lako, sa mai tiko sobu e na bati ni keli-wai. A sa voleka na kenai kaono ni aua.
7Sa lako mai e dua na yalewa ni Samaria me taki wai. Sa kaya vua ko Jisu, “Solia mai vei au me'u gunu.” 8(Ni ra a lako yani na nona tisaipeli ki na koro me voli kakana.) 9#Esera 4.1-5; Nie 4.1,2Sa qai kaya vua na yalewa ni Samaria, “Ni ko sa Jiu, ko sa kerea vakacava vei au mo gunu, ni'u sa yalewa ni Samaria?” (Ni ra sa sega ni veiriti ko ira na Jiu, kei ira na kai Samaria.) 10Sa vosa ko Jisu ka kaya vua, “Kevaka ko sa kila nai solisoli ni Kalou, kei koya talega sa kaya vei iko, ‘Solia mai vei au me'u gunu,’ ko sa qai kerea vua, ka na solia vei iko ko koya na wai bula.” 11Sa kaya vei koya na yalewa, “Sa sega, saka, na nomu i takitaki, a sa titobu nai keli-wai. Ko sa rawata mai vei na wai bula oqori? 12Ko sa uasivi cake beka vei Jekope na tama i keimami, ko koya ka solia vei keimami nai keli-wai, ka gunu kina ko koya, kei iratou na luvena, kei na nona manumanu?” 13Sa vosa ko Jisu, ka kaya vua, “O koya yadua sa gunuva na wai oqo ena viagunu tale, 14ia ko koya sa gunuva na wai ka'u na solia vua, ena sega sara ni via gunu ka tawa mudu. Ia na wai ka'u na solia vua, ena tu e na lomana me mata-ni-wai sa tovure ki na bula tawa mudu.” 15Sa kaya vei koya na yalewa, “Solia, saka, mai vei au na wai oqori, me'u kakua ni viagunu, se lako mai ki ke me'u taki.”
16Sa kaya vua ko Jisu, “Laki kaciva na watimu, ka mo drau lako mai ki ke.” 17Sa vosa na yalewa, ka kaya, “Sa sega na watiqu.” Sa kaya vua ko Jisu, “Ko sa kaya dina, ‘Sa sega na watimu’; 18ni sa lewe lima na watimu eliu, ia ko koya drau sa tiko kaya oqo sa sega ni watimu. Ko sa vosa dina e na ka ko ya.” 19Sa kaya vei koya na yalewa, “Au sa qai kila, saka, sa dua na parofita koi kemuni. 20Era sa dausoro na neimami qase e na ulunivanua oqo, ia dou sa kaya, sa tu mai Jerusalemi na tikina e dodonu me da sokalou kina.” 21Sa kaya vua ko Jisu, “Yalewa, vakadinata na noqu vosa, ena lako mai na gauna dou na sega ni lotu kina vei Tamada, e na ulunivanua oqo, se mai Jerusalemi. 22Dou sa lotu vei koya dou sa sega ni kila; keimami sa kilai koya keimami sa lotu vua, ni sa tubu mai vei ira na Jiu nai Vakabula. 23Ia ena lako mai na gauna, a sa qai yaco mai, era na lotu vakayalo ka vakaidina vei Tamada ko ira sa lotu dina, ni sa qara ko Tamada me vakaoqo ko ira sa lotu vua. 24A Yalo na Kalou, ia ko ira sa lotu vua, e dodonu me ra lotu vakayalo ka vakaidina.” 25Sa kaya vei koya na yalewa, “Au sa kila ni na lako mai na Mesaia” (ko koya sa vakatokai na Karisito). “Ni sa tadu mai ko koya, ena tukuna vei keda na ka kecega.” 26Sa kaya vua ko Jisu, “Sai au ga sa qai vosa tiko vei iko.”
27A sa qai lako mai ko ira na nona tisaipeli. A ra sa kurabui ni rau sa veivosaki kei na yalewa, ia sa sega ni dua na tamata sa taroga, “A cava ko sa vakasaqara?” se, “Drau sa veivosaki kaya e na vuku ni cava?” 28Sa qai biuta na nona i takitaki na yalewa, ka lako yani ki na koro, ka kaya vei ira na tamata, 29“Dou lako mai, ka bau laki raica na tamata ka sa tukuna mai vei au na ka kecega ka'u a cakava. Sai koya beka oqo na Karisito, se segai?” 30A ra sa qai biuta na koro ka lako mai vua.
31Ia ni sa bera mai, sa qai cikevi koya ko ira na tisaipeli, ka kaya, “Vakavuvuli, mo kana mada.” 32A sa kaya vei ira ko koya, “Sa tu vei au na kakana me'u kania, dou sa sega ni kila.” 33Sa qai veitarogi ko ira na tisaipeli, “Sa dua li na tamata e kau kakana mai vei koya?” 34Sa kaya vei ira ko Jisu, “A qau kakana me'u kitaka na loma i koya sa talai au mai ka me'u vakaotia na nona cakacaka. 35Dou sa sega li ni kaya, ‘Sa vo e va na vula, me qai cava mai na yabaki?’ Raica, au sa kaya vei kemudou, dou ta cake, ka raica na veiwere, sa voleka ni matua na yabaki. 36Ia ko koya sa tamusuka sa saumi, ka binia na vuana ki na bula tawa mudu, me reki vata ko koya sa kaburaka kei koya sa tamusuka. 37A sa dina kina na vosa oqo, ‘E dua sa kaburaka, ia sa tamusuka e dua tale.’ 38Au a talai kemudou mo dou tamusuka na ka dou a sega ni cakacaka kina. Eso tani era a cakacaka, ia dou sa rawata na vua ni nodra cakacaka.”
39A ra sa le vuqa na kai Samaria e na koro ko ya era sa vakabauti koya e na vuku ni nona vosa na yalewa, ko koya sa vakatakila, “Sa tukuna mai vei au ko koya na ka kecega ka'u a cakava.” 40Ia ni ra sa lako mai vua ko ira na kai Samaria, era sa masuti koya me tiko ga kei ira, a sa tiko ga mai kea ka bogi rua. 41A ra sa lewe vuqa talega sa vakabauta e na vuku ni nona vosa. 42A ra sa kaya vua na yalewa, “Oqo keimami sa sega ni vakabauta e na vuku ni nomu vosa ga, ni keimami sa rogoca koi keimami, ka kila ni sai koya dina oqo na nodra i Vakabula na kai vuravura.”
43Sa oti na bogi rua sa lako tani ekeri ko koya, ka yaco ki Kalili. 44#Maciu 13.57; Mari 6.4; Luke 4.24A sa vakatakila ko Jisu, ni sa sega e dua na parofita sa dokai e nona vanua. 45#Joni 2.23Ni sa qai tadu mai ki Kalili ko koya, sa vakacegui koya ko ira na kai Kalili, e na vuku ni ra a raica na ka kecega sa kitaka ko koya mai Jerusalemi e na solevu, ni ra a lako talega ko ira ki na solevu.
Sa Vakabula ko Jisu na Luvei Koya nai Vakalesilesi
46 #
Joni 2.1-11
A sa lako tale mai ko Jisu ki Kena e Kalili, a koro sa vukica kina na wai me waini. Ka sa dua na turaga sa tauvi-mate na luvena mai Kapenaumi. 47Ni sa rogoca ko koya sa lako mai Jutia ko Jisu ki Kalili, sa lako vua, ka masuta me lako sobu ka vakabula na luvena, ni sa vakarau ciba. 48Sa qai kaya vua ko Jisu, “Kevaka dou sega ni raica eso na ka-mana kei na ka e veivakurabuitaki, dou na sega ni vakabauta.” 49Sa kaya vei koya na turaga, “Lako sobu saka mai, de mate mada na luvequ.” 50Sa kaya vua ko Jisu, “Lako yani; sa bula na luvemu.” A sa vakadinata na tamata na vosa sa kaya vua ko Jisu, ka sa lako yani ko koya. 51Ia ni sa lako sobu tiko, eratou sa mai tavaki koya na nona tamata, a ratou sa tukutuku vua, ka kaya ni sa bula na luvena. 52Sa qai taroga vei iratou ko koya na aua sa vakatekivu kina ko koya me bula cake. A ratou sa kaya vua, “Sa takali vei koya na katakata e na noa e nai kavitu ni aua.” 53A sa kila kina na tamana ni sai koya oqo na aua ka kaya kina vua ko Jisu, “Sa bula na luvemu.” A sa vakabauta ko koya, kei ira kecega na nona lewe-ni-vuvale. 54Oqo tale nai karua ni cakacaka-mana sa cakava ko Jisu ni sa lako mai Jutia ki Kalili.
Trenutno odabrano:
Joni 4: FRV21
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
