Joni 2
2
Na Vakamau mai Kena
1Sa bogi tolu sa qai caka e dua na vakawati mai Kena e Kalili, a sa tiko kina na tina i Jisu. 2A sa sureti ko Jisu, kei iratou talega na nona tisaipeli, ki na soqo ni vakawati. 3Ia ni sa oti na waini, sa kaya vei Jisu na tinana, “Sa sega vei ira na waini.” 4Sa kaya vua ko Jisu, “Yalewa, a cava vei iko kei au? Sa sega ni yaco mai na noqu gauna.” 5Sa kaya vei ira na tamata dauveiqaravi ko tinana, “A ka kecega sa kaya vei kemudou ko koya, dou kitaka.” 6Ia sa tu mai kina e ono na saqa vatu ni wai, sa dauvakasavasavataki ira kina ko ira na Jiu, sa tauyarua se tauyatolu nai vakarau. 7Sa kaya vei ira ko Jisu, “Vakasinaita na saqa ni wai e na wai.” A ra sa vakasinaita me vuabale sara. 8A sa kaya vei ira ko koya, “Dou qai takiva, ka kauta vua sa lewa na magiti.” A ra sa kauta. 9Ia ni sa tovolea na wai sa vuki me waini ko koya sa lewa na magiti, ka sa sega ni kila se sa mai vei (ia ko ira na tamata dauveiqaravi sa takiva na wai era sa kila), ko koya sa lewa na magiti sa kaciva na tagane sa vakawati, 10ka kaya vua, “A tamata yadua sa dautauca eliu na waini vinaka, ia ni ra sa gunuva vakalevu na tamata, sa qai muri na waini sa vinaka vakalailai ga. Ia ko iko, ko sa maninitaka na waini vinaka ka yacova na tiki-ni-gauna oqo.” 11Oqo nai vakatekivu ni cakacaka-mana sa cakava ko Jisu mai Kena e Kalili, ka sa vakaraitaka kina na nona i ukuuku; ka sa vakabauti koya ko iratou na nona tisaipeli.
12 #
Maciu 4.13
Ni sa oti oqo eratou sa lako sobu ki Kapenaumi, ko koya, kei na tinana, kei iratou na tacina, kei iratou na nona tisaipeli, a ratou sa sega ni bogi vuqa kina.
Sa Lako ki Valenisoro ko Jisu
(Maciu 21.12-13; Marika 11.15-17; Luke 19.45-46)
13 #
Lako 12.1-27
A sa voleka na nodra solevu ni Lako-sivia na Jiu, a sa lako cake ki Jerusalemi ko Jisu, 14a sa kunei ira e na vale-ni-soro era sa volitaka eso na bulumakau kei na sipi kei na ruve, kei ira sa veisau i lavo era sa mai tiko. 15Ia ni sa cakava oti e dua na kuita wa qaliqali, sa vakasavi ira kecega mai na vale-ni-soro, kei na sipi, kei na bulumakau. A sa sovaraka yani na nodra i lavo era sa veisau i lavo, a sa mani vukica na nodra tepeli. 16A sa kaya vei ira sa volitaki ruve, “Kauta tani na veika oqo! Kakua ni cakava na vale nei Tamaqu me vale ni veivoli.” 17#Same 69.9A sa nanuma ko iratou na nona tisaipeli ni sa volai, “Sa kani au na lomakatakata ni nomuni vale.”
18Sa qai vosa ko ira na Jiu, ka kaya vua, “A cava nai vakatakilakila ko sa vakatakila vei keitou, ni ko sa kitaka na veika oqo?” 19#Maciu 26.61; 27.40; Mari 14.58; 15.29Sa vosa ko Jisu, ka kaya vei ira, “Dou talaraka na vale oqo, ka'u na qai tara vakaoti e na bogi e tolu.” 20Era sa qai kaya na Jiu, “A vale-ni-soro oqo sa vasagavulu ka ono na yabaki ni sa tara tiko, ia ko na tara vakaoti li e na bogi e tolu?” 21Ia na vale sa vosataka ko koya, na yagona ga. 22Ni sa qai tucake tale mai na mate ko koya, sa nanuma ko ira na nona tisaipeli ni sa tukuna vei ira ko koya na ka oqo; a ra sa vakadinata kina nai Vola Tabu, kei na vosa sa kaya ko Jisu.
Sa Kila na Tamata Kece ga ko Jisu
23Ia ni sa tiko ko koya mai Jerusalemi, ni sa ia tiko na solevu ni Lako-sivia, sa lewe vuqa era sa vakadinata na yacana, ni ra sa raica na veika-mana sa cakava ko koya. 24A sa sega ni vakararavi vei ira ko Jisu, ni sa kilai ira kecega, 25a sa sega ni yaga vua me dua me vakatakilai ira na tamata, ni sa kila ko koya na ka sa tu e na loma ni tamata.
Trenutno odabrano:
Joni 2: FRV21
Istaknuto
Podijeli
Kopiraj
Želiš li svoje istaknute stihove spremiti na sve svoje uređaje? Prijavi se ili registriraj
